Nehemia 12 - BAIBLO ALOO NGMAMI KLƆUKLƆU Ɔ

Osɔfohi kɛ Levi bi a biɛhi

¹ Osɔfohi kɛ Levi bi nɛ kpale kɛ je ma se kɛ ba a, a kɛ Shaeltiel bi Zerubabel, kɛ osɔfo nɔkɔtɔma pe kulaa nɛ a tsɛɛ Yoshua a nɛ ba. A biɛhi ji nɛ ɔmɛ nɛ:

Osɔfo ɔmɛ:

^2-7 Seraya, Yeremia, Ezra, Amaria, Maluk, Hatush, Shekania, Rehum, Meremot, Ido, Ginetoi, Abiya, Miyamin, Maadia, Bilga, Shemaya, Yoyarib, Yedaya, Salu, Amok, Hilkia, kɛ Yedaya. Mɛ ji a nyɛmimɛ osɔfo ɔmɛ tsuo a nya dali ngɛ Yoshua yi nɔ.

⁸ Levi bi: Nihi nɛ hyɛɛ nɛ a la sina lahi ji Yeshua, Binui, Kadmiel, Sherebia, Yuda, kɛ Matania.

⁹ Lali a kuu nɛ heɔ la nɔ ji Bakbukia, Uno, kɛ e nyɛmimɛ Levi bi ɔmɛ.

Osɔfo nɔkɔtɔma pe kulaa Yoshua nina

¹⁰ Yoshua bi ji Yoyakim; Yoyakim bi ji Eliashib, nɛ Eliashib hu bi ji Yoyada.

¹¹ Yoyada bi ji Yonatan, nɛ Yonatan bi ji Yadua.

Osɔfo weku ɔmɛ a nyatsɛmɛ

^12-21 Osɔfo weku ɔmɛ a nyatsɛmɛ ngɛ osɔfo nɔkɔtɔma pe kulaa Yoyakim yi nɔ ɔ, a biɛhi ji nɛ ɔmɛ nɛ: Osɔfo Weku Meraya Seraya Hanania Yeremia Meshulam Ezra Yehohanan Amaria Yonatan Maluki Yosef Shebania Adna Harim Helkai Merayot Zakaria Ido Meshulam Gineton Zikri Abiya … Miniamin Piltai Moadia Shamua Bilga Yehonatan Shemaya Matenai Yoyarib Uzi Yedaya Kalai Salai Eber Amok Hashabia Hilkia Netanel Yedaya

Osɔfo Osɔfo ɔmɛ kɛ Levi bi ɔmɛ a wekuhi a he sane

²² A ngma Levi bi ɔmɛ a weku ɔmɛ a nyatsɛmɛ ɔmɛ, kɛ osɔfo ɔmɛ a weku ɔmɛ a nyatsɛmɛ ɔmɛ hu a biɛhi ngɔ wo womi mi ngɛ osɔfo nikɔtɔma pe kulaa nɛ ɔmɛ a wami be mi: Eliashib, Yoyada, Yonatan, kɛ Yadua. A ya nɔ ngma biɛ nɛ ɔmɛ hluu kɛ ya si Persia matsɛ, Darius yi nɔ.

²³ Levi bi ɔmɛ a weku ɔmɛ a nyatsɛmɛ ɔmɛ a biɛ ɔmɛ lɛɛ a ngma kɛ wo Blema Sanehi Womi ɔ mi kɛ ba su Eliashib bibi Yonatan be ɔ mi pɛ.

Bɔ nɛ a dla sɔlemi we ɔ mi ní tsumi ɔmɛ

²⁴ A dla Levi bi ɔmɛ a mi ngɔ wo kuuhi a mi. A nyatsɛmɛ ji Hashabia, Sherebia, Yeshua, Binui, kɛ Kadmiel. Kuu enyɔ ya buaa a he nya si kake kɛ laa kɛ jeɔ Mawu yi. Kuu kake jeɔ la a, nɛ enyɔne ɔ heɔ nɔ kaa bɔ nɛ Matsɛ David, Mawu nɔmlɔ ɔ to blɔ nya ha mɛ ke a pee ɔ.

²⁵ Buli nɛ ɔmɛ ji nihi nɛ buu ngɛ nito hehi nɛ ngɛ sɔlemi we ɔ agbo ɔmɛ a nya: Matania, Bakbukia, Obadia, Meshulam, Talmon, kɛ Akub.

²⁶ Nihi nɛ a wo a ta nɛ ɔ hi si ngɛ Yeshua bi Yoyakim, Yehozadak bibi ɔ yi nɔ. Jamɛ a be ɔ kɛ̃ nɛ Nehemia ye amlaalo, nɛ osɔfo Ezra hu ji mlaa tsɔɔlɔ ɔ nɛ.

Nehemia julaa ma a gbogbo ɔ

²⁷ Benɛ a maa julaa Yerusalem gbogbo ɔ, a ya kpee Levi bi ɔmɛ kɛ je hehi tsuo nɛ a ngɛ ɔ kɛ ba. A ba piɛ Yerusalem ma mi bi ɔmɛ a he, nɛ a fia gɔgɔ, kɛ saku, nɛ a la sina lahi nɛ a kɛ ye nyami ligbi ɔ.

²⁸ A bua lali ɔmɛ hu a nya kɛ je Yerusalem kpo ɔ mi kɛ kɔpehi nɛ bɔle Netofa,

²⁹ Betgilgal, Geba, kɛ Azmavet kɛ ba.

³⁰ Osɔfo ɔmɛ, kɛ Levi bi ɔmɛ pee kusumi kɛ julaa mɛ nitsɛmɛ a he. A julaa ma a, kɛ agbo ɔmɛ, kɛ ma gbogbo ɔ hulɔ.

³¹ Lɔ ɔ se ɔ, i bua Yuda ma nimeli ɔmɛ a nya ngɛ gbogbo ɔ nɔ, nɛ i ngɔ mɛ ngɔ to kuu agboagbo enyɔ a nya, konɛ a hyɛ nɛ a to kɛ nyɛɛ, nɛ a la Mawu yi jemi lahi kɛ bɔle ma a. Kekleekle kuu ɔ nyɛɛ hiɔ nɔ, ngɛ gbogbo ɔ nɔ, kɛ yaa Dwɔmi Agbo ɔ nya.

³² Hoshaya nyɛɛ lali ɔmɛ a se, nɛ Yuda ma nimeli ɔmɛ fa nyɛɛ e se.

^33-35 Osɔfo nɛ ɔmɛ ngɛ bɛhi kpae kɛ nyɛɛ a se: Azaria, Ezra, Meshulam, Yuda, Benyamin, Shemaya, kɛ Yeremia. Jehanɛ, Yonatan bi Zakaria, Shemaya bibi ɔ ba. E nɛmɛ ɔ ekomɛ ji Matania, Mikaya, kɛ Zakur nɛ je Asaf weku ɔ mi ɔ.

³⁶ Ni kpahi nɛ je e weku ɔ mi nɛ nyɛɛ e se ji Shemaya, Azarel, Milalai, Gilalai, Maai, Netanel, Yuda, kɛ Hanani. Sakuhi nɛ Matsɛ David, nɛ a pɔɔ lɛ tsɛmi ke Mawu nɔmlɔ ɔ fiaa a, ni nɛ ɔmɛ tsuo hɛɛ jamɛ a saku ɔmɛ ekomɛ. Mlaa tsɔɔlɔ nɛ a tsɛɛ Ezra a, nyɛɛ kuu nɛ to ɔ a hɛ mi.

³⁷ A gu Nyu Vu Agbo ɔ nya kɛ kuɔ kpoku ɔmɛ nɛ yaa David ma a mi ɔ, kɛ ya be ngɛ David mɔ ɔ he, kɛ kpale kɛ ba Nyu Agbo ɔ nya, ngɛ ma a beleku je.

³⁸ Kuu enyɔne ɔ nyɛɛ muɔ nɔ ngɛ gbogbo ɔ nɔ, nɛ i kɛ ma a fa nyɛɛ a se. Wa to kɛ nyɛɛ kɛ ya gu Flɔɔnɔɔ Mɔ ɔ nɔ, kɛ ya su Gbogbo Gbajaa he.

³⁹ Wa tsa nɔ kɛ ya gu Efraim Agbo ɔ nɔ, Yeshana Agbo ɔ nɔ, Lo Agbo ɔ nɔ, Hananel Mɔ ɔ he, kɛ Lafa Mɔ ɔ he, hluu kɛ ya su To Agbo ɔ nɔ. Wa ba gbe nya ngɛ Buli Agbo ɔ nya.

⁴⁰ Kɛkɛ ɔ, lali a kuu enyɔ ɔmɛ tsuo nɛ ngɛ lae kɛ ngɛ Mawu si nae ɔ ba bua ngɛ Mawu we ɔ. I kɛ ma nimeli nɛ nyɛɛ ye se ɔ hu ya su lejɛ ɔ,

⁴¹ kɛ osɔfo nɛ ɔmɛ nɛ ngɛ a bɛ ɔmɛ kpae: Eliakim, Maaseya, Miniamin, Mikaya, Elioenai, Zakaria, kɛ Hanania.

⁴² Ni nɛ ɔmɛ hu tsa nɔ: Maaseya, Shemaya, Eleazar, Uzi, Yehohanan, Malkiya, Elam, kɛ Ezer. Lali ɔmɛ, kɛ a nyatsɛ Yezrahia la wawɛɛ.

⁴³ A sã bɔhi babauu jamɛ a ligbi ɔ, nɛ ma a nyá saminya; ejakaa Mawu ha nɛ a bua jɔ wawɛɛ nitsɛ. Yi ɔmɛ, kɛ jokuɛwi ɔmɛ hu piɛ he kɛ ye nyami ligbi ɔ; nɛ a nu ngmlaa a he ngɛ se lokoo.

A ke ní nɛ a kɛ sɔmɔ ngɛ sɔlemi we ɔ

⁴⁴ Jamɛ a ligbi ɔ, nito hehi nɛ ngɛ sɔlemi we ɔ, nɛ a toɔ nike níhi ngɛ a mi ɔ, a ngɔ ni komɛ ngɔ to a nya, nɛ́ a hyɛ mi dlami nyɔngmanyɔngma mi kakaaka ɔmɛ, kɛ jeha mi kekleekle blɛfo ɔ, kɛ kekleekle tso yiblii nɛ fu ɔ a nɔ. Ni nɛ ɔmɛ a ní tsumi ji kaa a hyɛ nɛ a bua nike ní ɔmɛ a nya ngɛ ngmɔ ɔmɛ nɛ bɔle ma amɛ a nɔ, nɛ a kɛ ba ha osɔfo ɔmɛ, kɛ Levi bi ɔmɛ kaa bɔ nɛ mlaa a tsɔɔ ɔ. Yuda ma a tsuo bua jɔ osɔfo ɔmɛ, kɛ Levi bi ɔmɛ a he saminya;

⁴⁵ ejakaa a pee he julaami, kɛ kusumi kpahi nɛ Mawu fa ke a pee ɔ pɛpɛɛpɛ. Jã kɛ̃, sɔlemi we ɔ lali ɔmɛ, kɛ buli ɔmɛ hu tsu a blɔ nya ní tsumi ɔmɛ pɛpɛɛpɛ kaa bɔ nɛ Matsɛ David kɛ e bi Salomo tsɔɔ kaa a pee ɔ.

⁴⁶ Lali a kuu nɛ laa yi jemi, kɛ sina lahi kɛ haa Mawu ɔ, Matsɛ David, kɛ la polɔ Asaf be ɔ mi tɔɔ nɛ a to nikɔtɔmahi ngɛ a nya.

⁴⁷ Zerubabel yi nɔ, kɛ Nehemia be ɔ mi ɔ, Israel ma a tsuo ngɔɔ nike ní kɛ ba haa nɛ a kɛ hyɛ sɔlemi we ɔ lali ɔmɛ, kɛ buli ɔmɛ a nɔ daa ligbi. Ma a ngɔɔ bɔ klɔuklɔu kɛ ba haa Levi bi ɔmɛ, nɛ mɛ hu a ngɔɔ bɔ ɔ mi fa, nɛ ji osɔfo ɔmɛ a blɔ nya a kɛ haa osɔfo ɔmɛ.