Mose IV, 4 - BAIBLO ALOO NGMAMI KLƆUKLƆU Ɔ

Kohat bi ɔmɛ a ní tsumi

¹ Yawɛ de Mose kɛ Aaron ke,

² “Nyɛɛ kane Kohat bi nɛ ngɛ Levi bi ɔmɛ a kpɛti ɔ weku nya weku nya, kɛ we puɔ nya we puɔ nya, nɛ nyɛɛ ngma nyumu ɔmɛ a biɛ,

³ kɛ je nɔ nɛ ye jeha nyingmi etɛ nɔ, kɛ yaa si nɔ nɛ ye jeha nyingmi enuɔ nɔ, nɔ tsuaa nɔ nɛ ma nyɛ tsu ní ngɛ kpe he bo tsu ɔ mi.

⁴ Kohat bi ɔmɛ ji ni nɛmɛ nɛ ma tsu níhi nɛ ngɛ klɔuklɔu pe kulaa ngɛ kpe he bo tsu ɔ mi ɔ a he ní.

⁵ “Ke be nɛ ma a maa hia kɛ je a sito he ɔ, Aaron kɛ e bimɛ ɔmɛ nɛ a ya sɛ bo tsu ɔ mi, nɛ a je tsu mi pomi bo ɔ nɛ ngɛ somi daka a nɛ somi womi ɔ ngɛ mi ɔ hɛ mi ɔ kɛ ha daka a he.

⁶ Lɔ ɔ se ɔ, a ngɔ apletsi he womi nɛ a je blɔ pee kɛ ha he, nɛ a ngɔ bo bluu hu kɛ ha lɔ ɔ nɔ, loko a ngɔ tsohi nɛ a kɛ maa hɛɛ daka a kɛ hɔɔ a blɔ hehi.

⁷ “Okplɔɔ ɔ nɛ a kɛ abolo klɛdɛɛ nɛ a kɛ maa Yawɛ hɛ mi ɔ maa nɔ ɔ, á ngɔ bo bluu kɛ ha nɔ loko a ngɔ plɛɛtehi, kahi nɛ a kɛ tsopa kɛ e he via kɛ bɔhi woɔ a mi ɔ, kɛ kpluhi nɛ a kɛ wai bɔhi woɔ a mi ɔ kɛ ma nɔ.

⁸ A ngɔ bo tsu kɛ ha ní nɛ ɔmɛ a nɔ, nɛ a ngɔ apletsi he womi nɛ a je blɔ pee hu kɛ ha he, loko a ngɔ tsohi nɛ a kɛ maa hɛɛ okplɔɔ ɔ kɛ hɔɔ a blɔ hehi.

⁹ “Kane tso ɔ kɛ e he kane ɔmɛ, abɛɛle ɔmɛ, kɛ nu tɔ ɔmɛ tsuo nɛ a kɛ nu woɔ a mi ɔ, a ngɔ bo bluu kɛ ha a he.

¹⁰ A ngɔ apletsi he womi nɛ a je blɔ pee kɛ ha kane tso ɔ, kɛ e he ní ɔmɛ tsuo a he, nɛ a ngɔ kɛ wo tlɔɔke mi.

¹¹ “Sika tsu bɔ sami la tɛ ɔ hu a ngɔ bo bluu kɛ ha he, nɛ a ngɔ apletsi he womi nɛ a je blɔ pee kɛ ha lɔ ɔ hu nɔ, loko a ngɔ tsohi nɛ a kɛ maa hɛɛ lɛ ɔ kɛ hɔɔ a blɔ hehi.

¹² Ní ɔmɛ tsuo nɛ a kɛ sɔmɔɔ ngɛ he klɔuklɔu ɔ, a je mɛ nɛ a fi kɛ wo bo bluu mi, nɛ a ngɔ apletsi he womi nɛ a je blɔ pee kɛ ha a he, loko a kɛ wo tlɔɔke ɔ mi.

¹³ A muɔ la zu ɔ ngɛ bɔ sami la tɛ ɔ nɔ, nɛ a ngɔ bo he jua wawɛ nɛ hɛɛ alamua tu su kɛ ha he.

¹⁴ Jehanɛ, a ngɔ ní ɔmɛ tsuo nɛ a kɛ sɔmɔɔ ngɛ lejɛ ɔ kɛ ma nɔ: ngɛyuhi, sofihi, gbowehi, kɛ kahi. Lɔ ɔ se ɔ, a ngɔ apletsi he womi nɛ a je blɔ pee kɛ ha he, loko a ngɔ tsohi nɛ a kɛ maa hɛɛ lɛ ɔ kɛ hɔɔ a blɔ hehi.

¹⁵ Ke be nɛ ma a maa hia kɛ je a sito he ɔ, Aaron kɛ e bimɛ ɔmɛ nɛ a ha ní klɔuklɔu ɔmɛ kɛ a he ní ɔmɛ tsuo a he, loko Kohat bi ɔmɛ nɛ a ba nɛ a ba tloo kɛ ho. Kohat bi ɔmɛ kó ta ní klɔuklɔu ɔmɛ a he, konɛ a ko gbo. Kpe he bo tsu ɔ he níhi nɛ Kohat bi ɔmɛ maa tloo be tsuaa be nɛ ma a maa hia ji nɛ ɔmɛ nɛ.

¹⁶ “Osɔfo Aaron bi Eleazar lɛɛ e ní tsumi ji kaa e hyɛ kane mi nu ɔ, tsopa kɛ e he via a, daa niye ní bɔ sami ɔ, kɛ nɔ pɔmi nu ɔ a nɔ. Lɛ ji nɔ nɛ maa hyɛ kpe he ɔ, e mi ní klɔuklɔu ɔmɛ, kɛ e he ní ɔmɛ tsuo a nɔ.”

¹⁷ Yawɛ de Mose kɛ Aaron ke,

¹⁸ “Nyɛ ko ha nɛ Kohat bi ɔmɛ a hɛ mi ba kpata ngɛ Levi bi ɔmɛ a kpɛti.

¹⁹ Bɔ nɛ pee nɛ ke a ba su níhi nɛ ngɛ klɔuklɔu pe kulaa a he nɛ a ko gbo, se mohu a yi nɛ na wami he je ɔ, nɔ́ nɛ nyɛɛ pee ha mɛ ji nɛ ɔ nɛ: Aaron kɛ e bimɛ ɔmɛ nɛ a ya nɛ a ya tsɔɔ nɔ tsuaa nɔ e ní tsumi, kɛ e tlomi nɛ e maa tloo.

²⁰ Kohat bi ɔmɛ lɛɛ ke a sɛ bo tsu ɔ mi ɔ, a ko hyɛ ní klɔuklɔu ɔmɛ hɛngmɛfia po. Ke a pee ja a, a ma gbo.”

Gershon bi ɔmɛ a ní tsumi

²¹ Yawɛ de Mose ke,

²² “Moo kane Gershon bi nɛ ngɛ Levi bi ɔmɛ a kpɛti ɔ hu weku nya weku nya, kɛ we puɔ nya we puɔ nya, nɛ o ngma nyumu ɔmɛ a biɛ,

²³ kɛ je nɔ nɛ ye jeha nyingmi etɛ nɔ kɛ yaa si nɔ nɛ ye jeha nyingmi enuɔ nɔ, nɔ tsuaa nɔ nɛ ma nyɛ tsu ní ngɛ kpe he bo tsu ɔ mi.

²⁴ Gershon bi ɔmɛ a ní tsumi ji

²⁵ a maa tloo kpe he ɔ he bo ɔmɛ, bo tsu ɔ kɛ e he hami nɔ́ ɔ, e yi bumi nɔ́ ɔ nɛ a ngɔ apletsi he womi nɛ a je blɔ pee kɛ kpɛ ɔ, kpe he bo tsu sinya a nya bo ɔ,

²⁶ kue ɔ nɛ bɔle kpe he ɔ he bo ɔmɛ, kue ɔ nya bo ɔ, bɔ sami la tɛ ɔ, kɛ a he tangme kpa amɛ, kɛ a he ní tsumi ní ɔmɛ tsuo. Ní nɛ ɔmɛ a he ní tsumi tsuo nɛ sa tsumi ɔ, a tsu.

²⁷ Aaron kɛ e bimɛ ɔmɛ maa hyɛ Gershon bi ɔmɛ a nɔ, nɔ́ nɛ a ma tsu, kɛ níhi nɛ a maa tloo. Nyɛɛ dla tlomihi nɛ a maa tloo ɔ ngɔ ha mɛ kakaaka.

²⁸ Ní tsumihi nɛ Gershon bi ɔmɛ ma tsu ngɛ kpe he bo tsu ɔ mi ɔ ji nɛ ɔmɛ nɛ, nɛ nɔ nɛ maa hyɛ a nɔ ji osɔfo Aaron bi Itamar.

Merari bi ɔmɛ a ní tsumi

²⁹ “Merari bi ɔmɛ hu o kane mɛ weku nya weku nya, kɛ we puɔ nya we puɔ nya, nɛ o ngma nyumu ɔmɛ a biɛ,

³⁰ kɛ je nɔ nɛ ye jeha nyingmi etɛ nɔ, kɛ yaa si nɔ nɛ ye jeha nyingmi enuɔ nɔ, nɔ tsuaa nɔ nɛ ma nyɛ tsu ní ngɛ kpe he bo tsu ɔ mi.

³¹ Ní tsumi nɛ mɛɛ a ma tsu ngɛ kpe he bo tsu ɔ mi ji a maa muɔ kpe he ɔ he plai ɔmɛ, mani ɔmɛ, titima amɛ kɛ a nɔ dami ní ɔmɛ,

³² kue ɔ nɛ bɔle si ɔ mi tso ɔmɛ, a nɔ dami ní ɔmɛ, kɛ plɛɛko ɔmɛ kɛ a he tangme kpa amɛ, kɛ a he ní ɔmɛ tsuo. Moo dla tlomihi nɛ a maa tloo ɔ ngɔ ha mɛ kakaaka.

³³ Ní tsumihi nɛ Merari bi ɔmɛ ma tsu ngɛ kpe he bo tsu ɔ mi ji nɛ ɔmɛ nɛ; nɛ nɔ nɛ maa hyɛ a nɔ ji osɔfo Aaron bi Itamar.”

A kane Levi bi ɔmɛ

^34-48 Kaa bɔ nɛ Yawɛ fa a, Mose kɛ Aaron, kɛ ma nimeli ɔmɛ ya kane nihi ngɛ Levi wɛtso ɔ we puɔ nya etɛ ɔmɛ a mi. Mɛ ji Kohat, Gershon, kɛ Merari. A ngma nyumuhi tsuo nɛ ye kɛ je jeha nyingmi etɛ kɛ ya si ni nɛmɛ nɛ ye jeha nyingmi enuɔ, nɛ a ma nyɛ tsu ní ngɛ kpe he bo tsu ɔ mi ɔ a biɛ. Bɔ nɛ e ba lɛ ha ji nɛ ɔ nɛ: WE PUƆ NYA NI ƆMƐ A HIƐMI Kohat 2,750 Gershon 2,630 Merari 3,200 Lɛ tsuo peeɔ 8,580

WE PUƆ NYA NI ƆMƐ A HIƐMI

⁴⁹ A ngma nɔ tsuaa nɔ biɛ kakaaka kaa bɔ nɛ Yawɛ fa Mose ɔ, nɛ a dla ní tsumi slɔɔto ɔmɛ, kɛ tlomi ɔmɛ a tloomi ngɔ ha mɛ, nɔ tsuaa nɔ kɛ e nɔ́. Bɔ nɛ Yawɛ fa Mose ke e pee ji nɛ ɔ nɛ.