Mose V, 32 - BAIBLO ALOO NGMAMI KLƆUKLƆU Ɔ

¹ “Hiɔwe kɛ zugba lee, nyɛ ba bu mi tue; nyɛ ba bu nɔ́ nɛ i ngɛ dee ɔ tue saminya.

² Ma tsɔɔ nyɛ ní kaa bɔ nɛ hiɔmi nɛɛ blɛuu kɛ pueɔ zugba nɔ nɛ e peeɔ kaa bɔ́ ɔ. Ma tu nyɛ munyu kaa bɔ nɛ hiɔmi fĩaa kɛ pueɔ tso bihi a nɔ, aloo kaa bɔ nɛ hiɔmi nɛɛ blɛuu kɛ pueɔ nga nɔ ɔ.

³ Ma wo Yawɛ biɛ ta kɛ je e yi, nɛ e ma a maa wo e hɛ mi nyami.

⁴ “Yawɛ ji nyɛ yi baalɔ nɛ se be; e hi kɛ pi si, nɛ e da ngɛ blɔ tsuaa blɔ nɔ. Nyɛ Mawu ɔ yeɔ e siwo nɔ; yayami ko be e he; nɔ́ nɛ da, kɛ nɔ́ nɛ sa pɛ e peeɔ.

⁵ Se nyɛɛ lɛɛ, nyɛ yi nyɛ siwo nɔ, nɛ nyɛ sɛ kulaa kaa nyɛ peeɔ e ma. Ma nɛ peeɔ yayami, nɛ sisiɔ nɔ ji nyɛ.

⁶ Bɔ nɛ sa kaa nyɛ peeɔ Yawɛ ji nɛ ɔ lo, ma kuasia nɛ be juɛmi? Lɛ ji nyɛ tsɛ kɛ nyɛ bɔlɔ; lɛ nɛ e ha nyɛ pee e ma.

⁷ “Nyɛ susu blema lokoo ɔ he; nyɛ bi nyɛ nɛmɛ, kɛ nimeli ɔmɛ nɛ a gba nyɛ blema sane.

⁸ Nɔ nɛ ngɛ hiɔwe lokoo ɔ, nɔ nɛ dla zugba a ha je ma amɛ, nɛ e to ma tsuaa ma hi he ɔ, lɛ nɛ e ha je ma tsuaa je ma e mawu.

⁹ Se Yakob nina lɛɛ, Yawɛ hla lɛ kaa lɛ nitsɛ e ma.

¹⁰ “E na lɛ ngɛ nga kplanaa a nɔ, he nɛ nɔ ko nɔ ko be. E bu e he, nɛ e hyɛ e nɔ saminya kaa bɔ nɛ nɔ hyɛɛ e bi kpakpa nɛ e suɔ lɛ nɔ.

¹¹ Bɔ nɛ kɔle buu e tsu he, nɛ e tee kɛ bɔleɔ e bimɛ, nɛ e bliɔ e pɛli mi, nɛ e ngɔɔ e bimɛ ngɔ fɔɔ nɔ kɛ tee kɛ yaa hiɔwe ɔ, ja Yawɛ hɛɛ Israel.

¹² Yawɛ, lɛ nɔ kake lɛ e kpaka e ma a; ma se mawu ko piɛ we e he.

¹³ “E ha e ma a ye yo nɔ zugba amɛ a nɔ, nɛ a ye ngmɔ ɔmɛ a mi niba ní. E ma a ná hwo kɛ je tɛ sa mi; nɛ oliv tso ɔmɛ hu plɔke ngɛ zugba nɛ tɛ ngɛ mi ɔ nɔ.

¹⁴ Na amɛ, kɛ to ɔmɛ ha nyɔ nyu babauu; e ha ma a jijɔ, apletsi, kɛ na kpakpahi; a ye ní kpakpa, nɛ a nu dã kpakpa.

¹⁵ “Yawɛ ma a na ní kpɔtɔɔ; kɛkɛ nɛ a tsɔ atuã; a ye ní kpakpa nɛ a tɔ saminya. Se a je Mawu nɛ ji a bɔlɔ ɔ he, nɛ a kua a yi wami helɔ nɛ se be ɔ.

¹⁶ A kɛ mawuhi nɛ a li ye e tsui, nɛ a ngɔ ní hiemi nihi kɛ wo e mi mi la.

¹⁷ Ma a sã bɔ kɛ ha mumi yayamihi, kɛ mawuhi nɛ a he be se nami, mawuhi nɛ a nɛmɛ po li, mawuhi nɛ Israel sɔmɔ we hyɛ.

¹⁸ A Mawu ɔ nɛ baa a yi, nɛ́ he a yi wami ɔ, a hɛ je a nɔ.

¹⁹ “Benɛ Yawɛ na nɔ́ nɛ ɔ, e mi mi wo la, nɛ e kua e ma a; ejakaa a binyumu ɔmɛ, kɛ a biyi ɔmɛ wo e mi mi la.

²⁰ E de ke, ‘Jehanɛ, i be a he piɛe hu; ma hyɛ nɔ́ nɛ maa ba a nɔ; nihi nɛ a tue mi ti, nɛ a yi a siwo nɔ.

²¹ A kɛ a we amagahi wo ye mi mi la. A kɛ a yaka mawu ɔmɛ ye ye tsui. Lɔ ɔ he ɔ, ma ngɔ ma gu ko kɛ wo a mi mi la; ma ngɔ ma kɛ e mi kuasiahi sɔuu kɛ ye a tsui.

²² Ye mi mi fumi nya maa wa wawɛɛ kaa la nɛ ngɛ tsoe; e maa sã nɔ́ tsuaa nɔ́ ngɛ je ɔ mi kɛ ya su gbeje tɔɔ; e maa sã yo ɔmɛ a sisi tomi ɔmɛ hulɔ.

²³ “ ‘Ma ha haomihi maa ba a nɔ nɔtonɔto; ma tsɛ̃ mɛ ye kɛ̃ɛ̃ ɔmɛ tsuo.

²⁴ Hwɔ kɛ aslã maa gbe mɛ, nɛ hiɔhi nɛ ngɛ gbeyegbeye ma kpata a hɛ mi. Ma ha nga mi lohwe awi yeli ma ba tua mɛ, nɛ sinɔ duɔtsɛmɛ maa kɔɔ mɛ.

²⁵ Ta ma kpata nihi a hɛ mi ngɛ gbɛjegbɛ ɔmɛ a nɔ, nɛ sawale maa nu nihi ngɛ a we ɔmɛ a mi. Nihewi kɛ yihewi ma gbo; bimwɔwi kɛ nyumu nikɔtɔmahi hu be a he yee.

²⁶ Jinɛ i ko kpata mɛ tsuo a hɛ mi pɛsɛpɛsɛ, nɛ nɔ ko nɔ ko be mɛ kaie hu.

²⁷ Se i be blɔ ngmɛe nɛ a he nyɛli ɔmɛ nɛ a fĩa ke mɛ lɛ a ye ye ma a nɔ, be mi nɛ imi, Yawɛ nitsɛ nɛ i kpata a hɛ mi.’

²⁸ “Ma ko nɛ be juɛmi ji Israel; a li nɔ́ ko nɔ́ ko.

²⁹ A nyɛ we nɛ a na nɔ́ he je nɛ a ye a nɔ ɔ; a nui nɔ́ nɛ ba a sisi.

³⁰ Kɛ pee kɛɛ nɛ nɔ kake maa fie nihi akpe? Kɛ pee kɛɛ nɛ nihi enyɔ pɛ maa wo nihi akpe nyɔngma fo? Yawɛ, a Mawu ɔ kua mɛ; a Mawu ngua a ngmɛɛ a he.

³¹ He nyɛli ɔmɛ le kaa a mawu ɔmɛ be he wami ko kaa Israel Mawu ɔ.

³² He nyɛli ɔmɛ puɛ kaa Sodom kɛ Gomora; a ngɛ kaa wai tso nɛ woɔ yiblii doodooe nɛ gbee nɔ,

³³ aloo wai nɛ a wo mi sinɔ duɔ.

³⁴ “Ke he nyɛli ɔmɛ pee Israel nɔ́ ko ɔ, Yawɛ hɛ ji nɔ; e mlɛɛ blɛuu kɛ ya siɔ be nɛ sa loko e gblaa a tue.

³⁵ Yawɛ maa ye lue kokooko. E maa gbla he nyɛli ɔmɛ a tue. A maa sane nɔ si amlɔ nɔuu. E be kɛe kulaa nɛ e ma kpata a hɛ mi. A nyagbe ma tlukaa.

³⁶ Yawɛ ma kpɔ e ma a kɛ je he nyɛli a dɛ mi be mi nɛ e na kaa a he wami tsuo ta. Nihi nɛ sɔmɔɔ lɛ ɔ lɛɛ ke e na bɔ nɛ peepee ta a he ha a, e maa na mɛ mɔbɔ.

³⁷ Kɛkɛ ɔ, Yawɛ ma bi e ma a ke, ‘Mawu ngua amɛ nɛ nyɛ ngɔ nyɛ hɛ kɛ fɔ a nɔ ɔ, jije a ngɛ?

³⁸ Nyɛ lɛ mɛ kɛ lohwehi nɛ wo zɔ, nɛ nyɛ ngɔ dã kɛ sã bɔ ha mɛ. Lɛɛ, nyɛ ha nɛ a je ngmlaa ha nyɛ; nyɛ ha nɛ a he nɛ sɔ kɛ ba kpɔ nyɛ koo!’

³⁹ “Nyɛ na nɛ nyɛɛ le kaa, ‘Imi nɔ kake too ji Mawu; ye se ɔ, mawu ko mawu ko be! Imi nɛ i gbee nɔ, imi kɛ̃ nɛ i haa nɔ wami; imi nɛ i plaa nɔ, nɛ imi nɛ i tsaa nɔ. Nɔ ko nɔ ko be nɛ maa tsi ye nya.

⁴⁰ Be abɔ nɛ imi ji Mawu nɛ ngɛ kɛ yaa neneene nɛ ɔ, i wo ye nine nɔ, nɛ i ngɛ kita kae kaa

⁴¹ ma duɔ ye klaate nɛ kpɛɔ nylamnylam ɔ nya, nɛ ma hyɛ nɛ a ye dami sane. Ma ye lue ngɛ he nyɛli ɔmɛ a nɔ; nihi nɛ sume mi ɔ, ma gbla a tue.

⁴² Muɔ ma tsle ngɛ ye kɛ̃ɛ̃ mi bi ɔmɛ a he kɛ pue si; nɛ ye klaate ɔ maa gbe nihi nɛ teɔ si woɔ mi ɔ. Nihi nɛ kɛ mi na ta a, a ti nɔ ko nɔ ko be e he yee; nihi nɛ plaa, kɛ nihi nɛ a nuu ngɛ ta mi po, ma gbe mɛ!’

⁴³ “Je mahi lee, nyɛ je Yawɛ ma a yi; nihi tsuo nɛ gbee e ma a, Yawɛ gblaa a tue. E yeɔ lue ngɛ e he nyɛli ɔmɛ a nɔ, nɛ e kɛ e ma a he yayami paa mɛ.”

⁴⁴ Mose kɛ Nun bi, Yoshua kane la nɛ ɔ mi munyu ɔmɛ saminya kɛ tsɔɔ Israel ma a, nɛ mɛ tsuo a nu.

Mose nyagbe slɔmi

⁴⁵ Benɛ Mose kane Mawu mlaa amɛ kɛ tsɔɔ Israel ma a gbe nya a,

⁴⁶ e slɔ mɛ ke, “Nyɛɛ hyɛ saminya nɛ nyɛɛ ye mlaa nɛ ɔmɛ tsuo nɛ i ngɛ nyɛ woe mwɔnɛ ɔ a nɔ. Nyɛɛ tsɔɔ nyɛ bimɛ ɔmɛ, konɛ a ye Mawu mlaa amɛ tsuo a nɔ pɛpɛɛpɛ.

⁴⁷ Mlaa nɛ ɔmɛ pi munyu guhi; nyɛ wami daa si ngɛ a nɔ. Nyɛɛ ye a nɔ, konɛ nyɛ se nɛ kɛ ngɛ zugba a nɛ ngɛ Yordan se nɛ nyɛ yaa ngɔ ɔ nɔ.”

⁴⁸ Yawɛ kɛ Mose tu munyu jamɛ a ligbi ɔ kɛ̃, nɛ e de lɛ ke,

⁴⁹ “Yaa Abarim yo ɔmɛ a nɔ ngɛ Moab zugba a mi, ngɛ Yeriko ma a hanɔ; kuɔɔ Nebo yo ɔ, nɛ o hyɛ Kanaan zugba a nɛ i ngɔ kɛ ngɛ Israel ma a hae ɔ.

⁵⁰ O ma gbo ngɛ lejɛ ɔ kaa bɔ nɛ o nyɛminyumu Aaron hu gbo ngɛ Hor yo ɔ nɔ ɔ,

⁵¹ ejakaa nyɛ ni enyɔ ɔmɛ tsuo nyɛ bui mi tue; nyɛ pue ye hɛ mi si ngɛ Israel bi ɔmɛ a hɛ mi. Nyɛ pue ye hɛ mi si ngɛ Meriba pa a nya, ngɛ Kadesh ma a kasa nya, ngɛ Zin nga kplanaa a nɔ. Nyɛ bui mi kaa nɔ klɔuklɔu ngɛ Israel ma a hɛ mi.

⁵² O maa na zugba a nɛ i ngɔ kɛ ngɛ Israel ma a hae ɔ ngɛ se lokoo; se zugba a nitsɛ lɛɛ o be nɔ yae.”