Mose V, 13 - BAIBLO ALOO NGMAMI KLƆUKLƆU Ɔ

¹ “Ke gbalɔ ko, loo nlami sisi tsɔɔlɔ ko wo si ke e maa pee okadi ko, loo nyakpɛ nɔ́ ko,

² bɔ nɛ pee nɛ e kpaka nyɛ kɛ ya ja Mawu kpahi, nɛ pohu nyɛ ja we mɛ hyɛ ɔ, ke kaa níhi nɛ e wo a he si ɔ ba mi tete po ɔ,

³ nyɛ ko bu lɛ tue fɛɛ. Yawɛ, nyɛ Mawu ɔ gu nɔ́ nɛ ɔ nɔ kɛ ngɛ nyɛ kae nɛ e hyɛ kaa nyɛ suɔ lɛ, Yawɛ ɔ saminya ngɛ nyɛ tsui mi lo.

⁴ Nyɛɛ nyɛɛ Yawɛ, nyɛ Mawu ɔ se, nɛ nyɛɛ ye lɛ pɛ gbeye; nyɛɛ bu lɛ tue, nɛ nyɛɛ ye e mlaa amɛ a nɔ; nyɛ ja lɛ, nɛ nyɛɛ ye lɛ anɔkuale.

⁵ Se gbalɔ, loo nlami sisi tsɔɔlɔ ko nɛ maa wo nyɛ yi mi ke nyɛɛ te si kɛ si Yawɛ, nyɛ Mawu ɔ nɛ je nyɛ kɛ je Egipt zugba a nɔ, he nɛ nyɛ ye nyɔguɛ ngɛ ɔ, nyɛɛ gbe lɛ. Kikɛmɛ a nɔmlɔ ɔ, e ji nɔmlɔ yayami nɛ ngɛ nyɛ kae kaa e maa mlɔɔ nyɛ kɛ je si himi kpakpa nɛ Yawɛ fa nyɛ ke nyɛɛ hi ɔ he. Nyɛɛ gbe lɛ, konɛ nɔ́ yayami nɛ ɔ ko hi nyɛ kpɛti hu.

⁶ “O nyɛminyumu nɛ ji o nyɛ muklii mi bi, loo o binyumu, loo o biyo, loo o yo nɛ o suɔ lɛ, loo o huɛ nɛ nyu bi ngɛ nyɛ kpɛti po ma nyɛ maa mlɔɔ mo nɛ o ma ya ja mawu kpahi nɛ mo, loo o nɛmɛ ja we hyɛ.

⁷ A ti nɔ ko ma nyɛ maa mlɔɔ mo nɛ o ma ya ja nihi nɛ ngɛ nyɛ kasa nya, aloo nihi nɛ ngɛ tsitsaa a mawu ɔmɛ ekomɛ.

⁸ Koo kplɛɛ, nɛ koo bu lɛ tue tete po. Koo na lɛ mɔbɔ; koo baa e yi; koo laa e nɔ.

⁹ Gbee lɛ! Mo kekle o fia lɛ tɛ, nɛ lɔ ɔ se ɔ, nɔ tsuaa nɔ nɛ fiaa lɛ tɛ ɔ eko.

¹⁰ Á fiaa lɛ tɛ nɛ e gbo! E hla kaa e ma puɛ o tue ngɛ Yawɛ, o Mawu ɔ nɛ kpɔ̃ mo kɛ je Egipt, he nɛ o ya ye nyɔguɛ ngɛ ɔ he.

¹¹ Ke e ba mi ja a, Israel ma a tsuo maa nu sane ɔ he; a maa ye gbeye, nɛ nɔ ko nɔ ko be nɔ́ yayami kaa kikɛ nɛ ɔ pee hu.

¹² “Ke nyɛ ngɛ ma amɛ nɛ Yawɛ, nyɛ Mawu ɔ ha nyɛ ɔ a mi, nɛ nyɛ nu kaa

¹³ yakayaka nimli komɛ nɛ ji Israel fɔfɔɛhi puɛ ma a mi bi ɔmɛ a tue nɛ a ya ja mawu kpahi nɛ nyɛ ja we hyɛ ɔ,

¹⁴ nyɛ bi nɛ nyɛɛ na nɔ́ nɛ nyɛ nu ɔ mi fitsofitso. Ke sane ɔ ngɛ mi niinɛ kaa a pee nɔ́ yayami nɛ ɔ,

¹⁵ lɛɛ nyɛɛ gbe jamɛ a ma a mi bi ɔmɛ tsuo, kɛ a lohwe ɔmɛ tsuo. Nyɛɛ ngɔ klaate kɛ kpata ma a hɛ mi pɛsɛpɛsɛ.

¹⁶ Nyɛ bua ma a mi bi ɔmɛ a níhi nɛ a ngɛ ɔ tsuo a nya glekugleku ngɛ ma nɔ. Jehanɛ, nyɛɛ sã ma a, kɛ nɔ́ tsuaa nɔ́ nɛ ngɛ mi ɔ kaa sami bɔ kɛ ha Yawɛ, nyɛ Mawu ɔ. Ma a nɛ pee ma doku, nɛ e ko bɔ hu gblegbleegble.

¹⁷ Nyɛ ko ngɔ níhi nɛ a ma kpata a hɛ mi ɔ eko kɛ to ha nyɛ he. Kɛkɛ ɔ, Yawɛ mi mi nɛ fu nyɛ wawɛɛ ɔ nya maa ba si, nɛ e maa na nyɛ mɔbɔ. E maa na nyɛ mɔbɔ, nɛ e ma ha nyɛ he maa hiɛ babauu kaa bɔ nɛ e wo nyɛ nɛmɛ ɔmɛ si ɔ.

¹⁸ Ke nyɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ, nɛ nyɛ pee nɔ́ nɛ e ngɛ hlae ɔ, Yawɛ maa pee ní nɛ ɔmɛ ha nyɛ.