Mose V, 24 - BAIBLO ALOO NGMAMI KLƆUKLƆU Ɔ

Gba mi pomi, kɛ gba mi sɛmi ekohu

¹ “Waa ngɔ lɛ kaa nyumu ko ngɔ yo, nɛ pee se ɔ, e sume lɛ hu; ejakaa e na nɔ́ yayami ko ngɛ yo ɔ he. Lɔ ɔ he ɔ, e ngma gba mi pomi womi nɛ e ngɔ wo e dɛ; nɛ e ha e je e we ɔ mi.

² Jehanɛ, waa ngɔ lɛ ekohu kaa yo ɔ ya gba nyumu kpa,

³ nɛ nyumu nɛ ɔ hu sume lɛ, nɛ e ngma gba mi pomi womi nɛ e ngɔ wo e dɛ, nɛ e ha e je e we ɔ mi. Aloo waa ngɔ lɛ kaa nyumu nɛ e ya gba sekpɛ nɛ ɔ gbo.

⁴ Ke e ba mi ja a, nyumu nɛ e kɛ hi si kekleekle ɔ ko kpale ngɔ lɛ kɔkɔɔkɔ; ejakaa yo ɔ ble e he. Yawɛ hiɔ kaa e maa kpale ngɔ lɛ ekohu. Ko tsu musu ní kaa kikɛ nɛ ɔ ngɛ zugba nɛ Yawɛ, o Mawu ɔ ngɔ kɛ ngɛ mo hae ɔ nɔ.

Mlaa munomunohi

⁵ “Ke nyumu ko kpee yo he ɔ, a ko ha nɛ nyumu ɔ nɛ ya ta, nɛ a ko ha lɛ ma ní tsumi ko hu nɛ e tsu. A ha nɛ e hi si gu jeha kake, bɔ nɛ pee nɛ e hi we mi, nɛ e kɛ e yo ɔ tsuo a bua nɛ jɔ a he.

⁶ “Ke o pa nɔ́ ko ha nɔ ko ɔ, koo ngɔ e wɛ, kɛ e wɛ mi bi nɛ e kɛ gblɛɔ blɛfo ɔ kɛ to awaba. Ke o pee ja a, níhi nɛ e kɛ ma na e nya mi ngma nɛ o kpɔ ngɛ e dɛ ɔ nɛ.

⁷ “Nɔ tsuaa nɔ nɛ maa ju e nyɛmi Israel no, nɛ e maa pee lɛ nyɔguɛ, aloo e maa jua lɛ ɔ, á gbe lɛ. Bɔ nɛ o maa pee kɛ je yayami nɛ ɔ kɛ je nyɛ kpɛti ji nɛ ɔ nɛ.

⁸ “Ke o ngɛ he womi nɔ hiɔ yaya ko nue ɔ, hyɛ nɛ o pee bɔ nɛ Levi bi ɔmɛ nɛ ji osɔfo ɔmɛ ma de mo ke o pee ɔ pɛpɛɛpɛ kaa bɔ nɛ i fa mo ɔ.

⁹ Kai nɔ́ nɛ Yawɛ, o Mawu ɔ pee Miriam ngɛ blɔ ɔ nɔ, benɛ nyɛ je Egipt kɛ ma a.

¹⁰ “Ke o pa nɔ́ ko ha nɔ ko ɔ, koo nyɛɛ e se kɛ ya e we mi ke e ha mo e bo nɛ e ma kɛ to awaba ha mo ɔ.

¹¹ Dá si ngɛ e we ɔ se, nɛ lɛ nitsɛ e ngɔ kɛ ba ha mo.

¹² Ke ohiatsɛ ji nɔ ɔ, lɛɛ nɔ́ nɛ e kɛ ba to awaba a, je ko jɔ yi ngɛ o ngɔ.

¹³ Daa gbɔkuɛ ɔ, kpale kɛ ha lɛ, konɛ e kɛ hwɔ si. Kɛkɛ ɔ, e maa na mo si, nɛ Yawɛ, o Mawu ɔ bua maa jɔ o he.

¹⁴ “Koo sisi apaatsɛ ohiatsɛ nɛ e fi lɛ ɔ, o nyɛmi Israel no jio, nubwɔ nɛ ngɛ o ma amɛ eko mi jio.

¹⁵ Daa ligbi, loko pu maa nɔ si ɔ, wo lɛ nɔ́ nɛ e tsu jamɛ a ligbi ɔ he hiɔ. Sika a he ngɛ lɛ hiae, nɛ e ngɔ e hɛ ngɔ fɔ nɔ. Ke o wui lɛ hiɔ ɔ, nɛ e fa kue ha Yawɛ ngɛ nɔ́ nɛ o pee nɛ ɔ he ɔ, a maa bu mo fɔ kaa o pee yayami.

¹⁶ “A ko gbe fɔli ngɛ a bimɛ a tɔmihi a he; nɛ á ko gbe bimɛ hu ngɛ a fɔli a tɔmihi a he. A gbe nɔ ngɛ lɛ nitsɛ e tɔmi he pɛ.

¹⁷ “Ko plɛ nubwɔ nɛ ba ngɛ o ma a mi, kɛ awusa a sane hɛ mi kɛ bu si; nɛ ko he yalɔyo he ha nɔ́ kaa awaba tomi nɔ́.

¹⁸ Mo kai kaa o ye nyɔguɛ ngɛ Egipt, nɛ Yawɛ, o Mawu ɔ ha o ye o he, lɔ ɔ he nɛ i ngɛ mo mlaa nɛ ɔ woe ɔ nɛ.

¹⁹ “Ke o bua o ngmɔ niba ní nya, nɛ e piɛ blɛfo nɛ o kpɔ pue si ɔ eko nɛ o ngɔɛ kɛ bɛ we mi ɔ, koo kpale ya kukuɔ; mo si ha nibwɔhi, awusahi, kɛ yalɔyihi, konɛ Yawɛ, o Mawu ɔ nɛ gbaa nɔ́ tsuaa nɔ́ nɛ o ngɛ tsue nɔ ha mo.

²⁰ Ke o ya kplɔ o we oliv tso ɔmɛ a yiblii ɔ, koo kpale o se kɛ ya tso kɔni ɔmɛ nɛ o kpa ni ngɛ a nɔ mo ɔ a he ekohu. Ha nɛ nɔ nɛ piɛ ngɛ nɔ ɔ nɛ hi si ha nibwɔhi, awusahi, kɛ yalɔyihi.

²¹ Ke o bua o wai yiblii ɔmɛ a nya si kake ɔ, koo kpale o se nɛ o ya bua nya si enyɔne ngɛ he kake ɔ kɛ̃; si wai yiblii nɛ piɛ ɔ ha nibwɔhi, awusahi, kɛ yalɔyihi.

²² O hɛ ko je nɔ gblegbleegble kaa o ye nyɔguɛ ngɛ Egipt, lɔ ɔ he nɛ i wo mo mlaa nɛ ɔ nɛ.