Mose V, 34 - BAIBLO ALOO NGMAMI KLƆUKLƆU Ɔ

Mose gbenɔ

¹ Kɛkɛ nɛ Mose je Moab nga kplanaa a nɔ, nɛ e ya kuɔ Nebo yo ɔ kɛ ho Pisga yo ɔ yi mi ya, ngɛ Yordan beleku je. Yawɛ kɛ zugba a tsuo pɛpɛɛpɛ tsɔɔ lɛ ngɛ lejɛ ɔ: Gilead zugba muza a tsuo, kɛ ya muɔ Dan ma a ngɛ omleyi je,

² Naftali zugba muza a tsuo, Efraim kɛ Manase zugba amɛ, Yuda zugba a tsuo, kɛ ya su bonyoku je ngɛ Mediterenia wo nya tɔɔ,

³ Yuda zugba a leneyi je, kɛ nga kplanaa a nɛ ngɛ kɛ je Zoar kɛ ya su ma ngua a nɛ tã ngɛ mi, nɛ e biɛ ji Yeriko ɔ.

⁴ Jehanɛ, Yawɛ de Mose ke, “Zugba a nɛ i wo Abraham, Isak, kɛ Yakob si ke ma ngɔ ha a nina a ji nɛ ɔ nɛ. I ha nɛ o na zugba a kɛ o hɛngmɛ lɛɛ, se be o lejɛ ɔ yae.”

⁵ Yawɛ tsɔlɔ Mose gbo ngɛ lejɛ ɔ, ngɛ Moab zugba a nɔ kaa bɔ nɛ Yawɛ de to ɔ.

⁶ Yawɛ pu lɛ ngɛ kɔ̃ ko mi, ngɛ Moab zugba a nɔ, ngɛ Betpeor ma a hanɔ; se nɔ ko nɔ ko li he tutuutu nɛ a pu lɛ ngɛ kɛ ba si mwɔnɛ ɔ.

⁷ Mose ye jeha lafa kɛ nyingmi enyɔ benɛ e gbo ɔ. E ngɛ nɔmlɔ tso he wami saminya, nɛ e hɛngmɛ hu hyɛɛ nɔ́ bɔ nɛ sa.

⁸ Israel ma a nyɛ ya ha lɛ ligbi nyingmi etɛ ngɛ Moab nga kplanaa a nɔ.

⁹ Nun bi, Yoshua nile nya ba bli, ejakaa Mose to lɛ si kaa nɔ nɛ ma ba ye e se. Israel ma a bu Yoshua tue, nɛ a ye mlaa amɛ nɛ Yawɛ wo mɛ kɛ gu Mose nɔ ɔ a nɔ.

¹⁰ Gbalɔ ko ti si hu ngɛ Israel kaa Mose, nɛ́ e kɛ Mawu tu munyu hɛ mi kɛ hɛ mi.

¹¹ Gbalɔ kpa ko hu tsu we nyakpɛ níhi nɛ Yawɛ ha nɛ Mose tsu ngɛ Egipt matsɛ ɔ, kɛ e tsɔli ɔmɛ, kɛ e zugba a tsuo nɔ ɔ kaa lɛ.

¹² Jehanɛ hu, gbalɔ kpa ko pee we ní nguanguahi nɛ ngɛ gbeye kaa níhi nɛ Mose pee ngɛ Israel ma a tsuo hɛ mi ɔ.