Mose IV, 2 - BAIBLO ALOO NGMAMI KLƆUKLƆU Ɔ

Wɛtso ɔmɛ a si puemi

¹ Yawɛ de Mose kɛ Aaron ke,

² “Be tsuaa be nɛ Israel ma a maa to si ngɛ he ko ɔ, á pue si weku nya weku nya ngɛ nɔ tsuaa nɔ weku aflaangaa sisi kɛ bɔle kpe he bo tsu ɔ kɛ kpe, nɛ a plɛ a hɛ mi kɛ tsɔɔ kpe he ɔ.

^3-4 “Yuda wɛtso ɔ ma pue si kɛ yaa beleku je tabo nya tabo nya. A nyatsɛ ji Aminadab bi Nashon, nɛ a hiɛmi ji nimli akpe nyingmi kpaago kɛ eywiɛ kɛ e nya lafa ekpa.

^5-6 “Isakar wɛtso ɔ ma pue si kɛ tsa Yuda nɔ. A nyatsɛ ji Zuar bi Netanel, nɛ a hiɛmi ji nimli akpe nyingmi enuɔ kɛ eywiɛ kɛ e nya lafa eywiɛ.

^7-8 “Zebulun wɛtso ɔ ma pue si kɛ tsa Isakar nɔ. A nyatsɛ ji Helon bi Eliab, nɛ a hiɛmi ji nimli akpe nyingmi enuɔ kɛ kpaago kɛ e nya lafa eywiɛ.

⁹ Nihi tsuo pɛpɛɛpɛ nɛ ma pue si tabo nya tabo nya, ngɛ Yuda ta a mi ɔ a hiɛmi ji nimli akpe lafa kɛ nyingmi kpaanyɔ kɛ ekpa kɛ e nya lafa eywiɛ. Mɛ lɛ a maa hia ta kɛ nyɛɛ hɛ mi.

^10-11 “Ruben wɛtso ɔ ma pue si kɛ yaa leneyi je, tabo nya tabo nya. A nyatsɛ ji Shedeur bi Elizur, nɛ a hiɛmi ji nimli akpe nyingmi eywiɛ kɛ ekpa kɛ e nya lafa enuɔ.

^12-13 “Simeon wɛtso ɔ ma pue si kɛ tsa Ruben nɔ. A nyatsɛ ji Zurishadai bi Shelumiel, nɛ a hiɛmi ji nimli akpe nyingmi enuɔ kɛ nɛɛ kɛ e nya lafa etɛ.

^14-15 “Gad wɛtso ɔ ma pue si kɛ tsa Simeon nɔ. A nyatsɛ ji Deuel bi Eliasaf, nɛ a hiɛmi ji nimli akpe nyingmi eywiɛ kɛ enuɔ kɛ e nya lafa ekpa kɛ nyingmi enuɔ.

¹⁶ Nihi tsuo pɛpɛɛpɛ nɛ ma pue si tabo nya tabo nya ngɛ Ruben ta a mi ɔ, a hiɛmi ji nimli akpe lafa kɛ nyingmi enuɔ kɛ kake kɛ e nya lafa eywiɛ kɛ nyingmi enuɔ. Mɛ ji tabo enyɔne nɛ maa hia ta.

¹⁷ “Jehanɛ, Levi bi ɔmɛ maa tloo kpe he bo tsu ɔ kɛ maa hia; mɛ ji Israel ta a tsuo a kpɛti tabo. Bɔ nɛ ma a to si ɔ, ja a maa nyɛɛ, nɔ tsuaa nɔ ngɛ e ngwɔhe, kɛ e we aflaangaa sisi.

^18-19 “Efraim wɛtso ɔ ma pue si kɛ yaa bonyoku je, tabo nya tabo nya. A nyatsɛ ji Amihud bi Elishama, nɛ a hiɛmi ji nimli akpe nyingmi eywiɛ kɛ e nya lafa enuɔ.

^20-21 “Manase wɛtso ɔ ma pue si kɛ tsa Efraim nɔ. A nyatsɛ ji Pedazur bi Gamaliel, nɛ a hiɛmi ji nimli akpe nyingmi etɛ kɛ enyɔ kɛ e nya lafa enyɔ.

^22-23 “Benyamin wɛtso ɔ ma pue si kɛ tsa Manase nɔ. A nyatsɛ ji Gideoni bi Abidan, nɛ a hiɛmi ji nimli akpe nyingmi etɛ kɛ enuɔ kɛ e nya lafa eywiɛ.

²⁴ Nihi tsuo pɛpɛɛpɛ nɛ ma pue si tabo nya tabo nya, ngɛ Efraim ta a mi ɔ, a hiɛmi ji nimli akpe lafa kɛ kpaanyɔ kɛ e nya lafa kake. Mɛ ji tabo etɛne nɛ maa hia ta.

^25-26 “Dan wɛtso ɔ ma pue si kɛ yaa omleyi je, tabo nya tabo nya. A nyatsɛ ji Amishadai bi Ahiezer, nɛ a hiɛmi ji nimli akpe nyingmi ekpa kɛ enyɔ kɛ e nya lafa kpaago.

^27-28 “Asher wɛtso ɔ ma pue si kɛ tsa Dan nɔ. A nyatsɛ ji Okran bi Pagiel, nɛ a hiɛmi ji nimli akpe nyingmi eywiɛ kɛ kake kɛ e nya lafa enuɔ.

^29-30 “Naftali wɛtso ɔ ma pue si kɛ tsa Asher nɔ. A nyatsɛ ji Enan bi Ahira, nɛ a hiɛmi ji nimli akpe nyingmi enuɔ kɛ etɛ kɛ e nya lafa eywiɛ.

³¹ Nihi tsuo pɛpɛɛpɛ nɛ ma pue si tabo nya tabo nya ngɛ Dan ta a mi ɔ, a hiɛmi ji nimli akpe lafa kɛ nyingmi enuɔ kɛ kpaago kɛ e nya lafa ekpa. Mɛ ji ni nɛmɛ nɛ maa hia ta nyagbe ngɛ a we aflaangaa amɛ a sisi.”

³² Israel ma a tsuo pɛpɛɛpɛ nɛ a kane mɛ weku nya weku nya kɛ tabo nya tabo nya ngɛ ta amɛ a mi ɔ, a hiɛmi ji nimli akpe lafa ekpa kɛ etɛ kɛ e nya lafa enuɔ kɛ nyingmi enuɔ.

³³ Se kaa bɔ nɛ Yawɛ fa Mose ɔ, Levi bi ɔmɛ lɛɛ a kane we mɛ kɛ piɛ we Israel bi ɔmɛ a he.

³⁴ Bɔ nɛ Yawɛ fa Mose ɔ, ja pɛpɛɛpɛ Israel bi ɔmɛ pee. Ke ma a to si ɔ, a pueɔ si tabo nya tabo nya ngɛ wɛtso nya wɛtso nya, kɛ we puɔ nya we puɔ nya; nɛ ke a hia a, a nyɛɔ ja nɔuu.