Mose V, 21 - BAIBLO ALOO NGMAMI KLƆUKLƆU Ɔ

Nɔ ko nɛ a gbe, se a nɛ́ e gbelɔ ɔ

¹ “Ke a na nɔ ko nɛ a gbe lɛ fɔ si ngɛ nga mi ngɛ zugba a nɛ Yawɛ, o Mawu ɔ ma ngɔ ha mo ɔ nɔ, nɛ a li nɔ nɛ gbe lɛ ɔ,

² lɔ ɔ lɛɛ ma nimeli ɔmɛ, kɛ kojoli ɔmɛ nɛ a je kpo nɛ a ya susu kɛ je he nɛ a na nɔ gbogboe ɔ ngɛ ɔ, kɛ ya su ma amɛ nɛ bɔle lɛ ɔ a mi.

³ Jehanɛ, ma nimeli ɔmɛ nɛ ngɛ ma nɛ kɛ lejɛ ɔ kɛ we pe kulaa mi ɔ nɛ a hla na zangmayo nɛ a kɛ lɛ tsu we nɔ́ ko hyɛ.

⁴ Nimeli ɔmɛ nɛ a kpaka lohwe ɔ kɛ ya kɔ̃ ko nya, he nɛ nyu bee ngɛ daa, he ko nɛ a hu we, nɛ a du we ní ngɛ hyɛ. Á ku lohwe ɔ kuɛ ngɛ lejɛ ɔ.

⁵ E hia kaa Levi bi ɔmɛ, nɛ ji osɔfo ɔmɛ hu nɛ a ya lejɛ ɔ; ejakaa mɛ lɛ a hyɛɛ mlaa sane tsuaa mlaa sane nɛ kɔɔ pɛ nɛ gbenɔ jeɔ mi ɔ mi, nɛ a buá he. Yawɛ, o Mawu ɔ nitsɛ nɛ hla mɛ, nɛ́ a sɔmɔ lɛ, nɛ́ a ngɔ e biɛ kɛ gbaa.

⁶ Lɔ ɔ se ɔ, ma nimeli ɔmɛ tsuo nɛ je ma nɛ kɛ he nɛ a na nɔ nɛ a gbe ɔ ngɛ ɔ kɛ we pe kulaa a nɛ á fɔ a dɛ kɛ pue na a nɔ,

⁷ nɛ a de ke, ‘Pi wɔ nɛ wa gbe nyumu nɛ ɔ; wa li nɔ nɛ gbe lɛ.

⁸ Yawɛ, wa kpa mo pɛɛ, moo na o ma, Israel nɛ o kpɔ kɛ je Egipt ɔ mɔbɔ. Moo na wɔ mɔbɔ; nɛ koo ngɔ nɔ nɛ a gbe yaka nɛ ɔ musu kɛ tloo wɔ.’

⁹ Lɔ ɔ he ɔ, moo pee kaa bɔ nɛ Yawɛ ngɛ hlae kaa o pee ɔ, nɛ a be gbenɔ nɛ ɔ he musu woe kɛ tloo mo.

Yihi nɛ a nuu ngɛ ta mi

¹⁰ “Ke Yawɛ, o Mawu ɔ ha o ye o he nyɛli ɔmɛ a nɔ ngɛ ta mi, nɛ o nuu nihi ɔ,

¹¹ eko ɔ, o maa na yo nɛ he ngɛ fɛu, nɛ o maa suɔ nɛ o ngɔ lɛ nɛ e pee o yo.

¹² Ke e ba mi ja a, mo kpaka lɛ kɛ ya o we mi, nɛ o ha nɛ e sɛ e yi bwɔmi, nɛ e je e nine nguɛ nya,

¹³ nɛ é tsake e tade ɔmɛ ngɛ e he. É hi o we ɔ mi, nɛ é ye kɔmɔ nyɔhiɔ kake ha e fɔli. Lɔ ɔ se ɔ, o ma nyɛ maa ngɔ lɛ nɛ e pee o yo.

¹⁴ Pee se, ke o sume lɛ hu ɔ, lɛɛ ha nɛ e ye e he kulaa. Akɛnɛ pi e suɔmi nya nɛ o ta e he ɔ, o be he blɔ nɛ o peeɔ lɛ kaa nyɔguɛ nɛ o juaa lɛ.

Bitɛte weto ní blɔ nya

¹⁵ “Waa ngɔ lɛ kaa nyumu ko ngɛ yihi enyɔ, nɛ e suɔ nɔ kake saminya, se e sume nɔ kake sane tsɔ, nɛ e kɛ mɛ ni enyɔ ɔmɛ tsuo fɔ binyumuhi, se yo ɔ nɛ e sume lɛ tsɔ ɔ bi ji bi nɔkɔtɔma.

¹⁶ Lɔ ɔ lɛɛ ke be su nɛ e maa dla weto ní ha e binyumu ɔmɛ ɔ, nyumu ɔ be he blɔ kaa e ngɔɔ yo nɛ e suɔ lɛ saminya a bi ɔ ngɔ peeɔ bi nɔkɔtɔma ngɛ yo nɛ e sume lɛ ɔ bi ɔ nane mi.

¹⁷ E ha e bi nɔkɔtɔma ɔ nɔ́ nɛ e ma ha e bi kaketsɛ ɔ totoe enyɔ. Ejakaa bi nɔkɔtɔma nɛ ɔ ji nyumu ɔ kekleekle binyumu nɛ a fɔ ha lɛ.

Binyumu tue gbolɔ

¹⁸ “Waa ngɔ lɛ kaa nyumu ko ngɛ binyumu atuã tsɔlɔ nɛ e tue wa, bi nɛ bui e fɔli, nɛ ke a gbla e tue po e bui.

¹⁹ “Ke bi ko ngɛ kaa ja a, e fɔli ɔmɛ nɛ a ngɔ lɛ kɛ ya ha ma nimeli ɔmɛ ngɛ ma a mi he nɛ e ngɛ ɔ, nɛ a kojo lɛ.

²⁰ A de ma nimeli ɔmɛ ke, ‘Tue gbolɔ kɛ atuã tsɔlɔ ji wa bi nɛ ɔ; e bui wa gbi tue; ní puɛlɔ kɛ dã delɔ ji lɛ.’

²¹ Jehanɛ, ma a mi nyumu ɔmɛ nɛ a fiaa lɛ tɛ nɛ e gbo; kɛkɛ ɔ, o ma je yayami nɛ ɔ kɛ je nyɛ kpɛti. Nɔ tsuaa nɔ ngɛ Israel maa nu nɔ́ nɛ ba a, nɛ a maa ye gbeye.

Mlaa munomunohi

²² “Ke a gbe nɔ ko nɛ pee yayami ko, nɛ a kɛ e gbogboe ɔ bɛle si ngɛ tso nɔ ɔ,

²³ ko ha nɛ e hi tso ɔ nɔ nɛ je nɛ na yi. A pu lɛ jamɛ a ligbi ɔ kɛ̃; ejakaa nɔ gbogboe nɛ bɛle si ngɛ tso nɔ ɔ kɛ Mawu gbiɛmi baa zugba a nɔ. Moo pu gbogboe ɔ, bɔ nɛ pee nɛ o ko ble zugba a nɛ Yawɛ, o Mawu ɔ ngɛ mo hae ɔ.