Mose V, 14 - BAIBLO ALOO NGMAMI KLƆUKLƆU Ɔ

Nɔ́ ko nɛ a hiɔ ngɛ ya peemi mi

¹ “Yawɛ, nyɛ Mawu ɔ ma ji nyɛ. Lɔ ɔ he ɔ, ke nɔ ko gbo nɛ nyɛ ngɛ ya nyɛe ɔ, nyɛ ko poo nyɛ he ha, nɛ nyɛ ko je nyɛ hɛ nya kaa bɔ nɛ je ma kpa amɛ peeɔ ɔ.

² Yawɛ, nyɛ Mawu ɔ níhi ji nyɛ. E hla nyɛ kɛ je je ma amɛ tsuo nɛ ngɛ zugba a nɔ ɔ a mi kɛ pee lɛ nitsɛ e ma.

Lohwehi nɛ a he tsɔ kɛ ni nɛmɛ nɛ a he tsɔ we

³ “Nɔ́ ko nɛ Yawɛ ke e he tsɔ we ɔ, nyɛ ko ye.

⁴ Lohwehi nɛ nyɛ ma nyɛ maa ye ji na, jijɔ, apletsi,

⁵ odabɔ, anagla, bayelɔ, kɛ nga mi gbe, loo asisã.

⁶ Nyɛ ma nyɛ maa ye lohwe tsuaa lohwe nane eywiɛtsɛ nɛ a gba e nane kokloto mi, nɛ e gɔleɔ nɔ́ nɛ e yeɔ, nɛ e kpale taa ekohu.

⁷ Se kɛ̃ ɔ, lohwehi nɛ gɔleɔ nɔ́ nɛ a yeɔ, nɛ a kpale taa ekohu, nɛ́ ngɛ nane kokloto nɛ nyɛ ko ye ji afukpɔngɔ, alɔngɔ, kɛ tɛ sa nɔ kpi. A gɔleɔ nɔ́ nɛ a yeɔ nɛ a kpale taa ekohu lɛɛ, se a gba we a nane kokloto mi; lɔ ɔ he ɔ, a he tsɔ we.

⁸ Nyɛ ko ye kpotoo. E he tsɔ we; ejakaa a gba e nane kokloto mi lɛɛ, se e gɔle we nɔ́ nɛ e yeɔ nɛ e taa ekohu. Nyɛ ko ye lohwe nɛ ɔmɛ a lo, nɛ nyɛ ko ta a gbogboe he hulɔ.

⁹ “Nyɛɛ ye nyu mi lo nɛ ngɛ se mi mio, nɛ toto ha e he,

¹⁰ se nyu mi lo nɛ be se mi mio, nɛ toto hɛ e he ɔ, nyɛ ko ye; e he tsɔ we.

¹¹ “Nyɛɛ ye lohwe pɛlitsɛmɛ nɛ a he tsɔ ɔ tsuo.

^12-18 Se nyɛ ko ye lohwe pɛlitsɛ nɛ ɔmɛ kɛ a henɔ ɔmɛ: kɔle, klomi, kayo, osansa, alɔɔ, okpoku, kɔɔkɔmite, duguma, anuma, nyɔ mi kayo, nga mi kpakpahe, omiɔhɔɔ, pa nɔ kayo, kpokukpoku, godo, kɔne, kɛ apani.

¹⁹ “Lohwe tsɔwi nɛ tee ɔ tsuo a he tsɔ we; nyɛ ko ye.

²⁰ Nyɛɛ ye lohwe tsɔwi nɛ a he tsɔ.

²¹ “Nyɛ ko ye lohwe ko nɛ lɛ nitsɛ e gbo. Nyɛ kɛ ha nibwɔhi nɛ ba to nyɛ ɔ nɛ a ye, loo nyɛɛ jua ha ni kpahi. Nyɛɛ lɛɛ Yawɛ, nyɛ Mawu ɔ nihi ji nyɛ; nyɛ ji e ma. Nyɛ ko hoo jijɔ bi, loo apletsi bi ngɛ e nyɛ nyɔ nyu mi.

Mi dlami nyɔngma mi kake he mlaa

²² “Nyɛ je nyɛ ngmɔ niba ní mi mi dlami nyɔngma mi kake kɛ to daa jeha.

²³ Lɔ ɔ se ɔ, nyɛɛ ya he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ. Nyɛɛ ye nyɛ blɛfo, wai, kɛ oliv nu mi dlami nyɔngmanyɔngma mi kakaaka a, kɛ nyɛ na amɛ, kɛ to ɔmɛ a kekleekle bi ɔmɛ ngɛ Yawɛ hɛ mi. Nyɛɛ pee enɛ ɔ kɛ kase bɔ nɛ nyɛ maa ye Yawɛ, nyɛ Mawu ɔ gbeye nyɛ wami be tsuo.

²⁴ Ke nyɛ we mi kɛ jami he ɔ kɛ tsɔ, nɛ nyɛ be nyɛe maa tloo ní ɔmɛ a mi dlami nyɔngmanyɔngma mi kakaaka a kɛ ya a,

²⁵ lɛɛ nyɛɛ jua ní ɔmɛ, nɛ nyɛɛ kɛ sika a nɛ ya he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ.

²⁶ Nyɛɛ ngɔ sika a kɛ he nɔ́ tsuaa nɔ́ nɛ nyɛ suɔ, na, wai, loo dã nɛ nya wa, konɛ nyɛɛ kɛ nyɛ weku li nɛ ye ní, nɛ nyɛ bua nɛ jɔ nyɛ he saminya ngɛ Yawɛ, nyɛ Mawu ɔ hɛ mi.

²⁷ “Nyɛ ko si Levi bi ɔmɛ nɛ ngɛ nyɛ ma amɛ a mi ɔ se; mɛɛ lɛɛ a be weto ní ko ngɛ nyɛ kpɛti.

²⁸ Jeha etɛ tsuaa jeha etɛ nyagbe ɔ, nyɛ bua nyɛ ngmɔ niba ní ɔmɛ a mi dlami nyɔngmanyɔngma mi kakaaka a tsuo nya kɛ ba to ngɛ nyɛ ma amɛ a mi.

²⁹ Levi bi ɔmɛ a niye ní ji nɛ ɔ nɛ, ejakaa mɛɛ lɛɛ a be weto ní ko. Nibwɔhi, awusahi, kɛ yalɔyihi hu nɛ ngɛ nyɛ ma amɛ a mi ɔ, nyɛ ha nɛ a ye eko nɛ a tɔ. Ke nyɛ pee ja a, Yawɛ, nyɛ Mawu ɔ maa gbaa nyɛ ngɛ nɔ́ tsuaa nɔ́ nɛ nyɛ ngɛ tsue ɔ mi.