Mose IV, 34 - BAIBLO ALOO NGMAMI KLƆUKLƆU Ɔ

Zugba a huzu ɔmɛ

¹ Yawɛ de Mose ke

² e wo Israel bi ɔmɛ mlaa nɛ ɔ, “Ke nyɛ su Kanaan zugba a nɛ i ngɔ kɛ ngɛ nyɛ hae ɔ nɔ ɔ, nyɛ huzu ɔmɛ maa pee enɛ ɔmɛ.

³ Leneyi je zugba a maa je Zin nga a nɔ, kɛ nyɛɛ Edom huzu ɔ nya; nɛ nyɛ huzu ɔ ngɛ leneyi je ɔ maa je Ngo wo ɔ nya, ngɛ beleku je.

⁴ E maa lɔgɔ si kɛ gu Akrabim yo kpɛ blɔ ɔ leneyi je, nɛ e maa po mi kɛ be ngɛ Zin, hluu kɛ ya gu Kadesh Barnea leneyi je. E ma tsa nɔ kɛ je lejɛ ɔ kɛ ya Hazar Adar, nɛ e maa po mi kɛ ya Azmon.

⁵ Jehanɛ, huzu ɔ maa dɔ e yi kɛ je Azmon kɛ ba Egipt pa a he, nɛ e nya maa sɛ Mediterenia wo ɔ mi.

⁶ “Nyɛ huzu ɔ ngɛ bonyoku je ɔ maa pee Mediterenia wo ɔ.

⁷ “Jehanɛ, ke nyɛ wo za kɛ je Mediterenia wo ɔ nya kɛ ya si Hor yo ɔ he ɔ, lɔ ɔ maa pee nyɛ huzu ɔ ngɛ omleyi je.

⁸ Nyɛ ma tsa nɔ kɛ je Hor yo ɔ he, kɛ ya be ngɛ Hamat kasa nya, kɛ ya si Zedad.

⁹ Kɛ je lejɛ ɔ, huzu ɔ ma tsa nɔ kɛ ya Zifron, nɛ e maa gbe nya ngɛ Hazar Enan.

¹⁰ “Nyɛ maa wo nyɛ huzu ɔ nɛ ngɛ beleku je ɔ kɛ maa je Hazar Enan, kɛ ya si Shefam.

¹¹ Kɛ je Shefam ɔ, huzu ɔ ma kple si kɛ ya Ribla, ngɛ Ain beleku je, nɛ e maa nyɛɛ ja hluu kɛ ya pi Kineret wo ɔ nya, ngɛ beleku je.

¹² Kɛ je lejɛ ɔ, huzu ɔ ma tsa nɔ kɛ nyɛɛ Yordan pa a he, kɛ yaa si e nya maa pi Ngo wo ɔ. “Enɛ ɔ maa pee nyɛ zugba a, kɛ huzu ɔmɛ nɛ bɔle lɛ kɛ kpe ɔ.”

¹³ Mose de Israel bi ɔmɛ ke, “Zugba a nɛ nyɛ maa fɔ sɔ kɛ dla ha nyɛ he ɔ ji nɛ ɔ nɛ; enɛ ɔ ji zugba a nɛ Yawɛ wo si kaa e maa ngɔ kɛ ha wɛtso nɛɛ kɛ fa amɛ ɔ a nɛ.

¹⁴ Ruben wɛtso ɔ, Gad wɛtso ɔ, kɛ Manase wɛtso fa a, mɛɛ lɛɛ a na a blɔ fa mi nɔ́ we puɔ nya we puɔ nya momo.

¹⁵ Wɛtso enyɔ kɛ fa amɛ na a blɔ fa mi nɔ́ ɔ ngɛ Yordan pa a se, ngɛ Yeriko hanɔ, ngɛ beleku je.”

Nikɔtɔmahi nɛ maa dla zugba a

¹⁶ Yawɛ de Mose ke,

¹⁷ “Osɔfo Eleazar, kɛ Nun binyumu Yoshua ji ni nɛmɛ nɛ maa dla zugba a kɛ ha ma a nɛ.

¹⁸ Moo hla nikɔtɔmahi kakaaka kɛ je wɛtso tsuaa wɛtso mi ngɔ piɛ a he nɛ a kɛ dla zugba a.”

^19-28 Nihi nɛ Yawɛ hla, kɛ wɛtsohi nɛ a je a mi ji nɛ ɔmɛ nɛ: WƐTSO WƐTSO NƆKƆTƆMA Yuda Kaleb, Yefune bi ɔ Simeon Shelumiel, Amihud bi ɔ Benyamin Elidad, Kislon bi ɔ Dan Buki, Yogli bi ɔ Manase Haniel, Efod bi ɔ Efraim Kemuel, Shiftan bi ɔ Zebulun Elizafan, Parnak bi ɔ Isakar Paltiel, Azan bi ɔ Asher Ahihud, Shelomi bi ɔ Naftali Pedahel, Amihud bi ɔ.

WƐTSO WƐTSO NƆKƆTƆMA

²⁹ Ni nɛ ɔmɛ ji nihi nɛ Yawɛ fa ke a dla Kanaan zugba a kɛ ha Israel ma a nɛ.