Mose IV, 31 - BAIBLO ALOO NGMAMI KLƆUKLƆU Ɔ

Midian bi ɔmɛ a hɛ mi kpatami

¹ Yawɛ de Mose ke,

² “Yaa nɛ o ya gbla Midian bi ɔmɛ a tue ngɛ nɔ́ nɛ a pee Israel bi ɔmɛ ɔ he. Lɔ ɔ se ɔ, o ma gbo.”

³ Mose de ma a ke, “Nyɛɛ mia kɛ nyɛ ta yami ní ɔmɛ, nɛ nyɛ ya tua Midian kɛ ye Yawɛ he lue.

⁴ Nyɛɛ hla nyumuhi akpe kɛ je Israel wɛtso tsuaa wɛtso mi kɛ ya ta a.”

⁵ Nyumuhi tsuo nɛ a hla kɛ je Israel nimli akpeakpe abɔ a kpɛti, nɛ ji ni nɛmɛ nɛ mia kɛ ha ta yami ɔ ji akpe nyɔngma kɛ enyɔ; wɛtso tsuaa wɛtso ha nimli akpe kake.

⁶ Mose wo mɛ blɔ, nɛ osɔfo Eleazar bi Finehas kɛ mɛ ho ta a ya. Lɛ ji nɔ nɛ hɛɛ ní klɔuklɔu ɔmɛ, kɛ titimati ɔmɛ nɛ a kɛ ma hwɔ lele ɔ.

⁷ Nɛ kaa bɔ nɛ Yawɛ fa Mose ɔ, a ya tua Midian bi ɔmɛ, nɛ a gbe nyumu ɔmɛ tsuo pɛpɛɛpɛ,

⁸ kɛ Midian matsɛmɛ enuɔ ɔmɛ. Mɛ ji Evi, Rekem, Zur, Hur, kɛ Reba. A gbe Beor binyumu Balaam ɔ hulɔ.

⁹ Israel bi ɔmɛ nuu Midian yi ɔmɛ, kɛ jokuɛwi ɔmɛ nyɔguɛ. A ha a na amɛ, a to ɔmɛ, kɛ a he níhi tsuo,

¹⁰ nɛ a kɛ la sã a ma amɛ, kɛ a hi he ɔmɛ tsuo.

¹¹ Nɛ a ngɔ ta yibu ní ɔmɛ kulaa nɛ ji nimli, lohwehi, kɛ níhi nɛ a ha a tsuo.

¹² A ngɔ ta yibu ní ɔmɛ tsuo, nyɔguɛ ɔmɛ, kɛ lohwe ɔmɛ nɛ a ha a kɛ ba Mose, osɔfo Eleazar, kɛ Israel ma kpekpemi ɔ a ngɔ ngɛ ma sito he ɔ, ngɛ Moab nga kplanaa a nɔ, ngɛ Yordan pa a se ngɛ Yeriko.

Ta buli ɔmɛ kpale kɛ ba

¹³ Benɛ ta buli ɔmɛ ma a, Mose, osɔfo Eleazar, kɛ ma nimeli ɔmɛ tsuo ho ya kpee mɛ ngɛ ma sito he ɔ se.

¹⁴ Mose mi mi fu asafoatsɛmɛ ɔmɛ nɛ ji akpe akpe kɛ lafa lafa a nyatsɛmɛ ɔmɛ nɛ je ta a kɛ ba a.

¹⁵ Mose bi mɛ ke, “Mɛni he je nɛ nyɛ he yi ɔmɛ tsuo a yi wami ɔ?

¹⁶ Nyɛ kai kaa yi nɛ ɔmɛ nɔuu lɛ a ya bu Balaam ga womi tue, nɛ a puɛ Israel bi ɔmɛ a juɛmi, nɛ a kɛ pee yayami kɛ si Yawɛ ngɛ Peor jamɛ a ligbi ɔ nɛ. Enɛ ɔ he je nɛ gbenɔ hiɔ ba Yawɛ ma a nɔ ɔ nɛ.

¹⁷ Lɔ ɔ he ɔ, nyɛɛ gbe nyumuyo tsuaa nyumuyo, kɛ yo tsuaa yo nɛ le nyumu.

¹⁸ Se yihewi nɛ li nyumu ɔ, mɛɛ lɛɛ nyɛ ha nɛ a yi nɛ na wami, konɛ nyɛɛ ngɔ mɛ.

¹⁹ Jehanɛ, nyɛ nitsɛmɛ hu nyɛ maa hi ma sito he ɔ se ligbi kpaago. Nyɛ ti nɔ tsuaa nɔ nɛ gbe nɔ ko, aloo e ta nɔ ko nɛ gbo ngɛ ta a mi he ɔ, jamɛ a nɔ ɔ nɛ tsukɔ e he ligbi etɛne ɔ, kɛ ligbi kpaagone ɔ, nyɛɛ kɛ nyɛ nyɔguɛ ɔmɛ tsuo.

²⁰ Jehanɛ, nyɛɛ tsukɔ heha ní tsuo a he, kɛ níhi tsuo nɛ a ngɔ lohwe he womi, aloo to akpakpo he bwɔmi kɛ pee, aloo níhi nɛ a kɛ tso kpɛ.”

²¹ Osɔfo Eleazar de ta buli ɔmɛ nɛ je ta kɛ ba a ke, “Mlaa nɛ Yawɛ wo Mose ji nɛ ɔ nɛ.

^22-23 Níhi tsuo nɛ la be nyɛe maa sã, kaa sika tsu, sika hiɔ, akɔblee, dade, sanyla, loo sumui ɔ, nyɛɛ ngɔ kɛ wo la mi, konɛ a he nɛ tsɔ. Lɔ ɔ se ɔ, nyɛɛ ngɔ yayami fɔmi nyu ɔ kɛ fɔ a he. Se nɔ́ tsuaa nɔ́ nɛ kɛ la yi ɔ, lɛɛ nyɛɛ kɛ yayami fɔmi nyu ɔ nɛ fɔ he.

²⁴ Nyɛ fɔ nyɛ tade ɔmɛ a he ngɛ ligbi kpaagone ɔ nɔ, konɛ nyɛ he nɛ tsɔ ekohu. Lɔ ɔ se loko nyɛɛ ba ma sito he ɔ.”

Ta yibu ní ɔ dlami

²⁵ Yawɛ de Mose ke,

²⁶ “O kɛ osɔfo Eleazar, kɛ ma kpekpemi ɔ we wɛtsoyi ɔmɛ nɛ kane ta yibu níhi nɛ a ha, nɛ ji nyɔguɛhi, kɛ lohwehi nɛ a nuu ɔ tsuo.

²⁷ Dla ta yibu ní ɔmɛ a mi fiee enyɔ; ngɔɔ fa kɛ ha tabo ɔmɛ nɛ ya hwu ta a, nɛ o ngɔ fa hu kɛ ha ma kpekpemi ɔ tsuo.

^28-29 Ta yibu ní ɔ nɛ ji tabo ɔmɛ nɛ ya hwu ta a a blɔ fa mi nɔ ɔ, ngɔɔ eko kɛ ha Yawɛ. Nimli adesahi jio, nahi jio, tejihi jio, tohi jio, Yawɛ nɔ ji lafa enuɔ tsuaa lafa enuɔ mi kake. Ngɔɔ ní nɛ ɔmɛ ngɔ ha osɔfo Eleazar kaa nike ní klɛdɛɛ ha Yawɛ.

³⁰ Fa a nɛ ji Israel ma a nɛ piɛ ɔ a nɔ ɔ, nimli, nahi, tejihi tohi, kɛ we mi lohwehi tsuo ɔ, ngɔɔ kakaaka ngɛ nyingmi enuɔ tsuaa nyingmi enuɔ mi kɛ ha Levi bi ɔmɛ nɛ tsuɔ Yawɛ kpe he ɔ he ní ɔ.”

³¹ Mose kɛ osɔfo Eleazar pee bɔ nɛ Yawɛ fa Mose ɔ.

^32-35 Ta yibu ní ɔ nɛ tabo ɔmɛ ha, kɛ nɔ́ nɛ a si kɛ ha mɛ nitsɛmɛ a he ɔ tsuo ji nɛ ɔmɛ nɛ: to 675,000, na 72,000, teji 61,000, yihewi nɛ a li nyumu 32,000.

^36-40 Fa a nɛ ji ni nɛmɛ nɛ ya hwu ta a a nɔ ɔ, lɛ ji to 337,500, nɛ tohi nɛ a tsu kɛ ha Yawɛ ji 675; na 36,000, nɛ nahi nɛ a tsu kɛ ha Yawɛ ji 72; teji 30,500, nɛ tejihi nɛ a tsu kɛ ha Yawɛ ji 61; yihewi nɛ li nyumu 16,000; nɛ yihewi nɛ a tsu kɛ ha Yawɛ ji 32.

⁴¹ Nɛ kaa bɔ nɛ Yawɛ fa Mose ɔ, Mose ngɔ nimli ɔmɛ, kɛ lohwe ɔmɛ nɛ a tsu ɔ ngɔ ha osɔfo Eleazar kaa nike ní klɛdɛɛ ko ha Yawɛ.

^42-46 Fa a nɛ ji Israel ma a nɔ nɛ Mose he ngɛ ta buli ɔmɛ nɛ ya hwu ta a a dɛ kɛ ha ma kpekpemi ɔ, ji to 337,500, na 36,000, teji 30,500, kɛ yihewi 16,000.

⁴⁷ Mose ngɔ nimli, kɛ lohwe nyingmi enuɔ tsuaa nyingmi enuɔ mi kakaaka kɛ je fa a nɛ ji Israel ma a nɔ ɔ mi kɛ ha Levi bi ɔmɛ nɛ tsuɔ Yawɛ kpe he ɔ he ní ɔ, kaa bɔ nɛ Yawɛ fa lɛ ɔ.

⁴⁸ Lɔ ɔ se ɔ, asafoatsɛmɛ ɔmɛ nɛ ngɛ nimli akpehi, kɛ lafahi a nya a ba Mose ngɔ,

⁴⁹ nɛ a ba de lɛ ke, “Wɔ o tsɔli ɔmɛ ɔ, wa kane ta buli nɛ wa hɛɛ ɔ, nɛ a kpɛti nɔ kake po laa we.

⁵⁰ Lɔ ɔ he ɔ, wa ti nɔ tsuaa nɔ hɛɛ e dɛ mi nɔ́ ko kɛ ba nɛ a kɛ kpata Yawɛ ha wɔ. Ní ɔmɛ ji sika tsu junehi, kɔni si gahi, nine si gahi, nguɛ gahi, tue nya níhi, kɛ muɛhi.”

⁵¹ Mose kɛ osɔfo Eleazar he sika june ɔmɛ tsuo ngɛ a dɛ.

⁵² Sika tsu tsuo nɛ asafoatsɛmɛ ɔmɛ ngɔ kɛ ba ha Yawɛ ɔ, e jiimi maa pee kilo lafa enyɔ.

⁵³ Se ta buli gu ɔmɛ lɛɛ nɔ tsuaa nɔ ngɔ nɔ́ nɛ e na a kɛ to.

⁵⁴ Mose kɛ osɔfo Eleazar he sika tsu ɔ ngɛ asafoatsɛmɛ ɔmɛ nɛ a ngɛ nihi akpehi, kɛ lafahi a nya a a dɛ; nɛ a ngɔ kɛ ba kpe he bo tsu ɔ mi kaa Israel ma a kaimi nɔ́ ko ngɛ Yawɛ hɛ mi.