Mose V, 10 - BAIBLO ALOO NGMAMI KLƆUKLƆU Ɔ

Mose ya ngɔ mlaa amɛ ekohu

¹ “Jehanɛ, Yawɛ de mi ke, ‘Kó tɛ tɛtlɛɛ enyɔ kaa kekle ní ɔmɛ, nɛ o kpɛ tso daka nɛ a kɛ tɛ ɔmɛ maa wo mi. Ngɔɔ kɛ kuɔ yo ɔ kɛ ba ye ngɔ,

² konɛ ma ngma munyu ɔmɛ nɛ ngɛ kekle tɛ ɔmɛ nɛ o ywia a a nɔ ɔ kɛ wo tɛ tɛtlɛɛ nɛ ɔmɛ a nɔ, konɛ o ngɔ mɛ ngɔ wo daka a mi.’

³ “Lɔ ɔ he ɔ, i ngɔ akasia tso kɛ kpɛ daka, nɛ i kó tɛ tɛtlɛɛ enyɔ kaa kekle ní ɔmɛ, nɛ i hɛɛ mɛ ngɛ ye dɛ mi kɛ kuɔ yo ɔ.

⁴ Jehanɛ, Yawɛ ngma munyu ɔmɛ nɛ e ngma ngɛ kekle tɛ tɛtlɛɛ enyɔ ɔmɛ a nɔ ɔ ngɔ wo tɛ tɛtlɛɛ ehe nɛ ɔmɛ a nɔ. Munyu nɛ ɔmɛ ji mlaa nyɔngma amɛ nɛ a ngma ha nyɛ, benɛ e tu munyu kɛ je la a mi ligbi ɔ nɛ nyɛ bua nyɛ he nya ngɛ yo ɔ he ɔ. Kɛkɛ nɛ Yawɛ ngɔ tɛ tɛtlɛɛ ɔmɛ ngɔ ha mi;

⁵ nɛ i kple si kɛ je yo ɔ nɔ. Jehanɛ, kaa bɔ nɛ Yawɛ fa mi ɔ, i ngɔ tɛ ɔmɛ ngɔ wo daka nɛ i kpɛ ɔ mi; tɛ ɔmɛ ngɛ daka a mi kɛ mwɔɔ.”

⁶ (Israel ma a hia kɛ je Yaakan bi ɔmɛ a nyu vu ɔmɛ a he kɛ ho Mosera ya. Lejɛ ɔ Aaron gbo ngɛ, nɛ lejɛ ɔ kɛ̃ a pu lɛ ngɛ; nɛ e binyumu Eleazar ye e se kaa osɔfo.

⁷ A je lejɛ ɔ kɛ ho Gudgoda ya; nɛ a tsa nɔ kɛ ho he ko nɛ nyu hiɛ saminya ngɛ ya; a tsɛɛ lejɛ ɔ Yotbata.

⁸ Benɛ a ngɛ yoku ɔ he ɔ, Yawɛ hla Levi wɛtso ɔ mi nyumuhi, konɛ a hyɛ somi daka a nɔ, nɛ a sɔmɔ kaa osɔfohi, nɛ́ a ngɔ Yawɛ biɛ kɛ gbaa ma a. A blɔ nya ní tsumihi ji enɛ ɔmɛ kɛ mwɔɔ.

⁹ Lɔ ɔ he je nɛ Levi wɛtso ɔ na we zugba ko kaa bɔ nɛ wɛtso kpa amɛ na a nɛ. Blɔ nya nɛ Levi bi ɔmɛ na ji kaa a pee Yawɛ osɔfohi kaa bɔ nɛ Yawɛ, nyɛ Mawu ɔ wo si ɔ.)

¹⁰ “I hi yo ɔ nɔ nyɔnyɔɔnyɔ kɛ piapiaapia ligbi nyingmi eywiɛ kaa bɔ nɛ i pee kekle ɔ. Yawɛ bu mi tue ekohu; e kplɛɛ kaa e be nyɛ hɛ mi kpatae.

¹¹ Jehanɛ, Yawɛ de mi ke, ‘Yaa nɛ o ya nyɛɛ ma a hɛ mi kɛ ya ngɔ zugba a nɛ i ka a nɛmɛ ɔmɛ kita ngɛ he ke ma ngɔ ha mɛ ɔ.’

Nɔ́ nɛ Mawu ke Israel ma a nɛ pee

¹² “Jehanɛ, Israel bi, nyɛɛ bu nɔ́ nɛ Yawɛ, nyɛ Mawu ɔ ngɛ hlae kaa nyɛɛ pee ɔ tue. Nyɛ ja Yawɛ, nyɛ Mawu ɔ, nɛ nyɛɛ ye e mlaa amɛ tsuo a nɔ pɛpɛɛpɛ. Nyɛɛ suɔ lɛ, nɛ nyɛ sɔmɔ lɛ kɛ nyɛ tsui tsuo, kɛ nyɛ klaa tsuo.

¹³ Nyɛɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ, konɛ e hi ha nyɛ.

¹⁴ Yawɛ, nyɛ Mawu ɔ nɔ́ ji hiɔwe ploplooplo ɔ tsuo, zugba a, kɛ nɔ́ tsuaa nɔ́ nɛ ngɛ zugba a nɔ ɔ.

¹⁵ Se akɛnɛ suɔmi nɛ Yawɛ ngɛ kɛ ha nyɛ nɛmɛ ɔmɛ nya wa wawɛɛ he je ɔ, e hla nyɛ nɛ ji a nina a mohu ngɛ je ma kpa amɛ a mi; nɛ kɛ ba si mwɔnɛ ɔ hu, nyɛ ji e ma nɛ e hla.

¹⁶ Lɔ ɔ he ɔ, kɛ je mwɔnɛ ɔ kɛ yaa a, nyɛɛ bu Yawɛ tue, nɛ nyɛ ko wa tue hu.

¹⁷ Yawɛ, nyɛ Mawu ɔ ji Mawu nɛ pe mawuhi tsuo kulaa, nɛ e he wami se be. E ji Mawu nɛ kle, nɛ e he wa; nɛ e sa nɛ a ye lɛ gbeye. E hyɛ we nɔ hɛ mi, nɛ e he we nyɔ mi ní.

¹⁸ E hyɛɛ kaa a ye awusahi, kɛ yalɔyihi a sane pɛpɛɛpɛ ha mɛ. E suɔ nihi nɛ ba to wɔ nibwɔ ɔ, nɛ e haa mɛ a niye ní, kɛ a heha ní.

¹⁹ Lɔ ɔ he ɔ, nyɛɛ suɔ nibwɔ ɔmɛ a sane; ejakaa nyɛ hu nyɛ ya to nubwɔ hyɛ ngɛ Egipt.

²⁰ Nyɛɛ bu Yawɛ, nyɛ Mawu ɔ tue, nɛ nyɛ ja lɛ nɔ kake pɛ. Nyɛɛ ye lɛ anɔkuale, nɛ nyɛɛ wo si ngɛ e biɛ mi pɛ.

²¹ Nyɛ je e yi; lɛ ji nyɛ Mawu ɔ nɛ. Lɛ ji nɔ nɛ tsu ní nguanguahi nɛ ngɛ gbeye, nɛ nyɛ na kɛ nyɛ nitsɛmɛ nyɛ hɛngmɛ ɔ nɛ.

²² Benɛ nyɛ nɛmɛ ɔmɛ yaa Egipt ɔ, mɛ nimli nyingmi kpaago pɛ nɛ a ho, se amlɔ nɛ ɔ, Yawɛ, nyɛ Mawu ɔ ha nyɛ he hiɛ babauu kaa dodoehi ngɛ hiɔwe.