Nehemia 13 - BAIBLO ALOO NGMAMI KLƆUKLƆU Ɔ

A je nibwɔ ɔmɛ kɛ je a kpɛti

¹ Benɛ a ngɛ mlaa a kanee, nɛ ma a tsuo ngɛ tue bue ɔ, a na he nɛ a ngma ngɛ ke a ko ngmɛ Amon no, loo Moab no ko blɔ nɛ e ba futu Mawu ma a mi bi ɔmɛ kɔkɔɔkɔ ɔ.

² A wo mlaa nɛ ɔ, ejakaa benɛ Israel bi ɔmɛ je Egipt kɛ ma a, Amon bi ɔmɛ, kɛ Moab bi ɔmɛ ha we mɛ niye ní nɛ a ye; nyu tete po a ha we mɛ nɛ a nu. Nɔ́ nɛ a pee mohu ji kaa a ya bɔ Balaam apaa ke e ba gbiɛ Israel. Se wa Mawu ɔ plɛ gbiɛmi ɔ kɛ pee gbaami.

³ Benɛ ma a nu mlaa a nɛ a kane ɔ, a je nibwɔ ɔmɛ tsuo kɛ je Israel bi ɔmɛ a kpɛti.

Nehemia tsake níhi

⁴ Osɔfo Eliashib, nɔ nɛ hyɛɛ wa Mawu ɔ we ɔ nito he tsu ɔmɛ a nɔ ɔ, e huɛ ji Tobia.

⁵ Eliashib dla tsu agbo ko ngɔ to Tobia. Jinɛ ní nɛ ɔmɛ pɛ nɛ a toɔ ngɛ tsu ɔ mi: niye ní bɔ, mimɛ, níhi nɛ a kɛ tsuɔ ní ngɛ Mawu we ɔ, bɔhi nɛ a haa osɔfo ɔmɛ, blɛfo mi dlami nyɔngmanyɔngma mi kakaaka amɛ, wai, kɛ oliv nu nɛ a kɛ haa Levi bi ɔmɛ, kɛ Mawu we ɔ lali ɔmɛ, kɛ buli ɔmɛ ɔ.

⁶ Be nɛ ɔ mi tsuo ɔ, i be Yerusalem; ejakaa Babilonia matsɛ, Artaherhes yi nɔ jeha nyingmi etɛ kɛ enyɔne ɔ mi ɔ, i ya e ngɔ nɛ i ya bɔ lɛ amaniɛ. Pee se ɔ, e ngmɛ mi blɔ,

⁷ nɛ i kpale kɛ ba Yerusalem. Lejɛ ɔ nɛ i ya na yayami nɛ Eliashib pee kaa e je Mawu we ɔ tsu kake he gbi ha Tobia. Nɔ́ nɛ ɔ ha nɛ ye mi mi fu wawɛɛ nitsɛ,

⁸ nɛ i kɛ hɛdɔ ya je Tobia ní ɔmɛ tsuo kpo ngɔ hɛ pue he.

⁹ I fa ke a sá tsu ɔmɛ a mi saminya, nɛ a ngɔ níhi nɛ a kɛ tsuɔ ní ngɛ Mawu we ɔ, kɛ ngma bɔ ɔmɛ, kɛ mimɛ ɔ kɛ ya to a hi hehi.

¹⁰ I na le hu kaa Mawu we ɔ lali ɔmɛ, kɛ Levi bi kpa amɛ je Yerusalem kɛ ho a ngmɔhi a mi ya; ejakaa niye ní nɛ a to kaa a ha mɛ ɔ, a ha we mɛ.

¹¹ I ka ma ní tsuli ɔmɛ a hɛ mi wawɛɛ kaa a hyɛ we Mawu we ɔ nɔ bɔ nɛ sa. Jehanɛ, i kpale Levi bi ɔmɛ, kɛ lali ɔmɛ kɛ ba to a ní tsumi ɔmɛ a nya ngɛ Mawu we ɔ ekohu.

¹² Lɔ ɔ se ɔ, Israel ma a tsuo ngɔ a blɛfo, wai, kɛ oliv nu mi dlami nyɔngmanyɔngma mi kakaaka amɛ kɛ ba nito he ɔmɛ ekohu.

¹³ I ngɔ nimli nɛ ɔmɛ ngɔ to nito he tsu ɔmɛ a nya: osɔfo Shelemia, mlaa tsɔɔlɔ Zadok, kɛ Levi no ɔ nɛ a tsɛɛ Pedaya a. A he piɛlɔ ji Zakur bi Hanan, Matania bibi ɔ. I le mɛ kaa anɔkuale yeli nɛ a ní tsumi ji kaa a maa dla niye ní ɔ ha a sibi ní tsuli ɔmɛ pɛpɛɛpɛ.

¹⁴ Mawu, i kpa mo pɛɛ, mo kai ní nɛ ɔmɛ tsuo nɛ i pee ɔ. Ni kpakpahi tsuo nɛ i pee kɛ ha o we ɔ, kɛ bɔ nɛ i sɔmɔ mo ɔ, o hɛ ko je nɔ.

¹⁵ Jamɛ a be ɔ, i na ni komɛ ngɛ Yuda nɛ a ngɛ wai yiblii ngae ngɛ Hejɔɔmi ligbi ɔ nɔ. Ni komɛ hu ngɛ tlomi fie kɛ ngɛ a tejihi a nɔ woe kɛ yaa Yerusalem. Tlomi ɔmɛ ji nɛ ɔmɛ nɛ: blɛfo, wai, wai yiblii, ngmɔkɔ, kɛ ní kpa komɛ. I bɔ mɛ kɔkɔ ke Hejɔɔmi ligbi ɔ, a ko jua ní.

¹⁶ Tiro bi komɛ nɛ ngɛ Yerusalem ɔ, mɛ hu a ngɔɔ pa mi lo, kɛ nijua ní slɔɔtoslɔɔtohi babauu kɛ baa ma a mi, nɛ a ba juaa kɛ haa wa nyɛmimɛ Yuda bi ɔmɛ ngɛ Hejɔɔmi ligbi ɔ nɔ.

¹⁷ I ka Yuda ma nimeli ɔmɛ a hɛ mi, nɛ i de mɛ ke, “Nɔ́ yayami nyɛ ngɛ pee nɛ ɔ nɛ! Nyɛ ngɛ Hejɔɔmi ligbi ɔ blee.

¹⁸ Pi níhi nɛ nyɛ nɛmɛ ɔmɛ pee, nɛ Mawu gbla nyɛ nɛmɛ ɔmɛ, kɛ Yerusalem ma a tue ɔ ji nɛ ɔmɛ lo? Mɛni he je mɔ nɛ nyɛ ngɛ Hejɔɔmi ligbi ɔ blee kɛ mwɔɔ ɔ? Anɛ nyɛ li kaa nɔ́ nɛ ɔ kɛ Mawu mi mi fumi nɛ nya wa maa ba Israel nɔ lo?”

¹⁹ Lɔ ɔ he ɔ, i fa ke ke pu yaa nɔ si nɛ a maa je Hejɔɔmi ligbi tsuaa Hejɔɔmi ligbi yemi sisi ɔ, a nga ma agbo ɔmɛ, nɛ a ko bli kɛ yaa si Hejɔɔmi ligbi ɔ maa be. I ngɔ ye tsɔli ɔmɛ ekomɛ ngɔ to agbo ɔmɛ a nya, konɛ a hyɛ nɛ a ko ngɔ tlomi ko kɛ ba ma a mi Hejɔɔmi ligbi ɔ.

²⁰ Jua yeli nɛ juaa ní slɔɔtoslɔɔtohi ba hwɔ ma a gbogbo ɔmɛ a se Soha nyɔ mi si kake loo si enyɔ.

²¹ I bɔ mɛ kɔkɔ, nɛ i de mɛ ke, “Nyɛ ko ba hwɔ gbogbo ɔ se kɛ mlɛ kɛ yaa si je maa na hu. Ke nyɛ pee ja ekohu ɔ, ma ha a maa nuu nyɛ!” Kɛ je lɔ ɔ se ɔ, a bɛ lejɛ ɔ Hejɔɔmi ligbi ɔ hu.

²² Kɛkɛ nɛ i fa Levi bi ɔmɛ ke a tsukɔ a he, nɛ a ya bu agbo ɔmɛ a nya, bɔ nɛ pee nɛ a ye Hejɔɔmi ligbi ɔ klɔuklɔu. Ye Mawu lee, mo kai mi ngɛ enɛ ɔ hu he, nɛ o baa ye yi ngɛ o suɔmi agbo nɛ ngɛ daa a he.

²³ Jamɛ a be ɔ mi kɛ̃ nɛ i ná le kaa Yuda bi ɔmɛ babauu ya ngɔ yihi ngɛ Ashdod, Amon, kɛ Moab.

²⁴ A bimɛ ɔmɛ fa tuɔ Ashdod gbi, loo gbi kpa ko, nɛ a tu we Yuda gbi ɔ.

²⁵ Lɔ ɔ he ɔ, i ka nyumu ɔmɛ a hɛ mi, nɛ i gbiɛ mɛ; i fia ni komɛ ní, nɛ i hiaa a yi bwɔmi. Jehanɛ, i ha a kɛ Mawu biɛ ka kita ke mɛ nitsɛmɛ, kɛ a binyumu ɔmɛ be nibwɔhi a biyi ɔmɛ ngɔe, nɛ a biyi ɔmɛ hu be nibwɔhi gbae kɔkɔɔkɔ hu.

²⁶ I de ke, “Pi ma se yihi nɛ ha nɛ Matsɛ Salomo pee yayami ɔ? Matsɛ Salomo ji matsɛ nguaa pe je ma amɛ a matsɛmɛ ɔmɛ tsuo. Mawu suɔ e sane, nɛ e wo lɛ Israel tsuo nɔ matsɛ; se kɛ̃ ɔ, ma se yi ɔmɛ ha nɛ lɛ po e pee yayami.

²⁷ Anɛ waa nyɛɛ nyɛ se, nɛ wa ya ngɔ ma se yihi, nɛ wa tɔ Mawu nɔ lo?”

²⁸ Osɔfo nɔkɔtɔma pe kulaa Eliashib bi ji Yoyada; se Yoyada bimɛ ɔmɛ a ti nɔ kake ya ngɔ Sanbalat nɛ je Bet Horon ɔ biyo. Lɔ ɔ he ɔ, i fie Yoyada kɛ je Yerusalem.

²⁹ Ye Mawu, mo kai bɔ nɛ jamɛ a ni ɔmɛ ble osɔfo yemi, kɛ somi nɛ o kɛ osɔfo ɔmɛ, kɛ Levi bi ɔmɛ so ɔ hulɔ.

³⁰ Bɔ nɛ i pee kɛ tsukɔ ma a he kɛ je ma se níhi a he ji nɛ ɔ nɛ; i to osɔfo ɔmɛ, kɛ Levi bi ɔmɛ a ní tsumi ɔ hanɔhanɔ, nɛ nɔ tsuaa nɔ hɛɛ e ní tsumi nɛ e ngɛ tsue.

³¹ I to blɔ nya, konɛ a ngɔ lɛ́ nɛ a kɛ maa sã bɔ ɔ kɛ ba ngɛ be nɔ. I to be hu nɛ a maa ngɔ a kekleekle ngmɔ niba ní ɔmɛ kɛ ba. Ye Mawu, mo kai ní nɛ ɔmɛ tsuo, nɛ o ha nɛ e hi ha mi.