Mose V, 1 - BAIBLO ALOO NGMAMI KLƆUKLƆU Ɔ

¹ Munyuhi nɛ Mose tu kɛ tsɔɔ Israel ma a ngɛ nga kplanaa a nɔ ngɛ Yordan pa a beleku je ji nɛ ɔmɛ nɛ. Jamɛ a be ɔ mi ɔ, Israel ma a ngɛ Yordan kɔ̃ ɔ mi, ngɛ Suf hanɔ ngɛ Paran, kɛ ma nɛ ɔmɛ, Tafel, Laban, Hazerat, kɛ Dizahab a kpɛti.

² Kɛ je Sinai yo ɔ he kɛ gu Edom yo ɔ nɔ kɛ yaa Kadesh Barnea a peeɔ ligbi nyɔngma kɛ kake blɔ nyɛɛmi.

³ Se jeha nyingmi eywiɛne ɔ, nyɔhiɔ nɛ ji nyɔngma kɛ kake ɔ we kekleekle ligbi ɔ loko Mose tu munyuhi tsuo nɛ Yawɛ fa lɛ ke e de Israel ma a kɛ tsɔɔ mɛ.

⁴ Jamɛ a be ɔ mi ɔ, Yawɛ gbe Amor bi ɔmɛ a matsɛ, Sihon nɛ hi Heshbon ɔ, kɛ Bashan matsɛ, Og nɛ hi Ashtarot ngɛ Edrei ɔ momo.

⁵ Benɛ ma a ba su Yordan pa a beleku je ngɛ Moab zugba a nɔ ɔ, Mose bɔni mɛ mlaa amɛ a sisi tsɔɔmi. Nɛ e de ke,

⁶ “Bɔ nɛ nyɛ hi yo nɛ ɔ he ɔ hiɛ;

⁷ nyɛɛ hia nɛ nyɛɛ ya nyɛ hɛ mi. Nyɛɛ ya Amor bi ɔmɛ a yo zugba amɛ, kɛ zugbahi nɛ bɔle mɛ ɔ tsuo a nɔ. Nyɛɛ ya Yordan kɔ̃ ɔ mi, yo nɔ zugba amɛ, zugba kpataa amɛ, kɛ leneyi je zugba a nɔ, kɛ ya su Mediterenia wo ɔ nya. Nyɛɛ ya Kanaan bi ɔmɛ a zugba a nɔ, kɛ Lebanon yo ɔmɛ a nɔ, kɛ ya su pa ngua a nɛ a tsɛɛ Yufrate ɔ nya.

⁸ Zugba nɛ ɔ tsuo nɛ imi Yawɛ, i wo nyɛ nɛmɛ Abraham, Isak, kɛ Yakob si ke ma ngɔ ha mɛ, kɛ a nina a nɛ. Nyɛɛ ya nɛ nyɛ ya ngɔ zugba a tsuo kulaa.”

Mose wo ma nya dali komɛ

⁹ Mose de Israel ma a ke, “Jamɛ a be ɔ mi, benɛ wa ngɛ Sinai yo ɔ he ɔ, i de nyɛ ke, ‘Imi nɔ kake, i be nyɛ nɔ nyɛe ma hyɛ hu;

¹⁰ Yawɛ nyɛ Mawu ɔ ha nɛ amlɔ nɛ ɔ nyɛ he hiɛ babauu kaa dodoehi ngɛ hiɔwe.

¹¹ Yawɛ, nyɛ nɛmɛ a Mawu ɔ ma ha nyɛ maa hiɛ pe bɔ nɛ nyɛ ngɛ nɛ ɔ si akpe abɔ; nɛ e maa gbaa nyɛ kaa bɔ nɛ e wo si ɔ.

¹² Kɛ ma pee kɛɛ nɛ imi nɔ kake too ma tloo ma tlomi nɛ jiɔ nɛ ɔ? Kɛ ma pee kɛɛ nɛ imi nɔ kake ma nyɛ hyɛ nyɛ munyu tsɔwitsɔwi ɔmɛ a mi ha nyɛ?

¹³ Nyɛɛ hla nyumuhi nɛ le ní, nɛ a ngɛ juɛmi, nɛ a ngɛ biɛ kpakpa hulɔ ngɛ nyɛ wɛtso ɔmɛ a nya, konɛ ma ngɔ mɛ kɛ to ma a nya.’

¹⁴ Nyɛ ha heto ke bɔ nɛ i de ɔ hi, nɛ nyɛ maa pee ja.

¹⁵ Lɔ ɔ he ɔ, i ngɔ wɛtsoyihi nɛ ji nyumuhi nɛ le ní, nɛ a ngɛ juɛmi, nɛ a ngɛ biɛ kpakpa nɛ nyɛ hla a ngɔ to ma a nya. Ni komɛ hyɛ nimli nyɔngma nɔ, ni komɛ hyɛ nimli nyingmi enuɔ nɔ, ni komɛ hyɛ nimli lafa nɔ, nɛ ni komɛ hu hyɛ nimli akpe nɔ. Jehanɛ i hla nɔ hyɛli kpa komɛ kɛ je nyɛ wɛtso ɔmɛ tsuo a mi.”

¹⁶ “Jamɛ a be ɔ mi ɔ, i wo ma nya dali ɔmɛ mlaa ke, ‘Sanehi nɛ nyɛ nyɛmimɛ ɔmɛ kɛ maa ba nyɛ hɛ mi ɔ, nyɛɛ hyɛ a mi. Nyɛɛ kojo ngɛ blɔ nɛ da nɔ, nyɛ nyɛmimɛ Israel bi sɔuu a kpɛti sane jio, a ti nɔ ko kɛ nibwɔhi nɛ ngɛ nyɛ ngɔ a kpɛti sane jio.

¹⁷ Nyɛ ko hyɛ nɔ hɛ mi ngɛ sane yemi mi; nyɛɛ bu nɔ tsuaa nɔ tue pɛpɛɛpɛ. Nyɛ ko ye nɔmlɔ adesa hɛ mi gbeye; ejakaa Mawu ji nɔ nɛ buáá sane he. Se ke sane ko pa nyɛ ɔ, lɛɛ nyɛ kɛ ba ye hɛ mi, konɛ imi nitsɛ ma hyɛ mi.’

¹⁸ Jamɛ a be ɔ mi nɔuu ɔ, i wo nyɛ níhi tsuo nɛ sa kaa nyɛɛ pee ɔ a he mlaa.

A tsɔ slaali kɛ je Kadesh Barnea

¹⁹ “Kaa bɔ nɛ Yawɛ, wa Mawu ɔ fa wɔ ɔ, wa hia kɛ je Sinai yo ɔ he, kɛ gu nga kplanaa nɛ nɔ ngɛ gbeye ɔ nɔ, kɛ ya be ngɛ Amor bi ɔmɛ a yo zugba amɛ a nɔ.

^20-21 Benɛ wa ba su Kadesh Barnea a, i de nyɛ ke, ‘Jehanɛ lɛɛ nyɛ su Amor bi ɔmɛ a yo zugba nɛ Yawɛ, wa nɛmɛ a Mawu ɔ kɛ ngɛ wɔ hae ɔ nɔ. Nyɛɛ ya nɛ nyɛ ya ngɔ kaa bɔ nɛ Yawɛ fa wɔ ɔ. Nyɛ ko to tsle, nɛ nyɛ ko ye gbeye.’

²² “Se nyɛ tsuo nyɛ ba ye ngɔ, nɛ nyɛ ba de mi ke, ‘Waa tsɔ nyumuhi kɛ sɛ hlami kɛ ya slaa zugba a, nɛ́ a ba tsɔɔ wɔ blɔ nɛ wa maa gu nɔ ɔ, nɛ́ a de wɔ mahi nɛ ngɛ lejɛ ɔ a he nɔ́ ko.’

²³ “Ga nɛ nyɛ wo ɔ, i na kaa e hi, lɔ ɔ he ɔ, i hla nyɛ kpɛti nihi nyɔngma kɛ enyɔ, nɔ kakaaka ngɛ nyɛ wɛtso ɔmɛ a nya.

²⁴ I wo mɛ blɔ, nɛ a gu yo nɔ je kɛ ya su Eshkol kɔ̃ ɔ mi tɔɔ; nɛ a slaa lejɛ ɔ.

²⁵ A ngɔ zugba a nɔ tso yiblii ɔ eko kɛ kple si kɛ ba bɔ wɔ amaniɛ ke, ‘Zugba nɛ Yawɛ, wa Mawu ɔ ngɛ wɔ hae nɛ ɔ, e ji zugba kpakpa.’

²⁶ “Se nyɛ tsɔ Yawɛ, nyɛ Mawu ɔ hɛ mi atuã; nyɛ bui e fami ɔ fɛɛ; nyɛ kua yo ɔ kuɔmi;

²⁷ nɛ nyɛ tu munyu huitihuiti ke, ‘Akɛnɛ Yawɛ sume wa sane he je ɔ, e je wɔ kɛ je Egipt zugba a nɔ kɛ ba ha Amor bi ɔmɛ, konɛ a kpata wa hɛ mi.

²⁸ Jije wa maa ya? Wa nyɛmimɛ ɔmɛ ha wa tsui po. A ke nihi nɛ ngɛ lejɛ ɔ je oblai; a he wa, nɛ a ka pe wɔ. A ke mahi nɛ a ngɛ mi ɔ, ma nguanguahi nɛ a fia gbogbohi nɛ ya hiɔwe ploplooplo ngɔ wo a he. Jehanɛ hu, mɛ nitsɛmɛ a na oblai nɛ ɔmɛ paa kɛ a hɛngmɛ!’

²⁹ “Se i de nyɛ ke, ‘Nyɛ ko nu sawale, nɛ nyɛ ko ye mɛ gbeye.

³⁰ Yawɛ, nyɛ Mawu ɔ nɛ nyɛɛ nyɛ hɛ mi ɔ, lɛ nitsɛ e maa hwu ha nyɛ kaa bɔ nɛ e pee ha nyɛ ngɛ Egipt,

³¹ kɛ nga kplanaa a nɔ nɛ nyɛ na kɛ nyɛ hɛngmɛ ɔ. Nyɛ na bɔ nɛ Yawɛ, nyɛ Mawu ɔ hɛɛ nyɛ fiafiaafia hluu kɛ ba hiɛmɛ nɛ ɔ, kaa bɔ nɛ tsɛ hɛɛɔ e bi ɔ.’

³² Se nɛ i de nyɛ nɔ́ nɛ ɔ se po, nyɛ he we Yawɛ, nyɛ Mawu ɔ yi,

³³ be mi nɛ lɛɛ daa nɛ ɔ e nyɛɛ nyɛ hɛ mi kɛ ngɛ sito he hlae ha nyɛ. Nyɔ mi ɔ, e nyɛɛ nyɛ hɛ mi kɛ la titima, nɛ piani ɔ, e nyɛɛ nyɛ hɛ mi ngɛ bɔku titima mi kɛ tsɔɔ nyɛ blɔ.

Yawɛ gbla Israel tue

³⁴ “Benɛ Yawɛ nu nyɛ munyu ɔmɛ ɔ, e mi mi wo la, nɛ e ka kita ke,

³⁵ ‘Ke kikɛmɛ a yi nɔ yaya bi nɛ ɔmɛ a ti nɔ ko na zugba kpakpa nɛ i ka he kita ke ma ngɔ ha nyɛ nɛmɛ ɔmɛ ɔ fii!

³⁶ Yefune bi Kaleb pɛ lɛ maa na zugba a. Lɛɛ e ye mi anɔkuale, lɔ ɔ he ɔ, ma ngɔ zugba nɛ e ya slaa a ngɔ ha lɛ kɛ e nina.’

³⁷ Nyɛ he ɔ, Yawɛ mi mi fu imi hulɔ, nɛ e de ke, ‘Mo Mose po, o be lejɛ ɔ sue.

³⁸ Nun bi Yoshua, o sɔmɔlɔ ɔ lɛɛ e ma ya su lejɛ ɔ. Wo lɛ he wami, ejakaa lɛ nɛ e maa nyɛɛ Israel ma a hɛ mi kɛ ya ngɔ zugba a.’

³⁹ “Jehanɛ Yawɛ de wɔ tsuo ke, ‘Nyɛ bimɛ tsɔwi ɔmɛ nɛ na we nɛ a le slɔɔto nɛ ngɛ kpakpa kɛ yayami a kpɛti lolo, nɛ́ nyɛ de ngɛ a he ke he nyɛli ma ba nuu mɛ ɔ, mɛ ma ngɔ zugba a kɛ ha nɛ a hi nɔ.

⁴⁰ Se nyɛɛ lɛɛ nyɛɛ kpale nyɛ se kɛ gu nga kplanaa a nɔ kɛ ho Wo Tsu ɔ he ya.’

⁴¹ “Nyɛ he nɔ ke, ‘Wa tɔ̃ Yawɛ nɔ. Jehanɛ lɛɛ wa maa ya nɛ wa ya hwu ta a kaa bɔ nɛ Yawɛ, wa Mawu ɔ fa wɔ ɔ.’ Kɛkɛ nɛ nɔ tsuaa nɔ wo e ta hwumi ní; nyɛ ngɔ lɛ kaa plasee nɔ́ ko kaa nyɛ ma ya tua yo nɔ ma a.

⁴² “Se Yawɛ de mi ke, ‘De mɛ ke a ko hia ta, nɛ a ko hwu ta; ejakaa i be a he piɛe. Ke a hia ta a, a he nyɛli ɔmɛ maa ye a nɔ.’

⁴³ Bɔ nɛ i de nyɛ ji nɛ ɔ nɛ; se nyɛ bui tue. Nyɛ tsɔ Yawɛ hɛ mi atuã; nyɛ si nyɛ gugue, nɛ nyɛ kuɔ kɛ ho yo ɔ nɔ ya.

⁴⁴ Kɛkɛ nɛ Amor bi ɔmɛ nɛ ngɛ Edom yo ɔmɛ a nɔ ɔ je kpo kɛ ba kaa hwo bihi, nɛ a kɛ nyɛ ba kpe. A fie nyɛ hluu kɛ ya su Horma, nɛ a ye nyɛ nɔ ngɛ lejɛ ɔ, ngɛ Edom yo zugba a nɔ.

⁴⁵ Nyɛ kpale kɛ ba nɛ nyɛ ba wo yana ngɛ Yawɛ hɛ mi; se Yawɛ bui nyɛ tue, nɛ e he we nyɛ nɔ hulɔ.

Jehahi nɛ a ye ngɛ nga kplanaa a nɔ

⁴⁶ “Lɔ ɔ he ɔ, wa hi Kadesh be babauu.