Mose IV, 32 - BAIBLO ALOO NGMAMI KLƆUKLƆU Ɔ

Wɛtso ɔmɛ ngɛ Yordan pa a beleku je

¹ Ruben bi ɔmɛ, kɛ Gad bi ɔmɛ ngɛ lohwehi babauu nitsɛ. Benɛ a na kaa Yazer zugba a, kɛ Gilead zugba a hi ha lohwe lɛmi ɔ,

² a ya de Mose, osɔfo Eleazar, kɛ ma nimeli ɔmɛ ke,

³ “Atarot, Dibon, Yazer, Nimra, Heshbon, Eleale, Sibma, Nebo, kɛ Beon,

⁴ nɛ ji mahi nɛ Yawɛ piɛ Israel ma kpekpemi ɔ he kɛ kpɔ ɔ, zugba a hi ha lohwe lɛmi; nɛ wɔ o tsɔli ɔmɛ hu, wa ngɛ lohwehi babauu.

⁵ Lɔ ɔ he ɔ, wa kpa mo pɛɛ, ha nɛ waa ngɔ zugba nɛ ɔ, nɛ e pee wa nɔ; koo ngɔ wɔ kɛ po Yordan pa a.”

⁶ Mose de Gad bi ɔmɛ, kɛ Ruben bi ɔmɛ ke, “Anɛ nyɛ nyɛmimɛ ɔmɛ nɛ a ya nɛ a ya hwu ta, konɛ nyɛɛ lɛɛ nyɛɛ hi hiɛ ɔ?

⁷ Mɛni he je nɛ nyɛ ngɛ hlae nɛ nyɛɛ wo Israel bi ɔmɛ a kɔni mi nyu, nɛ a ko po pa a kɛ ya zugba a nɛ Yawɛ ngɔ ha mɛ ɔ nɔ ɔ?

⁸ Kikɛ nɛ ɔ nyɛ nɛmɛ ɔmɛ pee, benɛ i tsɔ mɛ kɛ je Kadesh Barnea nɛ a ya slaa zugba a nɛ.

⁹ A nyɛɛ hluu kɛ ya su Eskol kɔ̃ ɔ mi, nɛ a ya na zugba a. Se mohu a se kpalemi mi ɔ, a ba wo Israel bi ɔmɛ a kɔni mi nyu nɛ a ko ya zugba a nɛ Yawɛ ngɔ ha mɛ ɔ nɔ.

¹⁰ Jamɛ ligbi ɔ, Yawɛ mi mi wo la; nɛ e de ke,

¹¹ ‘Nyumuhi nɛ a je Egipt kɛ ba, nɛ a ye kɛ je jeha nyingmi enyɔ kɛ yaa a, akɛnɛ a nyɛɛ we ye se kɛ pi si he je ɔ, i ngɛ kita kae kaa ke a ti nɔ ko na zugba a nɛ i wo si ke ma ngɔ kɛ ha Abraham, Isak, kɛ Yakob ɔ fii!

¹² Ja Yefune bi Kaleb, Ken no ɔ, kɛ Nun bi Yoshua pɛ; ejakaa mɛɛ a nyɛɛ Yawɛ se kɛ pi si.’

¹³ Lɔ ɔ he ɔ, Yawɛ mi mi fu Israel, nɛ e ha a wo lalaalo ngɛ nga a nɔ jeha nyingmi eywiɛ, kɛ ya si be mi nɛ jamɛ a yi nɔ bi ɔmɛ nɛ pee nɔ́ nɛ dɛ ngɛ Yawɛ hɛ mi ɔ tsuo pɛpɛɛpɛ gbo ta.

¹⁴ Nɛ hyɛ, yayami peeli a nina, nyɛ hu nyɛ ba wo nyɛ nɛmɛ ɔmɛ a nane, nɛ nyɛ ngɛ pee, konɛ Yawɛ mi mi fumi nɛ nya wa a nɛ pa ba Israel nɔ ekohu!

¹⁵ Nyɛ Ruben bi, kɛ Gad bi, ke nyɛ je Yawɛ se ɔ, lɛ hu e maa ngmɛɛ ma nɛ ɔ he ngɛ nga a nɔ ekohu; nɛ ke ma a hɛ mi kpata a, nyɛ lɛ nyɛ pee.”

¹⁶ Se a hɛ mɛ kɛ su Mose he, nɛ a de lɛ ke, “Nɔ́ nɛ wa ngɛ hlae kɛkɛ ji waa ma lohwe tsuhi kɛ ha wa lohwe ɔmɛ, nɛ waa po mahi kɛ ha wa bimɛ tsɔwi ɔmɛ.

¹⁷ Wɔ nitsɛmɛ lɛɛ wa maa mia kɛ nyɛɛ Israel ma a hɛ mi kɛ ya su a su he. Se zugba a nɔ bi ɔmɛ a he je ɔ, wa bimɛ tsɔwi ɔmɛ maa hi mahi nɛ a fia gbogbo kɛ wo a he ɔ a mi.

¹⁸ Wa be wa se kpalee kɛ ba wa we ɔmɛ a mi, kɛ yaa si Israel bi ɔmɛ a ti nɔ tsuaa nɔ nine maa su e blɔ fa mi nɔ́ nɔ.

¹⁹ Jehanɛ, ke wɔɔ wa nine su wa blɔ fa mi nɔ́ ɔ nɔ ngɛ Yordan beleku je ngɛ hiɛmɛ nɛ ɔ, waa kɛ mɛ be weto ní ko he plee hu ngɛ Yordan pa a se.”

²⁰ Mose ha mɛ heto ke, “Ke nyɛ maa ye nyɛ si womi ɔ nɔ, nɛ nyɛ maa mia kɛ nyɛɛ Yawɛ hɛ mi kɛ ya ta a,

²¹ nɛ ta buli ɔmɛ tsuo nɛ ngɛ nyɛ kpɛti ɔ maa po Yordan pa a kɛ nyɛɛ Yawɛ hɛ mi kɛ yaa si e maa fie he nyɛli ɔmɛ,

²² nɛ e ma kpɔ zugba a, lɛɛ ke nyɛ kpale nyɛ se kɛ ba a, nyɛ maa ye bemi ngɛ Yawɛ kɛ Israel ma a hɛ mi; nɛ zugba nɛ ɔ maa pee nyɛ blɔ fa mi nɔ́ nɛ Yawɛ ngɔ ha nyɛ.

²³ Se ke nyɛ yi nyɛ si womi ɔ nɔ ɔ, lɛɛ nyɛ na nɛ nyɛɛ le kaa nyɛ pee yayami kɛ si Yawɛ; nɛ bɔ tsuaa bɔ nɛ pee ɔ, nyɛ ma na nyɛ yayami ɔ he tue gblami.

²⁴ Lɔ ɔ he ɔ, nyɛɛ po mahi kɛ ha nyɛ bimɛ tsɔwi ɔmɛ, nɛ nyɛɛ ma lohwe tsuhi kɛ ha nyɛ lohwe ɔmɛ, konɛ nyɛɛ ye nyɛ si womi ɔ hu nɔ.”

²⁵ Gad bi ɔmɛ, kɛ Ruben bi ɔmɛ de Mose ke, “Wa nyɔmtsɛ, wa maa pee kaa bɔ nɛ o fa wɔ ɔ.

²⁶ Wa bimɛ tsɔwi ɔmɛ, wa yi ɔmɛ, kɛ wa to ɔmɛ, kɛ wa lohwe kpa amɛ maa hi Gilead ma amɛ a mi ngɛ hiɛmɛ nɛ ɔ;

²⁷ se wɔ o tsɔli ɔmɛ lɛɛ wa maa mia kɛ po pa a kɛ ya hwu ta ha Yawɛ, kaa bɔ nɛ mo, wa nyɔmtsɛ ɔ, o fa wɔ ɔ.”

²⁸ Lɔ ɔ he ɔ, Mose wo osɔfo Eleazar, Nun bi Yoshua, kɛ Israel ma nimeli ɔmɛ mlaa ngɛ a he,

²⁹ nɛ e de mɛ ke, “Ke Gad bi ɔmɛ, kɛ Ruben bi ɔmɛ mia kɛ nyɛɛ Yawɛ hɛ mi, nɛ a kɛ nyɛ po Yordan pa a kɛ ya ngɔ zugba a, nyɛɛ kɛ Gilead zugba a ma ha mɛ kaa a blɔ fa mi nɔ́.

³⁰ Se ke a mia we nɛ a kɛ nyɛ nɛ po pa a kɛ ya a, lɛɛ a ma na a blɔ fa mi nɔ́ ɔ ngɛ Kanaan zugba a nɔ kaa nyɛ kɛ̃.”

³¹ Gad bi ɔmɛ, kɛ Ruben bi ɔmɛ he nɔ nɛ a de ke, “Wa maa pee kaa bɔ nɛ Yawɛ fa wɔ ɔ.

³² Wa maa mia kpɛii kɛ po pa a kɛ nyɛɛ Yawɛ hɛ mi kɛ ya Kanaan zugba a nɔ, bɔ nɛ pee nɛ weto ní ɔ nɛ wa na ngɛ Yordan pa a se ɔ nɛ tlɔ wa dɛ.”

³³ Lɔ ɔ he ɔ, Mose ngɔ Amor matsɛ, Sihon nɔ yemi he ɔ, Bashan matsɛ, Og nɔ yemi he ɔ, mahi nɛ ngɛ huza amɛ a nɔ ɔ, kɛ zugbahi tsuo nɛ bɔle mɛ ɔ ngɔ ha Gad bi ɔmɛ, kɛ Ruben bi ɔmɛ, kɛ Yosef bi Manase wɛtso fa a.

³⁴ Gad bi ɔmɛ kpale po Dibon, Atarot, Aroer,

³⁵ Atrot Shofan, Yazer, Yogbeha,

³⁶ Bet Nimra, kɛ Bet Haran, nɛ ji mahi nɛ a fia gbogbo kɛ wo a he ɔ ehe ekohu; nɛ a ma lohwe tsuhi hulɔ.

³⁷ Ruben bi ɔmɛ hu kpale po Heshbon, Eleale, Kiriataim,

³⁸ Nebo, Baal Meon (a tsake biɛ nɛ ɔ), kɛ Sibma. Nɛ a wo mahi nɛ a po ɔ biɛ kpahi.

³⁹ Manase binyumu Makir bimɛ ɔmɛ pue nɔ kɛ ho Gilead ya nɛ a ya ngɔ zugba a, nɛ a fie Amor bi ɔmɛ kɛ je lejɛ ɔ.

⁴⁰ Lɔ ɔ he ɔ, Mose ngɔ Gilead ngɔ ha Manase binyumu Makir bimɛ ɔmɛ, nɛ a hi lejɛ ɔ.

⁴¹ Yair nɛ je Manase wɛtso ɔ mi ɔ hu ya tua kɔpe komɛ, nɛ e ngɔ mɛ, nɛ e wo mɛ biɛ ke Havot Yair (e sisi ji Yair kɔpehi).

⁴² Noba hu ya tua Kenat kɛ kɔpehi nɛ bɔle lɛ ɔ, nɛ e kɛ lɛ nitsɛ e biɛ Noba a wo ma a.