Mose IV, 29 - BAIBLO ALOO NGMAMI KLƆUKLƆU Ɔ

Jehahe nyami be bɔhi

¹ Nyɔhiɔ nɛ ji kpaago ɔ we kekleekle ligbi ɔ, nyɛ bua nyɛ he nya nɛ nyɛ ja Mawu; nyɛ ko tsu ní tsumi ko nɛ he wa. Jamɛ a ligbi ɔ, nyɛ kpa titimati ɔmɛ,

² nɛ nyɛɛ ngɔ lohwe nɛ ɔmɛ kɛ sã sami bɔ nɛ jee via saminya, nɛ saa Yawɛ hɛ mi: na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

³ Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku ɔ nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu ɔ nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

⁴ Jijɔ ku kpaago ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

⁵ Jehanɛ, nyɛɛ ngɔ akpakpo kake kɛ sã yayami pami bɔ, nɛ a kɛ kpata Yawɛ ha ma a.

⁶ Nyɛɛ sã bɔ nɛ ɔmɛ kɛ piɛ daa Nyɔhiɔhe kekleekle ligbi sami bɔ ɔ, kɛ ngma bɔ ɔ a he; slo daa sami bɔ ɔ, kɛ e he ngma bɔ ɔ, kɛ e he wai bɔ ɔ ngɛ a blɔ nya blɔ nya. Enɛ ɔmɛ maa pee bɔhi nɛ a kɛ la sãã, nɛ jee via, nɛ saa Yawɛ hɛ mi.

Kpatami ligbi bɔ sami

⁷ “Nyɔhiɔ nɛ ji kpaago ɔ we ligbi nɛ ji nyɔngma a, nyɛ bua nyɛ he nya nɛ nyɛ ja Mawu. Nyɛɛ ha hwɔ, nɛ nyɛ ko tsu ní tsumi ko.

⁸ Nyɛɛ ngɔ lohwe nɛ ɔmɛ kɛ sã sami bɔ nɛ jee via saminya, nɛ saa Yawɛ hɛ mi: na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

⁹ Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku kake ɔ nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu ɔ nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

¹⁰ Jijɔ ku kpaago ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

¹¹ Jehanɛ, nyɛɛ ngɔ akpakpo kake kɛ ba sã yayami pami bɔ. Nyɛɛ sã bɔ nɛ ɔmɛ kɛ piɛ yayami pami bɔ nɛ a kɛ kpataa a, kɛ daa sami bɔ ɔ, kɛ e he ngma bɔ ɔ, kɛ a he wai bɔ ɔmɛ a he.

Gbasisihimi nyami be bɔ sami

¹² “Nyɔhiɔ nɛ ji kpaago ɔ we ligbi nɛ ji nyɔngma kɛ enuɔ ɔ, nyɛ bua nyɛ he nya nɛ nyɛ ja Mawu; nyɛ ko tsu ní tsumi ko nɛ he wa, se mohu nyɛɛ ye nyami be nɛ ɔ ligbi kpaago nɛ nyɛ kɛ wo Yawɛ hɛ mi nyami.

¹³ Kekleekle ligbi ɔ, nyɛɛ ngɔ lohwe nɛ ɔmɛ kɛ sã sami bɔ nɛ a kɛ la sãã nɛ jee via saminya, nɛ saa Yawɛ hɛ mi: na ku nyɔngma kɛ etɛ, agbosu enyɔ, jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he.

¹⁴ Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku nyɔngma kɛ etɛ ɔmɛ ɔ, eko fɛɛ eko nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu enyɔ ɔmɛ ɔ, eko fɛɛ eko nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

¹⁵ Jijɔ ku nyɔngma kɛ eywiɛ ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

¹⁶ Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

¹⁷ “Ligbi nɛ ji enyɔ ɔ, nyɛɛ ngɔ na niheyo nyɔngma kɛ enyɔ, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

¹⁸ Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

¹⁹ Jehanɛ, nyɛɛ ngɔ akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ a he wai bɔ ɔmɛ a he.

²⁰ “Ligbi nɛ ji etɛ ɔ, nyɛɛ ngɔ na ku nyɔngma kɛ kake, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

²¹ Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

²² Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

²³ “Ligbi nɛ ji eywiɛ ɔ, nyɛɛ ngɔ na ku nyɔngma, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

²⁴ Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

²⁵ Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

²⁶ “Ligbi nɛ ji enuɔ ɔ, nyɛɛ ngɔ na ku nɛɛ, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

²⁷ Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔ hi ngɛ a hiɛmi nya a.

²⁸ Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

²⁹ “Ligbi nɛ ji ekpa a, nyɛɛ ngɔ na ku kpaanyɔ, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

³⁰ Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he, kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

³¹ Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

³² “Ligbi nɛ ji kpaago ɔ, nyɛɛ ngɔ na ku kpaago, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

³³ Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

³⁴ Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

³⁵ “Ligbi nɛ ji kpaanyɔ ɔ, nyɛ bua nyɛ he nya nɛ nyɛ ja Mawu; nyɛ ko tsu ní tsumi ko nɛ he wa.

³⁶ Nyɛɛ ngɔ lohwe nɛ ɔmɛ kɛ sã sami bɔ nɛ jeɔ via saminya, nɛ saa Yawɛ hɛ mi: na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

³⁷ Nyɛɛ ngɔ ngma bɔ ɔmɛ, kɛ wai bɔ ɔ mɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

³⁸ Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

³⁹ “Mlaahi nɛ a wo nɛ kɔɔ sami bɔ, ngma bɔ, wai bɔ, kɛ tue mi jɔmi bɔ nɛ nyɛɛ sã ha Yawɛ ngɛ nyɛ nyami be ɔmɛ a mi he ji nɛ ɔmɛ nɛ. Slo enɛ ɔmɛ ngɛ si womi bɔhi, kɛ bɔhi nɛ nyɛ sãã kɛ jeɔ nyɛ tsui mi faa a a he.”

⁴⁰ Mose de Israel bi ɔmɛ nɔ́ tsuaa nɔ́ nɛ Yawɛ fa lɛ Mose ɔ pɛpɛɛpɛ.