Mose V, 7 - BAIBLO ALOO NGMAMI KLƆUKLƆU Ɔ

Nyɔmtsɛ ɔ nitsɛ e ma

¹ “Yawɛ, nyɛ Mawu ɔ maa ngɔ nyɛ kɛ ya su zugba a nɛ nyɛ yaa ngɔ ɔ nɔ, nɛ e maa fie je mahi babauu kɛ je zugba a nɔ ha nyɛ. Je ma kpaago nɛ a he hiɛ, nɛ a he wa kulaa pe nyɛ Yawɛ maa fie ngɛ nyɛ blɔ ɔ nɔ: Hit bi, Girgash bi, Amor bi, Kanaan bi, Periz bi, Hiv bi, kɛ Yebus bi.

² Ke be ɔ su nɛ Yawɛ, nyɛ Mawu ɔ je mɛ ngɔ wo nyɛ dɛ, nɛ nyɛ ye a nɔ ɔ, nyɛ kpata mɛ tsuo a hɛ mi pɛsɛpɛsɛ. Nyɛɛ kɛ ma ko ma ko kó so nɛ nyɛɛ pee kake; nyɛ ko na mɛ mɔbɔ.

³ Nyɛ ko ngɔ nyɛ biyi ɔmɛ ngɔ ha a binyumu ɔmɛ gba; nɛ nyɛ ko ha nyɛ binyumu ɔmɛ hu ya ngɔ a biyi ɔmɛ.

⁴ Ejakaa a ma kpaka nyɛ bimɛ ɔmɛ kɛ je Yawɛ he kɛ ya ja mawu kpahi. Ke e ba mi ja a, Yawɛ mi mi ma fu, nɛ e ma kpata nyɛ hɛ mi amlɔ.

⁵ Bɔ nɛ nyɛɛ pee mohu ji kaa nyɛɛ ku a bɔ sami la tɛ ɔmɛ; nyɛɛ ywia mɛ dukuduku, nɛ nyɛɛ ywia a yo mawu nɛ a tsɛɛ Ashera a we amaga a, nɛ nyɛɛ sã wɔ ɔmɛ.

⁶ Nyɛɛ pee ja, ejakaa Yawɛ, nyɛ Mawu ɔ hla nyɛ kɛ je nihi tsuo nɛ ngɛ je ɔ mi ɔ a kpɛti, bɔ nɛ pee nɛ nyɛɛ pee lɛ nitsɛ e ma pɔtɛɛ.

⁷ “Pi hiɛmi nɛ nyɛ he hiɛ pe ma kpa amɛ he je nɛ Yawɛ suɔ nyɛ nɛ e hla nyɛ ɔ; nyɛ mohu ji nihi nɛ a he pi pe kulaa ngɛ ma amɛ a kpɛti.

⁸ Suɔmi mohu Yawɛ suɔ nyɛ; nɛ kita nɛ e ka nyɛ nɛmɛ ɔmɛ ɔ, e suɔ kaa e maa ye nɔ. Enɛ ɔ he je nɛ Yawɛ kɛ kɔni si wami je nyɛ, nɛ e kpɔ̃ nyɛ kɛ je nyɔguɛ yemi mi kɛ je Egipt matsɛ ɔ dɛ mi ɔ nɛ.

⁹ Nyɛ na nɛ nyɛɛ le kaa Yawɛ, nyɛ Mawu ɔ, lɛ pɛ ji Mawu, nɛ e yeɔ anɔkuale. E maa ye e somi nɔ, nɛ e ma je e suɔmi nɛ ngɛ daa a kpo kɛ tsɔɔ yi nɔhi akpe abɔ nɛ suɔ lɛ, nɛ a yeɔ e mlaa amɛ a nɔ ɔ,

¹⁰ se ni nɛmɛ nɛ sume lɛ ɔ, e maa gbla a tue amlɔ.

¹¹ Lɔ ɔ he ɔ, nyɛɛ ye níhi nɛ a tsɔɔ nyɛ ɔ a nɔ; nyɛɛ ye mlaa amɛ tsuo nɛ i wo nyɛ mwɔnɛ ɔ a nɔ pɛpɛɛpɛ.

Gbaami jeɔ tue bumi mi

¹² “Ke nyɛ bu mlaa nɛ ɔmɛ tue, nɛ nyɛ ye a nɔ pɛpɛɛpɛ ɔ, lɛɛ Yawɛ, nyɛ Mawu ɔ maa ye somi nɛ e kɛ nyɛ so ɔ nɔ, nɛ e ma je e suɔmi nɛ ngɛ daa a kpo kɛ tsɔɔ nyɛ kaa bɔ nɛ e wo nyɛ nɛmɛ ɔmɛ si ɔ;

¹³ e maa suɔ nyɛ, nɛ e maa gbaa nyɛ. E ma ha nyɛ he maa hiɛ, nɛ nyɛ ma fɔ bimɛ babauu. E maa gbaa nyɛ ngmɔ ɔmɛ, nɛ nyɛ ma na blɛfo, wai, kɛ oliv nu. E maa gbaa nyɛ, nɛ nyɛ na amɛ kɛ to ɔmɛ maa bɔ. Gbaami nɛ ɔmɛ tsuo e kɛ maa gbaa nyɛ ngɛ zugba nɛ e ka nyɛ nɛmɛ ɔmɛ kita ke e ma ngɔ ha nyɛ ɔ nɔ.

¹⁴ Ma ko ma ko be je ɔ mi nɛ a maa gbaa mɛ babauu kaa nyɛ. A be nyumu ko, loo yo ko nae ngɛ nyɛ kpɛti nɛ be fɔe; nɛ nyɛ lohwe ɔmɛ hu ja nɔuu.

¹⁵ Yawɛ be hae nɛ hiɔ nɛ nu nyɛ; nɛ Egipt hiɔ yaya amɛ nɛ nyɛ le ɔ ekoeko be nyɛ he sae; nyɛ he nyɛli mohu lɛ a maa nu hiɔ yaya nɛ ɔmɛ.

¹⁶ Ma tsuaa ma nɛ Yawɛ, nyɛ Mawu ɔ ma je ngɔ wo nyɛ dɛ ɔ, nyɛ kpata a hɛ mi; nyɛ ko na mɛ mɔbɔ. Nyɛ ko ja a mawu ɔmɛ. Ke nyɛ pee ja a, nyɛ hɛ mi ma kpata.

¹⁷ “Nyɛ ko de nyɛ he ke, ‘Ni ɔmɛ a he hiɛ pe wɔ, nɛ kɛ wa maa pee kɛ fie mɛ kɛɛ?’

¹⁸ Nyɛ ko ye mɛ gbeye; nyɛ kai nɔ́ nɛ Yawɛ, nyɛ Mawu ɔ pee Egipt bi ɔmɛ tsuo, kɛ a matsɛ ɔ.

¹⁹ Nyɛ kai gbenɔ hiɔhi nɛ a nya wa nɛ nyɛ na kɛ nyɛ hɛngmɛ ɔ. Nyɛ kai okadihi, kɛ nyakpɛ níhi nɛ Yawɛ, nyɛ Mawu ɔ kɛ kɔni si wami pee kɛ kpɔ̃ nyɛ ɔ. Bɔ nɛ Yawɛ kpata Egipt bi ɔmɛ a hɛ mi ɔ, jã kɛ̃ e maa pee je ma amɛ tsuo nɛ nyɛ ngɛ mɛ gbeye yee ɔ.

²⁰ Yawɛ, nyɛ Mawu ɔ ma ha sawale maa nu mɛ; nɛ ni nɛmɛ nɛ tu fo ngɛ nyɛ nya ya laa a he ɔ hu a hɛ mi ma kpata.

²¹ Lɔ ɔ he ɔ, nyɛ ko ye nyɛ he nyɛli ɔmɛ gbeye. Yawɛ, nyɛ Mawu ɔ kɛ nyɛ ngɛ; e ji Mawu kpetekpleenyɛ nɛ sa nɛ a ye lɛ gbeye.

²² Nyɛ maa na kaa bɔɔbɔɔ ɔ, Yawɛ, nyɛ Mawu ɔ maa fie je ma amɛ kɛ maa je nyɛ blɔ nɔ ha nyɛ. Nyɛ be mɛ tsuo a hɛ mi nyɛe ma kpata si kake too; ke nyɛ pee ja a, nga mi lohwe awi yeli ɔmɛ maa hiɛ tsɔ, nɛ a maa hao nyɛ.

²³ Se kɛ̃ ɔ, Yawɛ, nyɛ Mawu ɔ maa ngɔ nyɛ he nyɛli ɔmɛ ngɔ wo nyɛ dɛ; sawale maa nu mɛ, nɛ a ma jija kɛ yaa si be nɛ a hɛ mi ma kpata pɛsɛpɛsɛ.

²⁴ E maa ngɔ a matsɛmɛ ɔmɛ ngɔ wo nyɛ dɛ. Nyɛɛ gbe mɛ nɛ a biɛ nɛ laa kulaa. Nɔ ko nɔ ko be nyɛ hɛ mi nyɛe maa da; nyɛ ma kpata nɔ tsuaa nɔ hɛ mi.

²⁵ Nyɛɛ sã a we amaga amɛ. Nyɛ hɛ ko kɔ̃ a sika hiɔ, loo sika tsu nɔ; nyɛ ko ngɔ ekoeko. Ke nyɛ ngɔ eko ɔ, e maa pee gbenɔ ha nyɛ; ejakaa Yawɛ, nyɛ Mawu ɔ sume amaga jami.

²⁶ Nyɛ ko ngɔ amaga nɛ ɔ eko kɛ ba nyɛ we ɔmɛ a mi; ke nyɛ pee ja a, gbiɛmi nɛ ngɛ amaga amɛ a nɔ ɔ maa ba nyɛ nɔ. Nyɛɛ nyɛ, nɛ nyɛɛ hie amaga amɛ, ejakaa Yawɛ gbiɛmi ngɛ a nɔ.