Nahum 3 - BAIBLO ALOO NGMAMI KLƆUKLƆU Ɔ1 Mo Nineve ma, ma nɛ lakpa sɔuu a yeɔ ngɛ o mi, ma nɛ a pueɔ muɔ si ngɛ mi, ma nɛ hyi tɔ kɛ ní kpakpahi nɛ a kpɔ ngɛ nihi a dɛ, musu tloo mo! 2 Bu tue! Okpɔngɔ kpa amɛ ngɛ pɛe fioko, fioko! Tlɔɔke nane ɔmɛ a nya ngɛ pɛe kpata, kpata! Okpɔngɔ ɔmɛ ngɛ tue glɛi, glɛi, glɛi! Nɛ ta zugba lɛ ɔmɛ hu ngɛ si hɛe kplalala, kplalala! 3 Ta buli nɛ hi okpɔngɔhi a nɔ ba tua ma a; klaate ɔmɛ ngɛ la pãe nylamnylam! Nɛ akplɔ ɔmɛ ngɛ kpɛe plamplam! A bua ni gbogboe ɔmɛ a nya glekuuglekuu; nihi nɛ gbo ɔ hiɛ babauu; a li a yibɔ; a ngɛ mɛ tɛe, nɛ a ngɛ a nɔ nɔe ngɛ a blɔ mi! 4 Mɛni kɛ ní nɛ ɔmɛ tsuo ba? Nineve, ma nɛ ngɛ fɛu ɔ mi bi kunya yeli, kɛ azetsɛmɛ ya sisi je ma amɛ, nɛ a ya ja a wɔ ɔmɛ kaa bɔ nɛ yo yaholɔ puɛɔ ma a. 5 Yawɛ Tabohiatsɛ ɔ ke, “Nineve, ma gbla o tue! Ma ha nɛ o maa hɛɛ o he gu, nɛ ma ha nɛ je ma amɛ maa na mo paslapaa kɛ o he zo ɔ tsuo. 6 Ma pue o hɛ mi si, nɛ o maa pee kaa nɔ ko nɛ a plɛ níhi nɛ a hiee ngɔ pue e nɔ. Nihi maa hyɛ mo gaa, nɛ a maa ye gbeye. 7 Nɔ tsuaa nɔ nɛ maa na mo ɔ he mi maa po. E ma de ke, ‘Akuanyɛ! Nineve hɛ mi kpata pɛ! Mɛnɔ ma ba ye lɛ kɔmɔ? Mɛnɔ ma ba wo lɛ bua?’ ” 8 Nineve, anɛ o hi pe Egipt matsɛ ma Tebes ɔ lo? Lɛ hu tse Nilo pa a bɔle lɛ kaa gbogbo nɛ faa e he lo? 9 Tebes nɛ yeɔ Sudan kɛ Egipt tsuo a nɔ; nɛ e he wa kaa nɔ́ ko. Put kɛ Libia piɛ e huɛmɛ ɔmɛ a he kɛ hwu ta a! 10 Se kɛ̃ ɔ, a nuu Tebes bi ɔmɛ nyɔguɛ kɛ ho ma se ya. A fiaa jokuɛwi ɔmɛ ní nɛ a gbe ngɛ ma a mi blɔ ɔmɛ a kɔ nya amɛ tsuo. A nuu a ma nimeli ɔmɛ, nɛ a wo mɛ kɔsɔkɔsɔ kɛ ho. A dla mɛ ngɔ ha nihi nɛ ba nuu mɛ ɔ. 11 Nineve, mo hu o maa pee kaa nɔ nɛ tɔ dã! O ma hla kaa o maa je o he nyɛli ɔmɛ a dɛ mi. 12 O mɔ nguangua amɛ tsuo maa pee kaa ngmɔkɔ tsohi nɛ a nɔ yiblii fu. Nɔ ko nɛ huanya tso ɔ piɔ kaa yiblii ɔmɛ be tsɔe ba nɔ nɔ ɔ nya mi klom lo! 13 O ta buli ɔmɛ ngɛ kaa yihi pɛ; ke he nyɛli ba tua ma a, nɔ ko be nyɛe maa te si kɛ wo mɛ. La maa sã agbo ɔmɛ a se lami ní ɔmɛ. 14 Yaa yɛ nyu ngɔ to; a ma ba sa ma a yi. Dla o mɔ nguangua amɛ! Moo naa zu nɛ o kɛ maa pee bliikisi, nɛ o dla bliikisi peemi daka amɛ kɛ to si! 15 Bɔ tsuaa bɔ nɛ pee ɔ, ja a sã mo, loo ja o nɔ ngɛ ta mi. Kaa bɔ nɛ baalɛ yeɔ ní kɛ pii si ɔ, jã a ma kpata o hɛ mi pɛsɛpɛsɛ. O fɔ babauu, nɛ o he hiɛ kaa baalɛ! 16 O jua yeli ɔmɛ hiɛ pe hlami dodoehi ngɛ hiɔwe! Se jehanɛ lɛɛ, mɛ tsuo a ho kaa baalɛhi nɛ́ bli a pɛli mi, nɛ a te kɛ je. 17 O ma ní tsuli ɔmɛ hiɛ babauu kaa baalɛhi. Fĩɛ be mi ɔ, a laa a he ngɛ gbogbo ɔmɛ a mi. Se ke pu je pɛ a te, nɛ nɔ ko li he nɛ a yaa! 18 Asiria matsɛ, o we amlaalo ɔmɛ gbo, nɛ o ma nimeli ɔmɛ hwɔ mahe kɛ yaa neneene! O we bi ɔmɛ gbɛ fĩa yo ɔmɛ a nɔ, nɛ nɔ ko be nɛ maa ngɔ mɛ kɛ ba we ekohu. 19 Tsa ba ko be ha o plaami ɔmɛ, nɛ o pa a kle. Nihi tsuo nɛ maa nu o hɛ mi kpatami ɔ he ɔ, a bua maa jɔ, nɛ a maa fia a dɛ. Yi wu tso níhi babauu nɛ o pee ɔ, anɛ nɔ ko ngɛ nɛ e he je mi lo? |
Bible in Dangme © Bible Society of Ghana, 2018.
Bible Society of Ghana