Mose IV, 7 - BAIBLO ALOO NGMAMI KLƆUKLƆU Ɔ

Ma nimeli ɔmɛ ba sã bɔ

¹ Ligbi ɔ nɛ Mose gbe kpe he ɔ mami nya a, e pɔ kpe he ɔ nu, nɛ e tsukɔ he kɛ e he ní ɔmɛ tsuo, kɛ bɔ sami la tɛ ɔ kɛ e he ní ɔmɛ tsuo.

² Lɔ ɔ se ɔ, Israel wɛtso nikɔtɔma amɛ nɛ da wɛtso ɔmɛ a nya, be mi nɛ a kane ni ɔmɛ ɔ,

³ ngɔ a nike ní ba ha Yawɛ ngɛ kpe he ɔ. Ní ɔmɛ ji tlɔɔkehi nɛ a kɛ nɔ́ ha a he ekpa, kɛ na ku nyɔngma kɛ enyɔ. Ni enyɔ tsuaa ni enyɔ kɛ tlɔɔke kake ba, se na amɛ lɛɛ a ngɔ kakaaka kɛ ba.

⁴ Kɛkɛ nɛ Yawɛ de Mose ke,

⁵ “Mo he nike ní nɛ ɔmɛ ngɛ a dɛ, nɛ a kɛ tsu kpe he bo tsu ɔ he ní; moo dla ngɔ ha Levi bi ɔmɛ ngɛ a ti nɔ tsuaa nɔ ní tsumi nya.”

⁶ Mose he ní ɔmɛ, nɛ e ngɔ tlɔɔke ɔmɛ, kɛ na ku ɔmɛ ngɔ ha Levi bi ɔmɛ.

⁷ E ha Gershon bi ɔmɛ tlɔɔke enyɔ, kɛ na eywiɛ ngɛ a ní tsumi nya,

⁸ nɛ e ha Merari bi ɔmɛ tlɔɔke eywiɛ, kɛ na kpaanyɔ ngɛ mɛ hu a ní tsumi nya. Mɛ tsuo a nɔ hyɛlɔ ji osɔfo Aaron bi Itamar.

⁹ Se Kohat bi ɔmɛ lɛɛ Mose ha we mɛ nɔ́ ko; ejakaa ní klɔuklɔu ɔmɛ nɛ a kɛ ha mɛ nɛ a hyɛ nɔ ɔ, a konɔ a kɛ maa fɔ.

¹⁰ Ligbi ɔ nɛ a pɔ bɔ sami la tɛ ɔ nu, nɛ a tsukɔ he ɔ, ma nimeli ɔmɛ ngɔ nike ní kɛ ba bɔ sami la tɛ ɔ hɛ mi ekohu.

¹¹ Yawɛ de Mose ke, “Ha nɛ ma nimeli ɔmɛ nɛ a ngɔ a nike ní ɔmɛ kɛ ba kakaaka, nɛ a kɛ tsukɔ bɔ sami la tɛ ɔ he. Daa ligbi ɔ, nɔ kake nɛ ngɔ e nɔ́ kɛ ba.”

^12-83 Bɔ nɛ a ngɔ nike ní ɔmɛ kɛ ba ha ji nɛ ɔ nɛ: LIGBI WƐTSO WƐTSO NƆKƆTƆMA Kekleekle Yuda Nashon, Aminadab bi ɔ Enyɔne Isakar Netanel, Zuar bi ɔ Etɛne Zebulun Eliab, Helon bi ɔ Eywiɛne Ruben Elizur, Shedeur bi ɔ Enuɔne Simeon Shelumiel, Zurishadai bi ɔ Ekpane Gad Eliasaf, Deuel bi ɔ Kpaagone Efraim Elishama, Amihud bi ɔ Kpaanyɔne Manase Gamaliel, Pedazur bi ɔ Nɛɛne Benyamin Abidan, Gideoni bi ɔ Nyɔngmane Dan Ahiezer, Amishadai bi ɔ Nyɔngma kɛ Asher Pagiel, Okran bi ɔ kakene Nyɔngma kɛ enyɔne Naftali Ahira, Enan bi ɔ. Nike ní mi mi kake too nɛ nɔ tsuaa nɔ ngɔ kɛ ba. Nike ní ɔmɛ ji nɛ ɔmɛ nɛ: sika hiɔ plɛɛte kake nɛ e jiimi ji kilo kake kɛ fa, kɛ sika hiɔ kã kake nɛ e jiimi ji gram lafa kpaanyɔ ngɛ he klɔuklɔu ɔ jiimi nya. Ní enyɔ nɛ ɔmɛ tsuo hyi tɔ kɛ ngma mamu bukɔbukɔ nɛ a ngɔ nu kɛ futu mi kɛ ha niye ní bɔ sami. Enɛ ɔmɛ hu piɛ he: sika tsu kã kake nɛ e jiimi ji gram lafa kɛ nyɔngma nɛ tsopa kɛ e he via nɛ a sãã hyi lɛ tɔ, na niheyo kake, agbosu kake, kɛ jijɔ ku kake nɛ ye jeha kake, nɛ a kɛ maa sã sami bɔ, kɛ akpakpo kake nɛ a kɛ maa sã yayami pami bɔ. Enɛ ɔmɛ lɛɛ a kɛ maa sã tue mi jɔmi bɔ: na ku enyɔ, agbosu enyɔ, akpakpo enuɔ, kɛ jijɔ ku enuɔ nɛ a ye jeha kakaaka.

LIGBI WƐTSO WƐTSO NƆKƆTƆMA Nashon, Aminadab bi ɔ Netanel, Zuar bi ɔ Eliab, Helon bi ɔ Elizur, Shedeur bi ɔ Shelumiel, Zurishadai bi ɔ Eliasaf, Deuel bi ɔ Elishama, Amihud bi ɔ Gamaliel, Pedazur bi ɔ Abidan, Gideoni bi ɔ Ahiezer, Amishadai bi ɔ Pagiel, Okran bi ɔ kakene Ahira, Enan bi ɔ.

^84-88 Ligbi ɔ nɛ a pɔ bɔ sami la tɛ ɔ nu ɔ, nike ní nɛ Israel wɛtso nikɔtɔma amɛ ngɔ kɛ ba a tsuo pɛpɛɛpɛ a hiɛmi ji nɛ ɔmɛ nɛ: - Sika hiɔ plɛɛte nyɔngma kɛ enyɔ, kɛ sika hiɔ kã nyɔngma kɛ enyɔ nɛ a jiimi ji kilo nyingmi enyɔ kɛ kpaago kɛ se. - Sika tsu kã nyɔngma kɛ enyɔ ɔmɛ nɛ tsopa kɛ e he via hyi mɛ tɔ ɔ tsuo a jiimi ji kilo kɛ se. - Na ku nyɔngma kɛ enyɔ, agbosu nyɔngma kɛ enyɔ, jijɔ ku nyɔngma kɛ enyɔ nɛ a ye jeha kakaaka, kɛ niye ní bɔ ɔ nɛ piɛ he nɛ a kɛ maa sã sami bɔ ɔ. - Akpakpo nyɔngma kɛ enyɔ nɛ a kɛ maa sã yayami pami bɔ ɔ. - Na ku nyingmi enyɔ kɛ eywiɛ, agbosu nyingmi ekpa, akpakpo nyingmi ekpa, kɛ jijɔ ku nyingmi ekpa nɛ a ye jeha kakaaka nɛ a kɛ maa sã tue mi jɔmi bɔ ɔ.

⁸⁹ Benɛ Mose ya sɛ kpe he bo tsu ɔ mi, konɛ e kɛ Yawɛ nɛ ya tu munyu ɔ, e nu Yawɛ gbi nɛ e kɛ lɛ ngɛ munyu tue kɛ je somi daka a nya nɔ́ ɔ yi mi, ngɛ kerub enyɔ ɔmɛ a kpɛti.