Mose IV, 8 - BAIBLO ALOO NGMAMI KLƆUKLƆU Ɔ

Kane ɔmɛ a si mamɛ

¹ Yawɛ de Mose ke,

² “Mo de Aaron ke, ke e ngɔ kane kpaago ɔmɛ kɛ ma si mami ɔ, e hyɛ nɛ mɛ tsuo a tso kɛ ya kane tso ɔ hɛ mi.”

³ Aaron pee kaa bɔ nɛ Yawɛ fa Mose ɔ. E ngɔ kane ɔmɛ kɛ ma si, konɛ a tso kɛ ya kane tso ɔ hɛ mi.

⁴ Bɔ nɛ a pee kane tso ɔ ji nɛ ɔ nɛ: a ngɔ sika tsu nɛ a fia nɔ tɛtlɛɛ kɛ pee kane tso ɔ kɛ je e nane kɛ ya si e mɔmɔ ɔmɛ a he, kaa bɔ nɛ nɔ hyɛmi nɔ́ ɔ nɛ Yawɛ kɛ tsɔɔ Mose ɔ ngɛ ɔ pɛpɛɛpɛ.

A hla Levi bi ɔmɛ ngɔ to

⁵ Yawɛ de Mose ekohu ke,

⁶ “Je Levi bi ɔmɛ kɛ je Israel bi ɔmɛ a kpɛti, nɛ o tsukɔ a he.

⁷ Bɔ nɛ o maa pee kɛ tsukɔ a he ji nɛ ɔ nɛ: ngɔɔ nyu ɔ nɛ a kɛ jeɔ yayami ɔ ngɔ fĩa a nɔ. Ha nɛ nɔ tsuaa nɔ nɛ ngɔ asoyi kɛ sɛ bwɔmi tsuo ngɛ e nɔmlɔ tso ɔ he, nɛ a fɔ a tade ɔmɛ a he. Ke a pee ja a, a he ma tsɔ.

⁸ Jehanɛ, ha nɛ a ngɔ na niheyo kake, kɛ niye ní bɔ ɔ, nɛ ji mamu bukɔbukɔ nɛ a futu mi nu ɔ kɛ ba. Ngɔɔ na niheyo kpa nɛ o kɛ sã yayami pami bɔ.

⁹ Lɔ ɔ se ɔ, o maa kpee Israel ma mluku ɔ tsuo kɛ ba, nɛ o kɛ Levi bi ɔmɛ ma ba da si ngɛ kpe he bo tsu ɔ sinya a nya.

¹⁰ Ke o ngɔ Levi bi ɔmɛ kɛ ba imi Yawɛ, ye hɛ mi ɔ, Israel bi ɔmɛ maa ngɔ a nine kɛ pue Levi bi ɔmɛ a yi mi.

¹¹ Kɛkɛ Aaron maa pee kusumi klɛdɛɛ ko kɛ tsɔɔ kaa a hla Levi bi ɔmɛ kɛ ha imi Yawɛ, kaa Israel ma mluku ɔ a nike ní klɛdɛɛ, konɛ a sɔmɔ mi.

¹² Enɛ ɔ se ɔ, Levi bi ɔmɛ maa ngɔ a nine kɛ pue na ku enyɔ ɔmɛ a yi mi. O kɛ kake maa sã yayami pami bɔ, nɛ o maa ngɔ kake hu kɛ sã sami bɔ, nɛ o kɛ kpata Yawɛ ha Levi bi ɔmɛ.

¹³ “Ngɔɔ Levi bi ɔmɛ ngɔ ha mi kaa nike ní klɛdɛɛ, konɛ a hi Aaron kɛ e bimɛ ɔmɛ a nine nɔ.

¹⁴ O maa pee enɛ ɔ kɛ je Levi bi ɔmɛ kɛ je Israel ma a he nɛ a ba pee ye níhi.

¹⁵ Ke o tsukɔ Levi bi ɔmɛ a he, nɛ o hla mɛ ngɔ to ɔ, lɔ ɔ se loko a ma nyɛ maa ya kpe he bo tsu ɔ mi nɛ a ya sɔmɔ mi ngɛ lejɛ ɔ.

¹⁶ I ngɔ mɛ ngɔ to bitɛtehi tsuo pɛpɛɛpɛ ngɛ Israel ɔ a nane mi; lɔ ɔ he ɔ, ye níhi ji mɛ.

¹⁷ Ligbi ɔ nɛ i kpata Egipt bi ɔmɛ a kekleekle bimɛ ɔmɛ tsuo a hɛ mi ɔ, i tsukɔ Israel bi ɔmɛ lɛɛ a bitɛte ɔmɛ, kɛ a lohwe ɔmɛ hu a kekleekle bi ɔmɛ a he, nɛ i kɛ mɛ pee imi nitsɛ ye níhi.

¹⁸ I hla Levi bi ɔmɛ ngɛ Israel bitɛtehi tsuo pɛpɛɛpɛ a nane mi.

¹⁹ I ngɔ mɛ ngɔ ha Aaron kɛ e bimɛ ɔmɛ kaa Israel ma a tsuo a nike ní. A ma sɔmɔ ngɛ kpe he bo tsu ɔ mi, nɛ a ma kpata Yawɛ ha ma a, bɔ nɛ pee nɛ ke alini ma a hɛ mɛ kɛ su he klɔuklɔu ɔ he tsɔ ɔ, gbenɔ hiɔ kó sɛ a kpɛti.”

²⁰ Mose kɛ Aaron, kɛ Israel ma kpekpemi ɔ tsukɔ Levi bi ɔmɛ a he, nɛ a hla mɛ ngɔ to kaa bɔ nɛ Yawɛ fa Mose ɔ.

²¹ Benɛ Levi bi ɔmɛ tsukɔ a he kɛ je a yayami ɔmɛ a he, nɛ a fɔ a tade ɔmɛ a he ta a, Aaron ngɔ mɛ kɛ ba ha Yawɛ kaa nike ní klɛdɛɛ. E pee kusumi kɛ kpata Yawɛ ha mɛ nɛ e kɛ tsukɔ a he.

²² Enɛ ɔ se ɔ, Levi bi ɔmɛ ya sɛ kpe he bo tsu ɔ mi, nɛ a sɔmɔ ngɛ lejɛ ɔ ngɛ Aaron kɛ e bimɛ ɔmɛ a sisi. Bɔ nɛ Yawɛ fa Mose ke a pee ha Levi bi ɔmɛ ɔ, ja pɛpɛɛpɛ nɛ a pee ha mɛ.

²³ Yawɛ de Mose ke,

²⁴ “Mlaa nɛ kɔɔ Levi bi ɔmɛ a he ji nɛ ɔ nɛ: Levi no tsuaa Levi no nɛ ye kɛ je jeha nyingmi enyɔ kɛ enuɔ kɛ yaa a, e ma sɔmɔ ngɛ kpe he bo tsu ɔ mi.

²⁵ Ni nɛmɛ nɛ ye kɛ je jeha nyingmi enuɔ kɛ yaa a, mɛɛ a ma kpa ní tsumi.

²⁶ Kɛ je jamɛ a be ɔ kɛ yaa a, a ní tsumi ji kaa a maa piɛ a nyɛmimɛ Levi bi ɔmɛ a he kɛ sɔmɔ ngɛ kpe he bo tsu ɔ mi, se mɛ nitsɛmɛ lɛɛ a be ní tsumi pɔtɛɛ ko tsue. Bɔ nɛ o maa to ní tsumi ɔ he blɔ nya kɛ ha Levi bi ɔmɛ ji nɛ ɔ nɛ.”