Mose IV, 25 - BAIBLO ALOO NGMAMI KLƆUKLƆU Ɔ

Israel bi ɔmɛ ngɛ Peor

¹ Benɛ Israel bi ɔmɛ ngɛ Shitim ɔ, a kɛ Moab yi ɔmɛ nɛ ngɛ lejɛ ɔ bɔni nyumu kɛ yo yakayaka fiɛmi fiɛmi.

² Yi nɛ ɔmɛ kpeeɔ mɛ kɛ yaa niye ní nɛ a kɛ ba sã bɔ ha a mawu ɔmɛ ɔ a he. A yeɔ ní ɔ, nɛ a jaa mawu ɔmɛ hulɔ.

³ Kɛ gu enɛ ɔ peemi mi ɔ, Israel bi ɔmɛ kɛ a he ya wo Baal nɛ ngɛ Peor ɔ jami sisi. Nɔ́ nɛ ɔ ha Yawɛ mi mi fu ma a,

⁴ nɛ e de Mose ke, “Ngɔɔ ma nimeli ɔmɛ tsuo kɛ ya nɛ o ya sɛu mɛ ngɛ Yawɛ hɛ mi piani katakata; kɛkɛ ɔ, ye mi mi fumi nɛ nya wa a maa je Israel nɔ.”

⁵ Mose de Israel ma kojoli ɔmɛ ke, “Nyɛ ti nɔ tsuaa nɔ nɛ gbe lɛ nitsɛ e he nihi nɛ a kɛ a he ya mɛtɛ Baal nɛ ngɛ Peor he ɔ.”

⁶ Benɛ Mose kɛ Israel ma kpekpemi ɔ bua a he nya, nɛ a wo yana ngɛ kpe he bo tsu ɔ sinya a nya a, Israel bi ɔmɛ a kpɛti nyumu ko ya wo Midian yo ko kɛ ba sɛ e bo tsu mi, ngɛ Mose kɛ ma a tsuo a hɛ mi paa.

⁷ Benɛ Eleazar bi Finehas, nɛ ji osɔfo Aaron bibi ɔ na nɔ́ nɛ ɔ, e te si kɛ je gua a mi. E ya kɛ̃ akplɔ,

⁸ nɛ e nyɛɛ Israel no ɔ se kɛ ya sɛ e se tsu mi; nɛ e kɛ akplɔ nɛ e hɛɛ ɔ gbɔ nyumu ɔ kɛ yo ɔ tsuo kɛ ya pa si. Kɛkɛ nɛ gbenɔ hiɔ ɔ se po ngɛ Israel bi ɔmɛ a kpɛti.

⁹ Se kɛ̃ nimli nɛ gbenɔ hiɔ ɔ gbe ɔ, a hiɛmi ji akpe nyingmi enyɔ kɛ eywiɛ.

¹⁰ Yawɛ de Mose ke,

¹¹ “Nɔ́ nɛ Eleazar binyumu Finehas, osɔfo Aaron bibi ɔ pee nɛ ɔ ha nɛ ye mi mi nɛ fu Israel ma a nya ba si. E je hunga ha mi, nɛ enɛ ɔ he je ɔ, i be ye ma a hɛ mi kpatae hu.

¹² Lɔ ɔ he ɔ, mo de lɛ ke, i kɛ lɛ ngɛ he jɔmi somi soe.

¹³ E maa pee lɛ, kɛ e nina tsuo a nɔ́, nɛ a maa da nɔ kɛ ye osɔfo kɛ maa ya neneene. Ejakaa e kplɛɛ we nɛ nihi kɛ mi nɛ plee nɔ́ he, nɛ nɔ́ nɛ ɔ ha nɛ a kɛ Israel ma a he yayami pa mɛ.”

¹⁴ Israel no ɔ nɛ a gbe e kɛ Midian yo ɔ, lɛ ji Salu binyumu Zimri. Wɛtsoyi ji lɛ ngɛ Simeon bi ɔmɛ a wɛtso ɔ mi.

¹⁵ Moab yo ɔ nɛ a gbe ɔ, lɛ hu e biɛ ji Kozbi. E tsɛ Zur ɔ, lɛ hu Midian bi a wɛtso kake nyatsɛ ji lɛ.

¹⁶ Yawɛ de Mose ke,

¹⁷ “Jehanɛ, nyɛɛ ya nɛ nyɛ ya tua Midian bi ɔmɛ, nɛ nyɛ kpata a hɛ mi,

¹⁸ ejakaa a gu sisimi blɔ nɔ nɛ a kɛ nyɛ wo haomi mi. A ha nɛ nyɛ ya ja Baal nɛ ngɛ Peor ɔ, nɛ nyɛ kɛ tɔtɔ nyɛ nane. Midian wɛtsoyi ɔ biyo Kozbi, nɔ nɛ a gbe benɛ gbenɔ hiɔ ɔ ngɛ ní tsue ɔ, e sane ɔ yeɔ nɔ́ nɛ ɔ he odase.”