Mose IV, 22 - BAIBLO ALOO NGMAMI KLƆUKLƆU Ɔ

Balak kɛ Balaam

¹ Israel bi ɔmɛ pue nɔ, nɛ a ya to si ngɛ Moab nga kpataa a nɔ ngɛ Yordan pa a se, ngɛ Yeriko hanɔ.

² Benɛ Moab matsɛ, Balak, Zipor binyumu ɔ na Israel bi ɔmɛ a hiɛmi, kɛ bɔ nɛ a pee Amor bi ɔmɛ ɔ,

³ e kɛ e ma a tsuo ye Israel bi ɔmɛ gbeye wawɛɛ nitsɛ.

⁴ Moab bi ɔmɛ ya de Midian ma nimeli ɔmɛ ke, “E be kɛe nɛ ta nɛ ɔ ma kpata nɔ tsuaa nɔ nɛ bɔle wɔ ɔ hɛ mi kaa bɔ nɛ na ku kpeɔ nga ngɛ nga nɔ ɔ.” Lɔ ɔ he ɔ, Matsɛ Balak

⁵ tsɔ nihi kɛ ho Petor ya, ngɛ Yufrate pa a kasa nya, ngɛ Amaw bi ɔmɛ a zugba a nɔ, nɛ́ a ya kpee Beor binyumu Balaam kɛ ba. E sɛ gbi ji, “I ngɛ hae nɛ o le kaa ma ko je Egipt kɛ ba, nɛ a ha zugba a tsuo nɔ. Amlɔ nɛ ɔ po a su ye ngɔ ta.

⁶ Lɔ ɔ he ɔ, i kpa mo pɛɛ, ba nɛ o ba gbiɛ ma nɛ ɔ ha wɔ kaa, alini wa maa ye a nɔ, nɛ wa maa fie mɛ kɛ je zugba a nɔ lo; ejakaa a hiɛ pe wɔ. I le kaa ke o gbaa nɔ ko ɔ, kɛkɛ a gbaa lɛ; nɛ ke o gbiɛ nɔ ko ɔ, kɛkɛ a gbiɛ lɛ.”

⁷ Moab ma nimeli ɔmɛ, kɛ Midian ma nimeli ɔmɛ pue nɔ kɛ ho Balaam ngɔ ya. A hɛɛ sika nɛ a kɛ maa wo nɔ gbiɛmi ɔ he hiɔ ngɛ a dɛ, nɛ benɛ a ya su ɔ, a ngɔ Balak sɛ gbi ɔ ngɔ ha Balaam.

⁸ Balaam de mɛ ke, “Nyɛɛ hwɔ hiɛ ɔ nyɔ nɛ ɔ mi, konɛ nɔ́ tsuaa nɔ́ nɛ Yawɛ ma de mi ɔ, ma ha nɛ nyɛɛ le.” Nɛ Moab ma nimeli ɔmɛ hwɔ Balaam ngɔ.

⁹ Mawu ba Balaam ngɔ, nɛ e ba bi lɛ ke, “Nyumu ɔmɛ nɛ ba to mo ɔ, mɛnɔmɛ ji mɛ?”

¹⁰ Balaam ha heto ke, “Moab matsɛ, Balak, Zipor binyumu ɔ, lɛ nɛ e tsɔ mɛ ke a ba de mi ke

¹¹ ma a nɛ je Egipt kɛ ba a, ha zugba a tsuo nɔ. Lɔ ɔ he ɔ, e ngɛ hlae nɛ ma ba gbiɛ mɛ ha lɛ, konɛ e nyɛ nɛ e kɛ mɛ nɛ hwu ta, nɛ e fie mɛ kɛ je zugba a nɔ.”

¹² Mawu de Balaam ke, “O kɛ mɛ ko ya, nɛ koo gbiɛ Israel ma a hulɔ; ejakaa a gbaa mɛ.”

¹³ Balaam te si mɔtu nɛ e ya de Balak nimeli ɔmɛ ke, “Nyɛɛ kpale kɛ ho nyɛ ma mi ya; ejakaa Yawɛ kplɛɛ we kaa i kɛ nyɛ nɛ ya.”

¹⁴ Kɛkɛ nɛ Moab ma nimeli ɔmɛ kpale a se kɛ ho Balak ngɔ ya, nɛ a ya de lɛ ke, “Balaam kplɛɛ we kaa e kɛ wɔ maa ba.”

¹⁵ Balak kpale tsɔ ma nimeli kpahi kɛ ho; ni nɛ ɔmɛ hiɛ pe kekle ni ɔmɛ, nɛ a hɛ mi hu ngɛ nyami pe mɛ.

¹⁶ A ya Balaam ngɔ nɛ a ya de lɛ ke, “Bɔ nɛ Balak, Zipor binyumu ɔ de ji nɛ ɔ nɛ: i kpa mo pɛɛ, ko ha nɛ nɔ́ ko nɔ́ ko nɛ tsi mo ye ngɔ bami blɔ!

¹⁷ Ma wo o hɛ mi nyami babauu, nɛ nɔ́ tsuaa nɔ́ nɛ o ma de mi ɔ, ma pee. I kpa mo pɛɛ, ba nɛ o ba gbiɛ kikɛmɛ a ma nɛ ɔ ha mi.”

¹⁸ Se Balaam he nɔ nɛ e de Balak tsɔli ɔmɛ ke, “Ke Balak ha mi sika hiɔ, loo sika tsu tsuo nɛ ngɛ e we ɔ mi po, i be nyɛe nɛ ma pee nɔ́ ko agbo, loo nyafii kɛ si nɔ́ nɛ Yawɛ, ye Mawu ɔ de mi ɔ.

¹⁹ Se kɛ̃, nyɛ hu nyɛɛ hwɔ hiɛ ɔ nyɔ nɛ ɔ mi, konɛ ma hyɛ kaa Yawɛ ngɛ nɔ́ kpa ko nɛ e ma de mi lo.”

²⁰ Jamɛ a nyɔ ɔ mi ɔ, Mawu ba Balaam ngɔ, nɛ e ba de lɛ ke, “Ke nimli nɛ ɔmɛ ba nɛ́ a ba kpee mo kɛ ho ɔ, tee si nɛ o kɛ mɛ nɛ ya. Se mohu, nɔ́ nɛ ma de mo ɔ, lɔ ɔ o pee.”

²¹ Lɔ ɔ he ɔ, Balaam te si mɔtu, nɛ e wo e teji yo ɔ nɔ ní; nɛ e kɛ Moab ma nimeli ɔmɛ pue nɔ kɛ ho.

Balaam kɛ e teji yo ɔ

²² Se Mawu mi mi fu kaa Balaam ho. Benɛ Balaam hi e teji yo ɔ nɔ nɛ e kɛ e tsɔli enyɔ ɔmɛ yaa a, Yawɛ bɔfo ɔ ya po lɛ ngɛ blɔ ɔ nɔ.

²³ Benɛ teji yo ɔ na bɔfo ɔ nɛ e hia klaate kɛ daa si ngɛ blɔ ɔ mi ɔ, e gba kɛ je blɔ ɔ nɔ kɛ ho nga a mi ya. Balaam fia teji yo ɔ nɔ́, konɛ e kɛ dɔ e yi kɛ ba blɔ ɔ nɔ ekohu.

²⁴ Kɛkɛ nɛ Yawɛ bɔfo ɔ ya da si ngɛ nane blɔ ko mi ngɛ wai ngmɔ enyɔ komɛ a kpɛti; nɛ gbogbo ngɛ hiɛ kɛ hiɛ.

²⁵ Benɛ teji yo ɔ na Yawɛ bɔfo ɔ, e ngɔ e he ya kpasa gbogbo ɔ, nɛ e mia Balaam nane kɛ wo gbogbo ɔ he. Balaam fia lɛ nɔ́ ekohu.

²⁶ Yawɛ bɔfo ɔ ya e hɛ mi ekohu, nɛ e ya da si ngɛ he ko tokofii, he nɛ blɔ ko blɔ ko be nɛ a kɛ plɛɔ he kɛ yaa nɔ hiɔ nɔ, loo nɔ muɔ nɔ.

²⁷ Benɛ teji yo ɔ na Yawɛ bɔfo ɔ ekohu ɔ, e kpla si ngɛ Balaam sisi. Balaam mi mi fu, nɛ e ngɔ e dɛma tso ɔ kɛ fia teji yo ɔ.

²⁸ Kɛkɛ nɛ Yawɛ bli teji yo ɔ nya, nɛ e bi Balaam ke, “Mɛni i pee mo loko o fia mi nɔ́ si etɛ sɔuu kikɛ nɛ ɔ?”

²⁹ Balaam he nɔ nɛ e de teji yo ɔ ke, “Ejakaa o pee mi kuasia. I hɛɛ klaate jinɛ i gbe mo momo.”

³⁰ Teji yo ɔ ya nɔ nɛ e bi Balaam ke, “Anɛ pi mo nitsɛ o teji yo ji mi, nɛ o hii ye nɔ daa nɛ ɔ kɛ ba si mwɔnɛ ɔ lo? Anɛ i pee mo nɔ́ ko kaa kikɛ nɛ ɔ hyɛ lo?” Balaam ha lɛ heto ke, “Dɛbi.”

³¹ Jehanɛ ɔ, Yawɛ bli Balaam hɛngmɛ, nɛ e na Yawɛ bɔfo ɔ nɛ hɛɛ klaate kɛ daa si ngɛ blɔ ɔ mi. Kɛkɛ nɛ Balaam ma e yi si, nɛ e kɛ e hɛ mi bu si.

³² Yawɛ bɔfo ɔ bi Balaam ke, “Mɛni he je nɛ o fia o teji yo ɔ nɔ́ si etɛ sɔuu kikɛ nɛ ɔ? O nɛ, pe i ba nɛ ma ba tsi mo blɔ; ejakaa blɔ nɛ o hia nɛ ɔ ngɔɛ ye nya.

³³ Teji yo ɔ na mi nɛ e yu e he kɛ je ye hɛ mi si etɛ sɔuu. Niinɛ, kaa e pee we ja jinɛ i gbe mo, nɛ i he teji yo ɔ yi wami.”

³⁴ Balaam de Yawɛ bɔfo ɔ ke, “I pee yayami; i li kaa mo lɛ o ba po mi ngɛ blɔ ɔ nɔ. Lɔ ɔ he ɔ, ke blɔ nɛ i hia nɛ ɔ dɛ ha mo ɔ, lɛɛ ma kpale ye se mɔ.”

³⁵ Se Yawɛ bɔfo ɔ de Balaam ke, “O kɛ nyumu ɔmɛ nɛ ya kɛkɛ; se mohu, munyu nɛ ma ngɔ kɛ wo o nya ke o tu ɔ, lɔ ɔ pɛ o de.” Kɛkɛ nɛ Balaam kɛ Balak tsɔli ɔmɛ pue nɔ kɛ ho.

Balak ba kpee Balaam

³⁶ Benɛ Balak nu kaa Balaam ma a, e ho nɛ e ya kpee lɛ ngɛ Ar tɔɔ. Ma nɛ ɔ ji ma ko nɛ ngɛ Arnon pa a nya, ngɛ Moab huzu ɔ nyagbe.

³⁷ Balak bi Balaam ke, “Anɛ i sɛ́ ke a ba de mo ke o ba nɛ o ba na mi dãã lo? Mɛni he je o bɛ nɛ o ba na mi ɔ? Anɛ o susuɔ kaa i be nyɛe ma wo o hɛ mi nyami lo?”

³⁸ Balaam de lɛ ke, “O nɛ mi; i ba! Imi nitsɛ lɛɛ i be he wami nɛ ma kɛ de nɔ́ ko. Nɔ́ nɛ Mawu ke ma de ɔ, lɔ ɔ ji nɔ́ nɛ ma de ɔ nɛ.”

³⁹ Kɛkɛ nɛ Balak kɛ Balaam pue nɔ kɛ ho Kiriat Huzot ya.

⁴⁰ Balak ngɔ nahi, kɛ tohi kɛ sã bɔ, nɛ e kɛ lo ɔ eko ha Balaam, kɛ ma nimeli nɛ piɛ e he ɔ.

Balaam kekleekle gbami

⁴¹ E nɔ jena a, Balak ngɔ Balaam kɛ ho Bamot Baal ya, nɛ Balaam na Israel ma a fa ko kɛ je lejɛ ɔ.