Mose V, 29 - BAIBLO ALOO NGMAMI KLƆUKLƆU Ɔ

Yawɛ kɛ Israel so ngɛ Moab zugba a nɔ

¹ Somi nɛ Yawɛ fa Mose ke e kɛ Israel bi ɔmɛ nɛ a so ngɛ Moab zugba a nɔ ɔ mi munyu komɛ ji nɛ ɔmɛ nɛ. E slo somi nɛ Yawɛ nitsɛ kɛ Israel ma a so ngɛ Sinai yo ɔ he ɔ.

² Mose tsɛ Israel ma a tsuo kɛ kpe, nɛ e de mɛ ke, “Nyɛ nitsɛmɛ nyɛ na nɔ́ nɛ Yawɛ pee Egipt matsɛ ɔ, e tsɔli ɔmɛ, kɛ e zugba a tsuo.

³ Nyɛ na gbenɔ hiɔ gbeyegbeye ɔmɛ, okadi ɔmɛ, kɛ nyakpɛ ní nguangua amɛ nɛ Yawɛ pee ɔ.

⁴ Se kɛ ba si mwɔnɛ ligbi nɛ ɔ, e ha we nɛ nyɛɛ nu níhi nɛ nyɛɛ kɛ kpe ɔ a sisi lolo.

⁵ Jeha nyingmi eywiɛ sɔuu Yawɛ kpaka nyɛ kɛ gu nga kplanaa a nɔ; nyɛ heha ní gba we ngɛ nyɛ he, nɛ nyɛ tokota amɛ hu tsɔ we.

⁶ Nyɛ na we abolo nɛ nyɛɛ ye, nɛ nyɛ na we wai, loo dã nɛ nya wa ko nɛ nyɛɛ nu; se Yawɛ ha nyɛ nyɛ hiami ní ɔmɛ, bɔ nɛ pee nɛ e kɛ tsɔɔ nyɛ kaa lɛ ji nyɛ Mawu ɔ nɛ.

⁷ Jehanɛ, benɛ wa ba su hiɛmɛ nɛ ɔ, Heshbon matsɛ, Sihon, kɛ Bashan matsɛ, Og hia ta kɛ kpee wɔ. Se wa ye a nɔ,

⁸ nɛ wa ngɔ a zugba a, nɛ wa dla mi ngɔ ha Ruben wɛtso ɔ, Gad wɛtso ɔ, kɛ Manase wɛtso fa a.

⁹ Lɔ ɔ he ɔ, nyɛɛ ye somi ɔ mi munyu ɔmɛ tsuo a nɔ pɛpɛɛpɛ, bɔ nɛ pee nɛ nyɛɛ ye manye ngɛ nɔ́ tsuaa nɔ́ nɛ nyɛ maa pee mi.

¹⁰ “Mwɔnɛ ɔ, nyɛ tsuo nyɛ daa si ngɛ Yawɛ nyɛ Mawu ɔ hɛ mi. Nyɛ, nyɛ ma nimeli, tsɔli, nyumuhi,

¹¹ yihi, jokuɛwi, kɛ nyɛ nibwɔhi nɛ gbaa lɛ́, nɛ a yaa pa ha nyɛ ɔ tsuo ngɛ hiɛ ɔ.

¹² Nyɛ ba hiɛmɛ nɛ ɔ, konɛ nyɛɛ fua ngɔ fɔ somi nɛ Yawɛ, nyɛ Mawu ɔ kɛ nyɛ ngɛ soe ɔ nɔ, nɛ nyɛɛ pɛtɛ níhi nɛ sa nɛ nyɛ tsu ngɛ mi ɔ a he.

¹³ Nyɛ ngɛ enɛ ɔ pee konɛ Yawɛ kɛ nyɛ nɛ da si kaa lɛ nitsɛ e ma, nɛ e pee nyɛ Mawu, kaa bɔ nɛ e wo nyɛɛ kɛ nyɛ nɛmɛ Abraham, Isak, kɛ Yakob si ɔ.

¹⁴ Somi nɛ ɔ, pi nyɛ kɛkɛ nɛ Yawɛ kɛ ngɛ soe, nɛ e mi ní tsumi ɔmɛ hu, pi nyɛ kɛkɛ nɛ a ngɛ kɛ ha.

¹⁵ Se e kɛ wɔ tsuo nɛ ngɛ soe ɔ nɛ; wɔ ni nɛmɛ nɛ wa daa si ngɛ e hɛ mi mwɔnɛ ɔ, kɛ wa nina nɛ a fɔ we mɛ lolo ɔ tsuo.

¹⁶ “Nyɛ kai bɔ nɛ wa hi Egipt zugba a nɔ, kɛ bɔ nɛ wa nyɛɛ kɛ gu je ma amɛ a zugba a nɔ.

¹⁷ Nyɛ na a musu ní hiemi ní ɔmɛ, amagahi nɛ a kɛ tso, kɛ tɛ, kɛ sika hiɔ, kɛ sika tsu pee ɔ.

¹⁸ Nyɛ nɛ nyɛ daa si ngɛ hiɛ ɔ mwɔnɛ ɔ, nyɛɛ hyɛ saminya nɛ nɔ ko nɔ ko kó je Yawɛ, wa Mawu ɔ se kɛ ya ja ma je li a mawu ɔmɛ, nyumu jio, yo jio, weku jio, wɛtso jio. Nɔ́ nɛ ɔ ngɛ kaa tso sipoku nɛ maa wa, nɛ maa ngɔ e duɔ kɛ gbla haomi kɛ ba nyɛ nɔ.

¹⁹ Nyɛɛ hyɛ saminya nɛ nyɛ nihi tsuo nɛ nyɛ ngɛ somi munyu nɛ ɔmɛ nue mwɔnɛ ɔ ngɛ hiɛmɛ nɛ ɔ, nyɛ ti nɔ ko kó mlɔɔ e he kaa ke e pee lɛ nitsɛ e tsui wami nya ní ɔ, e maa hi ha lɛ ligbi ko. Ke nɔ ko pee ja a, nyɛ tsuo nyɛ hɛ mi ma kpata, nɔ kpakpa, kɛ nɔ yayami tsuo nɛ slɔɔto ko be mi.

²⁰ Yawɛ be nɔ nɛ tue wa nɛ ɔ he yayami ngɔe kɛ pa lɛ. Niinɛ, Yawɛ mi mi ma fu wawɛɛ kɛ wo lɛ, nɛ gbiɛmihi tsuo nɛ a ngma ngɛ womi nɛ ɔ mi ɔ maa ba e nɔ kɛ yaa si Yawɛ ma kpata e hɛ mi kulaa kɛ pi si.

²¹ Yawɛ ma je e hɛ kɛ pi lɛ, nɛ e maa gbla e tue. Gbiɛmihi tsuo nɛ a ngma ngɛ Yawɛ mlaa womi nɛ ɔ mi, nɛ a to kɛ ha nihi nɛ ma tɔ̃ somi nɛ ɔ nɔ ɔ maa ba e nɔ.

²² “Hwɔɔ se yi nɔ bi nɛ ji nyɛ nina, kɛ nibwɔhi nɛ je ma se zugbahi a nɔ tsuo maa na haomihi, kɛ amanehluhi nɛ Yawɛ kɛ ba nyɛ zugba a nɔ ɔ.

²³ La zu, kɛ ngo maa ha ngmɔ ɔmɛ tsuo a nɔ. Nɔ́ ko nɔ́ ko be hie dumi ngɛ nɔ hu, nɛ nga po be puɛe ngɛ nɔ. Nyɛ zugba a maa pee kaa Sodom kɛ Gomora, kɛ Adma kɛ Zeboiim nɛ Yawɛ kpata a hɛ mi benɛ e mi mi fu wawɛɛ ɔ.

²⁴ Ke e ba mi ja a, je ɔ tsuo ma bi si ke, ‘Mɛni he je nɛ Yawɛ pee e zugba a kikɛ nɛ ɔ?

²⁵ Mɛni he je e mi mi fu wawɛɛ kikɛ nɛ ɔ?’ Heto nɛ a ma na ji, ‘Nɔ́ he je nɛ e ba ja a ji kaa Yawɛ ma a yi somi nɛ a kɛ lɛ, a nɛmɛ a Mawu ɔ so ɔ nɔ. Lɛ ji nɔ nɛ kpaka mɛ kɛ je Egipt ɔ nɛ.

²⁶ A ya sɔmɔ mawu kpahi nɛ a ja we hyɛ, mawuhi nɛ Yawɛ wo mɛ mlaa ke a ko ja kɔkɔɔkɔ ɔ.

²⁷ Enɛ ɔ he nɛ Yawɛ mi mi fu e ma a, nɛ e kɛ haomi ɔmɛ tsuo nɛ a ngma ngɛ womi nɛ ɔ mi ɔ ba a nɔ ɔ nɛ.

²⁸ Yawɛ mi mi wo la wawɛɛ nitsɛ, nɛ e kɛ mi mi la nɛ nya wa nɛ ɔ hia mɛ kɛ je a zugba a nɔ, nɛ e sake mɛ ngɔ pue ma se zugba ko nɔ, nɛ lejɛ ɔ a ngɛ kɛ mwɔɔ.’

²⁹ “Laami ní komɛ ngɛ nɛ Yawɛ, wa Mawu ɔ je we kpo ngɔ tsɔɔ wɔ, se e je e mlaa a kpo ngɔ ha wɔ kɛ wa nina, bɔ nɛ pee nɛ waa ye nɔ kɛ ya neneene.