Mose IV, 27 - BAIBLO ALOO NGMAMI KLƆUKLƆU Ɔ

Zelofehad biyi ɔmɛ

^1-2 Ligbi ko ɔ, Zelofehad biyi enuɔ ɔmɛ ngɔ a hiami sane ko kɛ ba fɔ Mose, osɔfo Eleazar, ma nimeli ɔmɛ, kɛ Israel ma kpekpemi ɔ tsuo a hɛ mi ngɛ kpe he bo tsu ɔ sinya a nya. Yi nɛ ɔmɛ a biɛhi ji Mahla, Noa, Hogla, Milka kɛ Tirza, nɛ a je Yosef binyumu Manase wɛtso fa a mi. A nɛ̃ biɛ ji Hefer, nɛ a nɛnɛkasowa ji Gilead, Makir binyumu ɔ. A we amaniɛ ji,

³ “Wa tsɛ gbo ngɛ nga a nɔ. Lɛɛ e piɛ we Kora se nyɛɛli ɔmɛ nɛ te si ngɔ wo Yawɛ ɔ a he; lɛ nitsɛ e yayami nɛ gbe lɛ. Se e be binyumu.

⁴ Ke wa tsɛ be binyumu ɔ, kɛkɛ e sa kaa e biɛ nɛ laa ngɛ Israel lo? Lɔ ɔ he ɔ, nyɛ ha wɔ hu weto ní ɔ eko kaa wa tsɛ nyɛmimɛ ɔmɛ.”

⁵ Mose ngɔ a sane ɔ kɛ ya fɔ Yawɛ hɛ mi,

⁶ nɛ Yawɛ de Mose ke,

⁷ “Zelofehad biyi ɔmɛ a sane ɔ da. Ha mɛ hu weto ní ɔ eko kaa a tsɛ nyɛmimɛ ɔmɛ; ngɔɔ a tsɛ zugba a kɛ ha mɛ.

⁸ Jehanɛ, de Israel bi ɔmɛ ke, ke nyumu ko gbo nɛ e be binyumu ɔ, e biyo nɛ ye e ní.

⁹ Ke e be biyo ɔ, a ngɔ gbosi ní ɔ kɛ ha e nyɛminyumuhi.

¹⁰ Ke e be nyɛminyumuhi ɔ, a ngɔ gbosi ní ɔ kɛ ha e tsɛ nyɛminyumuhi.

¹¹ Ke e tsɛ ɔ hu be nyɛminyumuhi ɔ, lɛɛ a ngɔ gbosi ní ɔ kɛ ha e he nɔ pɔtɛɛ ko ngɛ weku ɔ mi. Nɔ́ nɛ ɔ maa pee mlaa kɛ ha Israel bi ɔmɛ, kaa bɔ nɛ imi Yawɛ, i fa mo ɔ.”

A hla Yoshua ke e ye Mose se

¹² Yawɛ de Mose ke, “Yaa nɛ o ya kuɔ Abarim yo ɔ, nɛ o kɛ o hɛngmɛ nɛ hyɛ zugba a nɛ i ngɔ kɛ ha Israel ma a.

¹³ Ke o hyɛ ta a, mo hu o ma gbo kaa bɔ nɛ o nyɛminyumu Aaron gbo ɔ;

¹⁴ ejakaa nyɛ ni enyɔ ɔmɛ tsuo nyɛ tsɔ ye hɛ mi atuã ngɛ Zin nga a nɔ. Benɛ Israel ma a te si ngɔ wo mi ngɛ Meriba a, nyɛ je we ye he wami klɔuklɔu ɔ kpo kɛ tsɔɔ we mɛ kaa bɔ nɛ i fa nyɛ ɔ.” (Meriba ji taku ko ngɛ Kadesh ngɛ Zin nga a nɔ.)

¹⁵ Mose fa kue ha Yawɛ ke,

¹⁶ “Yawɛ, mo nimli adesahi tsuo a Mawu, i kpa mo pɛɛ nɛ mo nitsɛ o hla nyumu ko kɛ da ma kpekpemi nɛ ɔ nya,

¹⁷ nɔ nɛ maa nyɛɛ a hɛ mi, nɛ e ma kpaka mɛ kɛ ya kɛ ba, bɔ nɛ pee nɛ mo Yawɛ, o ma kpekpemi ɔ nɛ ko pee kaa tohi nɛ be hyɛlɔ.”

¹⁸ Yawɛ de Mose ke, “Yaa ngɔ Nun binyumu Yoshua, nɛ o kɛ o nine pue e yi mi. Nɔmlɔ nɛ ɔ, ye mumi ɔ ngɛ e mi, nɛ e ma nyɛ ma tsu ní ɔ.

¹⁹ Ha nɛ e ba da si ngɛ osɔfo Eleazar, kɛ ma kpekpemi ɔ tsuo a hɛ mi, nɛ o to lɛ si kaa o se yelɔ.

²⁰ Lɔ ɔ se ɔ, ngɔɔ mo nitsɛ o he wami ɔ eko ngɔ wo e dɛ, konɛ ma kpekpemi ɔ tsuo nɛ bu lɛ.

²¹ É ba e he si ha osɔfo Eleazar, konɛ osɔfo Eleazar hu nɛ ngɔ Urim kɛ Tumim kɛ bi Yawɛ ga womi ha lɛ. Nɔ́ tsuaa nɔ́ nɛ Yawɛ ma de Eleazar a, lɔ ɔ Yoshua, kɛ Israel ma kpekpemi ɔ tsuo maa pee.”

²² Mose pee kaa bɔ nɛ Yawɛ fa lɛ ɔ. E ngɔ Yoshua ba da si ngɛ osɔfo Eleazar, kɛ ma kpekpemi ɔ tsuo a hɛ mi.

²³ Nɛ, kaa bɔ nɛ Yawɛ fa lɛ ɔ, Mose ngɔ e nine kɛ pue Yoshua yi mi; nɛ e ngɔ he wami ɔ ngɔ wo e dɛ kaa e se yelɔ.