Mose V, 4 - BAIBLO ALOO NGMAMI KLƆUKLƆU Ɔ

Mose de Israel ma a ke a ye mlaa amɛ a nɔ pɛpɛɛpɛ

¹ Jehanɛ Mose de Israel ma a ke, “Nyɛɛ bu mlaa amɛ nɛ ma tsɔɔ nyɛ ɔ tue, nɛ nyɛɛ ye a nɔ, konɛ nyɛ yi nɛ na wami, nɛ́ nyɛ ya ngɔ zugba a nɛ Yawɛ, nyɛ nɛmɛ a Mawu ɔ kɛ ngɛ nyɛ hae ɔ.

² Nyɛ ko ngɔ nɔ́ ko kɛ piɛ mlaa nɛ i ngɛ nyɛ woe nɛ ɔ he; nɛ nyɛ ko je nɔ́ ko kɛ je mi; nyɛɛ ye Yawɛ, nyɛ Mawu ɔ mlaa amɛ nɛ i ngɛ nyɛ woe nɛ ɔ a nɔ pɛpɛɛpɛ.

³ Nyɛ nitsɛmɛ nyɛ na nɔ́ nɛ Yawɛ pee ngɛ Peor yo ɔ he. Nɔ tsuaa nɔ nɛ ya nyɛɛ Baal se ngɛ lejɛ ɔ, Yawɛ, nyɛ Mawu ɔ kpata e hɛ mi.

⁴ Se nyɛ nihi tsuo pɛpɛɛpɛ nɛ nyɛ mɛtɛ Yawɛ, nyɛ Mawu ɔ he ɔ, nyɛ ngɛ wami mi kɛ mwɔɔ.

⁵ “I tsɔɔ nyɛ mlaa amɛ tsuo kaa bɔ nɛ Yawɛ, ye Mawu ɔ fa mi ke ma pee ɔ; nyɛɛ ye a nɔ ngɛ zugba nɛ nyɛ yaa ngɔ ɔ nɔ.

⁶ Nyɛɛ ye a nɔ pɛpɛɛpɛ, konɛ ma amɛ tsuo nɛ maa nu blɔ nya tomi nɛ ɔmɛ tsuo a he ɔ, a de ke, ‘Niinɛ, ma kpetekpleenyɛ nɛ le ní, nɛ ngɛ juɛmi saminya ji nɛ ɔ nɛ!’

⁷ “Ma kpetekpleenyɛ te nɛ ngɛ nɛ e mawuhi baa e kasa nya kikɛ nɛ ɔ, kaa bɔ nɛ Yawɛ, wa Mawu ɔ baa wa ngɔ be tsuaa be nɛ wa tsɛ lɛ ɔ?

⁸ Jehanɛ hu, ma kpetekpleenyɛ te nɛ ngɛ nɛ e mlaahi da kaa ní nɛmɛ tsuo nɛ i ngɛ nyɛ tsɔɔe mwɔnɛ nɛ ɔ?

⁹ Nyɛɛ hyɛ saminya! Nyɛ hɛ nɛ hi nyɛ he nɔ ngɛ níhi nɛ nyɛ na kɛ nyɛ nitsɛmɛ nyɛ hɛngmɛ ɔ a he. Nyɛ hɛ ko je nɔ ligbi ko ligbi ko nyɛ wami be tsuo. Nyɛɛ tsɔɔ nyɛ bimɛ, kɛ nyɛ bibimɛ nɛ a le,

¹⁰ kaa ligbi ɔ nɛ nyɛ da si ngɛ Sinai yo ɔ he ngɛ Yawɛ, nyɛ Mawu ɔ hɛ mi ɔ, Yawɛ de mi ke, ‘Bua ma a nya. Ha nɛ a bu nɔ́ nɛ ma de mɛ ɔ tue, konɛ a ye mi gbeye a wami be tsuo; nɛ a tsɔɔ a bimɛ, nɛ mɛ hu a ye mi gbeye.’

¹¹ “Nyɛ de nyɛ bimɛ bɔ nɛ nyɛ ba da si ngɛ yo ɔ sisi, kɛ bɔ nɛ yo ɔ ngɛ tsoe, nɛ la a ya hiɔwe ploplooplo, nɛ bɔku wo diblii kpii kɛ bɔle yo ɔ.

¹² Jehanɛ, nyɛ de mɛ bɔ nɛ Yawɛ kɛ nyɛ tu munyu kɛ je la a mi. Nyɛ nu munyu ɔmɛ, se nyɛ nɛ́ lɛ nitsɛ e su ko kulaa; gbi ɔ kɛkɛ nɛ nyɛ nu nɛ ngɛ munyu ɔmɛ tue.

¹³ E tsɔɔ nyɛ bɔ nɛ nyɛ maa pee kɛ ye somi nɛ e kɛ nyɛ so ɔ nɔ; lɔ ɔ ji kaa nyɛ maa ye mlaa nyɔngma amɛ nɛ e ngma ngɛ tɛ tɛtlɛɛ enyɔ ɔmɛ a nɔ ɔ a nɔ.

¹⁴ Yawɛ de mi jamɛ a be ɔ mi ke ma tsɔɔ nyɛ mlaa amɛ tsuo nɛ nyɛ maa ye a nɔ ngɛ zugba a nɛ nyɛ yaa ngɔ ɔ nɔ ɔ.

A bɔ ma a kɔkɔ ngɛ amaga jami he

¹⁵ “Benɛ Yawɛ kɛ nyɛ tu munyu kɛ je la a mi ngɛ Sinai yo ɔ nɔ ɔ, nyɛ nɛ́ su ko su ko. Lɔ ɔ he ɔ, nyɛɛ hyɛ nyɛ he nɔ saminya,

¹⁶ konɛ nyɛ ko ya ye sane yaya, nɛ nyɛ ya pee amaga ko ha nyɛ he, nɛ ngɛ kaa nyumu, loo yo,

¹⁷ loo lohwe ko nɛ ngɛ zugba a nɔ, loo lohwe pɛlitsɛ nɛ tee ngɛ kɔɔhiɔ mi,

¹⁸ loo nɔ́ ko nɛ waa, loo lo. Nyɛ ko pee ekoeko henɔ ko kulaa.

¹⁹ Nyɛ ko ha níhi nɛ nyɛ ngɛ hyɛe ngɛ hiɔwe ɔ, pu, nyɔhiɔ, kɛ dodoehi babauu nɛ ha si ngɛ hiɔwe nɛ ɔ nɛ gbla nyɛ juɛmi kɛ ya ja mɛ, nɛ nyɛ sɔmɔ mɛ. Ejakaa Yawɛ, nyɛ Mawu ɔ ngɔ mɛ ngɔ ha ma amɛ tsuo nɛ ngɛ je ɔ mi ɔ.

²⁰ Se nyɛɛ lɛɛ, Yawɛ kpɔ̃ nyɛ kɛ je Egipt yi mi wami wawɛɛ ɔ sisi. E je nyɛ konɛ e pee nyɛ lɛ nitsɛ e ma kulaa, kaa bɔ nɛ nyɛ ji mwɔnɛ nɛ ɔ.

²¹ Nyɛ he ɔ, Yawɛ, nyɛ Mawu ɔ mi mi fu mi, nɛ e ka kita ke i be Yordan pa a poe kɛ ya zugba kpakpa a nɛ e ngɔ kɛ ngɛ nyɛ hae ɔ nɔ.

²² Imi lɛɛ ma gbo ngɛ hiɛ ɔ, ngɛ zugba nɛ ɔ nɔ, nɛ i be Yordan pa a poe; se nyɛɛ lɛɛ nyɛ maa po pa a kɛ ya ngɔ zugba kpakpa a.

²³ Nyɛɛ hyɛ nɛ hi, konɛ nyɛ hɛ ko je somi nɛ Yawɛ, nyɛ Mawu ɔ kɛ nyɛ so ɔ nɔ. Mlaa nɛ e wo nyɛ ke nyɛ ko pee amaga ko ɔ, nyɛɛ ye nɔ.

²⁴ Ejakaa Yawɛ, nyɛ Mawu ɔ ngɛ kaa la nɛ ngɛ tsoe plamplam; a kɛ lɛ plee we nɔ́ he.

²⁵ “Ke nyɛ se kɛ ngɛ zugba a nɔ, nɛ nyɛ ná bimɛ, kɛ bibimɛ ɔ, nyɛ ko pee yayami kaa nyɛ maa puɛ amaga ko nɛ ngɛ su ko kulaa ha nyɛ he. E ji yayami agbo ngɛ Yawɛ hɛ mi nɛ ma ha e mi mi maa wo la.

²⁶ I tsɛ hiɔwe kɛ zugba odase kaa ke nyɛ bui mi tue ɔ, nyɛ hɛ mi ma kpata ngɛ zugba a nɔ. Lɛɛ zugba a nɛ nyɛ yaa ngɔ ngɛ Yordan pa a se ɔ, nyɛ se be kɛe ngɛ nɔ. A ma kpata nyɛ hɛ mi pɛsɛpɛsɛ.

²⁷ Yawɛ maa gbɛ nyɛ ngɔ fĩa je ma kpa amɛ a mi, nɛ nyɛ ti nihi bɔɔ pɛ nɛ a yi ma na wami.

²⁸ Nyɛ ma ya sɔmɔ mawuhi nɛ a kɛ nɔmlɔ adesa nine pee ngɛ lejɛ ɔ, mawuhi nɛ a kɛ tso pee, mawuhi nɛ a kɛ tɛ pee, mawuhi nɛ hyɛ we nɔ́, nɛ a nui nɔ́, kɛ mawuhi nɛ a yi ní, nɛ a nui nɔ́ he fu.

²⁹ Nyɛ ma hla Yawɛ, nyɛ Mawu ɔ ngɛ lejɛ ɔ. Ke nyɛ hla lɛ kɛ nyɛ tsui tsuo ɔ, nyɛ maa na lɛ.

³⁰ Ke nyɛ ngɛ amanehlu mi, nɛ ní nɛ ɔmɛ tsuo ba nyɛ nɔ ɔ, lɔ ɔ loko nyɛ maa kpale kɛ ba Yawɛ, nyɛ Mawu ɔ ngɔ, nɛ nyɛ maa bu lɛ tue.

³¹ Akɛnɛ Yawɛ, nyɛ Mawu ɔ, mɔbɔ nalɔ ji lɛ he je ɔ, e be nyɛ kuae, nɛ e be nyɛ hɛ mi kpatae; e hɛ be somi nɛ e kɛ nyɛ nɛmɛ ɔmɛ so ɔ nɔ jee.

³² “Jehanɛ, nyɛ bi ngɛ je ɔ mi tsuo kulaa kaa kɛ je blema lokoo loko a fɔ nyɛ, kɛ je be nɛ Mawu bɔ nɔmlɔ ngɛ zugba a nɔ ɔ, anɛ sane nguaa ko kaa enɛ ɔ eko ba hyɛ, loo a nu eko hyɛ lo?

³³ Anɛ ma ko nu mawu ko gbi hyɛ nɛ e kɛ mɛ tu munyu kɛ je la mi nɛ a gbo we, se a ngɛ hɛ ngmengmle kaa bɔ nɛ nyɛ ngɛ nɛ ɔ lo?

³⁴ Anɛ mawu ko ka hyɛ kaa e ma ya je je ma ko kɛ je je ma kpa ko mi kɛ pee lɛ nitsɛ e ma, kaa bɔ nɛ Yawɛ, nyɛ Mawu ɔ pee ha nyɛ ngɛ Egipt ɔ lo? Nyɛ nitsɛmɛ nyɛ na kɛ nyɛ hɛngmɛ, bɔ nɛ e je e he wami, kɛ e nyɛmi kpetekpleenyɛ ɔ kpo; e kɛ gbenɔ hiɔhi, kɛ ta ba; e pee okadihi, kɛ nyakpɛ níhi; nɛ e ha gbeye ní nguanguahi ba.

³⁵ Nyɛɛ lɛɛ Yawɛ ha nyɛ na ní nɛ ɔmɛ kɛ tsɔɔ nyɛ kaa Yawɛ ɔ, lɛ nɔ kake pɛ ji Mawu; nɛ nɔ ko nɔ ko be hu, ja lɛ pɛ.

³⁶ E ha nyɛ nu e gbi kɛ je hiɔwe, konɛ e kɛ tsɔse nyɛ; nyɛ na e la klɔuklɔu ɔ ngɛ zugba a nɔ, nɛ e kɛ nyɛ tu munyu kɛ je mi.

³⁷ Akɛnɛ e suɔ nyɛ nɛmɛ ɔmɛ he je ɔ, e hla nyɛ, nɛ lɛ nitsɛ e kɛ e he wami kpetekpleenyɛ ɔ je nyɛ kɛ je Egipt.

³⁸ E fie je mahi nɛ a he wa kɛ je nyɛ blɔ ɔ nɔ, nɛ e ngɔ a zugba a ngɔ ha nyɛ. Lejɛ ɔ nyɛ ngɛ kɛ mwɔɔ.

³⁹ Lɔ ɔ he ɔ, mwɔnɛ ɔ, nyɛ na nyɛɛ le, nɛ nyɛ hɛ ko je nɔ gblegbleegble kaa Yawɛ ji Mawu ngɛ hiɔwe kɛ zugba; e se ɔ, nɔ ko be.

⁴⁰ Nyɛɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ, konɛ e hi ha nyɛɛ kɛ nyɛ nina. Ke nyɛ ye a nɔ ɔ, nyɛ maa hi zugba nɛ Yawɛ, nyɛ Mawu ɔ kɛ ngɛ nyɛ hae ɔ nɔ daa.”

A to wesa he mahi ngɛ Yordan pa a beleku je

⁴¹ Enɛ ɔ se ɔ, Mose hla ma etɛ ngɛ Yordan pa a beleku je ngɔ to,

⁴² konɛ ke nɔ ko li e he be nɛ e nine ya kpa ngɛ e nyɛmi nɔ tlukaa nɛ pi ninyɛ nya a, e tu fo kɛ ya sa we ngɛ lejɛ ɔ. Ke e tu fo kɛ ho ma nɛ ɔmɛ eko mi ya a, e yi ma na wami; nɛ a be lɛ gbee.

⁴³ E hla Bezer nɛ ngɛ nga a nɔ ngɛ zugba kpataa a nɔ ha Ruben wɛtso ɔ, Ramot ngɛ Gilead ha Gad wɛtso ɔ, kɛ Golan nɛ ngɛ Bashan ɔ ha Manase wɛtso ɔ.

Munyuhi nɛ sɛ mlaa hami ɔ hɛ mi

⁴⁴ Mawu mlaa amɛ nɛ Mose ngɔ ha Israel bi ɔmɛ ji nɛ ɔmɛ nɛ.

^45-46 Benɛ Israel bi ɔmɛ je Egipt, nɛ a ba su kɔ̃ ɔ nɛ ngɛ Yordan pa a beleku je ngɛ Betpeor hanɔ ɔ, nɛ e ha mɛ mlaa nɛ ɔmɛ ɔ nɛ. Sa a, Amor bi ɔmɛ a matsɛ, Sihon nɛ je Heshbon ɔ nɛ ye zugba nɛ ɔ nɔ. Se Mose kɛ Israel bi ɔmɛ ba ye e nɔ, benɛ a je Egipt kɛ ma a.

⁴⁷ A ngɔ e zugba a, kɛ Amor matsɛ kpa ko nɛ a tsɛɛ lɛ Og nɛ hi Bashan nɛ ngɛ Yordan pa a beleku je ɔ hu e zugba a.

⁴⁸ Zugba nɛ ɔ huzu ji kɛ je Aroer ma a mi kɛ ya su Arnon pa a nya, kɛ ya na Sirion yo ɔ ngɛ leneyi je; lɔ ɔ ji Hermon yo ɔ nɛ.

⁴⁹ Zugba tsuo nɛ ngɛ Yordan pa a beleku je kɛ ya su Ngo wo ɔ nya, kɛ Pisga yo ɔ sisi hu piɛ he.