Mose IV, 24 - BAIBLO ALOO NGMAMI KLƆUKLƆU Ɔ

¹ Benɛ Balaam na kaa Yawɛ suɔ kaa e gbaa Israel ma a, e yɛ nɛ e ya bi Yawɛ ní kaa bɔ nɛ e pee sa a. Mohu, e plɛ e hɛ mi kɛ kpee nga a nɔ blɔ,

² nɛ e na Israel ma a nɛ a pueɔ si wɛtso nya wɛtso nya.

³ Kɛkɛ nɛ Mawu mumi ɔ ba e nɔ, nɛ gba gbi nɛ ɔ je e nya ke, “Beor binyumu Balaam sɛ gbi ji nɛ ɔ nɛ. Nyumu ɔ nɛ hyɛɛ nɔ́ saminya a sɛ gbi ji nɛ ɔ nɛ.

⁴ Nɔ nɛ nuɔ Mawu gbi, Nɔ nɛ Mawu Ope ɔ jeɔ ninahi kɛ tsɔɔ lɛ, Nɔ nɛ ke e hɛli po ɔ, e hɛngmɛhi fɔɔ si paa.

⁵ Yakob lee, o bo tsu ɔmɛ ngɛ fɛu; Israel lee, o sito he ɔmɛ ngɛ fɛu.

⁶ A ngɛ kaa dɔhi nɛ a gba kɛ yaa tsitsaa, aloo abɔɔhi ngɛ pa tue. A ngɛ kaa tso kɛ e he via nɛ Yawɛ du; A ngɛ kaa seda tsohi ngɛ pa tue.

⁷ Bɔ́ maa nɛ kɛ je e tso kɔni ɔmɛ a mi, nɛ e ngmɛdu maa hi zugba kpakpa nɔ. E matsɛ yemi ɔ maa kle pe Agag nɔ ɔ; E nɔ yemi he ɔ yi ma bli.

⁸ Benɛ Mawu je lɛ kɛ je Egipt kɛ ma a, e he wami ngɛ kaa pu mi na ku he wami. Ma je li ɔmɛ nɛ ji e he nyɛli ɔmɛ ɔ, e maa ye mɛ tsuatsuaatsua; e maa ywia a wu ɔmɛ mɔnyɔmɔnyɔ, nɛ e kɛ e kɛ̃ɛ̃ mi bi ɔmɛ maa gbɔ a mi mi kɛ ya pa si.

⁹ E bua e he nya, nɛ e buu si kaa jata ku; Ee e buu si kaa jata yo. Mɛnɔ ma nyɛ maa tsɛɛ lɛ? Nɔ tsuaa nɔ nɛ gbaa mo ɔ, a maa gbaa lɛ; Nɔ tsuaa nɔ nɛ gbiɛɛ mo ɔ, a maa gbiɛ lɛ.”

¹⁰ Kɛkɛ nɛ Balak mi mi fu Balaam wawɛɛ, nɛ e gba e dɛ mi ma, nɛ e de Balaam ke, “I kpee mo kɛ ba nɛ o ba gbiɛ ye he nyɛli ha mi; se si etɛ sɔuu ji nɛ ɔ nɛ o ngɛ mɛ gbaae mohu.

¹¹ Lɔ ɔ he ɔ, moo je hiɛ ɔ nɛ o ho esɔesɔ! I wo mo si kaa ma wo o hɛ mi nyami, se Yawɛ tsi o hɛ mi nyami womi ɔ nya.”

¹² Balaam ha Balak heto ke, “Anɛ i de we tsɔli ɔmɛ nɛ o tsɔ kɛ ba ye ngɔ ɔ ke,

¹³ Ke Balak ngɔ sika hiɔ, loo sika tsu tsuo nɛ ngɛ e we ɔ mi kɛ ha mi po ɔ, i be nyɛe nɛ ma to ye yi mi nɛ ma pee nɔ́ ko nɛ kɛ fami nɛ Yawɛ fa mi ɔ yɛ, kpakpa jio, yayami jio, kaa ja nɔ́ nɛ Yawɛ ke ma de ɔ, lɔ ɔ pɛ ma de ɔ lo?”

Balaam gbami nɛ ji eywiɛ

¹⁴ “Lɔ ɔ he ɔ, piɔ lɛɛ i kpale kɛ yaa imi nitsɛ ye ma mi. Se loko ma je ɔ, ma suɔ nɛ ma wo o tue nɔ ngɛ nɔ́ nɛ kikɛmɛ a ma nɛ ɔ maa pee mo nitsɛ o ma mi bi ɔmɛ hwɔɔ se ɔ he.”

¹⁵ Kɛkɛ nɛ gba gbi nɛ ɔ ba e nya, nɛ e de ke, “Beor binyumu Balaam sɛ gbi ji nɛ ɔ nɛ. Nyumu ɔ nɛ hyɛɛ nɔ́ saminya a sɛ gbi ji nɛ ɔ nɛ.

¹⁶ Lɛ nɛ e nuɔ Mawu gbi; Lɛ nɛ Mawu Ope ɔ jeɔ ninahi kɛ tsɔɔ; Lɛ nɛ ke e hɛli po e hɛngmɛhi fɔɔ si paa.

¹⁷ I na lɛ, se e he kɛ; I ngɛ lɛ hyɛe, se e sui hiɛ ɔ lolo. Dodoe ko maa je Yakob mi kɛ ba; Matsɛ tso ko maa je Israel; E maa fia Moab ma nimeli ɔmɛ ní, nɛ e ma kpata Set bi ɔmɛ a hɛ mi.

¹⁸ E maa ye e he nyɛli ɔmɛ a nɔ ngɛ Edom; nɛ e maa ngɔ a zugba a; Israel maa ye kunimi daa.

¹⁹ Yakob maa ye matsɛ, nɛ e ma kpata ni nɛmɛ nɛ piɛ ɔ a hɛ mi.”

²⁰ Kɛkɛ nɛ Balaam na Amalek bi ɔmɛ ngɛ nina mi, nɛ gba gbi nɛ ɔ ba e nya, nɛ e de ke, “Sa a, Amalek ji ma nɛ a he wa pe je ma amɛ tsuo. Se nyagbenyagbe ɔ, a ma kpata a hɛ mi.”

²¹ Jehanɛ, e na Ken bi ɔmɛ ngɛ nina mi, nɛ gba gbi nɛ ɔ ba e nya, nɛ e de ke, “Nyɛ sihi he ɔmɛ ngɛ he wami, nɛ nyɛ ma nyɛ tsu ɔmɛ ngɛ tɛ sahi a nɔ.

²² Se kɛ̃, Ken bi! Asiria bi ma ba ngɔ nyɛ nyɔguɛ, nɛ a ma kpata nyɛ hɛ mi.”

²³ Kɛkɛ nɛ gba gbi nɛ ɔ hu ba Balaam nya, nɛ e de ke, “Akuanyɛ! Mɛnɔ maa hi hɛ ngmengmle benɛ Mawu ngɛ enɛ ɔ pee ɔ?

²⁴ Lɛhi maa je Kipro wo nya kɛ ba, nɛ a maa hao Asiria, kɛ Eber. Nɛ mɛ nitsɛmɛ hu a hɛ mi ma kpata!”

²⁵ Kɛkɛ nɛ Balaam dla e he nɛ e kpale kɛ ho e je he ya; nɛ Balak hu wo e blɔ.