Mose V, 27 - BAIBLO ALOO NGMAMI KLƆUKLƆU Ɔ

A ngma Mawu mlaa amɛ ngɛ tɛhi a nɔ

¹ Jehanɛ, Mose kɛ Israel ma a tu munyu, nɛ ma nimeli ɔmɛ tsuo fi e se. Mose de ma a ke, “Nyɛɛ bu níhi nɛ i ngɛ nyɛ dee mwɔnɛ ligbi nɛ ɔ tue.

² Ligbi ɔ nɛ nyɛ maa po Yordan pa a kɛ ya su zugba a nɛ Yawɛ, nyɛ Mawu ɔ kɛ ngɛ nyɛ hae ɔ nɔ ɔ, nyɛɛ ngɔ tɛ agboagbohi kɛ ma si, nɛ nyɛ kpa a he kalo.

³ Ke nyɛ po pa a pɛ, nyɛɛ ngma mlaa nɛ ɔmɛ tsuo ngɛ tɛ ɔmɛ a nɔ. Zugba nɛ Yawɛ, nyɛ nɛmɛ a Mawu ɔ wo si ke e ma ngɔ ha nyɛ ngɛ pa a se ɔ, zugba a hi, nɛ e baa ní saminya.

⁴ Ke nyɛ su zugba nɛ ɔ nɔ ngɛ Yordan pa a se ɔ, nyɛɛ ngɔ tɛ nɛ ɔmɛ ngɔ ma si ngɛ Ebal yo ɔ nɔ kaa bɔ nɛ i ngɛ nyɛ fae mwɔnɛ ɔ, nɛ nyɛ kpa a he kalo.

⁵ Lɔ ɔ se ɔ, nyɛɛ ngɔ tɛhi nɛ a kɛ dade kó we nɛ ma bɔ sami la tɛ ngɛ lejɛ ɔ.

⁶ Ke nyɛ maa ma bɔ sami la tɛ ko ha Yawɛ, nyɛ Mawu ɔ, nyɛɛ ngɔ tɛhi nɛ a kɛ dade kó we nɛ ma. Nyɛɛ sã nyɛ sami bɔ ɔmɛ ngɛ lejɛ ɔ.

⁷ Jehanɛ hu, nyɛɛ sã nyɛ tue mi jɔmi bɔ ɔmɛ, nɛ nyɛ bla nyɛɛ ye ní. Nyɛɛ na Yawɛ, nyɛ Mawu ɔ si ngɛ lejɛ ɔ.

⁸ Nyɛɛ ngma mlaa nɛ ɔmɛ tsuo ngɛ tɛ ɔmɛ nɛ a kɛ kalo kpa a he ɔ a nɔ; nɛ nyɛ ha nɛ ningma a nɛ je si paa.”

⁹ Lɔ ɔ se ɔ, Mose kɛ osɔfo ɔmɛ nɛ ji Levi bi ɔmɛ tu munyu kɛ tsɔɔ Israel ma kpekpemi ɔ tsuo ke, “Nyɛɛ pee dii nɛ nyɛɛ bu mi tue. Israel bi, mwɔnɛ ligbi nɛ ɔ, nyɛ pee Yawɛ, nyɛ Mawu ɔ ma.

¹⁰ Lɔ ɔ he ɔ, nyɛɛ bu Yawɛ, nyɛ Mawu ɔ gbi tue, nɛ nyɛɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ.”

Tue gbomi kɛ e he gbiɛmi

¹¹ Jamɛ a ligbi ɔ, Mose de Israel ma a ke,

¹² “Ke nyɛ po Yordan pa a, wɛtso nɛ ɔmɛ nɛ a da si ngɛ Gerizim yo ɔ nɔ benɛ a ngɛ ma a gbaae: Simeon, Levi, Yuda, Isakar, Yosef, kɛ Benyamin.

¹³ Wɛtso nɛ ɔmɛ hu nɛ a da si ngɛ Ebal yo ɔ nɔ benɛ a ngɛ gbiɛmi munyu ɔmɛ dee: Ruben, Gad, Asher, Zebulun, Dan, kɛ Naftali.

¹⁴ Levi bi ɔmɛ ma wo a gbi nɔ, nɛ a ma de Israel ma a tsuo ke,

¹⁵ “ ‘Mawu maa gbiɛ nɔ tsuaa nɔ nɛ ngɔɔ tɛ, loo tso, loo dade kɛ peeɔ amaga ko, nɛ e jaa lɛ ngɛ laami mi. Yawɛ hiɔ wɔ jami.’ Ma a tsuo ma he nɔ ke, ‘Amen!’

¹⁶ “ ‘Mawu maa gbiɛ nɔ tsuaa nɔ nɛ pueɔ e tsɛ, loo e nyɛ hɛ mi si.’ “Ma a tsuo ma he nɔ ke, ‘Amen!’

¹⁷ “ ‘Mawu maa gbiɛ nɔ tsuaa nɔ nɛ tsɛ̃ɛ̃ e nyɛmi buna kɛ yaa se.’ “Ma a tsuo ma he nɔ ke, ‘Amen!’

¹⁸ “ ‘Mawu maa gbiɛ nɔ tsuaa nɔ nɛ tsɔɔ hɛ yuyuilɔ blɔ yayami.’ “Ma a tsuo ma he nɔ ke, ‘Amen!’

¹⁹ “ ‘Mawu maa gbiɛ nɔ tsuaa nɔ nɛ plɛɔ nibwɔhi, awusahi, kɛ yalɔyihi a sane hɛ mi buɔ si.’ “Ma a tsuo ma he nɔ ke, ‘Amen!’

²⁰ “ ‘Mawu maa gbiɛ nɔ tsuaa nɔ nɛ e kɛ e tsɛ yo naa bɔmi nɛ e kɛ pueɔ e tsɛ ɔ hɛ mi si.’ “Ma a tsuo ma he nɔ ke, ‘Amen!’

²¹ “ ‘Mawu maa gbiɛ nɔ tsuaa nɔ nɛ e kɛ lohwe naa bɔmi.’ “Ma a tsuo ma he nɔ ke, ‘Amen!’

²² “ ‘Mawu maa gbiɛ nɔ tsuaa nɔ nɛ e kɛ e nyɛmiyo, e tsɛbiyo jio, e nyɛbiyo jio naa bɔmi.’ “Ma a tsuo ma he nɔ ke, ‘Amen!’

²³ “ ‘Mawu maa gbiɛ nɔ tsuaa nɔ nɛ e kɛ e nganyɛ naa bɔmi.’ “Ma a tsuo ma he nɔ ke, ‘Amen!’

²⁴ “ ‘Mawu maa gbiɛ nɔ tsuaa nɔ nɛ gbee e nyɛmi ngɛ laami mi.’ “Ma a tsuo ma he nɔ ke, ‘Amen!’

²⁵ “ ‘Mawu maa gbiɛ nɔ tsuaa nɔ nɛ heɔ nyɔ mi ní, nɛ e kɛ pueɔ nɔ ko nɛ pee we nɔ́ ko muɔ si.’ “Ma a tsuo ma he nɔ ke, ‘Amen!’

²⁶ “ ‘Mawu maa gbiɛ nɔ tsuaa nɔ nɛ bui Mawu mlaa nɛ ɔmɛ, nɛ e yi a nɔ hulɔ.’ “Ma a tsuo ma he nɔ ke, ‘Amen!’