Mose IV, 16 - BAIBLO ALOO NGMAMI KLƆUKLƆU Ɔ

Kora kɛ Datan kɛ Abiram tsɔ atuã

^1-2 Ligbi ko ɔ, Izhar binyumu Kora, nɛ je Kohat we puɔ nya ngɛ Levi wɛtso ɔ mi ɔ, ya dɔ nihi ngɔ piɛ e he, nɛ a te si ngɔ wo Mose. Ni ɔmɛ a kpɛti nyumuhi etɛ je Ruben wɛtso ɔ mi. Mɛ ji Eliab binyumuhi Datan, kɛ Abiram, kɛ Pelet binyumu On. Israel bi kpahi lafa enyɔ kɛ nyingmi enuɔ piɛ a he. Nimli nɛ ɔmɛ ji ma nimeli nɛ a le mɛ saminya, nɛ ma a hla mɛ.

³ A kpe kɛ wo Mose kɛ Aaron a he, nɛ a de mɛ ke, “Nyɛ ngɛ nɔ́ ko pee tsɔ. Ma kpekpemi nɛ ɔ tsuo pɛpɛɛpɛ nimli klɔuklɔuhi ji mɛ; nɛ Yawɛ ngɛ a kpɛti. Mɛni he je mɔ nɛ nyɛ ngɛ nyɛ he nɔ woe ngɛ Yawɛ ma kpekpemi ɔ nɔ ɔ?”

⁴ Benɛ Mose nu nɔ́ nɛ ɔ, e kɛ e hɛ mi bu si,

⁵ nɛ e de Kora kɛ e se nyɛɛli ɔmɛ ke, “Hwɔɔ mɔtu ɔ, Yawɛ nitsɛ maa tsɔɔ wɔ nɔmlɔ nɛ ji e nɔ, kɛ nɔ nɛ ji nɔ klɔuklɔu. Nɔmlɔ nɛ ji e nɔ nɛ e maa hla a, Yawɛ ma ha nɛ e hɛ lɛ kɛ ba e ngɔ.

⁶ Bɔ nɛ nyɛɛ pee ji nɛ ɔ nɛ: mo Kora, kɛ o se nyɛɛli ɔmɛ tsuo nyɛ ya hla ngɛyuhi.

⁷ Hwɔɔ mɔtu ɔ, nyɛɛ je la kɛ wo ngɛyu ɔmɛ a mi. Nyɛɛ ngɔ tsopa kɛ e he via kɛ pue la a nɔ, nɛ nyɛɛ ngɔ kɛ ba Yawɛ hɛ mi. Nɔmlɔ nɛ Yawɛ nitsɛ maa hla a, lɛ ji nɔ klɔuklɔu ɔ nɛ. Nyɛ Levi bi, nyɛ ngɛ nyɛ he nɔ woe tsɔ!”

⁸ Mose ya nɔ nɛ e de Kora ke, “Nyɛɛ bu mi tue, nyɛ Levi bi;

⁹ anɛ e pi ha nyɛ kaa Israel Mawu ɔ hla nyɛ kɛ je Israel ma kpekpemi ɔ mi konɛ nyɛɛ ba e ngɔ, nɛ nyɛ ba tsu ní ngɛ Yawɛ kpe he ɔ, nɛ nyɛɛ da ma kpekpemi ɔ nya kaa a sɔmɔli lo?

¹⁰ Mawu ha mo, kɛ o nyɛmimɛ Levi bi ɔmɛ tsuo kikɛmɛ a blɔ nya nɛ ɔ. Nɛ jehanɛ lɛɛ nyɛ pa ngɛ osɔfo yemi ɔ hu hlae lo.

¹¹ Hyɛ, Yawɛ yi nɔ nɛ o kɛ o se nyɛɛli ɔmɛ tsuo ngɛ soe ɔ nɛ. Jehanɛ, Aaron ɔ lɛɛ mɛni e pee nyɛ loko nyɛ ngɛ nya si hɔɔe kɛ ngɛ lɛ woe ɔ?”

¹² Mose tsɔ ke a ya tsɛ Datan, kɛ Abiram, Eliab bimɛ ɔmɛ kɛ ba. Se a de ke, “Wa be bae!

¹³ O kpaka wɔ kɛ je zugba nɛ hi, nɛ baa ní nɔ, nɛ́ o ba gbe wɔ ngɛ nga nɛ ɔ nɔ. Anɛ enɛ ɔ pi ha mo, nɛ o pa ngɛ hlae nɛ o ye ganɔ ngɛ wa nɔ?

¹⁴ Jehanɛ ɔ hu, o kɛ wɔ yɛ zugba nɛ hi, nɛ baa ní ko nɔ; ngmɔhi, kɛ wai abɔɔhi hu o ha we wɔ. Anɛ e peeɔ mo kaa o ma nyɛ nimli kaa kikɛ nɛ ɔ maa sisi lo? Dɛbi, wa be bae!”

¹⁵ Mose mi mi fu wawɛɛ nitsɛ, nɛ e de Yawɛ ke, “Ko he bɔ ɔmɛ nɛ a ba sã a! I he we teji kake po ngɛ a dɛ, nɛ i yi a ti nɔ ko nɔ ko sane yayami ko hulɔ.”

¹⁶ Mose de Kora ke, “Hwɔɔ ɔ, o kɛ o se nyɛɛli ɔmɛ tsuo kulaa nyɛɛ ba Yawɛ hɛ mi; Aaron hu maa ba lejɛ ɔ.

¹⁷ O se nyɛɛli lafa enyɔ kɛ nyingmi enuɔ ɔmɛ ɔ, a ti nɔ tsuaa nɔ nɛ ngɔ lɛ nitsɛ e ngɛyu, nɛ e kɛ tsopa kɛ e he via wo mi, nɛ e kɛ ba Yawɛ hɛ mi.”

¹⁸ Lɔ ɔ he ɔ, nɔ tsuaa nɔ ho ya ngɔ ngɛyu, nɛ e je la kɛ wo mi, nɛ e ngɔ tsopa kɛ e he via kɛ pue nɔ, nɛ e ba da si ngɛ kpe he bo tsu sinya a nya ngɛ Mose kɛ Aaron a kasa nya.

¹⁹ Kora ya kpee ma kpekpemi ɔ tsuo kɛ ba kpe he bo tsu sinya a nya, nɛ a plɛ a hɛ mi ngɔ kpee Mose kɛ Aaron. Tlukaa a, Yawɛ hɛ mi nyami ɔ ba je e he kpo kɛ tsɔɔ ma kpekpemi ɔ tsuo.

²⁰ Yawɛ de Mose kɛ Aaron ke,

²¹ “Nyɛɛ hɛ nyɛ kɛ je ma nɛ ɔ he kɛ ya se, nɛ ma kpata a hɛ mi hɛngmɛfia.”

²² Se Mose kɛ Aaron ngɔ a hɛ mi ngɔ bu si, nɛ a de ke, “Mawu lee, mo nɛ o ji adesahi tsuo a mumi. Anɛ ke nɔ kake pee yayami ɔ, o mi mi ma fu ma a tsuo lo?”

²³ Yawɛ de Mose ke,

²⁴ “De ma a ke a hɛ mɛ kɛ je Kora, kɛ Datan, kɛ Abiram a bo tsu ɔmɛ a he.”

²⁵ Kɛkɛ nɛ Mose te si, nɛ e kɛ Israel ma nimeli ɔmɛ pue nɔ kɛ ho Datan, kɛ Abiram a ngɔ ya.

²⁶ E de ma a ke, “Nyɛɛ hɛ nyɛ kɛ je nimli yiwutsotsɛmɛ nɛ ɔmɛ a bo tsu ɔmɛ a he. Ke pi ja a, a ma kpata nyɛɛ kɛ mɛ tsuo nyɛ hɛ mi ngɛ a he yayami ɔmɛ a he.”

²⁷ Lɔ ɔ he ɔ, a hɛ mɛ kɛ je Kora, kɛ Datan, kɛ Abiram a bo tsu ɔmɛ a he. Datan kɛ Abiram je kpo ba da si ngɛ a bo tsu sinya amɛ a nya; a kɛ a binyumu ɔmɛ, kɛ a bimɛ tsɔwitsɔwi ɔmɛ.

²⁸ Mose de ke, “Nɔ́ nɛ nyɛɛ kɛ maa le kaa Yawɛ nitsɛ lɛ tsɔ mi ke ma ba tsu ní nɛ ɔmɛ, se pi imi nitsɛ ye yi mi tomi nya ji

²⁹ ke nimli nɛ ɔmɛ gbo mɛ nitsɛmɛ a gbenɔ, aloo a gbo ngɛ oslaa nya kaa bɔ nɛ nimli adesahi tsuo gboɔ ɔ, lɛɛ tsa pi Yawɛ nɛ tsɔ mi.

³⁰ Se ke Yawɛ pee nɔ́ ko nɛ bɛ hyɛ, nɛ zugba bli e nya mi nɛ e mii mɛ kɛ ho yɔkɔ mi ya hɛ ngmengmle, kɛ nɔ́ tsuaa nɔ́ nɛ a ngɛ ɔ, lɛɛ nyɛ maa le kaa nimli nɛ ɔmɛ kua Yawɛ niinɛ.”

³¹ Mose nya nɛ e ke e nɔɔ si kikɛ nɛ ɔ kɛkɛ nɛ zugba a mi gba enyɔ ngɛ a sisi,

³² nɛ e mii mɛ kɛ a we mi bimɛ, kɛ nihi tsuo nɛ nyɛɛ Kora se ɔ, kɛ mɛ hu a níhi tsuo.

³³ Mɛ tsuo pɛpɛɛpɛ a ho gbeje ya hɛ ngmengmle, kɛ a nɔ́ tsuaa nɔ́. Zugba a sa a yi, nɛ a hɛ mi kpata.

³⁴ Israel bi tsuo nɛ ngɛ lejɛ ɔ tu fo benɛ a nu ni ɔmɛ a ngmlaa kpami ɔ. A de ke, “Nyɛ ha waa tu fo, ke pi ja a wɔ hu zugba a maa mii wɔ!”

³⁵ Kɛkɛ nɛ la je Yawɛ ngɔ ba sã nimli lafa enyɔ kɛ nyingmi enuɔ ɔmɛ nɛ a ngɔ tsopa kɛ e he via a kɛ ba a.

Ngɛyu ɔmɛ

³⁶ Lɔ ɔ se ɔ, Yawɛ de Mose ke,

³⁷ “De osɔfo Aaron bi Eleazar nɛ e ya je ngɛyu ɔmɛ kɛ je la a mi, nɛ e gbɛ la a kɛ ya se lokoo; ejakaa ngɛyu ɔmɛ a he tsɔ.

³⁸ Benɛ a ngɔ ngɛyu ɔmɛ kɛ ya Yawɛ bɔ sami la tɛ ɔ he pɛ kɛkɛ nɛ a pee ní klɔuklɔuhi. Lɔ ɔ he ɔ, nimli nɛ ɔmɛ nɛ a gbe mɛ ngɛ a he yayami he ɔ, mo de Eleazar nɛ e ya je a ngɛyu ɔmɛ nɛ a fiaa nɔ tɛtlɛɛ, nɛ a kɛ ha bɔ sami la tɛ ɔ he. Nɔ́ nɛ ɔ maa pee kɔkɔ bɔmi nɔ́ kɛ ha Israel ma a.”

³⁹ Kɛkɛ nɛ osɔfo Eleazar ya kukuɔ akɔblee ngɛyu ɔmɛ, nɛ e ha a fia a nɔ tɛtlɛɛ, nɛ a kɛ pee bɔ sami la tɛ ɔ he hami nɔ́,

⁴⁰ kaa bɔ nɛ Yawɛ fa Eleazar kɛ gu Mose nɔ ke e pee ɔ. Nɔ́ nɛ ɔ ba pee kɔkɔ bɔmi nɔ́ ko kɛ ha Israel bi ɔmɛ, kaa nɔ ko nɛ pi osɔfo ji lɛ, nɛ e pi Aaron weku ɔ mi no hulɔ ɔ, e be he blɔ nɛ e sãã tsopa kɛ e he via ngɛ bɔ sami la tɛ ɔ nɔ kɛ haa Yawɛ. Ke nɔ ko pee ja a, a ma kpata e hɛ mi kaa bɔ nɛ a pee Kora kɛ e se nyɛɛli ɔmɛ ɔ.

Aaron he ma a yi wami

⁴¹ E nɔ jena a, Israel ma a tsuo hɔɔ nya si kɛ wo Mose kɛ Aaron, nɛ a de ke, “Nyɛ lɛ nyɛ gbe Yawɛ ni ɔmɛ ɔ nɛ.”

⁴² Se benɛ ma a tsuo nya bua ngɔ wo Mose kɛ Aaron he ɔ, a plɛ kɛ kpee kpe he bo tsu ɔ, nɛ a na kaa bɔku ɔ ba ma lejɛ ɔ, nɛ Yawɛ hɛ mi nyami ɔ je e he kpo.

⁴³ Kɛkɛ nɛ Mose kɛ Aaron ho ya da si ngɛ kpe he bo tsu ɔ hɛ mi,

⁴⁴ nɛ Yawɛ de Mose ke,

⁴⁵ “Nyɛɛ hɛ nyɛ kɛ je ma nɛ ɔ he kɛ ya se nɛ ma kpata a hɛ mi ngɛ hɛngmɛfia mi!” Se Mose kɛ Aaron kpla si nɛ a ngɔ a hɛ mi kɛ bu si,

⁴⁶ nɛ Mose de Aaron ke, “Ngɔɔ ngɛyu ɔ, nɛ o je la ngɛ bɔ sami la tɛ ɔ nɔ kɛ wo mi. Ngɔɔ tsopa kɛ e he via kɛ pue nɔ, nɛ o hɛɛ kɛ ya ma a ngɔ esɔesɔ, nɛ o ya kpata Yawɛ ha mɛ. Yawɛ mi mi fu, nɛ gbenɔ hiɔ ɔ je sisi.”

⁴⁷ Kaa bɔ nɛ Mose de lɛ ɔ, Aaron ngɔ e ngɛyu ɔ, nɛ e tu fo kɛ ya sɛ ma a kpɛti benɛ a bua a he nya. Benɛ e na kaa gbenɔ hiɔ ɔ bɔni ní puɛmi momo ngɛ ni ɔmɛ a kpɛti ɔ, e kɛ tsopa kɛ e he via a pue la a nɔ, nɛ e pee kusumi kɛ kpata Yawɛ ha ma a.

⁴⁸ E ya da si ngɛ ni nɛmɛ nɛ gbo ɔ, kɛ ni nɛmɛ nɛ a hɛ ngɛ ɔ a kpɛti, kɛkɛ nɛ gbenɔ hiɔ ɔ se po.

⁴⁹ Nimli nɛ gbenɔ hiɔ ɔ gbe ɔ, a hiɛmi ji akpe nyɔngma kɛ eywiɛ kɛ e nya lafa kpaago; slo ni nɛmɛ nɛ gbo ngɛ Kora sane ɔ nɛ ba a mi.

⁵⁰ Benɛ gbenɔ hiɔ ɔ se po ɔ, Aaron kpale e se kɛ ba Mose ngɔ ngɛ kpe he bo tsu ɔ sinya a nya.