Mose V, 31 - BAIBLO ALOO NGMAMI KLƆUKLƆU Ɔ

Yoshua ba ye Mose se

¹ Mose tsa e munyu ɔ nɔ, nɛ e de Israel ma a ke,

² “Amlɔ nɛ ɔ, i ye jeha lafa kɛ nyingmi enyɔ, nɛ i be nyɛe ma pee nyɛ hɛ mi nyɛɛlɔ hu. Jehanɛ hu, Yawɛ de mi ke, i be Yordan pa a poe.

³ Yawɛ, nyɛ Mawu ɔ ma kpaka nyɛ, nɛ e ma kpata ma amɛ nɛ ngɛ lejɛ ɔ a hɛ mi, konɛ nyɛ nyɛ nɛ nyɛɛ ngɔ zugba a; nɛ Yoshua maa pee nyɛ hɛ mi nyɛɛlɔ kaa bɔ nɛ Yawɛ de ɔ.

⁴ Yawɛ maa pee je ma amɛ kaa bɔ nɛ e pee Amor matsɛmɛ, Sihon kɛ Og, kɛ a zugba a; e ma kpata a hɛ mi pɛsɛpɛsɛ.

⁵ Yawɛ ma ha nɛ nyɛɛ ye nyɛ he nyɛli ɔmɛ a nɔ, nɛ́ nyɛɛ pee mɛ kaa bɔ nɛ i de nyɛ ɔ pɛpɛɛpɛ.

⁶ Nyɛ he nɛ wa nɛ nyɛɛ pee kã. Nyɛ ko ye mɛ gbeye. Yawɛ, nyɛ Mawu ɔ nitsɛ kɛ nyɛ maa hi si. E be nyɛ sie, nɛ e be nyɛ kuae hulɔ.”

⁷ Jehanɛ, Mose tsɛ Yoshua nɛ e de lɛ ngɛ Israel ma kpekpemi ɔ hɛ mi ke, “O he nɛ wa, nɛ o pee kã; mo ji nɔ nɛ maa nyɛɛ Israel ma a hɛ mi kɛ ya ngɔ zugba a nɛ Yawɛ wo a nɛmɛ si ke e kɛ ma ha mɛ ɔ nɛ.

⁸ Yawɛ nitsɛ ma kpaka mo, nɛ e kɛ mo maa hi si. E be mo sie, nɛ e be mo kuae hulɔ; lɔ ɔ he ɔ, koo nu sawale; nɛ koo ye gbeye.”

A kane mlaa a daa jeha kpaago

⁹ Mose ngma Mawu mlaa a ngɔ wo womi mi, nɛ e ngɔ ha osɔfo ɔmɛ nɛ ji Levi bi ɔmɛ nɛ hyɛɛ somi daka a nɔ ɔ, kɛ Israel ma nimeli ɔmɛ tsuo.

¹⁰ E fa mɛ ke, “Daa jeha kpaagone ɔ, ke e su be nɛ a kɛ hiɔhi maa ke ɔ, nyɛɛ kane mlaa nɛ ɔ wawɛɛ nɛ a nu ngɛ Gbasisihimi nyami be ɔ.

¹¹ Ke Israel ma a tsuo ba bua a he nya ngɛ Yawɛ, nyɛ Mawu ɔ hɛ mi ngɛ he nɛ a to nɛ a ja lɛ ngɛ ɔ, nyɛɛ kane mlaa nɛ ɔ nɛ a nu.

¹² Moo kpee Israel ma a tsuo kɛ ba: nyumuhi, yihi, jokuɛwi, kɛ nibwɔhi nɛ ngɛ nyɛ ma amɛ a mi ɔ, konɛ nɔ tsuaa nɔ nɛ ba nu, nɛ e wo Yawɛ, nyɛ Mawu ɔ hɛ mi nyami; nɛ a ye mlaa womi nɛ ɔ mi munyu ɔmɛ tsuo a nɔ pɛpɛɛpɛ.

¹³ Ke e pee ja a, nyɛ bimɛ nɛ nui Yawɛ, nyɛ Mawu ɔ mlaa a hyɛ ɔ maa nu, nɛ a maa bu Yawɛ, nyɛ Mawu ɔ; nɛ a maa ye lɛ gbeye a wami ligbi tsuo nɛ́ a maa hi zugba a nɛ nyɛ yaa ngɔ ngɛ Yordan pa a se ɔ nɔ.”

Nyagbe munyu nɛ Yawɛ kɛ Mose tu

¹⁴ Enɛ ɔ se ɔ, Yawɛ de Mose ke, “O gbenɔ be su ta. Mo tsɛ Yoshua nɛ o kɛ lɛ nɛ ba bo tsu ɔ mi, konɛ ma tsɔɔ lɛ bɔ nɛ e pee.” Mose kɛ Yoshua ya bo tsu ɔ mi.

¹⁵ Kɛkɛ nɛ Yawɛ je e he kpo ngɔ tsɔɔ mɛ ngɛ bɔku titima nɛ ba da bo tsu ɔ sinya a nya a mi.

¹⁶ Yawɛ de Mose ke, “E be kɛe nɛ o ma gbo; nɛ o gbenɔ se ɔ, Israel ma a be mi anɔkuale yee hu; a be somi nɛ i kɛ mɛ so ɔ nɔ yee. A maa je ye se ya ja ma se mawuhi nɛ ngɛ zugba a nɔ he nɛ a yaa a.

¹⁷ Ke e ba mi ja a, ye mi mi ma fu. I ma kua mɛ, nɛ a hɛ mi ma kpata. Haomihi nɛ ngɛ gbeyegbeye maa ba a nɔ, nɛ lɔ ɔ loko a ma kpa si kaa ní nɛ ɔmɛ ngɛ a nɔ bae, ejakaa imi a Mawu ɔ, i kua mɛ.

¹⁸ Jamɛ a be ɔ mi ɔ, i be a he piɛe hu; ejakaa a pee yayami kaa a ya ja mawu kpahi.

¹⁹ “Jehanɛ, ngmaa la nɛ ɔ, nɛ o tsɔɔ Israel ma a, konɛ e pee odase kɛ si mɛ.

²⁰ I ma kpaka mɛ kɛ ya zugba kpakpa nɛ baa ní saminya nɛ ɔ nɔ kaa bɔ nɛ i wo a nɛmɛ ɔmɛ si ɔ. A ma na niye ní bɔ nɛ a ngɛ hlae ngɛ lejɛ ɔ. A maa ye ní nɛ a maa tɔ, nɛ a ma na bua jɔmi. Se kɛ̃ ɔ, a maa je ye se kɛ ya ja mawu kpahi. A ma kua mi, nɛ a be somi nɛ i kɛ mɛ so ɔ nɔ yee,

²¹ nɛ haomi gbeyegbeye babauu maa ba a nɔ. Jamɛ a be ɔ mi tsuo ɔ, a maa hi la nɛ ɔ lae, nɛ e maa pee odase kɛ si mɛ. Amlɔ nɛ ɔ po nɛ i kɛ mɛ sui zugba nɛ i wo si ke ma ha mɛ ɔ nɔ lolo ɔ, i le a yi mi.”

²² Mose ngma la a, nɛ e tsɔɔ Israel ma a jamɛ a ligbi ɔ nɔuu.

²³ Jehanɛ, Yawɛ to Nun bi Yoshua si, nɛ e de lɛ ke, “Pee kã, nɛ o he nɛ wa. Mo nɛ o ma kpaka Israel ma a kɛ ya zugba a nɛ i wo mɛ e he si ɔ nɔ. I kɛ mo maa hi si.”

²⁴ Mose ngma Mawu mlaa a fitsofitso kɛ wo womi ko mi; e si we nɔ́ ko.

²⁵ Benɛ e gbe nya a, e de Levi bi ɔmɛ nɛ ji osɔfo ɔmɛ nɛ hyɛɛ Yawɛ somi daka a nɔ ke,

²⁶ “Nyɛɛ ngɔ Mawu mlaa womi nɛ ɔ nɛ nyɛ ngɔ to Yawɛ, nyɛ Mawu ɔ somi daka a kasa nya, nɛ e hi lejɛ ɔ, nɛ e ye odase kɛ si ma a.

²⁷ I le kaa a kuɛ wa, nɛ a tsɔɔ atuã. Be mi nɛ i ngɛ je mi ɔ, a tsɔ Yawɛ hɛ mi atuã, nɛ ke i gbo lɛɛ kɛ e ma ba hi kɛɛ?

²⁸ Nyɛɛ kpee nyɛ wɛtsoyi ɔmɛ, kɛ tsɔli ɔmɛ kɛ ba, konɛ ma de mɛ ní nɛ ɔmɛ. I ma tsɛ hiɔwe kɛ zugba nɛ a ye odase kɛ si mɛ.

²⁹ I le paa kaa ye gbenɔ se ɔ, nyɛ ma puɛ nyɛ he kulaa, nɛ nyɛ maa je blɔ nɛ i tsɔɔ nyɛ ɔ nɔ. Lɔ ɔ he ɔ, e be kɛe nɛ nyɛ maa na amanehlu; ejakaa nyɛ maa pee yayami kɛ si Yawɛ. Nyɛ ní peepee maa wo e mi mi la.”

Mose la a

³⁰ Enɛ ɔ se ɔ, Mose kane la a mi munyu ɔmɛ tsuo kɛ tsɔɔ Israel ma a, nɛ mɛ tsuo a bu tue kɛ ya si nyagbe: