Mose IV, 35 - BAIBLO ALOO NGMAMI KLƆUKLƆU Ɔ

Mahi nɛ a dla kɛ ha Levi bi ɔmɛ

¹ Yawɛ kɛ Mose tu munyu ngɛ Moab nga kplanaa a nɔ, ngɛ Yordan pa a se, ngɛ Yeriko hanɔ; nɛ e de lɛ ke,

² “De Israel bi ɔmɛ ke, weto ní ɔ nɛ a nine su nɔ ɔ, a ha Levi bi ɔmɛ ma amɛ ekomɛ, kɛ a he lohwe lɛmi hehi nɛ mɛ hu a hi lejɛ ɔ.

³ Ma nɛ ɔmɛ maa pee Levi bi ɔmɛ a sihi he; nɛ zugbahi nɛ bɔle ma amɛ hu maa pee a we mi lohwehi, kɛ a lohwe kpahi a ní yemi he.

⁴ Lohwe lɛmi zugba a nɛ nyɛɛ kɛ ma ha Levi bi ɔmɛ ɔ, e maa je gbogbo nɛ a fia kɛ wo ma a he ɔ he, kɛ ya se gugue 250 kɛ bɔle si.

⁵ Kɛ je ma a nya a, nyɛ ma susu gugue 500 kɛ ya beleku je, gugue 500 kɛ ya leneyi je, gugue 500 kɛ ya bonyoku je, kɛ gugue 500 kɛ ya omleyi je, nɛ ma a maa hi kpɛti. Enɛ ɔ maa pee lohwehi a lɛmi he kɛ ha ma amɛ.

⁶ Nyɛ ma ha Levi bi ɔmɛ ma ekpa nɛ a ngɔ to kaa wesa hehi nɛ nɔ ko ma nyɛ tu fo kɛ ya laa e he ngɛ, ke e li e he be nɛ e nine ya kpa ngɛ nɔ ko nɔ tlukaa a. Jehanɛ, nyɛ ma ha mɛ ma kpa nyingmi eywiɛ kɛ enyɔ.

⁷ Lɔ ɔ he ɔ, mahi tsuo nɛ nyɛ ma ha Levi bi ɔmɛ ɔ, e pee nyingmi eywiɛ kɛ kpaanyɔ, kɛ a he lohwe lɛmi zugba amɛ tsuo.

⁸ Mahi nɛ o maa ngɔ ngɛ Israel wɛtso slɔɔto ɔmɛ a dɛ kɛ ha Levi bi ɔmɛ ɔ, bɔ nɛ o maa pee ji nɛ ɔ nɛ: wɛtsohi nɛ a he hiɛ ɔ, o he fuu ngɛ a dɛ, se wɛtsohi nɛ a he pi ɔ, o he bɔɔ pɛ ngɛ a dɛ.”

Wesa he mahi kɛ nɔ gbemi he sane

⁹ Yawɛ de Mose ke,

¹⁰ “De Israel bi ɔmɛ ke, ke nyɛ po Yordan pa a kɛ ya Kanaan zugba a nɔ ɔ,

¹¹ nyɛɛ hla ma komɛ kɛ to kaa wesa hehi nɛ nɔ ko ma nyɛ tu fo kɛ ya laa e he ngɛ, ke e ba mi kaa e li e he be nɛ e nine ya kpa ngɛ nɔ ko nɔ tlukaa a.

¹² Ma nɛ ɔmɛ maa pee wesa hehi ha nyɛ kɛ maa je muɔ he lue yelɔ ɔ dɛ mi. Ke nɔ ko nine ya kpa ngɛ nɔ ko nɔ tlukaa a, a ko gbe lɛ kɛ yaa si a kɛ lɛ ma ba da ma kpekpemi ɔ hɛ mi, nɛ a maa kojo lɛ lolo.

¹³ Nyɛɛ hla ma ekpa kɛ pee wesa he nɛ ɔmɛ,

¹⁴ ma etɛ ngɛ Yordan se, kɛ etɛ hu ngɛ Kanaan zugba a nɔ.

¹⁵ Ma ekpa nɛ ɔmɛ maa pee wesa hehi kɛ ha Israel bi, nibwɔhi, kɛ blɔ nyɛɛli tsuo. Ke e ba mi kaa nɔ ko li e he be nɛ e nine ya kpa ngɛ nɔ ko nɔ tlukaa a, e ma nyɛ maa tu fo kɛ ya sa we ngɛ ma nɛ ɔmɛ eko mi.

^16-18 “Se ke nɔ ko ngɔ awi yemi nɔ́ ko kaa dade, loo tɛ, loo tso kɛ fia nɔ, nɛ nɔ ɔ gbo ɔ, e gbe nɔmlɔ. Lɔ ɔ he ɔ, lɛ hu ja a gbe lɛ.

¹⁹ Nɔ nɛ a gbe ɔ nyɛmi tutuutu ji muɔ he lue yelɔ ɔ nɛ. Be tsuaa be nɛ e maa na nɔ nɛ gbe e nyɛmi ɔ, e gbe lɛ.

²⁰ “Ke nɔ ko nyɛ nɔ ko, nɛ e gbɔ lɛ ha, aloo e ya wo lɛ ka, nɛ e fɔ̃ nɔ́ ko kɛ ya na lɛ nɛ e gbo,

²¹ aloo ke e ngɔ abofu kɛ gba lɛ ma, nɛ e nɔ si, nɛ e gbo ɔ, nɔmlɔ gbelɔ ji lɛ. Lɔ ɔ he ɔ, lɛ hu ja a gbe lɛ. Be tsuaa be nɛ muɔ he lue yelɔ ɔ, kɛ nɔmlɔ gbelɔ nɛ ɔ maa kpe ɔ, e gbe lɛ.

²² “Se ke nɔ ko li e he be, nɛ e ya gbɔ nɔ ko ha, nɛ pi kaa nyɛmi nya, aloo e fɔ̃ nɔ́ ko kɛ ya na lɛ, nɛ pi kaa e wo lɛ ka,

²³ aloo e fɔ̃ tɛ nɛ ma nyɛ gbe nɔmlɔ kɛ ya na lɛ, nɛ e gbo, be mi nɛ e hyɛ we lɛ, be mi nɛ pi e he nyɛlɔ ji lɛ; nɛ pohu pi kaa e ngɛ lɛ yayami hlae ɔ,

²⁴ lɛɛ ma kpekpemi ɔ nɛ kojo nɔ nɛ fia nɔ nɔ́ ɔ, kɛ muɔ he lue yelɔ ɔ ngɛ kikɛmɛ a mlaa nɛ ɔmɛ a nya.

²⁵ Ke e ba mi ja a, ma kpekpemi ɔ nɛ kpɔ nɔ nɛ gbe nɔmlɔ ɔ kɛ je muɔ he lue yelɔ ɔ dɛ mi, nɛ a kpale lɛ kɛ ya ma a mi he nɛ e tu fo kɛ ya sa we ngɛ ɔ. E ya hi lejɛ ɔ kɛ yaa si be mi nɛ osɔfo nɔkɔtɔma pe kulaa a (nɛ a pɔ lɛ nu klɔuklɔu ɔ) ma gbo.

²⁶ Se ke nɔmlɔ nɛ ya gbe nɔ ɔ ya hane huzu ɔ ngɛ ma mi he nɛ e tu fo kɛ ya sa we ngɛ ɔ,

²⁷ nɛ e ba mi kaa muɔ he lue yelɔ nɛ ɔ ya na lɛ ngɛ e wesa he ma a huzu ɔ se, nɛ e gbe lɛ ɔ, a be lɛ gbenɔ fɔ bue.

²⁸ E sa kaa nɔmlɔ nɛ ɔ nɛ hi ma nɛ e ya sa we ngɛ mi ɔ mi kɛ yaa si osɔfo nɔkɔtɔma pe kulaa a ma gbo. Osɔfo nɔkɔtɔma pe kulaa a gbenɔ se loko e ngɛ he blɔ nɛ e kpaleɔ kɛ yaa lɛ nitsɛ e zugba nɔ ekohu.

²⁹ Enɛ ɔmɛ ji mlaahi, kɛ blɔ nya tomihi nɛ fɔɔ si ha nyɛ, ngɛ yi nɔhi tsuo ngɛ he tsuaa he nɛ nyɛ ngɛ.

³⁰ “Ke nɔ ko gbe nɔ ko ɔ, a da odase yeli enyɔ, loo nɔ́ a nya mi munyu nɔ nɛ a kɛ kojo lɛ loko a gbe lɛ; a ko da odase yelɔ kake pɛ nya mi munyu nɔ kɛ gbe nɔ ko.

³¹ Jehanɛ, nyɛ ko he wami kpɔmi nɔ́ ko ngɛ nɔ ko nɛ je blɔ gbe nɔ ɔ dɛ; ja a gbe lɛ.

³² Jehanɛ se hu, ke nɔ ko tu fo kɛ ya sa we ngɛ ma ko mi ɔ, nyɛ ko he wami kpɔmi nɔ́ ko ngɛ e dɛ; konɛ e ko kpale kɛ ba hi lɛ nitsɛ e zugba nɔ, be mi nɛ osɔfo nɔkɔtɔma pe kulaa a na we nɛ e gbo lolo ɔ.

³³ Ke nyɛ pee ja a, nyɛ ble zugba a nɛ nyɛ ngɛ nɔ ɔ. Muɔ bleɔ zugba, nɛ kpatami nɔ́ ko be kɛ ha zugba nɛ a pue muɔ si ngɛ nɔ kaa ja nɔ nɛ pue muɔ si ɔ nɔuu e muɔ.

³⁴ Nyɛ ko ble zugba nɛ nyɛ ngɛ nɔ ɔ, he nɛ imi hu i hii ɔ; ejakaa imi ji Yawɛ, nɛ Israel bi ɔmɛ a kpɛti lɛ i hii.”