Mose V, 33 - BAIBLO ALOO NGMAMI KLƆUKLƆU Ɔ

Mose gbaa Israel wɛtso ɔmɛ

¹ Gbaami munyuhi nɛ Mawu nɔmlɔ, Mose kɛ gbaa Israel bi ɔmɛ loko e gbo ji nɛ ɔmɛ nɛ.

² Yawɛ kple si kɛ je Sinai yo ɔ nɔ kaa pu nɛ gba ngɛ Edom yo ɔ nɔ, nɛ e tso ha e ma a kɛ je Paran yo ɔ he. Mawu bɔfohi akpe nyɔngma piɛ e he; a ngɛ kaa la nɛ ngɛ tsoe plamplam ngɛ e hiɔ nɔ.

³ Yawɛ suɔ e ma a; nihi nɛ ji e ni klɔuklɔu ɔmɛ ɔ, e baa a yi. Lɔ ɔ he ɔ, wa kplaa si ngɛ e nane nya; wa jaa lɛ, nɛ wa yeɔ e mlaa amɛ a nɔ.

⁴ Wa yeɔ mlaa nɛ Mose wo wɔ ɔ nɔ; ejakaa wa ma a weto ní nitsɛnitsɛ ji Mawu mlaa a nɛ.

⁵ Benɛ Israel wɛtso ɔmɛ, kɛ nikɔtɔma amɛ tsuo ba bua a he nya a, Yawɛ ba pee a matsɛ.

⁶ Bɔ nɛ Mose gbaa Ruben wɛtso ɔ ji nɛ ɔ nɛ: “E ngɛ mi kaa Ruben bi ɔmɛ a he pi lɛɛ, se a yi nɛ na wami nɛ a ko gbo.”

⁷ Bɔ nɛ e gbaa Yuda wɛtso ɔ ji nɛ ɔ nɛ: “Yawɛ, moo bu Yuda bi ɔmɛ a kue fami tue. Mo bua a kɛ wɛtso kpa amɛ a nya, nɛ o pee mɛ kake. Yawɛ, moo hwu a ta a ha mɛ, nɛ a ye a he nyɛli ɔmɛ a nɔ.”

⁸ Jehanɛ, Mose gbaa Levi wɛtso ɔ hulɔ ke, “Yawɛ, mo je o suɔmi kpo kɛ gu Tumim kɛ Urim a nɔ. Ní nɛ ɔmɛ ji níhi nɛ Levi bi ɔmɛ, nɛ ji sɔmɔli nɛ yeɔ mo anɔkuale ɔ kɛ biɔ mo gbi ɔ nɛ. O ka Levi wɛtso ɔ ngɛ Masa, nɛ o kɛ mɛ pɛ ngɛ Meriba pa a nya.

⁹ A ngmɛɛ we o he, se mohu a kua a fɔli, kɛ a nyɛminyumu ɔmɛ, kɛ a bimɛ. A bu o gbi tue, nɛ a ye o somi ɔ nɔ.

¹⁰ A maa tsɔɔ Israel bi ɔmɛ o mlaa a, konɛ a ye nɔ. A maa sã bɔ ɔmɛ ngɛ o bɔ sami la tɛ ɔ nɔ.

¹¹ Lɔ ɔ he ɔ, Yawɛ, moo gbaa Levi bi ɔmɛ, nɛ a he nɛ wa. Ha nɛ a pee nɔ́ nɛ maa sa o hɛ mi. Moo ku a he nyɛli ɔmɛ tsuo a mi kɛ pue si, nɛ a ko te si gblegbleegble.”

¹² Bɔ nɛ Mose gbaa Benyamin wɛtso ɔ ji nɛ ɔ nɛ: “Yawɛ suɔ Benyamin bi ɔmɛ a sane, nɛ e baa a yi. E buu a he daa ligbi, nɛ e kɛ mɛ ngɛ.”

¹³ Bɔ nɛ e gbaa Yosef wɛtso ɔ ji nɛ ɔ nɛ: “Mawu nɛ gbaa a zugba a; hiɔmi nɛ nɛ kɛ pue nɔ, nɛ a ná nyu kɛ je zugba a mi hulɔ.

¹⁴ A gbaa zugba a; tso yiblii nɛ fu ngɛ nɔ; tso yiblii kpakpahi babauu nɛ ba ngɛ a be mi.

¹⁵ Tso yiblii ngɔngɔɛhi nɛ ha blema yo ɔmɛ a nɔ.

¹⁶ A na ní kpakpahi ngɛ a zugba a nɔ. Yawɛ nɛ gbaa ní ɔmɛ a nɔ. Lɛ nɔ nɛ e tu munyu kɛ je mio tso nɛ ngɛ tsoe mi ɔ, é gbaa Yosef wɛtso ɔ kɛ ní nɛ ɔmɛ tsuo. Ejakaa lɛ ji e nyɛmimɛ ɔmɛ a hɛngmɛ.

¹⁷ Yosef he wa kaa na ku; se e tsuɔ ní kaa na yo nɛ hɛ mi wo la. E he wami ɔ bɔbɔyoo pɛ lɛ ngɛ Manase; se hiɛhiɛɛ ɔ ngɛ Efraim. Yosef buaa a nya kɛ fieɔ a he nyɛli ɔmɛ kɛ yaa se lokoo kaa bɔ nɛ na kɛ e kolihi siɔ nɔ ɔ.”

¹⁸ Bɔ nɛ Mose gbaa Zebulun kɛ Isakar wɛtso ɔmɛ ji nɛ ɔ nɛ: “Zebulun nɛ ya nɔ saminya ngɛ wo nɔ jua yemi mi. Isakar nɛ na ní, nɛ e pee kplɔkɔtɔtsɛ ngɛ we.

¹⁹ A maa kpee nibwɔhi kɛ ba a yo ɔmɛ a nɔ, nɛ a maa sã bɔ nɛ sa ngɛ lejɛ ɔ. A ma na ní kɛ je wo mi, nɛ a ma na ní kɛ je wo nya zia hu mi.”

²⁰ Bɔ nɛ Mose gbaa Gad wɛtso ɔ ji nɛ ɔ nɛ: “Á je Mawu yi; lɛ nɛ bli Gad zugba a huzu mi. Gad woɔ ká kaa jata nɛ kplɔ lohwe ko kɔni, loo e tsɔ e yi ngɛ nya.

²¹ Benɛ Israel ma nimeli ɔmɛ ba bua a he nya a, Gad bi ɔmɛ ngɔ zugba a he nɛ hi pe kulaa a ngɔ ha a he. A ná nɔkɔtɔma blɔ nya. A bu Yawɛ gbi tue, nɛ a ye e mlaa amɛ a nɔ.”

²² Bɔ nɛ Mose gbaa Dan wɛtso ɔ ji nɛ ɔ nɛ: “Dan ngɛ kaa jata bi; e hii tuue ngɛ Bashan yo ɔ nɔ.”

²³ Bɔ nɛ Mose gbaa Naftali wɛtso ɔ ji nɛ ɔ nɛ: “Yawɛ mi mi jɔ ha Naftali bi ɔmɛ; e ha mɛ ní kpakpahi; e ha mɛ zugba kɛ je wo ɔ nya kɛ ya su leneyi je.”

²⁴ Bɔ nɛ Mose gbaa Asher wɛtso ɔ ji nɛ ɔ nɛ: “Asher ji wɛtso nɛ a gbaa pe kulaa ngɛ wɛtso ɔmɛ tsuo a kpɛti. Lɔ ɔ he ɔ, Asher nɛ ba pee kaa bi nɛ a suɔ lɛ pe bimɛ ɔmɛ tsuo, nɛ́ oliv tso babauu nɛ ba a zugba a nɔ.

²⁵ Á ma a ma amɛ a nya dade agbohi, konɛ a na he wami daa.”

²⁶ Nyagbe ɔ, bɔ nɛ Mose gbaa Israel ma a tsuo ji nɛ ɔ nɛ: “Israel ma, mawu ko mawu ko be kaa nyɛ Mawu ɔ nɛ nyɛɛɔ kɔɔhiɔ mi kɛ agboje kɛ jee hiɔwe kɛ ba jee ngmlaa ha nyɛ ɔ.

²⁷ Mawu nɛ ngɛ kɛ yaa neneene ɔ ji nyɛ wesa he. Lɛ ji nɔ nɛ baa nyɛ yi daa. Lɛ ji nɔ nɛ fie nyɛ he nyɛli ɔmɛ ngɛ nyɛ hɛ mi, nɛ e de nyɛ ke nyɛ kpata mɛ tsuo a hɛ mi ɔ nɛ.

²⁸ Lɔ ɔ he ɔ, Yakob nina maa hi si ngɛ tue mi jɔmi mi; a nine maa su zugba kpakpa nɔ, he nɛ bɔ́ nɛɔ ngɛ, nɛ́ blɛfo kɛ wai baa saminya ngɛ.

²⁹ A gbaa nyɛ, Israel ma. Ma ko ma ko be kaa nyɛ ma nɛ Yawɛ he nyɛ yi wami. Yawɛ ji nyɛ tsɛ̃i kɛ klaate. Lɛ ji nɔ nɛ faa nyɛ he. Lɛ ji nɔ nɛ haa nyɛ yeɔ kunimi. Nyɛ he nyɛli ɔmɛ ma ba kpa nyɛ pɛɛ ke nyɛɛ na mɛ mɔbɔ; se nyɛɛ lɛɛ nyɛ maa naa a nɔ.”