Mose V, 25 - BAIBLO ALOO NGMAMI KLƆUKLƆU Ɔ

¹ “Waa ngɔ lɛ kaa Israel bi enyɔ ngɛ pɛe, nɛ a ba kojomi he ɔ, konɛ a hyɛ a sane ɔ mi ha mɛ. Nɔ nɛ nɔ́ dɛ ɔ, á bu lɛ fɔ; nɔ nɛ nɔ́ da a, á wo lɛ nguɔ.

² Ke nɔ nɛ ye fɔ ɔ sa kpa a, kojolɔ ɔ nɛ hyɛ nɛ a bu lɛ si, nɛ á fia lɛ kpa. Kpa abɔ nɛ a maa fia lɛ ɔ maa je bɔ nɛ e tɔmi ɔ kle ha.

³ A ko fia nɔ kpa nɛ pe si nyingmi eywiɛ; ke e pe ja a, lɛɛ o pue o nyɛmi ɔ hɛ mi si ngɛ ma hɛ mi.

⁴ “Na nɛ ngɛ ngma gblɛe ha mo ɔ, koo fi e nya.

Nyɛminyumu nɛ gbo e yalɔyo ngɔmi

⁵ “Ke nyɛminyumuhi enyɔ hi si, nɛ a ti nɔ kake gbo nɛ e be bi nyumu ɔ, nɔ nɛ gbo ɔ yo ɔ ko ya gba nɔ ko ngɛ weku kpa mi; e ji e huno ɔ nyɛminyumu ɔ blɔ nya kaa e ngɔ lɛ.

⁶ Kekleekle binyumu nɛ e ma fɔ ɔ, é ye nyɛminyumu nɛ gbo ɔ nane mi, konɛ e biɛ ko laa ngɛ Israel.

⁷ Se ke nyumu ɔ sume kaa e maa ngɔ e nyɛminyumu ɔ yalɔyo ɔ, lɛɛ yo ɔ nɛ e ya ma agbo ɔ nya, nɛ ya de ma nimeli ɔmɛ ke, ‘Ye huno ɔ nyɛminyumu ɔ kplɛɛ we kaa e ma tsu e blɔ nya ní: e sume kaa e ma ha e nyɛminyumu ɔ ma na ngmɛdu ngɛ Israel.’

⁸ Ke e ba mi ja a, ma nimeli ɔmɛ nɛ a tsɛ nyumu ɔ, nɛ á tu munyu kɛ tsɔɔ lɛ. Ke e ma nɔ mi kaa e be yo ɔ ngɔe ɔ,

⁹ lɛɛ e nyɛmi ɔ yalɔyo ɔ nɛ ya nyumu ɔ ngɔ ngɛ ma nimeli ɔmɛ a hɛ mi. A je nyumu ɔ tokota kake ngɛ e nane, nɛ e su lada kɛ pue nyumu ɔ hɛ mi, nɛ é de ke, ‘Bɔ nɛ a peeɔ nɔ nɛ sume nɛ e wo nina ha e nyɛminyumu ji nɛ ɔ nɛ.’

¹⁰ Biɛ nɛ a ma kɛ tsɛ nyumu nɛ ɔ weku ngɛ Israel ji, ‘Nɔ nɛ a je e tokota ngɛ e nane ɔ weku.’

Mlaa kpahi

¹¹ “Ke nyumuhi enyɔ ngɛ kunɔ nɔe, nɛ nɔ kake e yo ba piɛ e huno ɔ he, nɛ e nu nɔ kpa a nyumu tso kɛ e sungmɛ ɔ,

¹² poo yo ɔ nine; koo na lɛ mɔbɔ kulaa.

^13-14 “Ke o ngɛ nɔ́ jiimi ngmɛe, loo o ngɛ nɔ́ kami susue ɔ, koo sisi nɔ.

¹⁵ O sɛni tɛhi, kɛ susumi kpa tsuo nɛ su pɛpɛɛpɛ, konɛ o se nɛ kɛ ngɛ zugba a nɛ Yawɛ, o Mawu ɔ ngɛ mo hae ɔ nɔ.

¹⁶ Ejakaa Yawɛ sume nihi nɛ sisiɔ nɔ.

A fa ke á gbe Amalek bi ɔmɛ

¹⁷ “Mo kai nɔ́ nɛ Amalek bi ɔmɛ pee mo ngɛ blɔ ɔ nɔ, benɛ o je Egipt kɛ ma a.

¹⁸ Akɛnɛ a yi Mawu gbeye he je ɔ, a tua o se ta a, benɛ pɔ tɔ ta buli ɔmɛ, nɛ peepee ta a he ɔ; nɛ a gbe ni nɛmɛ nɛ ngɛ didaae ngɛ se ɔ tsuo.

¹⁹ Lɔ ɔ he ɔ, ke Yawɛ, o Mawu ɔ ngɔ zugba a ngɔ ha mo, nɛ e je mo kɛ je o he nyɛli tsuo nɛ bɔle mo kɛ kpe ɔ a dɛ mi ɔ, hyɛ nɛ o gbe Amalek bi ɔmɛ tsuo, konɛ nɔ ko kó kai mɛ hu. O hɛ ko je nɔ kɔkɔɔkɔ!