Mose V, 6 - BAIBLO ALOO NGMAMI KLƆUKLƆU Ɔ

Mlaa ngua a

¹ “Mlaahi nɛ Yawɛ, nyɛ Mawu ɔ fa mi ke ma tsɔɔ nyɛ ji nɛ ɔmɛ nɛ. Nyɛɛ ye a nɔ ngɛ zugba a nɛ nyɛ yaa ngɔ nɛ nyɛɛ hi nɔ ɔ nɔ.

² Nyɛɛ ye Yawɛ, nyɛ Mawu ɔ gbeye, nɛ nyɛɛ ye e mlaa amɛ nɛ i ngɛ nyɛ woe, kɛ e blɔ nya tomi ɔmɛ nɛ i ngɛ nyɛ hae nɛ ɔ a nɔ. A ngɛ kɛ ha nyɛ nitsɛmɛ, nyɛ bimɛ, kɛ nyɛ nina nyɛ wami be tsuo. Nyɛɛ ye a nɔ, konɛ nyɛ se nɛ kɛ ngɛ zugba a nɔ.

³ Israel ma, nyɛɛ bu tue, nɛ nyɛɛ ye mlaa amɛ a nɔ. Lɔ ɔ loko níhi a mi maa hi ha nyɛ, nɛ nyɛ maa pee ma ngua, nɛ nyɛ maa hi zugba kpakpa nɛ baa ní ɔ nɔ, kaa bɔ nɛ Yawɛ, wa nɛmɛ a Mawu ɔ wo si ɔ.

⁴ “Israel ma, nyɛ hɛ nɛ hi nɔ kaa Yawɛ, wa Mawu ɔ, lɛ pɛ ji Mawu.

⁵ Nyɛɛ suɔ Yawɛ, nyɛ Mawu ɔ kɛ nyɛ tsui tsuo, kɛ nyɛ klaa tsuo, kɛ nyɛ he wami tsuo.

⁶ Mlaahi nɛ i ngɛ nyɛ woe mwɔnɛ ɔ, nyɛ hɛ nɛ hi a nɔ.

⁷ Nyɛɛ tsɔɔ nyɛ bimɛ. Nyɛɛ sɛɛ he ní be nɛ nyɛ ngɛ we mi, be nɛ nyɛ hia blɔ, be nɛ nyɛ hwɔɔ si, kɛ be nɛ nyɛ te si.

⁸ Nyɛɛ fi kɛ wo nyɛ kɔni si, kɛ nyɛ hɛ nya kaa kaimi nɔ́.

⁹ Nyɛɛ ngma ngɔ wo nyɛ sinya tso ɔmɛ a he, kɛ nyɛ agbo ɔmɛ a nya.

Tue gbomi he kɔkɔ bɔmi

¹⁰ “Kaa bɔ nɛ Yawɛ wo nyɛ nɛmɛ Abraham, Isak, kɛ Yakob si ke e ma ha nyɛ zugba ko kɛ e nɔ mahi nɛ pi nyɛ nɛ nyɛ po,

¹¹ wehi kɛ a mi ní kpakpahi babauu nɛ pi nyɛ nɛ nyɛ wo a mi ní ɔmɛ, nyu vuhi nɛ pi nyɛ nɛ nyɛ tsua, wai ngmɔhi, kɛ oliv tsohi nɛ pi nyɛ nɛ nyɛ du ɔ, ke nyɛ na ní nɛ ɔmɛ nɛ nyɛ ye, nɛ nyɛ tɔ ɔ,

¹² nyɛɛ hyɛ nɛ hi, nɛ nyɛ hɛ ko je Yawɛ nɔ. Ejakaa lɛ nɛ je nyɛ kɛ je Egipt zugba a nɔ, he nɛ a ye nyɛ nyɔguɛ ngɛ ɔ.

¹³ Nyɛɛ ye Yawɛ, nyɛ Mawu ɔ gbeye; nyɛ ja lɛ pɛ; nɛ e biɛ nyɛ kɛ ka kita.

¹⁴ Nyɛ ko ya nyɛɛ je ma amɛ nɛ bɔle nyɛ ɔ a mawu ɔmɛ a se.

¹⁵ Yawɛ, nyɛ Mawu ɔ nɛ kɛ nyɛ nyɛɛ ɔ, a kɛ lɛ plee we nɔ́ he. Lɔ ɔ he ɔ, ke nyɛ ya nyɛɛ mawu kpahi a se ɔ, e mi mi ma fu nyɛ, nɛ e ma kpata nyɛ hɛ mi pɛsɛpɛsɛ kaa bɔ nɛ la sãã nɔ́ ɔ.

¹⁶ “Nyɛ ko ka Yawɛ, nyɛ Mawu ɔ kaa bɔ nɛ nyɛ pee ngɛ Masa a.

¹⁷ Mlaa amɛ tsuo nɛ a ha nyɛ ɔ, nyɛɛ hyɛ nɛ nyɛɛ ye a nɔ pɛpɛɛpɛ.

¹⁸ Nɔ́ tsuaa nɔ́ nɛ Yawɛ de ke e da, loo e hi ɔ, nyɛɛ pee. Ke nyɛ pee ja a, e maa hi ha nyɛ, nɛ nyɛ ma nyɛ ya ngɔ zugba kpakpa a nɛ Yawɛ wo nyɛ nɛmɛ ɔmɛ si ke e ma ha mɛ ɔ;

¹⁹ e maa fie nyɛ he nyɛli ɔmɛ tsuo kɛ je nyɛ blɔ nɔ kaa bɔ nɛ e wo si ɔ.

²⁰ “Hwɔɔ se ko ke nyɛ bimɛ bi nyɛ ke, ‘Mɛni he je Yawɛ, wa Mawu ɔ fa wɔ ke waa ye mlaa amɛ tsuo a nɔ ɔ?’

²¹ nyɛ de mɛ ke, ‘Sa a, Egipt matsɛ nyɔguɛhi ji wɔ, nɛ Yawɛ kɛ kɔni si wami je wɔ kɛ je Egipt.

²² Yawɛ ha okadihi, kɛ nyakpɛ ní nguanguahi nɛ ngɛ gbeye ba Egipt bi ɔmɛ, kɛ a matsɛ ɔ, kɛ e we ɔ tsuo nɔ ngɛ wɔ tsuo wa hɛ mi.

²³ Se wɔɔ lɛɛ e je wɔ kɛ je lejɛ ɔ, nɛ e ngɔ zugba nɛ e ka wa nɛmɛ ɔmɛ kita ngɛ he ɔ ngɔ ha wɔ.

²⁴ Lɔ ɔ he ɔ, Yawɛ fa wɔ ke waa ye mlaa nɛ ɔmɛ tsuo a nɔ, nɛ waa ye lɛ gbeye, konɛ e hi ha wɔ nitsɛmɛ, nɛ wa yi nɛ na wami daa kaa bɔ nɛ e ngɛ mwɔnɛ ɔ.

²⁵ Ke wa ye nɔ́ tsuaa nɔ́ nɛ Yawɛ, wa Mawu ɔ fa wɔ ɔ nɔ pɛpɛɛpɛ ɔ, e bua maa jɔ wa he.’