Mose IV, 5 - BAIBLO ALOO NGMAMI KLƆUKLƆU Ɔ

Nihi nɛ a he tsɔ we

¹ Yawɛ de Mose ke,

² “Wo Israel bi ɔmɛ mlaa, nɛ a fie nimli nɛ ɔmɛ tsuo kɛ je ma sito he ɔ: nihi nɛ he womi nɔ hiɔ yaya ngɛ a he; nihi nɛ a he nyu ngɛ bee, kɛ ni nɛmɛ nɛ ya ta nɔ gbogboe he kɛ ble a he.

³ Nyɛ je nimli nɛ ɔmɛ tsuo kɛ je nyɛ kpɛti, nyumuhi jio, yihi jio, konɛ a ko ble ma sito he ɔ, he nɛ i hii ngɛ ye ma a a kpɛti ɔ.”

⁴ Israel bi ɔmɛ pee kaa bɔ nɛ Yawɛ fa Mose ɔ, nɛ a fie jamɛatsɛmɛ ɔmɛ kɛ je ma sito he ɔ.

Yayami nane mi tomi

⁵ Yawɛ de Mose ke,

⁶ “De Israel bi ɔmɛ ke, ke nyumu ko, loo yo ko pee nɔ ko yayami nɛ e kɛ tɔ Yawɛ nɔ, nɛ a bu lɛ fɔ ɔ,

⁷ e jaje yayami nɛ e pee ɔ, nɛ e to e yayami ɔ nane mi sisiisi. Jehanɛ, e ngɔ nane mi tomi nɔ́ ɔ mi dlami enuɔ mi kake kɛ bɔ he ha nɔ nɛ nɔ nɛ e tɔ ɔ.

⁸ Se ke nɔmlɔ nɛ ɔ be je mi, nɛ e be weku no pɔtɛɛ ko nɛ a kɛ nane mi tomi ní ɔmɛ ma ha lɛ ɔ, lɛɛ nane mi tomi ní ɔmɛ maa pee Yawɛ nɔ, nɛ a kɛ ma ha osɔfo ɔ. Slo nɔ́ nɛ ɔ ngɛ agbosu ɔ nɛ a kɛ peeɔ kusumi kɛ tsukɔɔ nɔ ko nɛ tɔ ɔ he ɔ.

⁹ Jehanɛ se hu, nike ní klɛdɛɛ nɛ Israel bi ɔmɛ maa ngɔ kɛ ba ha Yawɛ ɔ, e maa pee osɔfo ɔ nɔ.

¹⁰ Nɔ́ tsuaa nɔ́ nɛ nɔ ko maa ngɔ kɛ ba ha osɔfo ko ɔ, jamɛ a nɔ́ ɔ maa pee osɔfo ɔ nɔ.”

Nyumuhi nɛ a yi mi tɛ̃ mɛ ngɛ a yihi a he

¹¹ Yawɛ de Mose ke,

¹² “Mo de Israel bi ɔmɛ ke, ke nyumu ko yo je e se, nɛ e ya tɔ e nɔ,

¹³ nɛ e ya hwɔ nyumu kpa se kɛ ble e he, nɛ e kɛ nɔ́ nɛ ɔ laa e huno ɔ, nɛ anɔkuale ɔ ji kpo, ejakaa odase ko be he, nɛ a nui yo ɔ hulɔ,

¹⁴ aloo ke hunga jemi mumi te si ngɛ nyumu nɛ ɔ mi, nɛ e yi mi tɛ̃ lɛ ngɛ e yo nɛ ya ble e he niinɛ, aloo nɔ nɛ ya pee we ja po he ɔ,

¹⁵ nyumu nɛ ɔ nɛ ngɔ e yo ɔ kɛ ba osɔfo ɔ ngɔ. Nyumu ɔ nɛ hɛɛ ngma mamu kilo kake, nɛ ji bɔ ɔ nɛ e maa sã ngɛ yo ɔ he ɔ kɛ ba. E ko plɛ oliv nu kɛ pue nɔ, nɛ e ko ngɔ mimɛ hu kɛ fɔ nɔ; ejakaa hunga niye ní bɔ ji nɛ ɔ nɛ; bɔ nɛ nyumu nɛ yi mi tɛ̃ e yo he ba sã, konɛ a kɛ hla anɔkuale ɔ.

¹⁶ “Osɔfo ɔ nɛ ngɔ yo ɔ kɛ ba Yawɛ hɛ mi.

¹⁷ Osɔfo ɔ nɛ yɛ nyu klɔuklɔu ɔ eko kɛ wo buɛ mi, nɛ e piti tabo zu ngɛ kpe he ɔ kɛ wo nyu ɔ mi.

¹⁸ Osɔfo ɔ nɛ pɛne yo ɔ yi bwɔmi. Lɔ ɔ se ɔ, e ngɔ niye ní bɔ ɔ, nɛ ji hunga niye ní bɔ ɔ nɛ a kɛ hlaa anɔkuale ɔ ngɔ wo yo ɔ dɛ mi. Osɔfo ɔ nitsɛ lɛɛ e hɛɛ nyu nɛ dooɔ, nɛ kɛ gbiɛmi baa nɔ nɔ ɔ ngɛ e dɛ mi.

¹⁹ Jehanɛ, osɔfo ɔ nɛ ka kita ngɔ pue yo ɔ nɔ, nɛ e de ke, ‘Ke o ya hwɔ we nyumu ko se, aloo ke o ji o huno ɔ se ya wui o he mu ɔ, lɛɛ gbiɛmi nɛ nyu nɛ dooɔ nɛ ɔ kɛ baa nɔ nɔ ɔ, o he nɛ je mi.’

²⁰ Se ke o je o huno ɔ se ya hwɔ nyumu kpa se, nɛ o ya ble o he ɔ, lɛɛ…!

²¹ Osɔfo ɔ nɛ ka kita nɛ e kɛ gbiɛ yo ɔ, nɛ e de lɛ ke, ‘Yawɛ nɛ ha nɛ o plɛ pee gbiɛmi, kɛ nɔ́ nɛ a kɛ ma ka kita ngɛ o ma mi bi ɔmɛ a kpɛti. Yawɛ nɛ ha nɛ o mi nɛ fu nɛ o mi si nɛ nɔ mi.

²² Nyu nɛ ɔ nɛ kɛ gbiɛmi baa nɔ nɔ ɔ, e sɛ o mi mi, nɛ e ha nɛ o mi nɛ fu, nɛ o mi si nɛ nɔ mi.’ Kɛkɛ, yo ɔ ma he nɔ ke, ‘E ba mi! E ba mi!’

²³ “Jehanɛ, osɔfo ɔ nɛ ngma gbiɛmi ɔ kɛ wo womi mi, nɛ e fɔ kɛ wo nyu nɛ dooɔ ɔ mi.

²⁴ Lɔ ɔ se ɔ, e ngɔ nyu nɛ dooɔ ɔ kɛ ha yo ɔ nɛ e nu. Ke nyu nɛ ɔ sɛ yo ɔ mi mi ɔ, e maa hao e mi mi ɔ.

²⁵ Se loko osɔfo ɔ maa pee nɔ́ nɛ ɔ, e he ngma niye ní bɔ ɔ, nɛ ji hunga bɔ ɔ ngɛ yo ɔ dɛ. E fɔ̃ ngma niye ní bɔ ɔ kɛ ya kɛ ba ngɛ Yawɛ hɛ mi. Lɔ ɔ se ɔ, e ngɔ kɛ ba bɔ sami la tɛ ɔ he.

²⁶ Osɔfo ɔ nɛ ti niye ní bɔ ɔ dɛ mamɛ kake kɛkɛ kaa okadi, nɛ e sã lɔ ɔ ngɛ bɔ sami la tɛ ɔ nɔ.

²⁷ Ke yo ɔ tɔ e huno ɔ nɔ niinɛ, nɛ e ya ble e he ɔ, lɛɛ ke a kɛ nyu ɔ ha lɛ nɛ e nu ɔ, nyu nɛ kɛ gbiɛmi baa nɔ nɔ nɛ ɔ ma ha nɛ e mi mi maa kɔɔ lɛ. E mi maa fu nɛ e mi si maa nɔ mi, nɛ e ma plɛ pee gbiɛmi ngɛ e ma mi bi ɔmɛ a kpɛti.

²⁸ Se ke yo ɔ ya ble we e he, nɛ e he tsɔ ɔ, lɛɛ e maa ye e he, nɛ e ma nyɛ ma fɔ bimɛ.

²⁹ “Mlaa nɛ kɔɔ hunga jemi he ji nɛ ɔ nɛ. Ke yogbayo ko je e huno se ya ble e he,

³⁰ aloo ke hunga jemi mumi te si ngɛ nyumu ko mi, nɛ e yi mi tɛ̃ lɛ ngɛ e yo he ɔ, nyumu ɔ nɛ ngɔ yo ɔ kɛ ba Yawɛ hɛ mi, konɛ osɔfo ɔ nɛ pee kikɛmɛ a mlaa nɛ ɔ he kusumi ɔmɛ tsuo kɛ ha lɛ.

³¹ A be nyumu ɔ fɔ ko bue; se ke yo ɔ ye fɔ ɔ, sɔ̃ ɔ maa tloo lɛ yo ɔ.”