Mose V, 2 - BAIBLO ALOO NGMAMI KLƆUKLƆU Ɔ

¹ “Nyagbe ɔ, wa kpale hia kɛ gu Wo Tsu ɔ nya blɔ kɛ ho nga a nɔ ya kaa bɔ nɛ Yawɛ fa wɔ ɔ. Wa wo lalaalo be babauu ngɛ Edom yo zugba a nɔ.

² “Lɔ ɔ se ɔ, Yawɛ de mi ke,

³ ‘Bɔ nɛ nyɛ wo lalaalo ngɛ yo zugba a nɔ ɔ, e hiɛ; nyɛ plɛ kɛ ya omleyi je.

⁴ De ma a tsuo ke nyɛ yaa be ngɛ nyɛ nyɛmimɛ Esau bi ɔmɛ a zugba a nɔ kɛ ho. Mɛɛ lɛɛ Edom yo ɔ he a hii. A maa ye nyɛ gbeye.

⁵ Se nyɛɛ hyɛ saminya nɛ nyɛɛ kɛ mɛ ko hwu ta. I be nyɛ a zugba a ekoeko hae; nane mami he kake po be nyɛ nɔ́ pee; ejakaa i ngɔ Edom yo ɔ ngɔ ha Esau nina kaa a weto ní.

⁶ Nyɛ ma he niye ní nɛ nyɛ maa wo he hiɔ kɛ nyu ngɛ a dɛ.’

⁷ “Nyɛ na bɔ nɛ Yawɛ, nyɛ Mawu ɔ gbaa nyɛ ngɛ nɔ́ tsuaa nɔ́ mi, nɛ e baa nyɛ yi ngɛ nga kplanaa tilaa nɛ ɔ nɔ. Jeha nyingmi eywiɛ sɔuu ji nɛ ɔ nɛ Yawɛ, nyɛ Mawu ɔ hyɛ nyɛ nɔ, nɛ nɔ́ ko nɔ́ ko hia we nyɛ.

⁸ “Kɛkɛ nɛ wa pue nɔ; wa si blɔ nɛ yaa Elat kɛ Eziongeber ma amɛ a mi ɔ, nɛ wa gu Ngo wo ɔ nya blɔ. Jehanɛ, wa plɛ kɛ gu omleyi je, kɛ beleku je a kpɛti blɔ kɛ yaa Moab nga a nɔ.

⁹ Yawɛ de mi ke, ‘Koo hao Moab bi ɔmɛ nɛ ji Lot nina a. I ngɔ Ar ma a ngɔ ha mɛ. I be mo a zugba a eko hae.’ ”

¹⁰ Oblai komɛ nɛ a tsɛɛ mɛ Emim bi hu hi Ar sa a; nɛ e mi nihi hiɛ. Oblai nɛ ɔmɛ ka kaa Anak bi ɔmɛ.

¹¹ A tsɛɛ mɛ ke Refaim hulɔ; se Moab bi ɔmɛ tsɛɛ mɛ Emim bi.

¹² Hor bi ɔmɛ hu hi Edom sa a; se Esau nina a ba fie mɛ, nɛ a kpata a hɛ mi, nɛ mɛ nitsɛmɛ a hi lejɛ ɔ, kaa bɔ nɛ Israel bi ɔmɛ hu ba fie a he nyɛli ɔmɛ kɛ je zugba nɛ ji weto ní nɛ Yawɛ ngɔ ha mɛ ɔ nɔ ɔ.

¹³ “Jehanɛ, wa ya po Zered pa a kaa bɔ nɛ Yawɛ fa wɔ ɔ.

¹⁴ Be nɛ e ngɔ wɔ kɛ nyɛɛ kɛ je Kadesh Barnea kɛ ba su be nɛ wa po Zered pa a pee jeha nyingmi etɛ kɛ kpaanyɔ. Jamɛ a yi nɔ bi ta buli ɔmɛ tsuo pɛpɛɛpɛ gbo kaa bɔ nɛ Yawɛ ka mɛ kita a.

¹⁵ Anɔkuale mi ɔ, Yawɛ kɛ mɛ to ní kɛ ya si mɛ tsuo a hɛ mi kpata.

¹⁶ “Benɛ ta buli ɔmɛ tsuo a hɛ mi kpata se ɔ,

¹⁷ Yawɛ de wɔ ke,

¹⁸ ‘Mwɔnɛ ɔ, nyɛ yaa gu Moab huzu nya ngɛ Ar kasa nya.

¹⁹ Ke nyɛ ya su Amon bi ɔmɛ nɛ ji Lot nina a a zugba a huzu nya a, nyɛ ko hao mɛ, nɛ nyɛɛ kɛ mɛ ko hwu ta hulɔ; ejakaa i be nyɛ a zugba a ekoeko hae.’ ”

²⁰ (A buu zugba nɛ ɔ hu kaa oblaihi nɛ a tsɛɛ mɛ Refaim ɔ a zugba; mɛ lɛ a hi lejɛ ɔ sa a; se Amon bi ɔmɛ tsɛɛ mɛ Zamzum bi.

²¹ Ma nɛ ɔ kle, nɛ e he wa; e mi ni ɔmɛ ka gagaaga kaa Anak bi. A hiɛ babauu, se Yawɛ kpata a hɛ mi. Amon bi ɔmɛ ya ngɔ a zugba a, nɛ a hi lejɛ ɔ.

²² Yawɛ pee Edom bi ɔmɛ nɛ ji Esau nina a jã nɔuu. E kpata Hor bi ɔmɛ a hɛ mi, nɛ Edom bi ɔmɛ ya ngɔ a zugba a, nɛ a hi lejɛ ɔ. A ngɛ lejɛ ɔ kɛ mwɔɔ.

²³ Nihi nɛ je pa kpɔ Kreta nɔ ɔ, hi Mediterenia wo nya zugba a nɔ be ko. Mɛ lɛ a gbe Avim bi ɔmɛ nɛ hi lejɛ ɔ sa a, nɛ a ngɔ a zugba a tsuo nɛ ngɛ leneyi je ɔ kɛ ya su Gaza tɔɔ.)

²⁴ “Benɛ wa nyɛɛ Moab zugba a nɔ kɛ be se ɔ, Yawɛ de mi ke, ‘Nyɛ pue blɔ nɛ nyɛ ya po Arnon pa a. I ngɔ Amor matsɛ, Sihon nɛ je Heshbon kɛ e zugba a ngɔ wo nyɛ dɛ. Nyɛ ya tua lɛ, nɛ nyɛɛ ngɔ e zugba a.

²⁵ Kɛ je mwɔnɛ nɛ ɔ kɛ yaa a, ma ha nihi nɛ ngɛ je ɔ mi tsuo maa ye nyɛ gbeye. Ke a wo nyɛ ta a, sawale maa nu nɔ tsuaa nɔ.’

Israel ye Matsɛ Sihon nɔ

²⁶ “Jehanɛ, i tsɔ nihi kɛ je Kedemot nga kplanaa a nɔ kɛ ho Heshbon matsɛ, Sihon ngɔ ya kɛ he jɔmi munyu ke,

²⁷ ‘Mo ha nɛ waa gu o huzu ɔ nya kɛ be; wa maa nyɛɛ blɔ tɛɛ kɛ ho. Wa be blɔ ɔ nɔ jee.

²⁸ Niye ní nɛ wa maa ye, kɛ nyu hu nɛ wa maa nu ɔ, wa ma he kɛ sika. Ha nɛ waa nyɛɛ kɛ be kɛkɛ.

²⁹ Kaa bɔ nɛ Esau nina a nɛ ngɛ Edom yo ɔ nɔ, kɛ Moab bi ɔmɛ hu nɛ ngɛ Ar ɔ pee ha wɔ ɔ, mo hu ngmɛɛ wɔ blɔ kɛ ya si wa ma ya po Yordan pa a, kɛ ya zugba nɛ Yawɛ, wa Mawu ɔ ha wɔ ɔ nɔ.’

³⁰ “Se Heshbon matsɛ, Sihon kplɛɛ we nɛ waa gu e zugba a mi kɛ be. Yawɛ, nyɛ Mawu ɔ kplii e tsui, bɔ nɛ pee nɛ waa ye e nɔ, nɛ́ wa kpɔ e zugba a ngɛ e dɛ. Jamɛ a zugba a nɔ wa ngɛ kɛ sá.

³¹ “Jehanɛ, Yawɛ de mi ke, ‘Hyɛ, i jɔɔ Matsɛ Sihon kɛ e zugba a he ha nyɛ. Nyɛ ya ngɔ e zugba a, nɛ nyɛɛ hi nɔ.’

³² Kɛkɛ nɛ Matsɛ Sihon kɛ e ma a tsuo je kpo nɛ a kɛ wɔ ba hwu ta ngɛ Yahaz.

³³ Yawɛ, wa Mawu ɔ ngɔ lɛ wo wa dɛ, nɛ wa gbe e kɛ e binyumu ɔmɛ, kɛ e we bi ɔmɛ tsuo.

³⁴ Jamɛ a be ɔ mi nɔuu nɛ wa ngɔ e ma amɛ tsuo, nɛ wa kpata mɛ tsuo pɛpɛɛpɛ a hɛ mi. Wa gbe nɔ tsuaa nɔ, nyumuhi, yihi, kɛ jokuɛwi tsuo; wa si we nɔ kake po.

³⁵ Wa ngɔ we mi lohwe ɔmɛ, nɛ wa ha níhi ngɛ ma amɛ a mi.

³⁶ Kɛ je Aroer nɛ ngɛ Arnon kɔ̃ ɔ nya kɛ ya su Gilead ɔ, ma ko ma ko be nɛ wa nyɛ we lɛ; Yawɛ, wa Mawu ɔ ngɔ mɛ tsuo wo wa dɛ.

³⁷ Hehi nɛ Yawɛ, wa Mawu ɔ fa wɔ ke wa ko ya a pɛ nɛ wa yɛ; mɛ ji Amon bi ɔmɛ a zugba a, Yabok pa a nya hiɛ kɛ hiɛ, kɛ a ma amɛ nɛ ngɛ yo nɔ ɔ, kɛ he kpa komɛ hulɔ.