Mose IV, 18 - BAIBLO ALOO NGMAMI KLƆUKLƆU Ɔ

Osɔfo ɔmɛ kɛ Levi bi ɔmɛ a ní tsumi

¹ Yawɛ de Aaron ke, “O kɛ o bimɛ ɔmɛ, kɛ o tsɛ we ɔ, nyɛ ji ni nɛmɛ nɛ he klɔuklɔu ɔ he sɔ tloo, se nɔ́ nɛ kɔɔ osɔfo yemi ní tsumi ɔ he ɔ lɛɛ o kɛ o bimɛ ɔmɛ kɛkɛ nyɛ sane ji lɔ ɔ.

² O nyɛmimɛ Levi bi ɔmɛ, nɛ ji o tsɛ weku li ɔmɛ ɔ, ha nɛ mɛ hu a ba piɛ o kɛ o bimɛ ɔmɛ a he, be mi nɛ nyɛ ngɛ sɔmɔe ngɛ bo tsu ɔ mi.

³ A ma sɔmɔ mo, nɛ a ma tsu bo tsu ɔ he ní tsumihi tsuo. Se mohu, á hyɛ nɛ a ko ta bɔ sami la tɛ ɔ, loo ní ɔmɛ nɛ ngɛ he klɔuklɔu ɔ a he, bɔ nɛ pee nɛ a kɛ nyɛ tsuo nyɛ ko gbo.

⁴ A maa piɛ nyɛ he kɛ tsu ní tsumi tsuaa ní tsumi ngɛ kpe he bo tsu ɔ mi; nɔ kpa ko nɛ ko ba nyɛ kasa nya.

⁵ He klɔuklɔu ɔ, kɛ bɔ sami la tɛ ɔ, o kɛ o bimɛ ɔmɛ pɛ nyɛ tsu ní ngɛ lejɛ ɔ, konɛ ye mi mi nɛ ko fu Israel bi ɔmɛ ekohu.

⁶ Imi nitsɛ lɛ i hla nyɛ nyɛmimɛ Levi bi ɔmɛ kɛ je Israel bi ɔmɛ a kpɛti, nɛ i ngɔ mɛ kɛ ha nyɛ kaa nike ní. A hla mɛ ngɔ to ha mi, konɛ a nyɛ nɛ a tsu ní ngɛ kpe he bo tsu ɔ mi.

⁷ Se o kɛ o bimɛ ɔmɛ pɛ ji ni nɛmɛ nɛ ngɛ he blɔ kaa nyɛ tsuɔ osɔfo ní tsumihi nɛ kɔɔ bɔ sami la tɛ ɔ, kɛ he klɔuklɔu pe kulaa a a he. Enɛ ɔmɛ ji nyɛ ní tsumi; ejakaa imi lɛ i kɛ osɔfo yemi ní tsumi ɔ ke nyɛ. Nɔ kpa ko nɛ maa hɛ lɛ kɛ su ní klɔuklɔu ɔmɛ a he ɔ, a gbe lɛ.”

Osɔfo ɔmɛ a blɔ fa mi nɔ

⁸ Yawɛ de Aaron ke, “O nɛ, imi nitsɛ i ngɔ Israel bi ɔmɛ a nike ní klɛdɛɛ ɔ nɛ a kɛ ba ha mi ɔ kɛ ngɛ o dɛ woe. I ngɔ mɛ kɛ ngɛ mo, kɛ o bimɛ tsuo hae kaa nyɛ blɔ nya nɛ fɔɔ si kɛ yaa neneene.

⁹ Ní klɔuklɔu pe kulaa nɛ a sɛ̃ ngɛ bɔ sami la tɛ ɔ nɔ ɔ, a kpɛti enɛ ɔmɛ maa pee o níhi: niye ní bɔ, yayami pami bɔ, kɛ fɔ yemi bɔ. Nike ní klɔuklɔu tsuaa nike ní klɔuklɔu nɛ a kɛ ba ha mi ɔ maa pee o kɛ o bimɛ nyɛ nɔ.

¹⁰ Nyɛɛ ye ngɛ he ko nɛ ngɛ klɔuklɔu; nyumuhi pɛ lɛ a ye. E ji niye ní klɔuklɔu ha nyɛ.

¹¹ “Jehanɛ, nike ní klɛdɛɛ kpa komɛ nɛ Israel bi ɔmɛ kɛ baa a, lɔ ɔmɛ hu maa pee o nɔ. I ngɔ mɛ kɛ ha mo, kɛ o binyumu ɔmɛ, kɛ o biyi ɔmɛ, kaa nyɛ blɔ fa mi nɔ́ kɛ yaa neneene. O we mi bimɛ tsuo nɛ a he tsɔ ɔ, a ye eko.

¹² “Jehanɛ, nu, wai he, kɛ blɛfo kpokploku, nɛ ji kekleekle yiblii nɛ a kɛ ba haa imi Yawɛ ɔ, lɔ ɔmɛ hu i ngɔ kɛ ha mo.

¹³ Jã kɛ̃, nɔ́ tsuaa nɔ́ nɛ puɛɔ ngɛ a zugba a nɔ ɔ, a kekleekle yiblii nɛ a kɛ ba haa mi ɔ maa pee o nɔ. O we mi bimɛ tsuo nɛ a he tsɔ ɔ, a ye eko.

¹⁴ “Nɔ́ tsuaa nɔ́ ngɛ Israel nɛ a hla ngɔ to ha mi ɔ maa pee o nɔ.

¹⁵ “Nɔ́ tsuaa nɔ́ nɛ bliɔ muklii nya, nɛ a kɛ ba ha Yawɛ ɔ maa pee o nɔ, nɔmlɔ jio, we mi lohwe jio. Se nɔmlɔ adesa e kekleekle bi, kɛ lohwe nɛ he tsɔ we e kekleekle bi lɛɛ o ha nɛ a kpɔ mɛ.

¹⁶ Níhi nɛ a ma kpɔ ɔ, ke a ye nyɔhiɔ kake pɛ a kpɔ mɛ. Jua nɛ a po fɔ si kɛ ha a kpɔmi ji sika hiɔ yi enuɔ, kaa bɔ nɛ he klɔuklɔu ɔ jua nɛ a po ɔ ngɛ ɔ.

¹⁷ Na, loo jijɔ, loo apletsi kekleekle bi lɛɛ a ko kpɔ; ejakaa mɛɛ a he tsɔ. Ngɔɔ a muɔ ɔ kɛ fĩa bɔ sami la tɛ ɔ nɔ, nɛ o sã a zɔ ɔ kaa bɔ nɛ jeɔ via ha Yawɛ.

¹⁸ A lo ɔ maa pee o nɔ, kaa bɔ nɛ bɔ nɛ a fɔɔ kɛ yaa kɛ baa a gugue ɔ, kɛ e hiɔ fiɔ ɔ peeɔ o nɔ ɔ.

¹⁹ “Nike ní klɔuklɔu nɛ Israel bi ɔmɛ kɛ ba haa Yawɛ ɔ, i ngɔ mɛ tsuo kɛ ha mo, kɛ o binyumu ɔmɛ, kɛ o biyi ɔmɛ kaa nyɛ blɔ fa mi nɔ nɛ fɔɔ si daa. Nɔ́ nɛ ɔ ji somi ko nɛ i kɛ mo, kɛ o nina so, nɛ a be mi poe gblegbleegble.”

²⁰ Enɛ ɔ se ɔ, Yawɛ de Aaron ke, “O be weto ní ko nae ngɛ Israel zugba a nɔ, nɛ blɔ fa mi nɔ ko hu o be nae. Imi ji o blɔ fa mi nɔ, kɛ o weto ní ngɛ Israel bi ɔmɛ a kpɛti.”

Levi bi ɔmɛ a blɔ fa mi nɔ

²¹ Yawɛ de ke, “Levi bi ɔmɛ lɛɛ i ngɔ Israel níhi tsuo a mi dlami nyɔngmanyɔngma mi kakaaka kɛ ngɛ mɛ hae kaa a weto ní, ngɛ ní nɛ a tsuɔ ngɛ kpe he bo tsu ɔ mi ɔ he.

²² Kɛ je mwɔnɛ ɔ kɛ yaa a, Israel bi kpa amɛ ko hɛ mɛ kɛ su kpe he bo tsu ɔ he hu, bɔ nɛ pee nɛ a ko ba pee yayami nɛ a ba gbo.

²³ Levi bi ɔmɛ pɛ ji ni nɛmɛ nɛ ma tsu ní ngɛ kpe he ɔ; ke sane ko ba a, mɛ lɛ a ma bi. Enɛ ɔ ji mlaa nɛ fɔɔ si daa kɛ ha nyɛ bimɛ; se weto ní ko lɛɛ a be nae ngɛ Israel,

²⁴ ejakaa Israel bi ɔmɛ a níhi a mi dlami nyɔngmanyɔngma mi kakaaka nɛ a kɛ ba haa Yawɛ ɔ, i ngɔ mɛ tsuo ngɔ ha Levi bi ɔmɛ kaa a weto ní. Enɛ ɔ he je nɛ i de mɛ ke a be weto ní kpa ko nae ngɛ Israel ɔ nɛ.”

Mi dlami nyɔngma mi kake

²⁵ Yawɛ fa Mose ke

²⁶ e de Levi bi ɔmɛ ke, “Ke nyɛ nine su Israel bi ɔmɛ a níhi a mi dlami nyɔngmanyɔngma mi kakaaka a nɛ Yawɛ kɛ ha nyɛ kaa nyɛ weto ní ɔ nɔ ɔ, nyɛ hu nyɛɛ ngɔ mi dlami nyɔngma mi kake nɛ ɔ hu mi dlami nyɔngma mi kake kɛ ba ha mi kaa nike ní klɛdɛɛ.

²⁷ Yawɛ maa ngɔ nɔ́ nɛ ɔ kaa ngma nɛ je nyɛ nitsɛmɛ nyɛ ngma mi sami he, loo wai he nɛ je nyɛ nitsɛmɛ nyɛ wai muɔ mi.

²⁸ Blɔ nɔ nɛ nyɛ maa gu nɛ nyɛ hu nyɛɛ kɛ nyɛ nike ni klɛdɛɛ ma ba ha Yawɛ ji nɛ ɔ nɛ. Níhi a mi dlami nyɔngmanyɔngma mi kakaaka nɛ nyɛ na kɛ je Israel bi ɔmɛ a dɛ mi, nɛ ji Yawɛ nike ní klɛdɛɛ ɔ, nyɛ maa ngɔ kɛ ha osɔfo Aaron.

²⁹ Nike níhi tsuo pɛpɛɛpɛ nɛ nyɛ na a, nyɛɛ ngɔ e mi nɔ́ nɛ hi pe kulaa, nɛ ji nɔ́ klɔuklɔu ɔ kɛ ba ha Yawɛ.

³⁰ Ke nyɛɛ kɛ nɔ́ nɛ hi pe kulaa a ba ha Yawɛ ɔ, nyɛɛ ngɔ nɔ́ nɛ piɛ ɔ kɛ to, kaa bɔ nɛ ke ngmɔ hulɔ ya sã bɔ nɛ e ngɔɔ nɔ́ nɛ piɛ ɔ kɛ toɔ ɔ.

³¹ Nyɛɛ kɛ nyɛ we mi bimɛ nɛ ye nɔ́ nɛ piɛ ɔ ngɛ he tsuaa he; ejakaa ní tsumi nɛ nyɛ tsuɔ ngɛ kpe he bo tsu ɔ mi ɔ, e he hiɔwo ji lɔ ɔ nɛ.

³² Ke nyɛ ngɔ nɔ́ nɛ hi pe lɛ tsuo ɔ kɛ ba ha Yawɛ ɔ, tue gblami ko be nyɛ nɔ bae. Se nyɛɛ hyɛ nɛ nyɛ ko ble Israel bi ɔmɛ a nike ní klɔuklɔu ɔmɛ, nɛ a ko gbe nyɛ.”