Mose IV, 19 - BAIBLO ALOO NGMAMI KLƆUKLƆU Ɔ

Na yo tsu la zu ɔ

¹ Yawɛ de Mose kɛ Aaron ke,

² “Mlaa nɛ Yawɛ wo ji nɛ ɔ nɛ: nyɛ de Israel bi ɔmɛ nɛ a ngɔ na yo tsu nɛ nye, loo kpa ko be e he, nɛ a kɛ kuɛpã hu wui lɛ hyɛ kɛ ba

³ osɔfo Eleazar ngɔ. A kpaka na a kɛ ya sito he ɔ se, nɛ a ya gbe lɛ ngɛ lejɛ ɔ, ngɛ osɔfo ɔ hɛ mi.

⁴ Osɔfo Eleazar nɛ ngɔ e nine nguɛ kɛ sɔ muɔ ɔ mi, nɛ e fĩa muɔ ɔ eko kɛ ya kpe he bo tsu ɔ hɛ mi si kpaago.

⁵ A sã na yo ɔ, e he womi ɔ, e lo ɔ, e muɔ ɔ, kɛ e mi ní ɔmɛ tsuo ngɛ osɔfo Eleazar hɛ mi.

⁶ Lɔ ɔ se ɔ, osɔfo ɔ nɛ hla seda tso, kɛ nga nɛ a fi kaa bɛ, kɛ kpa tsu, nɛ e sake mɛ ngɔ pue la a nɛ a ngɛ na yo ɔ sãe ngɛ nɔ ɔ mi.

⁷ Osɔfo ɔ nɛ fɔ e tade ɔmɛ a he, nɛ e du e he loko e kpale kɛ ba sito he ɔ; se kɛ̃ ɔ, e he tsɔ we kɛ yaa si gbɔkuɛ.

⁸ Nɔ nɛ sã na yo ɔ, lɛ hu e fɔ e tade ɔmɛ a he, nɛ e du e he ja nɔuu; lɛ hu e he tsɔ we kɛ yaa si gbɔkuɛ.

⁹ Nyagbe ɔ, nɔ ko nɛ he tsɔ nɛ ya muɔ na yo ɔ la zu ɔ kɛ ya pue he ko nɛ tsɔ ngɛ sito he ɔ se. A ngɔ la zu nɛ ɔ ngɔ to lejɛ ɔ, konɛ a kɛ futu nyu mi, nɛ a ngɔ nyu nɛ ɔ kɛ du Israel ma kpekpemi ɔ a he, nɛ a kɛ je a he yayami ɔmɛ.

¹⁰ Nɔ nɛ muɔ na yo ɔ la zu ɔ, lɛ hu e fɔ e tade ɔmɛ a he; se kɛ̃ ɔ, e he tsɔ we kɛ yaa si gbɔkuɛ. Nɔ́ nɛ ɔ maa pee mlaa nɛ fɔɔ si daa kɛ ha Israel bi, kɛ nibwɔhi nɛ ba to mɛ ɔ.

Nɔ gbogboe he kɔhi

¹¹ “Nɔ tsuaa nɔ nɛ maa ta nɔ gbogboe he ɔ, e ble e he; nɛ e he tsɔ we kɛ yaa si ligbi kpaago.

¹² Loko e he ma tsɔ ɔ, e ngɔ nyu nɛ a kɛ fɔɔ nɔ he yayami ɔ kɛ julaa e he ngɛ ligbi etɛne ɔ, kɛ ligbi kpaagone ɔ a nɔ. Ke e kɛ nyu ɔ fɔ we e he ngɛ ligbi nɛ ji etɛ ɔ kɛ ligbi nɛ ji kpaago ɔ a nɔ ɔ, e he be tsɔe.

¹³ Nɔ tsuaa nɔ nɛ maa ta nɔ gbogboe he, nɛ e kɛ nyu nɛ a kɛ fɔɔ nɔ he yayami nɛ ɔ be e he julaae ɔ, e he tsɔ we; mu ngɛ e he. Ke e ba mi ja a, nɔ ɔ ble Yawɛ kpe he ɔ. A ma je lɛ we, nɛ a be lɛ bue ngɔ si Mawu ma mi bi ɔmɛ a nɔ hu.

¹⁴ “Ke nɔ ko gbo ngɛ bo tsu mi ɔ, mlaa nɛ ngɛ he ji nɛ ɔ nɛ: nihi tsuo nɛ ngɛ bo tsu ɔ mi jamɛ a be ɔ mi, aloo nihi tsuo nɛ ma ba sɛ mi ɔ, a he tsɔ we kɛ yaa si ligbi kpaago.

¹⁵ Jehanɛ, buɛ tsuaa buɛ nɛ nya fɔɔ si gu, aloo buɛ nɛ nya nɔ be nya a, jamɛ a buɛ ɔ hu he tsɔ we.

¹⁶ Nɔ tsuaa nɔ nɛ maa ta nɔ gbogboe he ngɛ nga nɔ ɔ, e he tsɔ we kɛ yaa si ligbi kpaago, nɔ nɛ a kɛ klaate gbe lɛ jio, nɔ nɛ gbo lɛ nitsɛ e gbenɔ jio. Jã kɛ̃ nɔ nɛ maa ta nɔ gbogboe wu, aloo yɔkɔ ko he ɔ, lɛ hu e he tsɔ we kɛ yaa si ligbi kpaago.

¹⁷ “Ke nɔ ko ble e he kikɛ nɛ ɔ, bɔ nɛ a plɛ kɛ tsu e he ní ji na yo ɔ nɛ a sã kɛ je yayami ɔ, a ngɔ e la zu ɔ eko kɛ wo buɛ mi, nɛ a yɛ nyu mua kɛ pue nɔ.

¹⁸ Kekleekle ɔ, nɔ ko nɛ he tsɔ nɛ ngɔ nga nɛ a fi kaa bɛ kɛ sɔ nyu ɔ mi, nɛ e kɛ fĩa bo tsu ɔ, kɛ e mi ní ɔmɛ tsuo, kɛ nimli tsuo nɛ ngɛ lejɛ ɔ a nɔ. Jehanɛ, nɔ nɛ ya ta nɔ gbogboe wu, loo yɔkɔ, loo nɔ ko nɛ a gbe lɛ, loo nɔ ko nɛ gbo lɛ nitsɛ e gbenɔ he ɔ, nɔ nɛ he tsɔ ɔ nɛ ngɔ nyu ɔ kɛ fĩa e nɔ.

¹⁹ Nɔ nɛ he tsɔ nɛ ɔ nɛ fĩa nyu ɔ kɛ pue nɔ nɛ he tsɔ we ɔ nɔ, ngɛ ligbi nɛ ji etɛne ɔ kɛ ligbi nɛ ji kpaagone ɔ a nɔ. Ke a julaa nɔmlɔ nɛ ɔ ngɛ ligbi nɛ ji kpaago ɔ nɔ se ɔ, e fɔ e tade ɔmɛ a he, nɛ e yɛ nyu nɛ e du e he; kɛkɛ ɔ, ke pu nɔ si ɔ, e he ma tsɔ ekohu.

²⁰ “Nɔmlɔ nɛ ble e he, se e julaa we e he ɔ, mu ngɛ e he, nɛ e he tsɔ we; ejakaa a kɛ nyu nɛ a kɛ fɔɔ nɔ he yayami ɔ pue we e nɔ. Ke e ba mi ja a, nɔ ɔ ble Yawɛ kpe he ɔ. A ma je lɛ we, nɛ a be lɛ bue ngɔ si Mawu ma mi bi ɔmɛ a nɔ hu.

²¹ Mlaa nɛ fɔɔ si daa kɛ ha mɛ ji nɛ ɔ nɛ. Nɔ nɛ fĩaa nyu nɛ a kɛ fɔɔ nɔ he yayami ɔ ngɔ pueɔ nihi a nɔ ɔ, lɛ hu e fɔ e tade ɔmɛ a he; nɛ nɔ tsuaa nɔ nɛ nyu nɛ ɔ eko ma pue e nɔ ɔ, lɛ hu e he tsɔ we kɛ yaa si gbɔkuɛ.

²² Nɔ́ tsuaa nɔ́ nɛ nɔ ko nɛ he tsɔ we maa ta he ɔ, e ble nɔ́ ɔ; ke nɔ ko ta jamɛ a nɔ́ ɔ he ɔ, lɛ hu e he tsɔ we kɛ yaa si gbɔkuɛ.”