Mose IV, 23 - BAIBLO ALOO NGMAMI KLƆUKLƆU Ɔ

¹ Balaam de Balak ke, “Moo puɛ bɔ sami la tɛ kpaago ha mi ngɛ hiɛ ɔ, nɛ o ya hla na ku kpaago, kɛ agbosu kpaago kɛ ba.”

² Balak pee bɔ nɛ Balaam de lɛ ɔ, nɛ e kɛ Balaam sã na ku kake, kɛ agbosu kake ngɛ bɔ sami la tɛ tsuaa bɔ sami la tɛ nɔ.

³ Balaam de Balak ke, “Da si ngɛ o sami bɔ ɔ he, nɛ imi nɔ kake ma ya, kaa alini Yawɛ kɛ mi ma ba kpe lo. Nɔ́ tsuaa nɔ́ nɛ e ma je tsɔɔ mi ɔ, ma ba de mo.” Kɛkɛ nɛ e pue nɔ kɛ ho yoku kpataa ko nɔ ya,

⁴ nɛ Mawu kɛ lɛ ya kpe ngɛ lejɛ ɔ. Balaam de Mawu ke, “I puɛ bɔ sami la tɛ kpaago ɔmɛ, nɛ i sã na ku kake, kɛ agbosu kake ngɛ bɔ sami la tɛ tsuaa bɔ sami la tɛ nɔ.”

⁵ Yawɛ tsɔɔ Balaam nɔ́ nɛ e de Balak, ne e ha nɛ e kpale e se, konɛ e ngɔ sɛ gbi nɛ ɔ ya ha Balak.

⁶ Benɛ e kpale kɛ ho ɔ, e na kaa Balak daa si ngɛ e sami bɔ ɔ he kɛ mwɔɔ; lɛ, kɛ Moab ma nimeli ɔmɛ tsuo.

⁷ Kɛkɛ nɛ gba gbi nɛ ɔ je Balaam nya, nɛ e de ke, “Moab matsɛ, Balak ya kpee mi kɛ je Aram tɔɔ. E kpee mi kɛ je beleku yo ɔmɛ a nɔ, nɛ e de mi ke, ‘Ba nɛ o ba gbiɛ Yakob ha mi, nɛ o tu munyu kɛ si Israel!’

⁸ Kɛ ma pee kɛɛ nɛ ma gbiɛ nihi nɛ Mawu lɛɛ e gbíɛ mɛ; loo ma tu munyu kɛ si nihi nɛ Mawu lɛɛ e mi mi fu we mɛ?

⁹ I da tɛ sa amɛ a nɔ kɛ hyɛ mɛ; i na mɛ kɛ je yoku ɔmɛ a yi mi. O nɛ, ma kake mi bi ji mɛ; a kɛ a he bɔɛ ma je li ɔmɛ a he!

¹⁰ Yakob nina ngɛ kaa bunyuku; a he hiɛ babauu, nɛ nɔ ko be nyɛe maa kane mɛ. Ha nɛ ye nyagbe nɛ pee kaa Mawu bi ɔmɛ a ti nɔ kake. Ha nɛ ma gbo ngɛ tue mi jɔmi mi kaa dalɔ.”

¹¹ Kɛkɛ nɛ Balak de Balaam ke, “Akuanyɛ! Mɛni o pee mi nɛ ɔ? I ngɔ mo kɛ ba hiɛ ɔ nɛ o ba gbiɛ ye he nyɛli ha mi, se gbaami mohu o ba gbaa mɛ.”

¹² E he nɔ ke, “Anɛ ma nyɛ ma de nɔ́ kpa ko pe nɔ́ nɛ Yawɛ ke ma de ɔ lo?”

Balaam gbami nɛ ji enyɔ

¹³ Enɛ ɔ se ɔ, Balak de Balaam ke “Ha waa ya he kpa, he nɛ o maa na ma a fa ko kɛkɛ ngɛ, se pi mɛ tsuo, konɛ o gbiɛ mɛ ha mi ngɛ lejɛ ɔ.”

¹⁴ E ngɔ lɛ kɛ ho Zofim nga a nɔ ya, ngɛ Pisga yo ɔ yi mi. Lejɛ ɔ hu e puɛ bɔ sami la tɛ kpaago, nɛ e sã na ku kake, kɛ agbosu kake ngɛ bɔ sami la tɛ tsuaa bɔ sami la tɛ nɔ.

¹⁵ Balaam de Balak ke, “Da si ngɛ o sami bɔ ɔ he ngɛ hiɛ ɔ, konɛ i kɛ Yawɛ ya kpe ngɛ hɛ mi ɔ.”

¹⁶ Kɛkɛ nɛ Yawɛ kɛ Balaam ba kpe. E tsɔɔ lɛ nɔ́ nɛ e de Balak, nɛ e ha nɛ e kpale e se, konɛ e ngɔ sɛ gbi nɛ ɔ ya ha Balak.

¹⁷ Benɛ e kpale kɛ ho ɔ, e na kaa Balak daa si ngɛ e sami bɔ ɔ he kɛ mwɔɔ; lɛ, kɛ Moab ma nimeli ɔmɛ tsuo. Balak bi lɛ ke, “Kɛ Yawɛ de kɛɛ?”

¹⁸ Kɛkɛ nɛ gba gbi nɛ ɔ je Balaam nya ke, “Zipor bi Balak, moo bu nɔ́ nɛ ma de mo ɔ tue!

¹⁹ Mawu ɔ, pi nɔmlɔ ji lɛ nɛ e ngɔɔ nya, pi nɔmlɔ ji lɛ nɛ e tsakeɔ e yi mi tomi. Anɛ ke e de nɔ́ ko ɔ, e pee we lo? Aloo e woɔ si nɛ e yi nɔ lo?

²⁰ Hyɛ, gbaami a fa mi ke ma ba gbaa. Lɛɛ e gbaa momo; imi lɛɛ i be nyɛe ma kpale se.

²¹ Mawu nɛ́ Yakob he yayami ko; Mawu nɛ́ Israel he hiami ko. Yawɛ, a Mawu ɔ kɛ mɛ ngɛ; Yawɛ ji a matsɛ.

²² Mawu ji nɔ nɛ je mɛ kɛ je Egipt. Israel he wami ngɛ kaa na ku he wami.

²³ Kunya ko kunya ko be Yakob nyɛe, Israel ɔ, klaami he wami ko be lɛ nyɛe. Lɛɛ a ma de ngɛ Yakob, loo Israel he ke, ‘Nyɛɛ hyɛ nyakpɛ níhi nɛ Mawu tsu ha mɛ!’

²⁴ Israel ma a ngɛ kaa jata katsɛ; e bu we si, nɛ e jɔɔ we e he, ja e ye de lo ɔ tsuatsuaatsua, nɛ e nu lohwe nɛ e gbe ɔ muɔ lolo.”

²⁵ Kɛkɛ nɛ Balak de Balaam ke, “Ke o be mɛ gbiɛe ɔ, lɛɛ koo gbaa mɛ mɔ.”

²⁶ Balaam he nɔ ke, “Anɛ i de we mo ke nɔ́ tsuaa nɔ́ nɛ Yawɛ de mi ke ma pee ɔ, lɔ ɔ pɛ ma pee lo?”

Balaam gbami nɛ ji etɛ

²⁷ Balak ya nɔ nɛ e de Balaam ke, “Ha nɛ wa pa ya he kpa, kaa alini jehanɛ lɛɛ Mawu maa kplɛɛ kaa o gbiɛ mɛ ha mi ngɛ lejɛ ɔ lo.”

²⁸ Nɛ Balak ngɔ Balaam kɛ ho Peor yo ɔ nɔ ya, he nɛ ke o ngɛ nɛ o hyɛɛ nga a nɔ ɔ.

²⁹ Balaam de Balak ke, “Moo puɛ bɔ sami la tɛ kpaago ha mi ngɛ hiɛ ɔ, nɛ o ya hla na ku kpaago kɛ agbosu hu kpaago kɛ ba.”

³⁰ Balak pee kaa bɔ nɛ Balaam de lɛ ɔ, nɛ e sã na ku kake, kɛ agbosu kake ngɛ bɔ sami la tɛ tsuaa bɔ sami la tɛ nɔ.