Mose IV, 9 - BAIBLO ALOO NGMAMI KLƆUKLƆU Ɔ

Hetsɔmi enyɔne ɔ

¹ Benɛ Israel bi ɔmɛ je Egipt zugba a nɔ ɔ se jeha enyɔne ɔ we kekleekle nyɔhiɔ ɔ, Yawɛ kɛ Mose tu munyu ngɛ Sinai nga a nɔ, nɛ e de lɛ ke,

² “Ha nɛ Israel bi ɔmɛ nɛ a ye Hetsɔmi ɔ ngɛ be nɛ a to ɔ mi.

³ Nyɔhiɔ nɛ ɔ ligbi nɛ ji nyɔngma kɛ eywiɛ ɔ we gbɔkuɛ nya si ji be nɛ a to ke nyɛɛ ye Hetsɔmi ɔ nɛ. Nyɛɛ ye lɛ ngɛ mlaa amɛ, kɛ blɔ nya tomi ɔmɛ tsuo a nya.”

⁴ Lɔ ɔ he ɔ, Mose de Israel bi ɔmɛ ke a ye Hetsɔmi ɔ.

⁵ Nɛ a ye Hetsɔmi ɔ ngɛ Sinai nga a nɔ gbɔkuɛ nya si ngɛ kekleekle nyɔhiɔ ɔ we ligbi nɛ ji nyɔngma kɛ eywiɛ ɔ nɔ kaa bɔ nɛ Yawɛ fa Mose ɔ pɛpɛɛpɛ.

⁶ Se ni komɛ ngɛ a kpɛti nɛ a ble a he, ejakaa a ta nɔ gbogboe he; lɔ ɔ he ɔ, mɛɛ a nyɛ we nɛ a ye Hetsɔmi ɔ jamɛ a ligbi ɔ. Kikɛmɛ a nimli nɛ ɔmɛ ba Mose kɛ Aaron a ngɔ jamɛ a ligbi ɔ nɔuu,

⁷ nɛ a ba de ke, “E ngɛ mi kaa wa ya ta nɔ gbogboe he nɛ wa he tsɔ we, se mɛni he je nɛ a tsiɔ wa nya kaa wɔɔ lɛɛ wa ko piɛ Israel bi kpa amɛ a he, nɛ́ waa ngɔ wa nike ní kɛ ba ha Yawɛ ngɛ be nɛ a to ɔ mi?”

⁸ Mose de mɛ ke, “Nyɛɛ mlɛ kɛ yaa si ma nu nɔ́ nɛ Yawɛ ma fa mi ke ma de nyɛ.”

⁹ Yawɛ de Mose

¹⁰ ke e de Israel bi ɔmɛ ke, “Ke nyɛ ti nɔ ko, aloo nyɛ nina ko ya ta nɔ gbogboe he nɛ e kɛ ble e he, aloo e hia blɔ kɛ ho ma se lokoo ya a, jamɛ a nɔ ɔ ma nyɛ maa ye Yawɛ Hetsɔmi ɔ faa.

¹¹ Se mohu ɔ, e ye lɛ gbɔkuɛ nya si nyɔhiɔ kake se, ngɛ nyɔhiɔ enyɔne ɔ ligbi nɛ ji nyɔngma kɛ eywiɛ ɔ nɔ. A ngɔ abolo kplolo, kɛ pui doodooe kɛ ye.

¹² A ko si eko nɛ je nɛ na yi, nɛ á ko ywia lohwe ɔ wu ko hulɔ; a ye Hetsɔmi ɔ kaa bɔ nɛ mlaa a tsɔɔ ɔ.

¹³ Se nɔmlɔ nɛ he tsɔ, nɛ e hiɛ blɔ hulɔ, nɛ e kua Hetsɔmi ɔ yemi ɔ, jamɛ a nɔ ɔ lɛɛ a je lɛ we kɛ je e ma mi bi ɔmɛ a kpɛti; ejakaa e kɛ Yawɛ nike ní ɔ bɛ be nɛ a to ɔ. Nɔmlɔ nɛ ɔ, lɛ nitsɛ e musu maa tloo lɛ.

¹⁴ “Ke nubwɔ ko ba ngɛ nyɛ ma a mi nɛ e suɔ kaa e maa ye Hetsɔmi ɔ, e ye ngɛ Yawɛ blɔ nya tomi ɔ nya. Mlaa kake nɛ ɔ ngɛ kɛ ha nɔ tsuaa nɔ, nubwɔ jio, zugba a nɔ bi fɔfɔɛ jio.”

La bɔku ɔ

^15-16 Ligbi ɔ nɛ a ma kpe he ɔ, bɔku ɔ ba ha he. Kɛ je gbɔkuɛ kɛ ya si je na a, bɔku ɔ ngɛ kpɛe kaa la.

¹⁷ Be tsuaa be nɛ bɔku ɔ ma wo e he nɔ kɛ je bo tsu ɔ he pɛ Israel bi ɔmɛ maa hia nyɛɛmi. He tsuaa he nɛ bɔku ɔ maa da si ngɛ ɔ, lejɛ ɔ nɔuu ji he nɛ Israel bi ɔmɛ hu maa to si ngɛ.

¹⁸ Ke Yawɛ fa Israel bi ɔmɛ kɛkɛ a hia; ke e fa mɛ ekohu kɛkɛ a to si. Ligbi abɔ nɛ bɔku ɔ daa si ngɛ kpe he ɔ yi mi ɔ, Israel bi ɔmɛ hu hii si ngɛ sito he ɔ.

¹⁹ Ke e ba mi kaa bɔku ɔ se kɛ ngɛ kpe he ɔ yi mi ligbi babauu po ɔ, Israel bi ɔmɛ buɔ Yawɛ tue, nɛ a hiɛ blɔ.

²⁰ Be komɛ hu bɔku ɔ hii kpe he ɔ yi mi ligbi bɔɔ pɛ. Bɔ tsuaa bɔ nɛ pee ɔ, ke Israel bi ɔmɛ maa hi sito he ɔ jio, aloo a maa hia blɔ jio, ja Yawɛ fa mɛ.

²¹ Be komɛ po bɔku ɔ hii lejɛ ɔ kɛ jeɔ gbɔkuɛ kɛ ya siɔ mɔtu; nɛ ke e wo e he nɔ pɛ a hia blɔ; piani jio, nyɔ mi jio, be tsuaa be nɛ bɔku ɔ ma wo e he nɔ ɔ, kɛkɛ a hia blɔ.

²² Ke ligbi enyɔ, aloo nyɔhiɔ kake, aloo be nɛ kɛ pe ja po nɛ bɔku ɔ daa si ngɛ kpe he ɔ yi mi ɔ, Israel bi ɔmɛ hii sito he ɔ nɛ a hiɛ blɔ; ja bɔku ɔ wo e he nɔ loko a maa hia blɔ.

²³ Israel bi ɔmɛ buɔ Yawɛ tue. Lɔ ɔ he ɔ, ke a maa to si jio, a maa hia nyɛɛmi jio, ja Yawɛ fa mɛ kɛ gu Mose nɔ.