Mose IV, 17 - BAIBLO ALOO NGMAMI KLƆUKLƆU Ɔ

Aaron dɛma tso ɔ

¹ Yawɛ de Mose ke,

² “De Israel bi ɔmɛ nɛ a kɛ dɛma tso nyɔngma kɛ enyɔ nɛ ba; wɛtsoyi tsuaa wɛtsoyi nɛ ngɔ dɛma tso kake kɛ ba. Ngmaa nɔ tsuaa nɔ biɛ ngɛ e tso he.

³ Ngmaa Aaron biɛ ngɛ Levi tso ɔ he; ejakaa wɛtsoyi tsuaa wɛtsoyi ma na tso kake.

⁴ Muɔ tso ɔmɛ ya pue somi daka a hɛ mi ngɛ kpe he bo tsu ɔ mi he nɛ i kɛ mo kpee ngɛ ɔ.

⁵ Nɔ nɛ ma hla a, e tso ɔ ma tsɛ̃ mɔmɔ; nɛ nɔ́ nɛ ɔ ma ha nɛ munyu huitihuiti nɛ Israel bi ɔmɛ tuɔ kɛ siɔ nyɛ ngɛ ye he ɔ se maa po.”

⁶ Mose kɛ Israel ma a ya tu, nɛ wɛtsoyi ɔmɛ tsuo ngɔ dɛma tso kakaaka kɛ ba; lɛ tsuo peeɔ nyɔngma kɛ enyɔ, nɛ Aaron tso ɔ hu piɛ he.

⁷ Mose muɔ tso ɔmɛ tsuo ya pue Yawɛ somi daka a hɛ mi ngɛ kpe he bo tsu ɔ mi.

⁸ E nɔ jena a benɛ Mose ya bo tsu ɔ mi he nɛ somi womi ɔ ngɛ ɔ, e na kaa Aaron tso ɔ nɛ daa si ha Levi wɛtso ɔ tsɛ̃ tso hɛngmɛ he, e pɛ mɔmɔ, nɛ e wo ngmɛ́hi nɛ fu.

⁹ Mose muɔ tso ɔmɛ tsuo ngɛ Yawɛ hɛ mi kɛ je kpo ya tsɔɔ Israel ma a tsuo. Benɛ a na nɔ́ nɛ ba a, wɛtsoyi ɔmɛ tsuo ho ya ngɔ mɛ nitsɛmɛ a tso ɔmɛ.

¹⁰ Lɔ ɔ se ɔ, Yawɛ de Mose ke, “Kpale Aaron dɛma tso ɔ ya fɔ daka a nɛ somi womi ɔ ngɛ mi ɔ hɛ mi ekohu, nɛ e hi lejɛ ɔ kaa kɔkɔ bɔmi nɔ́ kɛ ha atuã tsɔli ɔmɛ bɔ nɛ pee nɛ a munyu huitihuiti ɔmɛ nɛ a tuɔ kɛ siɔ mi ɔ se nɛ po. Ke pi ja a, a ma gbo.”

¹¹ Mose pee kaa bɔ nɛ Yawɛ fa lɛ ke e pee ɔ.

¹² Kɛkɛ nɛ Israel bi ɔmɛ de Mose ke, “Wa yi ta! Wa gbe nya! Wɔ tsuo pɛpɛɛpɛ wa yi ta!

¹³ Ke nɔ tsuaa nɔ nɛ maa hɛ lɛ kɛ su Yawɛ kpe he ɔ he ma gbo ɔ, lɛɛ tse wɔ tsuo pɛpɛɛpɛ wa hɛ mi ma kpata mɔ!”