Mose V, 5 - BAIBLO ALOO NGMAMI KLƆUKLƆU Ɔ

Mlaa nyɔngma amɛ

¹ Mose bua Israel ma a tsuo nya, nɛ e de mɛ ke, “Israel bi, nyɛɛ bu mlaa nɛ ɔmɛ tsuo nɛ i ngɛ nyɛ woe mwɔnɛ ligbi nɛ ɔ tue. Nyɛɛ kase mɛ nɛ nyɛɛ hyɛ nɛ nyɛɛ ye a nɔ.

² Yawɛ, wa Mawu ɔ kɛ wɔ so ngɛ Sinai yo ɔ he.

³ Pi e kɛ wa nɛmɛ ɔmɛ kɛkɛ, se wɔ tsuo pɛpɛɛpɛ nɛ wa ngɛ je mi mwɔnɛ ɔ.

⁴ Yawɛ kɛ nyɛ tu munyu hɛ mi kɛ hɛ mi kɛ je la mi, ngɛ yo ɔ nɔ.

⁵ I da si ngɛ nyɛɛ kɛ Yawɛ nyɛ kpɛti jamɛ a be ɔ, konɛ ma de nyɛ nɔ́ nɛ e ngɛ dee ɔ, ejakaa nyɛ ngɛ la a gbeye yee. “Nɛ nyɛ kuɛ yo ɔ.

⁶ Nɔ́ nɛ Yawɛ de ji nɛ ɔ nɛ: ‘Imi ji Yawɛ, o Mawu ɔ nɛ je mo kɛ je Egipt zugba a nɔ, kɛ je nyɔguɛ yemi mi ɔ nɛ.

⁷ “ ‘Ko ja mawu ko kɛ piɛ ye he.

⁸ “ ‘Koo puɛ amaga ko, loo nɔ́ ko nɛ ngɛ kaa nɔ́ ko nɛ ngɛ hiɔwe, loo nɔ́ ko nɛ ngɛ zugba a nɔ, loo nɔ ko nɛ ngɛ nyu mi ngɛ zugba a sisi.

⁹ Ko kpla si ha mɛ, nɛ ko ja mɛ hulɔ; ejakaa imi Yawɛ, o Mawu ɔ, a kɛ mi plee we nɔ́ he. I gblaa ni nɛmɛ nɛ nyɛɛɔ mi ɔ, kɛ a bimɛ, kɛ a bibimɛ a tue hluu kɛ ya siɔ yi nɔ etɛne kɛ eywiɛne bimɛ a nɔ;

¹⁰ se nihi akpe abɔ nɛ suɔ mi, nɛ a yeɔ ye mlaa amɛ a nɔ ɔ, mɛɛ lɛɛ i naa mɛ mɔbɔ.

¹¹ “ ‘Ko tsɛ Yawɛ, o Mawu ɔ biɛ yaka gu, ejakaa nɔ tsuaa nɔ nɛ peeɔ ja a, Yawɛ kɛ e he be lɛ kee.

¹² “ ‘Mo kai Hejɔɔmi ligbi ɔ, nɛ o ye lɛ ngɛ mumi mi he tsɔmi mi, kaa bɔ nɛ imi Yawɛ, o Mawu ɔ fa mo ɔ.

¹³ Ngɔɔ ligbi ekpa kɛ tsu nɔ́ tsuaa nɔ́ nɛ o ngɛ tsumi.

¹⁴ Ligbi nɛ ji kpaago ɔ ji Yawɛ, o Mawu ɔ Hejɔɔmi ligbi. Jamɛ a ligbi ɔ, ko tsu nɔ́ ko nɔ́ ko kulaa, mo nitsɛ jio, o binyumu jio, o biyo jio, o tsɔlɔ nyumu jio, o mawayo jio, o lohwe jio, nubwɔ nɛ ngɛ o ma a mi jio. Ha o tsɔlɔ nyumu, kɛ o mawayo hu nɛ a jɔɔ a he kaa bɔ nɛ mo hu o maa jɔɔ o he ɔ.

¹⁵ Kai kaa mo hu o ya ye nyɔguɛ ngɛ Egipt, nɛ imi Yawɛ, o Mawu ɔ kɛ kɔni si wami, kɛ nyɛmi kpɔ mo kɛ je lejɛ ɔ. Lɔ ɔ he nɛ i wo mo mlaa ke o ye Hejɔɔmi ligbi ɔ nɛ.

¹⁶ “ ‘Moo bu o tsɛ kɛ o nyɛ, kaa bɔ nɛ imi Yawɛ, o Mawu ɔ fa mo ɔ, konɛ e hi ha mo, nɛ o se nɛ kɛ ngɛ zugba nɛ Yawɛ, o Mawu ɔ ngɛ mo hae ɔ nɔ.

¹⁷ “ ‘Koo gbe nɔmlɔ.

¹⁸ “ ‘Ko puɛ gba.

¹⁹ “ ‘Koo ju.

²⁰ “ ‘Koo ye lakpa odase kɛ si o nyɛmi.

²¹ “ ‘O hɛ ko kɔ̃ o nyɛmi e yo nɔ; o hɛ ko kɔ̃ o nyɛmi e we, aloo e zugba, aloo e tsɔlɔ nyumu, aloo e mawayo, aloo e na, aloo e teji, aloo e nɔ́ kpa ko nɔ.’

²² “Benɛ nyɛ bua nyɛ he nya ngɛ yo ɔ he ɔ, mlaahi nɛ Yawɛ ngɔ ha nyɛ tsuo ji nɛ ɔmɛ nɛ. Benɛ e wo gbi kɛ je la, kɛ bɔku kpii ɔ mi ɔ, jamɛ be ɔ mi nɛ e ha nyɛ mlaa nɛ ɔmɛ, nɛ ekpa ko piɛ we he. Lɔ ɔ se ɔ, e ngma mɛ ngɛ tɛ tɛtlɛɛ enyɔ nɔ, nɛ e ngɔ mɛ ngɔ ha mi.

Israel bi ɔmɛ ye gbeye

²³ “Benɛ yo ɔ tsuo ngɛ tsoe kɛ la, nɛ nyɛ nu gbi ɔ kɛ je diblii ɔ mi ɔ, nyɛ wɛtsoyi ɔmɛ tsuo, kɛ nyɛ nikɔtɔma amɛ ba ye ngɔ, ba de ke,

²⁴ ‘Hyɛ kaa Yawɛ, wa Mawu ɔ ha nɛ wa na e we agboje, kɛ e hɛ mi nyami ɔ, benɛ wa nu e gbi nɛ e tu munyu kɛ je la a mi ɔ! Mwɔnɛ ɔ, wa na kaa ke Mawu kɛ nɔmlɔ adesa tu munyu po nɔmlɔ adesa ma nyɛ maa hi je mi hɛ ngmengmle.

²⁵ Mɛni he je e sa nɛ wa wo wa he kɛ wo gbenɔ mi ekohu? La gegeege ɔ ma ngla wɔ pɛsɛpɛsɛ. Ke wa nu Yawɛ, wa Mawu ɔ gbi ekohu ɔ, wa ma gbo.

²⁶ Anɛ nɔmlɔ adesa ko kɛ Mawu tu munyu kɛ je la mi nɛ e hi je mi hɛ ngmengmle hyɛ kaa bɔ nɛ wa na nɛ ɔ lo?

²⁷ Mose, moo kpale kɛ ho nɛ o ya bu nɔ́ tsuaa nɔ́ nɛ Yawɛ ma de mo ɔ tue, konɛ o ba de wɔ nɔ́ nɛ e de mo ɔ. Wa maa bu mo tue, nɛ wa maa ye nɔ.’

²⁸ “Yawɛ nu munyu ɔmɛ, benɛ nyɛɛ kɛ mi ngɛ munyu ɔmɛ tsuo tue ɔ; nɛ Yawɛ de mi ke, ‘I nu munyu ɔmɛ nɛ ma a de mo ɔ; anɔkuale ɔ sisiisi a de ɔ nɛ.

²⁹ I ná nɛ ma a na juɛmi daa kikɛ nɛ ɔ, nɛ a wo ye hɛ mi nyami be tsuaa be, nɛ a ye ye mlaa amɛ tsuo a nɔ, konɛ nɔ́ tsuaa nɔ́ nɛ hi ha mɛ kɛ a nina kɛ ya neneene!’

³⁰ Yaa nɛ o ya de mɛ ke, ‘Nyɛɛ kpale kɛ ho nyɛ bo tsu ɔmɛ a mi ya.

³¹ Se mo Mose lɛɛ, hii hiɛmɛ nɛ ɔ ngɛ ye ngɔ, nɛ ma ha mo mlaa amɛ, kɛ fami ɔmɛ tsuo. O tsɔɔ ma a, nɛ a ye nɔ ngɛ zugba nɛ i ngɛ mɛ hae ɔ nɔ.’

³² “Israel ma, i ngɛ nyɛ dee ke nyɛɛ hyɛ saminya, nɛ nyɛɛ ye nɔ́ tsuaa nɔ́ nɛ Yawɛ, nyɛ Mawu ɔ ngɛ nyɛ fae ke nyɛɛ pee ɔ nɔ. Nyɛ ko gbo e mlaa amɛ ekoeko tue.

³³ Nyɛɛ ye nɔ́ nɛ Yawɛ fa nyɛ ɔ tsuo nɔ pɛpɛɛpɛ, konɛ nyɛɛ hi je mi, nɛ níhi a mi nɛ hi ha nyɛ; lɔ ɔ loko nyɛ se maa kɛ ngɛ zugba a nɛ nyɛ yaa ngɔ ɔ nɔ.