Mose V, 30 - BAIBLO ALOO NGMAMI KLƆUKLƆU Ɔ

Wami, loo gbenɔ

¹ “Jehanɛ, i ngɔ gbaami kɛ gbiɛmi ngɔ pue nyɛ hɛ mi, nɛ́ nyɛɛ hla mi nɔ́ nɛ nyɛ suɔ. Ke ní nɛ ɔmɛ tsuo ba nyɛ nɔ, nɛ nyɛ ya je ma je li a kpɛti, he nɛ Yawɛ, nyɛ Mawu ɔ gbɛ nyɛ ngɔ fĩa a, nyɛ ma kai níhi nɛ i ngɔ pue nyɛ hɛ mi ɔ.

² Ke nyɛɛ kɛ nyɛ nina maa kpale kɛ ba Yawɛ ngɔ, nɛ nyɛ maa je nyɛ tsui mi tsuo kɛ bu e gbi tue, nɛ nyɛ maa ye e mlaa amɛ tsuo nɛ i ngɛ nyɛ woe mwɔnɛ ɔ a nɔ ɔ,

³ lɛɛ Yawɛ, nyɛ Mawu ɔ maa na nyɛ mɔbɔ. E maa kpale nyɛ kɛ je ma je li ɔmɛ a zugba a nɔ, he nɛ e gbɛ nyɛ ngɔ fĩa a; nɛ e ma ha nyɛ ma na ní kpɔtɔɔ ekohu.

⁴ Ke kaa je ɔ nyagbe he tɔɔ po nɛ Yawɛ, nyɛ Mawu ɔ gbɛ nyɛ ngɔ fĩa a, e ma bua nyɛ nya, nɛ e maa kpale nyɛ kɛ ba,

⁵ konɛ nyɛ ba ngɔ zugba a he nɛ nyɛ nɛmɛ ɔmɛ hi ɔ, nɛ e pee nyɛ nɔ́ ekohu. Jehanɛ, e ma ha nɛ nyɛ ma na ní, nɛ nyɛ he maa hiɛ babauu pe nyɛ nɛmɛ ɔmɛ po.

⁶ Yawɛ, nyɛ Mawu ɔ ma ha nyɛɛ kɛ nyɛ nina tsui kpakpa nɛ buɔ tue, konɛ nyɛɛ suɔ lɛ kɛ nyɛ tsui tsuo, nɛ nyɛɛ hi jamɛ a zugba a nɔ.

⁷ Yawɛ, nyɛ Mawu ɔ ma ha gbiɛmi nɛ ɔmɛ tsuo maa ba nyɛ he nyɛli nɛ sume nyɛ, nɛ a waa nyɛ yi mi ɔ a nɔ.

⁸ Nyɛ maa bu Yawɛ tue ekohu, nɛ nyɛ maa ye e mlaa amɛ tsuo nɛ i ngɛ nyɛ woe mwɔnɛ ɔ a nɔ.

⁹ Yawɛ, nyɛ Mawu ɔ ma ha nyɛ maa ye manye ngɛ nyɛ nine nya ní tsumihi tsuo pɛpɛɛpɛ mi. Nyɛ bimɛ, kɛ nyɛ we mi lohwehi maa hiɛ babauu, nɛ nyɛ ngmɔ ɔmɛ maa ba ní saminya. Yawɛ bua maa jɔ nyɛ he, nɛ e ma ha nyɛ ma plɔke kaa bɔ nɛ e pee nyɛ nɛmɛ ɔmɛ ɔ.

¹⁰ Nɔ́ nɛ hia ji kaa nyɛ maa bu e gbi tue, nɛ nyɛ maa ye e mlaa amɛ tsuo nɛ a ngma ngɛ mlaa womi nɛ ɔ mi ɔ a nɔ. E hia kaa nyɛɛ kpale kɛ ba Yawɛ ngɔ kɛ nyɛ tsui tsuo.

¹¹ “Mlaa amɛ nɛ i ngɛ nyɛ woe mwɔnɛ ɔ, a he wɛ tsɔ ha nyɛ, nɛ e be tsitsaa he ko hulɔ.

¹² E be hiɔwe, nɛ́ nyɛ ma bi ke, ‘Mɛnɔ maa kuɔ kɛ ya nɛ e ya ngɔ kɛ ba ha wɔ, konɛ waa nu nɛ waa ye nɔ?’

¹³ E be wo se hulɔ nɛ nyɛ ma bi ke, ‘Mɛnɔ maa po wo, nɛ e ya ngɔ kɛ ba, konɛ waa nu, nɛ waa ye nɔ?’

¹⁴ Dɛbi, e ngɛ nyɛ ngɔ hiɛmɛ nɛ ɔ. Nyɛ le, nɛ nyɛ ma nyɛ ma de, lɔ ɔ he ɔ, jehanɛ, ye nɔ.

¹⁵ “Mwɔnɛ ɔ, i ngɔ kpakpa kɛ yayami ngɔ fɔ nyɛ hɛ mi; nyɛɛ ngɔ wami, aloo gbenɔ.

¹⁶ Ke nyɛ maa ye Yawɛ, nyɛ Mawu ɔ mlaa amɛ nɛ i ngɛ nyɛ woe mwɔnɛ ligbi nɛ ɔ a nɔ, nɛ nyɛ maa suɔ lɛ, nɛ nyɛ maa bu lɛ tue, nɛ nyɛ maa nyɛɛ e blɔ ɔmɛ tsuo a nɔ ɔ, lɛɛ nyɛ yi ma na wami, nɛ nyɛ he maa hiɛ; Yawɛ, nyɛ Mawu ɔ maa gbaa nyɛ ngɛ zugba a nɛ nyɛ yaa ngɔ ɔ nɔ.

¹⁷ Se, ke nyɛ gbo tue, nɛ nyɛ ha a mlɔɔ nyɛ kɛ ya ja mawu kpahi ɔ,

¹⁸ lɛɛ i ngɛ nyɛ dee mwɔnɛ ɔ ke ma kpata nyɛ hɛ mi. Zugba nɛ ngɛ Yordan pa a se nɛ nyɛ yaa ngɔ ɔ, nyɛ se be kɛe ngɛ nɔ.

¹⁹ Lɔ ɔ he ɔ, i ngɔ wami kɛ gbenɔ kɛ ngɛ nyɛ hɛ mi fɔe; i ngɔ Mawu gbaami kɛ gbiɛmi hu kɛ ngɛ nyɛ hɛ mi fɔe; nɛ i ngɛ hiɔwe kɛ zugba odase tsɛe ngɛ nɔ́ nɛ nyɛ maa hla a he. Nyɛɛ ngɔ wami.

²⁰ Nyɛɛ suɔ Yawɛ, nyɛ Mawu ɔ; nyɛɛ bu lɛ tue, nɛ nyɛ pee e suɔmi nya ní pɛpɛɛpɛ. Ke nyɛ pee ja a, zugba a nɛ e wo nyɛ nɛmɛ Abraham, Isak, kɛ Yakob si ke e kɛ ma ha mɛ ɔ, nyɛɛ kɛ nyɛ nina maa hi nɔ.”