Mose IV, 26 - BAIBLO ALOO NGMAMI KLƆUKLƆU Ɔ

Nihi a kanemi enyɔne ɔ

¹ Gbenɔ hiɔ ɔ se ɔ, Yawɛ de Mose kɛ osɔfo Aaron bi Eleazar ke,

² “Nyɛɛ kane Israel ma kpekpemi ɔ tsuo we puɔ nya we puɔ nya, kɛ je ni nɛmɛ nɛ ye jeha nyingmi enyɔ kɛ yaa, nɛ a ma nyɛ ya ta a nɔ.”

³ Mose kɛ osɔfo Eleazar ya nɛ a kɛ ma a ya tu munyu ngɛ Moab nga kplanaa a nɔ, ngɛ Yordan pa a nya, ngɛ Yeriko hanɔ;

⁴ nɛ a ngma ni nɛmɛ nɛ a ye kɛ je jeha nyingmi enyɔ kɛ yaa a a biɛ kaa bɔ nɛ Yawɛ fa Mose ɔ. Israel ma a nɛ je Egipt kɛ ba a ji nɛ ɔ nɛ.

⁵ Ruben wɛtso ɔ (Ruben ji Yakob kekleekle binyumu): wekuhi nɛ ngɛ Ruben wɛtso ɔ mi ji Hanok weku ɔ, kɛ a nyatsɛ Hanok; Palu weku ɔ, kɛ a nyatsɛ Palu;

⁶ Hezron weku ɔ, kɛ a nyatsɛ Hezron; Karmi weku ɔ, kɛ a nyatsɛ Karmi.

⁷ A hiɛmi ji 43,730.

⁸ Palu bi ji Eliab,

⁹ nɛ Eliab bimɛ ji Nemuel, Datan, kɛ Abiram. (Datan kɛ Abiram nɛ ɔ ji gua mi bimɛ nɛ ma kpekpemi ɔ hla. Mɛ ji ni nɛmɛ nɛ hyɛ Mose kɛ Aaron hɛ mi, nɛ pee se ɔ, a ya piɛ Kora kɛ e we bi ɔmɛ a he kɛ tsɔ Yawɛ hɛ mi atuã a nɛ.

¹⁰ Zugba mi gba enyɔ ngɛ a sisi, nɛ e mii a kɛ Kora tsuo; nɛ a gbo. Nyumuhi lafa enyɔ kɛ nyingmi enuɔ ɔmɛ lɛɛ la sã mɛ, nɛ a plɛ pee kɔkɔ bɔmi okadi kɛ ha ma a.

¹¹ Se Kora bimɛ ɔmɛ lɛɛ a gbo we.)

¹² Simeon wɛtso ɔ: wekuhi nɛ ngɛ mi ji Nemuel weku ɔ, kɛ a nyatsɛ Nemuel; Yamin weku ɔ, kɛ a nyatsɛ Yamin; Yakin weku ɔ, kɛ a nyatsɛ Yakin;

¹³ Zera weku ɔ, kɛ a nyatsɛ Zera; Shaul weku ɔ, kɛ a nyatsɛ Shaul.

¹⁴ A hiɛmi ji 22,200.

¹⁵ Gad wɛtso ɔ: wekuhi nɛ ngɛ mi ji Zefon weku ɔ, kɛ a nyatsɛ Zefon; Hagi weku ɔ, kɛ a nyatsɛ Hagi, Shuni weku ɔ, kɛ a nyatsɛ Shuni;

¹⁶ Ozni weku ɔ, kɛ a nyatsɛ Ozni; Eri weku ɔ, kɛ a nyatsɛ Eri;

¹⁷ Arod weku ɔ, kɛ a nyatsɛ Arod; Areli weku ɔ, kɛ a nyatsɛ Areli.

¹⁸ A hiɛmi ji 40,500.

^19-21 Yuda wɛtso ɔ: wekuhi nɛ ngɛ mi ji Shela weku ɔ, kɛ a nyatsɛ Shela; Perez weku ɔ, kɛ a nyatsɛ Perez; Zera weku ɔ, kɛ a nyatsɛ Zera; Hezron weku ɔ, kɛ a nyatsɛ Hezron; Hamul weku ɔ, kɛ a nyatsɛ Hamul (Yuda binyumuhi ji Er kɛ Onan, se mɛɛ a gbo ngɛ Kanaan zugba a nɔ.)

²² A hiɛmi ji 76,500.

²³ Isakar wɛtso ɔ: wekuhi nɛ ngɛ mi ji Tola weku ɔ, kɛ a nyatsɛ Tola; Puva weku ɔ, kɛ a nyatsɛ Puva.

²⁴ Yashub weku ɔ, kɛ a nyatsɛ Yashub; Shimron weku ɔ, kɛ a nyatsɛ Shimron.

²⁵ A hiɛmi ji 64,300.

²⁶ Zebulun wɛtso ɔ: wekuhi nɛ ngɛ mi ji Sered weku ɔ, kɛ a nyatsɛ Sered; Elon weku ɔ, kɛ a nyatsɛ Elon; Yahleel weku ɔ, kɛ a nyatsɛ Yahleel.

²⁷ A hiɛmi ji 60,500.

²⁸ Yosef ngɛ binyumuhi enyɔ: Manase kɛ Efraim.

²⁹ Manase wɛtso ɔ: Manase binyumu Makir ɔ, e bi ji Gilead, nɛ weku nɛ ɔmɛ je Gilead mi:

³⁰ Yazer weku ɔ, kɛ a nyatsɛ Yazer; Helek weku ɔ, kɛ a nyatsɛ Helek;

³¹ Asriel weku ɔ, kɛ a nyatsɛ Asriel; Shekem weku ɔ, kɛ a nyatsɛ Shekem;

³² Shemida weku ɔ, kɛ a nyatsɛ Shemida; Hefer weku ɔ, kɛ a nyatsɛ Hefer.

³³ Hefer binyumu Zelofehad lɛɛ e be binyumu; biyihi pɛ lɛ a fɔ ha lɛ. Zelofehad biyi ɔmɛ a biɛhi ji Mahla, Noa, Hogla, Milka, kɛ Tirza.

³⁴ Manase wɛtso ɔ mi bimɛ tsuo a hiɛmi ji 52,700.

³⁵ Efraim wɛtso ɔ: wekuhi nɛ ngɛ mi ji Shutela weku ɔ, kɛ a nyatsɛ Shutela; Beker weku ɔ, kɛ a nyatsɛ Beker; Tahan weku ɔ, kɛ a nyatsɛ Tahan.

³⁶ Shutela bimɛ ji Eran weku ɔ, kɛ a nyatsɛ Eran.

³⁷ Efraim wɛtso ɔ mi bi tsuo a hiɛmi ji 32,500. Wekuhi nɛ je Yosef mi ji lɔ ɔmɛ nɛ.

³⁸ Benyamin wɛtso ɔ: wekuhi nɛ ngɛ mi ji Bela weku ɔ, kɛ a nyatsɛ Bela; Ashbel weku ɔ, kɛ a nyatsɛ Ashbel; Ahiram weku ɔ, kɛ a nyatsɛ Ahiram;

³⁹ Shefufam weku ɔ, kɛ a nyatsɛ Shefufam; Hufam weku ɔ, kɛ a nyatsɛ Hufam.

⁴⁰ Ard kɛ Naaman weku ɔmɛ je Bela weku ɔ mi.

⁴¹ Benyamin wɛtso ɔ mi bi tsuo a hiɛmi ji 45,600.

⁴² Dan wɛtso ɔ: weku nɛ ngɛ Dan wɛtso ɔ mi ji Shuham weku ɔ, kɛ a nyatsɛ Shuham,

⁴³ nɛ a hiɛmi ji 64,400.

⁴⁴ Asher wɛtso ɔ: wekuhi nɛ ngɛ mi ji Imna weku ɔ, kɛ a nyatsɛ Imna; Ishvi weku ɔ, kɛ a nyatsɛ Ishvi; Beria weku ɔ, kɛ a nyatsɛ Beria;

⁴⁵ Heber weku ɔ, kɛ a nyatsɛ Heber; Malkiel weku ɔ, kɛ a nyatsɛ Malkiel.

⁴⁶ Asher ngɛ biyo ko nɛ a tsɛɛ lɛ Sera.

⁴⁷ Asher wɛtso ɔ mi bi a hiɛmi ji 53,400.

⁴⁸ Naftali wɛtso ɔ: wekuhi nɛ ngɛ mi ji Yazeel weku ɔ, kɛ a nyatsɛ Yazeel; Guni weku ɔ, kɛ a nyatsɛ Guni;

⁴⁹ Yezer weku ɔ, kɛ a nyatsɛ Yezer; Shilem weku ɔ kɛ a nyatsɛ Shilem.

⁵⁰ Naftali wɛtso ɔ mi bi ahiɛmi ji 45,400.

⁵¹ Israel bi ɔmɛ a kpɛti nyumuhi nɛ a ngma a biɛ ɔ, mɛ tsuo pɛpɛɛpɛ a hiɛmi ji 601,730.

Zugba a dlami

⁵² Yawɛ de Mose ke,

⁵³ “Dla zugba a kɛ ha wɛtso ɔmɛ ngɛ a hiɛmi nya, konɛ e pee a nɔ.

^54-56 Wɛtso nya dali ɔmɛ nɛ a fɔ sɔ kɛ dla zugba a. Wɛtso nɛ mi bimɛ hiɛ ɔ, a na zugba agbo; se wɛtso nɛ mi bimɛ a he pi lɛɛ a na zugba bɔbɔyoo.”

⁵⁷ Levi wɛtso ɔ, wekuhi nɛ ngɛ mi ji Gershon weku ɔ, kɛ a nyatsɛ Gershon; Kohat weku ɔ, kɛ a nyatsɛ Kohat; Merari weku ɔ, kɛ a nyatsɛ Merari.

⁵⁸ Levi wɛtso ɔ mi weku komɛ hu ji Libni, Hebron, Mahli, Mushi, kɛ Kora. Kohat bi ji Amram.

⁵⁹ Amram yo ji Yokebed, Levi biyo ɔ nɛ e fɔ ngɛ Egipt ɔ. Amram kɛ lɛ fɔ Aaron, Mose, kɛ a nyɛmiyo Miriam.

⁶⁰ Aaron bimɛ ji Nadab, Abihu, Eleazar, kɛ Itamar.

⁶¹ Se Nadab, kɛ Abihu gbo benɛ a ngɔ la nɛ he tsɔ we kɛ sã bɔ ha Yawɛ ɔ.

⁶² Nyumuhi nɛ ngɛ Levi wɛtso ɔ mi, nɛ a ye kɛ je nyɔhiɔ kake kɛ yaa, nɛ a ngma a biɛ ɔ, a hiɛmi ji 23,000. A kane we mɛ kɛ piɛ we Israel bi kpa amɛ a he; ejakaa mɛɛ lɛɛ a ha we mɛ weto ní ko ngɛ Israel bi ɔmɛ a kpɛti.

⁶³ Ni nɛ ɔmɛ tsuo ji nihi nɛ Mose kɛ osɔfo Eleazar ngma a biɛ, benɛ a kane Israel ma a ngɛ Moab nga kplanaa a nɔ, ngɛ Yordan pa a se, ngɛ Yeriko hanɔ ɔ.

⁶⁴ Se nihi nɛ Mose kɛ osɔfo Aaron ngma a biɛ, benɛ a kane Israel ma a ngɛ Sinai nga a nɔ ɔ, jamɛatsɛmɛ ɔmɛ a ti nɔ kake ngmelu be ni nɛ ɔmɛ a kpɛti.

⁶⁵ Yawɛ de to kaa mɛ tsuo kulaa a ma gbo ngɛ nga a nɔ. Nɛ niinɛ, Yefune binyumu Kaleb, kɛ Nun binyumu Yoshua pɛ ji a ti ni nɛmɛ nɛ piɛ.