Nahum 1 - BAIBLO ALOO NGMAMI KLƆUKLƆU Ɔ

¹ Sɛ gbi nɛ kɔɔ Nineve ma a he ji nɛ ɔ nɛ. Nina nɛ Nahum nɛ je Elkosh ɔ na ngɛ Nineve he ji nɛ ɔ nɛ.

Yawɛ mi mi fu Nineve

² Yawɛ Mawu ɔ, a kɛ lɛ plee we nɔ́ he; e gblaa nihi nɛ tee si kɛ woɔ lɛ ɔ a tue. E gblaa e he nyɛli ɔmɛ a tue bɔ nɛ sa mɛ kɛ yeɔ e he lue.

³ Yawɛ mi mi fu we mla, se kɛ̃ ɔ, e we abofu nya wa wawɛɛ nitsɛ; e ngmɛ́ blɔ nɛ nɔ tɔli yeɔ a he kɔkɔɔkɔ. Yawɛ jeɔ e he wami kpo ngɛ lasiogblee kɛ ahumi mi; nɛ bɔku ngɛ kaa e nane se bunyuku!

⁴ Ke Yawɛ wo gbi ɔ, wo miiɔ nɛ e peeɔ zugba gbigbli, nɛ pahi gbliɔ. Lohwehi a ní yemi he kpakpahi nɛ ngɛ Bashan kɛ Karmel yo ɔmɛ a nɔ ɔ nglaa; nɛ Lebanon mɔmɔ ɔmɛ taa.

⁵ Yoku mimiɛɔ ngɛ Yawɛ hɛ mi; nɛ yokuhi sileɔ ngɛ e hɛ mi. Ke Yawɛ je e he kpo ɔ, zugba a mimiɛɔ; nɛ je ɔ, kɛ e mi nimli ɔmɛ tsuo a he doɔ blibliibli.

⁶ Ke e mi mi fu ɔ, mɛnɔ ma nyɛ maa da nya? Ke e hɛ dɔ wawɛɛ ɔ, mɛnɔ yi ma na wami? Ke e je e mi mi la glegleegle ɔ kpo ɔ, tɛ sahi peeɔ wɔtsɔwɔtsɔ kaa bunyuku ngɛ e hɛ mi.

⁷ Yawɛ mi mi hi; e ngɛ kaa mɔ nɛ he wa ha nihi nɛ ngɛ haomi mi; nɛ nihi nɛ ba saa we ngɛ e ngɔ ɔ, e baa a yi.

⁸ E kpataa e he nyɛli ɔmɛ a hɛ mi pɛsɛpɛsɛ kaa bɔ nɛ pa nguaa nɛ ngɛ bee kɛ fo kpataa níhi a hɛ mi ɔ; e gbeɔ nihi nɛ tee si woɔ lɛ ɔ.

⁹ Mɛni yi mi yayami nyɛ ngɛ toe ngɛ Yawɛ he ɔ? E ma kpata nyɛ hɛ mi pɛsɛpɛsɛ. Ke nɔ ko kɛ lɛ kpe si kake pɛ nɔ ɔ nyagbe ji lɔ ɔ nɛ.

¹⁰ Kaa bɔ nɛ a buaa mio tsohi, kɛ go gbigbli nya nɛ a sãã a, jã e maa sã nyɛ butuu!

¹¹ Mo Nineve, o mi nɛ nɔ ko je, nɛ e to yi mi yayami kɛ si Yawɛ ɔ nɛ.

¹² Nɔ́ nɛ Yawɛ ngɛ Israel ma a dee ji nɛ ɔ nɛ: “E ngɛ mi kaa Asiria bi ɔmɛ a he wa, nɛ a he hiɛ babauu lɛɛ, se a ma kpata a hɛ mi pɛsɛpɛsɛ, nɛ a be mɛ nae hu. Ye ma, imi nitsɛ nɛ i ha nɛ nyɛ na amanehlu ɔ nɛ, se i be nyɛ tue gblae hu.

¹³ Ma ha nɛ Asiria nɔ yemi ɔ se maa po, nɛ ma kplɔ kɔsɔkɔsɔ ɔmɛ ngɛ nyɛ he.”

¹⁴ Kita nɛ Yawɛ ka ngɛ Asiria bi ɔmɛ a he ji nɛ ɔ nɛ: “A nina ko be si hie; a biɛ maa laa. Ma poo amaga amɛ nɛ ngɛ a wɔ piɛ ɔmɛ a mi ɔ ngɔ pue he. I ngɛ yɔkɔ tsuae ngɔ to Asiria bi ɔmɛ, ejakaa e sɛ kaa a hi je mi!”

¹⁵ Hyɛ, tsɔlɔ ko ma ngɛ yo ɔmɛ a nɔ kɛ manye munyu. E ngɛ fiɛe ngɛ dee ke wa ye kunimi. Yuda ma, nyɛɛ ye nyami ligbi ɔmɛ. Si nɛ nyɛ wo Mawu veveeve ɔ, nyɛɛ ye nɔ. Yiwutsotsɛmɛ nɛ ɔmɛ be bae nɛ a ba tua nyɛ zugba a hu. Ejakaa a kpata a hɛ mi pɛsɛpɛsɛ.