Mose V, 12 - BAIBLO ALOO NGMAMI KLƆUKLƆU Ɔ

Mawu to he kake nɛ a ja lɛ ngɛ

¹ “Mlaahi nɛ Yawɛ, nyɛ nɛmɛ a Mawu ɔ ngɛ nyɛ hae nɛ nyɛɛ ye a nɔ nyɛ wami be tsuo nɛ nyɛ maa hi zugba nɛ nyɛ yaa ngɔ ɔ nɔ ji nɛ ɔmɛ nɛ.

² Hehi nɛ je ma amɛ nɛ nyɛ yaa fie ɔ jaa a mawu ɔmɛ ngɛ, ngɛ yo gaga amɛ a nɔ, yoku ɔmɛ a nɔ, kɛ tso kusuu ɔmɛ a sisi ɔ, nyɛ kpata a hɛ mi.

³ Nyɛɛ ku a bɔ sami la tɛ ɔmɛ, nɛ nyɛɛ ywia a wɔ titima amɛ wɔtsɔwɔtsɔ. Nyɛɛ sã a yo wɔ Ashera a, nɛ nyɛɛ poo a mawu ɔmɛ a we amaga amɛ pue he. Nyɛ kpata a hɛ mi pɛsɛpɛsɛ, konɛ a ko ja mɛ ngɛ lejɛ ɔmɛ hu.

⁴ “Nyɛ ko ja Yawɛ, nyɛ Mawu ɔ ngɛ he saisaa kaa bɔ nɛ a peeɔ ɔ.

⁵ Yawɛ, nyɛ Mawu ɔ maa hla he kake ngɛ nyɛ wɛtso ɔmɛ tsuo a mi, nɛ e maa ngɔ e biɛ kɛ wo lejɛ ɔ kaa e si himi he nɛ a ja lɛ ngɛ.

⁶ Nyɛ ya sã nyɛ sami bɔ ɔmɛ, bɔ kpa amɛ, nyɛ níhi a mi dlami nyɔngmanyɔngma mi kakaaka amɛ, kɛ nyɛ bɔ ɔmɛ tsuo ngɛ lejɛ ɔ. Nike ní nɛ nyɛ wo si ke nyɛ ma ha Yawɛ, kɛ nike ní nɛ je nyɛ tsui mi faa, nyɛ na amɛ, kɛ nyɛ to ɔmɛ a kekleekle bi ɔmɛ hu nyɛɛ ngɔ kɛ ya lejɛ ɔ.

⁷ Nyɛɛ kɛ nyɛ we ɔmɛ tsuo maa ye ní ngɛ lejɛ ɔ, nɛ nyɛ bua maa jɔ niba ní kpakpahi nɛ Yawɛ, nyɛ Mawu ɔ kɛ gbaa nyɛ dengme gbomi nɔ ha nyɛ ɔ a he.

⁸ “Ke jamɛ a be ɔ su ɔ, nyɛ ko pee kaa bɔ nɛ nyɛ ngɛ pee amlɔ nɛ ɔ. Amlɔ nɛ ɔ, nyɛ tsuo nyɛ ngɛ Mawu jae bɔ nɛ nyɛ nitsɛmɛ nyɛ suɔ,

⁹ ejakaa zugba a nɛ Yawɛ, nyɛ Mawu ɔ kɛ ngɛ nyɛ hae nɛ nyɛ maa hi si ngɛ nɔ ngɛ tue mi jɔmi mi ɔ, nyɛ sui nɔ lolo.

¹⁰ Ke nyɛ po Yordan pa a, Yawɛ ma ha nyɛ maa ngɔ zugba a nɛ nyɛɛ hi nɔ. E ma ha nyɛ tue mi maa jɔ nyɛ kɛ je nyɛ he nyɛli tsuo nɛ bɔle nyɛ kɛ kpe ɔ a dɛ mi.

¹¹ Yawɛ maa hla he ko pɔtɛɛ nɛ a ja lɛ ngɛ. Nyɛɛ ngɔ bɔ sami ní ɔmɛ tsuo nɛ i ngɛ nyɛ a he mlaa woe nɛ ɔ kɛ ya sã bɔ ngɛ lejɛ ɔ: nyɛ sami bɔ ɔmɛ, nike ní ɔmɛ, nyɛ mi dlami nyɔngmanyɔngma mi kakaaka amɛ, kɛ bɔ pɔtɛɛ ɔmɛ nɛ nyɛ wo si ke nyɛ ma ha Yawɛ ɔ.

¹² Nyɛɛ kɛ nyɛ bimɛ ɔmɛ, nyɛ tsɔli nyumu ɔmɛ, nyɛ mawayi ɔmɛ, kɛ Levi bi ɔmɛ nɛ ngɛ nyɛ ma amɛ a mi ɔ tsuo nyɛ nya ngɛ Yawɛ, nyɛ Mawu ɔ hɛ mi; nyɛ kai kaa Levi bi ɔmɛ lɛɛ a be zugba ko nae kaa mɛ nitsɛmɛ a nɔ́.

¹³ Nyɛɛ hyɛ saminya nɛ nyɛ ko ya sã nyɛ sami bɔ ɔmɛ ngɛ he saisaa nɛ nyɛ suɔ.

¹⁴ Nyɛɛ sã bɔ ɔmɛ ha Yawɛ ngɛ he kake nɛ lɛ nitsɛ e maa to ngɛ nyɛ wɛtso ɔmɛ a kpɛti kake zugba mi ɔ pɛ. Lejɛ ɔ pɛ nyɛɛ sã nyɛ bɔ ɔmɛ nɛ nyɛ maa sã a, nɛ nyɛɛ pee ní kpa amɛ tsuo nɛ i fa nyɛ ke nyɛɛ pee ɔ ngɛ.

¹⁵ “Se kɛ̃ ɔ, nyɛ ma nyɛ maa gbe nyɛ lohwe ɔmɛ nɛ nyɛɛ ye ngɛ nyɛ hi he ɔmɛ. Nyɛɛ ye bɔ nɛ nyɛ suɔ, kaa bɔ nɛ Yawɛ, nyɛ Mawu dloo nyɛ ɔ. Nɔ tsuaa nɔ nɛ ye; ke ngɛ kɔ nya a, nɔ ɔ he tsɔ jio, e he tsɔ we jio, e ye kaa bɔ nɛ nyɛ yeɔ bayelɔ, loo avugbɛ lo ɔ.

¹⁶ Se muɔ lɛɛ, kaa niye ní ɔ, nyɛ ko ye; nyɛɛ tsɛ̃ pue zugba kaa nyu.

¹⁷ Nyɛ ko ye níhi nɛ nyɛ kɛ ke Yawɛ, nyɛ Mawu ɔ ekoeko ngɛ nyɛ hi he ɔmɛ, nyɛ blɛfo mi dlami nyɔngmanyɔngma mi kakaaka a jio, nyɛ wai jio, nyɛ oliv nu jio, loo nyɛ na amɛ kɛ to ɔmɛ a kekleekle bi ɔmɛ eko jio, nike níhi nɛ nyɛ wo si kaa nyɛɛ kɛ ma ha Yawɛ ɔ eko jio, nɔ́ nɛ je nyɛ tsui mi faa jio, loo bɔ kpa komɛ jio.

¹⁸ Nyɛɛ kɛ nyɛ bimɛ ɔmɛ, nyɛ sɔmɔli ɔmɛ, kɛ Levi bi ɔmɛ nɛ ngɛ nyɛ ma amɛ a mi ɔ, nyɛɛ ye bɔ sami ní nɛ ɔmɛ ngɛ Yawɛ, nyɛ Mawu ɔ hɛ mi pɛ, ngɛ he kake ɔ nɛ e to nɛ a ja lɛ Yawɛ, nyɛ Mawu ɔ ngɛ ɔ. Nyɛɛ kɛ bua jɔmi nɛ pee nɔ́ tsuaa nɔ́ ngɛ Yawɛ, nyɛ Mawu ɔ hɛ mi ngɛ lejɛ ɔ.

¹⁹ Jehanɛ hu, nyɛɛ hyɛ nɛ hi, konɛ nyɛ hɛ ko je Levi bi ɔmɛ a nɔ be abɔ nɛ nyɛ maa hi nyɛ zugba a nɔ ɔ.

²⁰ “Ke Yawɛ, nyɛ Mawu ɔ bli nyɛ huzu ɔmɛ a mi kaa bɔ nɛ e wo si ɔ, nyɛ ma nyɛ maa ye de lo be tsuaa be nɛ nyɛ suɔ.

²¹ Se ke he nɛ a to kaa a ja Yawɛ, nyɛ Mawu ɔ ngɛ ɔ kɛ tsɔ ɔ, nyɛ ma nyɛ maa gbe nyɛ na, loo to nɛ Yawɛ kɛ dloo nyɛ ɔ eko, nɛ nyɛɛ ye lɔ ɔ ngɛ nyɛ we mi kaa bɔ nɛ i de nyɛ momo ɔ.

²² Nɔ tsuaa nɔ ngɛ he blɔ nɛ e yeɔ lo ɔ eko; nɔ ɔ he tsɔ jio, nɔ ɔ he tsɔ we jio, e ye kaa bɔ nɛ e maa ye bayelɔ, loo avugbɛ lo ɔ.

²³ Lo kɛ e mi muɔ lɛɛ nyɛ ko ye kɔkɔɔkɔ; ejakaa wami ngɛ muɔ ɔ mi, nɛ e sɛ kaa nyɛ yeɔ lo kɛ e mi wami ɔ tsuo.

²⁴ Nyɛ ko ngɔ muɔ kɛ pee niye ní; mohu nyɛɛ tsɛ̃ pue zugba kaa nyu.

²⁵ Ke nyɛ ye mlaa nɛ ɔ nɔ ɔ, Yawɛ bua maa jɔ, nɛ nɔ́ tsuaa nɔ́ maa hi ha nyɛɛ kɛ nyɛ nina tsuo.

²⁶ Nyɛɛ ngɔ nyɛ bɔ ɔmɛ nɛ a sãã a, kɛ nike ní klɔuklɔu ɔmɛ nɛ nyɛ wo si ɔ kɛ ya he kake ɔ nɛ Yawɛ to ke a ja lɛ ngɛ ɔ.

²⁷ Nyɛɛ sã nyɛ sami bɔ ɔmɛ, lo kɛ muɔ tsuo pɛpɛɛpɛ ngɛ Yawɛ bɔ sami la tɛ ɔ nɔ. Nyɛ bɔ kpa amɛ lɛɛ nyɛ kpa muɔ ɔ ngɔ pue bɔ sami la tɛ ɔ nɔ, nɛ nyɛɛ ye lo ɔ.

²⁸ Nɔ́ tsuaa nɔ́ nɛ i fa nyɛ ke nyɛɛ pee, nɛ i wo nyɛ mlaa ngɛ he ɔ, nyɛɛ ye nɔ fitsofitso; kɛkɛ ɔ, níhi a mi maa hi ha nyɛ kɛ nyɛ nia tsuo kɛ maa ya neneene; ejakaa ke nyɛ pee ja a, nyɛ ngɛ nɔ́ nɛ da, kɛ nɔ́ nɛ saa Yawɛ, nyɛ Mawu ɔ hɛ mi pee.

Amaga jami he kɔkɔ bɔmi

²⁹ “Yawɛ, nyɛ Mawu ɔ ma kpata je ma amɛ nɛ nyɛ yaa ngɔ a zugba a a hɛ mi, nɛ nyɛ maa hi lejɛ ɔ kulaa.

³⁰ Ke Yawɛ kpata jamɛ a je ma amɛ a hɛ mi se ɔ, nyɛɛ hyɛ saminya nɛ nyɛ ko ya nyɛɛ a we amaga jami ní peemi ní ɔmɛ a se, ejakaa e maa pee gbenɔ ha nyɛ. Nyɛ ko hla a mawu ɔmɛ a se blɔ, nɛ nyɛ ko bi ke, ‘Kɛ jamɛ a ni ɔmɛ jaa a mawu ɔmɛ kɛɛ, konɛ wɔ hu waa pee ja!’

³¹ Nyɛ ko ja Yawɛ, nyɛ Mawu ɔ kaa a jaa a mawu ɔmɛ; ejakaa ngɛ a mawu ɔmɛ a jami mi ɔ, a peeɔ níhi nɛ a hĩɔ, nɛ́ Yawɛ sume ɔ tsuo. A bimɛ po a sãã ngɛ la mi ngɛ bɔ sami la tɛ ɔmɛ a nɔ.

³² “Nyɛɛ hyɛ saminya nɛ nyɛɛ ye mlaa amɛ tsuo nɛ i ngɛ nyɛ woe nɛ ɔ a nɔ fitsofitso. Nyɛ ko je nɔ́ ko kɛ je mi ɔ, nyɛ ko ngɔ nɔ́ ko nɔ́ ko kɛ piɛ he hulɔ.