Nehemia 2 - BAIBLO ALOO NGMAMI KLƆUKLƆU Ɔ

Nehemia ya Yerusalem

¹ Nyɔhiɔ eywiɛ se, ligbi ko benɛ Matsɛ Artaherhes ngɛ ní yee ɔ, i ngɔ wai ya ma e hɛ mi, nɛ i wo dã a ha lɛ. E nɛ ye hɛ mi nɛ pee mɔbɔmɔbɔ kaa ja hyɛ,

² lɔ ɔ he ɔ, e bi mi ke, “Mɛni he je o hɛ mi pee mɔbɔmɔbɔ kikɛ nɛ ɔ? Pi hiɔ nɛ o ngɛ nue; i na kaa o bua jɔɛ.” Kɛkɛ nɛ sawale nu mi,

³ nɛ i he nɔ ke, “Nɛnɛ, o yi nɛ na wa daa! Mɛni he je e sɛ kaa ye hɛ mi nɛ pee mɔbɔmɔbɔ, be mi nɛ ma nɛ a pu ye nɛmɛ ngɛ mi ɔ ku kɛ pueɔ si, nɛ la sã agbo ɔmɛ ɔ?”

⁴ Matsɛ ɔ bi mi ke, “Mɛni ji nɔ́ nɛ o ngɛ hlae?” I sɔle nɛ i bi Mawunɛ ngɛ hiɔwe ɔ gbi,

⁵ kɛkɛ nɛ i de matsɛ ɔ ke, “Nɛnɛ, ke e sa o hɛ mi, nɛ o suɔ kaa o ma ha mi nɔ́ nɛ ma bi mo ɔ, lɛɛ ha ma ya Yuda zugba a nɔ ngɛ ma mi he nɛ a pu ye nɛmɛ ngɛ ɔ, konɛ ma ya ma ma a ekohu.”

⁶ Matsɛ ɔ kplɛɛ nɔ́ nɛ i bi lɛ ɔ nɔ; jamɛ a be ɔ mi ɔ, manyɛ ɔ hii si ngɛ e kasa nya. Matsɛ ɔ bi mi be nɛ ma ya ye, kɛ be nɛ ma kpale kɛ ba; nɛ i de lɛ.

⁷ Jehanɛ i kpale bi matsɛ ɔ ke e ha mi womi kɛ ya ha amlaalo ɔmɛ nɛ ngɛ Yufrate pa a bonyoku je zugba a nɔ ɔ, konɛ a ha mi blɔ kɛ gu a zugba amɛ a nɔ kɛ ya Yuda zugba a nɔ.

⁸ I bi hu ke a ha mi womi kɛ ya ha Asaf, nɔ nɛ hyɛɛ matsɛ ɔ hue ɔmɛ a nɔ ɔ, konɛ e ha mi tso nɛ ma kɛ kpɛ agbohi ha mɔ ɔ nɛ ngɛ Yawɛ we ɔ kasa nya a, kɛ gbogbo nɛ a fia kɛ bɔle ma a, kɛ imi nitsɛ ye we nɛ ma hi mi ɔ. Mawu ngɛ ye se, lɔ ɔ he ɔ, matsɛ ɔ ha mi níhi nɛ i bi lɛ ɔ tsuo.

⁹ Matsɛ ɔ ha mi asafoatsɛmɛ, kɛ okpɔngɔ ta buli komɛ nɛ a bu ye he kɛ hia blɔ kɛ ya Yufrate pa a bonyoku je. Benɛ wa su lejɛ ɔ, i ngɔ matsɛ ɔ womi ɔmɛ ngɔ ha amlaalo ɔmɛ.

¹⁰ Se benɛ Sanbalat nɛ je Bet Horon, kɛ Tobia, ma ní tsulɔ ko nɛ je Amon zugba a nɔ ɔ nu kaa nɔ ko ba nɛ e ba ngɛ nɔ́ kpakpa hlae ha Israel bi ɔmɛ ɔ, e dɔ mɛ wawɛɛ nitsɛ.

¹¹ I ya su Yerusalem, nɛ i ye ligbi etɛ ngɛ lejɛ ɔ.

¹² Se i de we nɔ ko nɔ ko nɔ́ nɛ Mawu ngɔ wo ye mi ke ma pee ɔ. Nyɔ mi kɔ̃kɔ̃ɔ̃kɔ̃ ɔ, i te si, nɛ i kɛ ye nyɛmimɛ ɔmɛ bɔɔ pɛ je kpo. Wa ngɔɛ lohwe ko kɛ yɛ, ja teji nɛ i hi nɔ ɔ pɛ.

¹³ Nyɔ mi ɔ nɔuu ɔ, i gu Kɔ̃ Agbo ɔ nɛ ngɛ bonyoku je ɔ mi kɛ je kpo kɛ gu Ogbetee Vu ɔ nya kɛ ya su Dwɔmi Agbo ɔ he. I hyɛ bɔ nɛ Yerusalem gbogbo ɔmɛ ngɛ ha, bɔ nɛ a ku kɛ pueɔ si, kɛ bɔ nɛ a kɛ la sã agbo ɔmɛ.

¹⁴ Jehanɛ, i po mi kɛ je ma a beleku je kɛ gu omleyi je ngɛ he nɛ Nyu Vu Agbo ɔ, kɛ Matsɛ Taku ɔ ngɛ ɔ. Akɛnɛ lohwe ɔ nɛ i hi nɔ ɔ nɛ́ blɔ nɛ e kɛ be ngɛ lejɛ ɔ he je ɔ,

¹⁵ i gu Kidron pa a kɔ̃ ɔ mi kɛ ya hyɛ ma a gbogbo ɔ. Kɛkɛ nɛ i kpale ye se kɛ gu jamɛ a blɔ ɔ kɛ̃ kɛ gu Kɔ̃ Agbo ɔ mi kɛ ba ma a mi.

¹⁶ Ma ní tsuli ɔmɛ ekoeko li kaa i je kpo kɛ ya pee nɔ́ ko. Kɛ ba su be nɛ ɔ mi tsuo ɔ, i de we nɔ ko nɔ ko nɔ́ ko. Ye nyɛmimɛ Yuda bi ɔmɛ, osɔfo ɔmɛ, ma nimeli ɔmɛ, ma ní tsuli ɔmɛ, kɛ nihi nɛ ma tsu ní ɔ li nɔ́ nɛ ya nɔ nɛ ɔ he nɔ́ ko.

¹⁷ Lɔ ɔ he ɔ, jehanɛ i de mɛ ke, “Nyɛ nitsɛmɛ nyɛ na haomi mi nɛ wa ngɛ, bɔ nɛ Yerusalem pee ma doku, nɛ a sã agbo ɔmɛ! Nyɛ ha nɛ waa fia Yerusalem gbogbo ɔmɛ ekohu, konɛ wa zo ɔ nɛ je.”

¹⁸ Lɔ ɔ se ɔ, i sɛɛ mɛ bɔ nɛ Mawu nyɛɛ ye se, nɛ́ e piɛ ye he, kɛ nɔ́ nɛ matsɛ ɔ de mi ɔ. A he nɔ ke, “Nyɛ ha nɛ wa bɔni gbogbo ɔ fiami!” Kɛkɛ nɛ a je ní tsumi kpakpa nɛ ɔ sisi nɔuu.

¹⁹ Se benɛ Sanbalat nɛ je Bet Horon, Tobia, ma ní tsulɔ ɔ nɛ je Amon zugba a nɔ, kɛ Arabia no ɔ nɛ a tsɛɛ lɛ Geshem ɔ nu he ɔ, a muɔ wɔ, nɛ a ye wa he fɛu, nɛ a de ke, “Mɛni sane nyɛ ngɛ yee nɛ ɔ? Nyɛ ma tsɔ matsɛ ɔ hɛ mi atuã lo?”

²⁰ I he nɔ ke, “Mawu nɛ ngɛ hiɔwe ɔ ma ha wa maa ye manye. E tsɔli ji wɔ, nɛ wa ma bɔni gbogbo ɔ fiami. Nyɛɛ lɛɛ nyɛ be blɔ nya ko, loo weto ní, loo kaimi nɔ́ ko ngɛ Yerusalem.”