Mose V, 9 - BAIBLO ALOO NGMAMI KLƆUKLƆU Ɔ

Israel bi ɔmɛ gbo tue

¹ “Nyɛɛ bu tue, Israel bi; mwɔnɛ ɔ, nyɛ maa po Yordan pa a, konɛ nyɛ ya fie je ma amɛ nɛ kle, nɛ a he wa pe nyɛ ɔ. A fia gbogbo nɛ ya hiɔwe ploplooplo ngɔ wo a ma amɛ a he.

² Oblaihi gojogojoo nɛ nyɛ nu nɛ a de ke nɔ ko nɔ ko nyɛ we mɛ ɔ ngɛ lejɛ ɔ.

³ Se mwɔnɛ ligbi nɛ ɔ, nyɛ ma na maa le kaa Yawɛ, nyɛ Mawu ɔ ji nɔ nɛ nyɛɛ nyɛ hɛ mi kɛ yaa kaa bɔ nɛ la tsoɔ gegeege kɛ sãã nɔ́ ɔ nɛ. E maa ye a nɔ ha nyɛ; e ma ha nyɛ maa fie mɛ, nɛ nyɛ ma kpata a hɛ mi amlɔ kaa bɔ nɛ Yawɛ, nyɛ Mawu ɔ wo nyɛ si ɔ.

⁴ “Ke Yawɛ, nyɛ Mawu ɔ fie mɛ ha nyɛ ɔ, nyɛ ko susu nɛ nyɛ de nyɛ he ke, ‘Wa dami nɛ wa da he je nɛ Yawɛ kɛ wɔ ba nɛ wa ba ngɔ zugba nɛ ɔ.’ Pi ja, se mohu je ma nɛ ɔmɛ a yi mi nɛ wa a he je nɛ Yawɛ ngɛ mɛ fiee ha nyɛ ɔ nɛ.

⁵ Pi kaa nyɛ hi, loo nyɛ peeɔ nɔ́ nɛ da he je nɛ Yawɛ ha nyɛ yaa ngɔ a zugba a. Mohu ɔ, a yi mi nɛ wa a he je nɛ Yawɛ, nyɛ Mawu ɔ ngɛ mɛ fiee ha nyɛ ɔ nɛ. Jehanɛ hu, Yawɛ pee ja, bɔ nɛ pee nɛ e ye si nɛ e wo nyɛ nɛmɛ, Abraham, Isak, kɛ Yakob ɔ nɔ.

⁶ Nyɛ na nɛ nyɛɛ le kaa anɔkuale mi ɔ, pi nyɛ dami nɛ nyɛ da he je nɛ Yawɛ, nyɛ Mawu ɔ kɛ zugba nɛ baa ní saminya nɛ ɔ ngɛ nyɛ hae. Dɛbi, ma nɛ kuɛ wa ji nyɛ.

⁷ “Nyɛ hɛ ko je nɔ kɔkɔɔkɔ, bɔ nɛ nyɛ wo Yawɛ, nyɛ Mawu ɔ mi mi la ngɛ nga kplanaa a nɔ. Kɛ je ligbi ɔ nɛ nyɛ je Egipt zugba a nɔ kɛ ba si be nɛ nyɛ ba su hiɛmɛ nɛ ɔ, Yawɛ hɛ mi atuã sɔuu nyɛ ngɛ tsɔe.

⁸ Ngɛ Sinai yo ɔ he po nyɛ wo Yawɛ mi mi la; nɛ bɔ nɛ e mi mi fu ha a, e sa nɛ e kpata nyɛ hɛ mi.

⁹ Imi nɛ i kuɔ yo ɔ, nɛ i ya he tɛ tɛtlɛɛhi nɛ a ngma somi nɛ Yawɛ kɛ nyɛ so ɔ ngɛ a nɔ ɔ kɛ ba. I hi yo ɔ nɔ nyɔnyɔɔnyɔ kɛ piapiaapia ligbi nyingmi eywiɛ; nɛ́ i yi ní ɔ, i nui nyu hulɔ.

¹⁰ Lɔ ɔ se ɔ, Yawɛ ngɔ tɛ tɛtlɛɛ enyɔ ɔmɛ ngɔ ha mi. Lɛ nitsɛ nɛ e ngɔ e nine nguɛ kɛ ngma munyu ɔmɛ tsuo nɛ e kɛ nyɛ tu kɛ je la a mi ngɛ yo ɔ nɔ jamɛ a ligbi ɔ nɛ nyɛ bua nyɛ he nya ngɛ yo ɔ sisi ɔ ngɔ fɔ tɛ ɔmɛ a nɔ.

¹¹ Nyɔnyɔɔnyɔ kɛ piapiaapia ligbi nyingmi eywiɛ se loko Yawɛ ngɔ tɛ tɛtlɛɛ enyɔ ɔmɛ nɛ e ngma mlaa amɛ ngɛ a nɔ ɔ ngɔ ha mi.

¹² “Kɛkɛ nɛ Yawɛ de mi ke, ‘Kple si kɛ je yo ɔ nɔ esɔ; o ma a nɛ o ya je kɛ je Egipt ɔ tla blɔ momo, nɛ a pee yayami. Amlɔ nɛ ɔ nɔuu ɔ, a gba kɛ je nɔ́ nɛ i fa mɛ ke a pee ɔ he; a puɛ amaga, nɛ a ngɛ lɛ jae.’

¹³ “Jehanɛ, Yawɛ de mi ke, ‘I le kaa ma nɛ ɔ kuɛ wa.

¹⁴ Ha mi blɔ nɛ ma kpata a hɛ mi, nɛ́ nɔ ko nɔ ko kó kai mɛ gblegbleegble hu. Lɔ ɔ se ɔ, ma pee mo tsɛ ha ma ko nɛ kle, nɛ e he wa pe mɛ.’

¹⁵ “Lɔ ɔ he ɔ, ye he sɔ kɛ kple si kɛ je yo ɔ nɔ kɛ ye somi dɛ mi tɛ tɛtlɛɛ enyɔ ɔmɛ nɛ Yawɛ ngma somi munyu ɔmɛ ngɛ a nɔ ɔ. Jamɛ a be ɔ, la ngɛ tsoe plamplam kɛ ngɛ yo ɔ mi jee.

¹⁶ I na kaa mlaa a nɛ Yawɛ, nyɛ Mawu ɔ wo nyɛ ɔ, nyɛ tɔ̃ nɔ mo. Nyɛ pee yayami kɛ si Yawɛ, nyɛ Mawu ɔ. Nyɛ ngɔ dade kɛ ya sɔ̃ amaga nɛ ngɛ kaa na bi.

¹⁷ Lɔ ɔ he ɔ, nyɛ hɛ mi nɔuu nɛ i ngɔ tɛ tɛtlɛɛ enyɔ ɔmɛ nɛ i hɛɛ ɔ ngɔ fia si nɛ a ywia wɔtsɔwɔtsɔ.

¹⁸ Jehanɛ, i ho ya kpla si ngɛ Yawɛ hɛ mi ekohu nyɔnyɔɔnyɔ kɛ piapiaapia ligbi nyingmi eywiɛ; nɛ́ i yi ní ɔ, i nui nyu hulɔ. I pee ja ngɛ yayami nɛ nyɛ pee kɛ si Yawɛ kɛ wo e mi mi la a he.

¹⁹ I ye Yawɛ mi mi la a gbeye, ejakaa e gli wawɛɛ nitsɛ, nɛ e ko kpata nyɛ hɛ mi. Se Yawɛ bu mi tue ekohu.

²⁰ Aaron hu Yawɛ mi mi fu lɛ wawɛɛ, nɛ e piɛ bɔɔ pɛ nɛ e ko gbe lɛ; se i kpa pɛɛ ha Aaron hu jamɛ a be ɔ mi kɛ̃.

²¹ Jehanɛ, jamɛ a nɔ́ yaya a nɛ nyɛ sɔ̃, nɛ ji na bi ɔ, i ngɔ, nɛ i sã ngɛ la mi. Lɔ ɔ se ɔ, i ywia lɛ wɔtsɔwɔtsɔ nɛ i wɛɛ lɛ bɔdɔbɔdɔ; e pee kaa tabo zu, nɛ i ya hɛ lɛ ngɔ pue pa a nɛ je yo ɔ nɔ kɛ ngɛ bee ɔ mi.

²² “Nyɛ wo Yawɛ, nyɛ Mawu ɔ mi mi la ngɛ Tabera, Masa, kɛ Kibrot hulɔ.

²³ Jehanɛ, benɛ e wo nyɛ blɔ kɛ je Kadesh Barnea, nɛ e fa nyɛ ke nyɛ ya ngɔ zugba nɛ e kɛ ngɛ nyɛ hae kaa nyɛ weto ní ɔ, jamɛ a be ɔ mi po, nyɛ tsɔ Yawɛ, nyɛ Mawu ɔ hɛ mi atuã: nyɛ he we lɛ yi, nɛ nyɛ bui lɛ tue.

²⁴ Kɛ je be nɛ i le nyɛ ɔ, Yawɛ hɛ mi atuã sɔuu nyɛ ngɛ tsɔe.

²⁵ “Lɔ ɔ he ɔ, i ya kpla si ngɛ Yawɛ hɛ mi nyɔnyɔɔnyɔ kɛ piapiaapia ligbi nyingmi eywiɛ sɔuu kɛ kpa pɛɛ ha nyɛ; ejakaa i le kaa Yawɛ to kaa e ma kpata nyɛ hɛ mi.

²⁶ I kpa pɛɛ ke, ‘Nyɔmtsɛ Yawɛ, mo ko kpata mo nitsɛ o ma a hɛ mi; ma nɛ ɔ, mo nitsɛ lɛ o kpɔ̃ mɛ, nɛ o je mɛ kɛ je Egipt kɛ o kɔni si wami.

²⁷ Mo kai Abraham, Isak, kɛ Yakob, o sɔmɔli ɔmɛ; nɛ o ko di ma nɛ ɔ tue wami, a yi mi wami, kɛ yayami ɔmɛ.’

²⁸ Ke pi ja a, Egipt bi ɔmɛ ma de ke, ‘Nyɛɛ hyɛ, a Mawu ɔ nyɛ we nɛ e kɛ mɛ ya su zugba nɛ e wo si ke e ma ha mɛ ɔ nɔ. A ma de ke o je o ma a kɛ ho nga kplanaa a nɔ ya, nɛ o ya gbe mɛ ngɛ lejɛ ɔ; ejakaa o sume a sane.

²⁹ O le kaa ma nɛ mo nitsɛ o hla ha o he, nɛ o kɛ kɔni si wami kpetekpleenyɛ je kɛ je Egipt ji nɛ ɔ nɛ.’