Nahum 2 - BAIBLO ALOO NGMAMI KLƆUKLƆU Ɔ

A kpata Nineve hɛ mi

¹ Nineve, ta tua mo! Nyɛ ya da nyɛ blɔ hehi ngɛ gbogbo ɔmɛ a he! Nyɛɛ bu blɔ ɔmɛ a he! Nyɛɛ mia kɛ ha ta!

² (Yawɛ miɔ nɛ e wo Israel hɛ mi nyami ekohu kaa bɔ nɛ e ngɛ sa loko he nyɛli ɔmɛ ba kpata ngmɔ ɔmɛ a hɛ mi ɔ).

³ He nyɛli ɔmɛ a ta buli ɔmɛ hɛɛ tsɛ̃i tsutsuuhi, nɛ a wo tade tsutsuuhi. A bɔni ta gbami, konɛ a tua ma a! A ta zugba lɛ ɔmɛ ngɛ kpɛe kaa la! A we okpɔngɔ ɔmɛ ngɛ tue glɛi, glɛi, glɛi!

⁴ Ta zugba lɛ ɔmɛ ngɛ si poe hliididididi ngɛ gbɛjegbɛ ɔmɛ a nɔ, nɛ a ngɛ fo sae kɛ ngɛ yae kɛ ngɛ bae ngɛ ma kpe he ɔmɛ. A ngɛ kpɛe kaa jatɛ; nɛ a ngɛ gbae kɛ ngɛ yae kɛ ngɛ bae kaa oslabai.

⁵ A tsɛ asafoatsɛmɛ ɔmɛ; nɛ benɛ a hɛɛ fo kitikiti kɛ yaa a, a ngɛ si tɛe. He nyɛli ɔmɛ a he sɔ kɛ ya su gbogbo ɔ he, nɛ a wo tsɛ̃i ɔ nɔ kɛ ma si.

⁶ Tlukaa a, agbo ɔmɛ nɛ ngɛ pa a nya a bli, nɛ sawale nu nɔ tsuaa nɔ ngɛ matsɛ we ɔ mi.

⁷ A nu manyɛ ɔ kɛ ho; e mawayi ɔmɛ wo yana kɛ gbi nɛ ngɛ kaa lahuɛhi a gbi, nɛ a gba a gugue ma kɛ ye kɔmɔ.

⁸ Nineve ma mi bi ɔmɛ bu kɛ je kpo kɛ je ma a mi kɛ fo kaa bɔ nɛ nyu bee yayaaya kɛ jee taku nɛ gba dɔ tlukaa mi ɔ. A nu ngmlaa ke, “Nyɛɛ da si! Nyɛɛ da si!” Se nɔ ko nɔ ko plɛ we nɛ e hyɛ e se.

⁹ Nyɛɛ ha sika hiɔ! Nyɛɛ ha sika tsu! Juetli hyi ma a tɔ!

¹⁰ Nineve hɛ mi kpata; nimli ɔmɛ ta ma a mi, nɛ ma a pee ma doku! Sawale nu ni ɔmɛ tsuo; a nabɛni mi ngɛ doe blibliibli; a he wami ta, nɛ a hɛ mi pee mɔbɔmɔbɔ.

¹¹ Jehanɛ, ma nɛ ngɛ kaa jatahi a hi he ɔ, jije e ngɛ? Ma nɛ a haa jata bihi ní ngɛ mi ɔ, jije e ngɛ? He nɛ jata ku, kɛ jata yo ngɔɔ a bihi kɛ yaa, konɛ nɔ́ ko kó sa a he ɔ, jije e ngɛ?

¹² Jata ku ɔ ya gbe de lo, nɛ e tsɔtslɔɔ mi kɛ ha jata yo ɔ, kɛ e bi ɔmɛ; lo ɔ hyi e hi he ɔ tɔ.

¹³ Yawɛ Tabohiatsɛ ɔ ke, “I kɛ mo ná! Ma sã o ta zugba lɛ ɔmɛ. Ma kpata o ta buli ɔmɛ a hɛ mi ngɛ ta mi. Níhi tsuo nɛ o kpɔ ngɛ nihi a dɛ ɔ, ma ngɔ. A be o he wami he nue hu ngɛ je ɔ mi.”