Mose V, 8 - BAIBLO ALOO NGMAMI KLƆUKLƆU Ɔ

Zugba kpakpa a

¹ “Nyɛɛ ye mlaa amɛ tsuo nɛ i ngɛ nyɛ woe mwɔnɛ ɔ a nɔ pɛpɛɛpɛ, konɛ nyɛ yi nɛ na wami, nɛ nyɛ he nɛ hiɛ, nɛ nyɛ ya ngɔ zugba a nɛ Yawɛ wo nyɛ nɛmɛ ɔmɛ si ke e ma ha mɛ ɔ.

² Nyɛ kai kaa Yawɛ, nyɛ Mawu ɔ kpaka nyɛ ngɛ blɔ gagaa nɛ ɔ nɔ kɛ gu nga kplanaa a nɔ jeha nyingmi eywiɛ sɔuu. E ha hɛdo níhi kɛ nyɛ kpe kɛ ka nyɛ hyɛ, konɛ e kɛ le nɔ́ nɛ ngɛ nyɛ tsui mi, kaa nyɛ maa ye e mlaa amɛ a nɔ, loo nyɛ be a nɔ yee.

³ E ha hwɔ ye nyɛ, nɛ e ha nyɛ abolo nɛ je hiɔwe nɛ nyɛ nɛmɛ nɛ hyɛ ɔ nɛ nyɛ ye. E pee enɛ ɔ, konɛ nyɛ na nɛ nyɛɛ le kaa pi abolo pɛ nɛ haa nɔmlɔ yi naa wami, se mohu munyu tsuaa munyu nɛ jeɔ Yawɛ nya mi ɔ nɛ haa nɔ yi naa wami.

⁴ Jeha nyingmi eywiɛ nɛ ɔ tsuo mi ɔ, nyɛ tade gba we ngɛ nyɛ he, nɛ nyɛ nanehi hu fuu we.

⁵ Nyɛ na nɛ nyɛɛ le kaa bɔ nɛ tsɛ tsɔseɔ e bi ɔ, ja Yawɛ, nyɛ Mawu ɔ ngɛ nyɛ tsɔsee ɔ nɛ.

⁶ Lɔ ɔ he ɔ, nyɛɛ pee bɔ nɛ Yawɛ, nyɛ Mawu ɔ fa nyɛ ɔ; nyɛɛ ye e mlaa amɛ a nɔ, nɛ nyɛɛ ye lɛ gbeye.

⁷ Yawɛ, nyɛ Mawu ɔ kɛ nyɛ yaa zugba nɛ baa ní saminya ko nɔ. Pahi, kɛ nyu hɛngmɛhi ngɛ nɔ, nɛ jehanɛ nyu pãã si kɛ jee zu mi nɛ e suɔ kɛ pueɔ yoku ɔmɛ a nɔ, kɛ kɔ̃ ɔmɛ a mi.

⁸ E ji zugba nɛ ngma, blɛfo, wai yiblii, ngmɔkɔ, tso nɛ yiblii ngɔɔ, oliv tso, kɛ hwo ngɛ nɔ.

⁹ Hwɔ be nyɛ yee, nɛ nɔ́ ko nɔ́ ko be nyɛ hiae. Tɛ nɛ ngɛ zugba a mi ɔ, dade ngɛ mi. Yo ɔmɛ a mi hu akɔblee ngɛ nɛ nyɛ ma nyɛ maa tsua.

¹⁰ Nyɛ ma na ní maa ye maa tɔ; nɛ nyɛ maa na Yawɛ, nyɛ Mawu ɔ si ngɛ zugba nɛ baa ní saminya nɛ e ha nyɛ ɔ he.

A bɔ ma a kɔkɔ ke a hɛ ko je Mawu nɔ

¹¹ “Nyɛɛ hyɛ nɛ hi nɛ nyɛ hɛ ko je Yawɛ, nyɛ Mawu ɔ nɔ. Nyɛ hɛ nɛ hi mlaa amɛ nɛ i ngɛ nyɛ woe mwɔnɛ ɔ a nɔ, nɛ nyɛɛ ye a nɔ.

¹² Ke nyɛ ná ngma nɛ nyɛ ye nɛ nyɛ tɔ, nɛ nyɛ ma tsuhi nɛ ngɛ fɛu nɛ nyɛ ngɛ mi;

¹³ jehanɛ, ke nyɛ na amɛ kɛ to ɔmɛ, nyɛ sika hiɔ kɛ sika tsu, kɛ ní kpa amɛ tsuo ba hiɛ babauu ɔ,

¹⁴ nyɛɛ hyɛ saminya nɛ nyɛ ko wo nyɛ he nɔ, nɛ nyɛ hɛ ba je Yawɛ, nyɛ Mawu ɔ nɔ. Lɛ nɛ je nyɛ kɛ je Egipt, he nɛ a ye nyɛ nyɔguɛ ngɛ ɔ.

¹⁵ Lɛ ji nɔ nɛ kpaka nyɛ kɛ gu nga kplanaa gbajaa nɛ nɔ ngɛ gbeye ɔ nɔ ɔ nɛ. Lejɛ ɔ nɛ a naa sinɔhi nɛ a duɔ nya wa, kɛ nyingmogblakotohi ngɛ ɔ nɛ. Jehanɛ, ngɛ nga kplanaa a nɔ he nɛ nyu be ɔ, e je nyu kɛ je tslɛbo tɛ sa mi ha nyɛ.

¹⁶ Ngɛ nga a nɔ ɔ, e ha nyɛ mana, niye ní nɛ nyɛ nɛmɛ yi hyɛ, nɛ nyɛ ye. E ha nyɛ na hɛdo ní, nɛ e kɛ ka nyɛ hyɛ, konɛ lɔ ɔ se ɔ, e gbaa nyɛ kɛ ní kpakpahi.

¹⁷ E pee ja, konɛ nyɛ ko susu kaa nyɛ nitsɛmɛ nyɛ he wami nya nɛ nyɛ na ní nɛ ɔmɛ tsuo.

¹⁸ Nyɛ kai kaa Yawɛ, nyɛ Mawu ɔ ji nɔ nɛ haa nyɛ he wami nɛ nyɛ kɛ naa ní. E ngɛ enɛ ɔmɛ pee, ejakaa e ngɛ anɔkuale yee kɛ mwɔɔ ngɛ somi nɛ e kɛ nyɛ nɛmɛ ɔmɛ so ɔ he.

¹⁹ Nyɛ hɛ ko je Yawɛ, nyɛ Mawu ɔ nɔ kɔkɔɔkɔ; nyɛ ko nyɛɛ mawu kpahi a se; nyɛ ko ya ja mɛ, nɛ nyɛ ko sɔmɔ mɛ. Ke nyɛ pee ja a, lɛɛ i ngɛ nyɛ kɔkɔ bɔe mwɔnɛ ɔ kaa a ma kpata nyɛ hɛ mi.

²⁰ Ke nyɛ bui Yawɛ, nyɛ Mawu ɔ tue ɔ, lɛɛ e ma kpata nyɛ hɛ mi kaa bɔ nɛ e ngɛ je ma amɛ a hɛ mi kpatae ngɛ nyɛ blɔ nɔ ɔ.