Mose IV, 15 - BAIBLO ALOO NGMAMI KLƆUKLƆU Ɔ

Bɔ sami he mlaahi

¹ Yawɛ de Mose ke,

² “De Israel bi ɔmɛ ke, ke nyɛ ya su zugba a nɛ i ngɔ kɛ ngɛ nyɛ hae nɛ nyɛɛ hi nɔ ɔ nɔ,

³ nɛ nyɛ suɔ kaa nyɛɛ kɛ na, loo to maa sã bɔ nɛ je via ha mi ɔ, sami bɔ jio, si womi nɔ yemi bɔ jio, bɔ nɛ je nyɛ tsui mi faa jio, aloo bɔ nɛ a sãã ngɛ ligbi nguahi nɛ a to ɔ eko nɔ jio,

^4-5 nɔ tsuaa nɔ nɛ ma ba sã kikɛmɛ a bɔ ha Yawɛ ɔ, e ngɔ niye ní bɔ ngɔ piɛ he. Lɔ ɔ ji ngma mamu bukɔbukɔ kilo kake nɛ a futu lɛ kɛ nu lita kake.

⁶ Se ke agbosu lɛ nyɛɛ kɛ ba sã bɔ ɔ, lɛɛ nyɛɛ ngɔ ngma mamu bukɔbukɔ kilo enyɔ nɛ a futu lɛ kɛ nu lita kake kɛ fa kɛ pee niye ní bɔ,

⁷ nɛ nyɛɛ ngɔ wai lita kake kɛ fa ngɔ piɛ he kɛ sã bɔ ɔ, konɛ e je via kɛ ha Yawɛ.

⁸ Ke nyɛɛ kɛ na ku ma sami bɔ, loo si womi nɔ yemi bɔ, loo tue mi jɔmi bɔ sami ha Yawɛ ɔ,

⁹ niye ní bɔ nɛ á kɛ piɛ na ku ɔ he kɛ ba ji, ngma mamu bukɔbukɔ kilo etɛ nɛ a futu lɛ kɛ nu lita enyɔ,

¹⁰ kɛ wai lita enyɔ. Enɛ ɔ ji bɔ nɛ a kɛ la sãã, nɛ jeɔ via kɛ haa Yawɛ.

¹¹ “Be tsuaa be nɛ nyɛ maa ngɔ na ku, aloo agbosu, aloo jijɔ bi, aloo apletsi bi kɛ ba sã bɔ ɔ, nɔ́ nɛ nyɛ kɛ piɛ he ji nɛ ɔ nɛ.

¹² Ke lohwe ɔ hiɛ pe kake ɔ, bɔ ɔ nɛ maa piɛ he ɔ, lɔ ɔ hu e hiɛ ja nɔuu.

¹³ Israel no tsuaa Israel no nɛ pee nɔ́ nɛ ɔ, ke e kɛ e niye ní bɔ ɔ ba; e ji bɔ nɛ jeɔ via kɛ haa Yawɛ.

¹⁴ Ke nubwɔ ko ba to nyɛ be kuku, aloo ke e ngɛ nyɛ kpɛti daa, nɛ e suɔ kaa e maa ngɔ niye ní bɔ nɛ jeɔ via haa Yawɛ kɛ ba a, lɛ hu e pee kaa bɔ nɛ nyɛ peeɔ ɔ nɔuu.

¹⁵ Mlaa kake too maa pee mlaa ha ma a, kɛ nibwɔhi nɛ ngɛ nyɛ kpɛti ɔ kɛ yaa neneene. Ngɛ Yawɛ hɛ mi ɔ,

¹⁶ nyɛɛ kɛ nibwɔ ɔmɛ tsuo maa ye mlaa kake, kɛ blɔ nya tomi kake nɔ.”

¹⁷ Yawɛ de Mose ke,

¹⁸ “De Israel bi ɔmɛ ke, ke nyɛ ya su zugba a nɛ i kɛ nyɛ yaa nɔ ɔ nɔ,

¹⁹ nɛ nyɛ bɔni zugba a nɔ ní yemi ɔ, nyɛɛ ngɔ eko ba ha Yawɛ kaa nyɛ nike ní klɛdɛɛ.

²⁰ Nyɛɛ ngɔ nyɛ kekleekle ma a kɛ sã abolo, nɛ nyɛɛ ngɔ kɛ ba Yawɛ hɛ mi kaa nike ní klɛdɛɛ. Bɔ nɛ nyɛ ngɔɔ blɛfo he nɛ nyɛ kpɔ ba haa Yawɛ kaa nike ní klɛdɛɛ ɔ, ja nɔuu nyɛɛ pee enɛ ɔ hulɔ.

²¹ Ngɛ nyɛ yi nɔhi tsuo pɛpɛɛpɛ ɔ, nyɛ maa ngɔ nyɛ kekleekle ma nɛ ɔ mi eko kɛ ba ha Yawɛ kaa nyɛ nike ní klɛdɛɛ.

²² “Alini mlaa amɛ tsuo nɛ Yawɛ ngɔ kɛ ha Mose ɔ, nyɛ ma ya tɔ ekomɛ a nɔ.

²³ Alini mlaa amɛ tsuo nɛ Yawɛ wo nyɛ kɛ gu Mose nɔ ɔ, yi nɔhi nɛ maa ba ngɛ nyɛ se ɔ be mlaa amɛ a nɔ yee.

²⁴ Ke e ba mi kaa ma mluku nɛ ɔ li a he be nɛ a ya tɔ ɔ, lɛɛ ma a tsuo maa ngɔ na niheyo kake kɛ ba sã sami bɔ nɛ jee via ha Yawɛ. A ngɔ niye ní bɔ, kɛ dã nɛ a kɛ maa sã bɔ ɔ ngɔ piɛ he kaa bɔ nɛ kusumi ɔ ngɛ ɔ. Jehanɛ, a kɛ akpakpo kake hu ba sã yayami pami bɔ.

²⁵ Osɔfo ɔ maa da Israel ma kpekpemi ɔ tsuo nane mi, nɛ e maa pee kusumi kɛ kpata Yawɛ. A maa ngɔ a he yayami ɔmɛ ngɔ pa mɛ; ejakaa a li nɛ a pee. Enɛ ɔ he hu lɛ a ngɔ yayami pami bɔ ɔ, kɛ niye ní bɔ ɔ kɛ ba ha Yawɛ kaa a li nɛ a pee.

²⁶ A kɛ Israel ma mluku ɔ tsuo, kɛ nibwɔhi nɛ ba to mɛ ɔ a he yayamihi maa pa mɛ; ejakaa mɛ tsuo pɛpɛɛpɛ a tɔ.

²⁷ “Ke nɔ kake ko li be nɛ e ya tɔ ɔ, e ngɔ apletsi yo kake nɛ ye jeha kake kɛ ba sã yayami pami bɔ.

²⁸ Osɔfo ɔ maa pee kusumi kɛ kpata Yawɛ ha lɛ; nɛ a kɛ e he yayami ɔ maa pa lɛ.

²⁹ Mlaa kake ɔ nɔuu ngɛ kɛ ha nɔ tsuaa nɔ nɛ li e he be nɛ e ya pee yayami ko, Israel fɔmi bi jio, nɔ kpa ko nɛ ba to nyɛ nubwɔ jio.

³⁰ “Se ke nɔ ko je blɔ pee yayami ko ɔ, zugba a nɔ fɔmi bi ji lɛ jio, nubwɔ ji lɛ jio, nɔ ɔ bɔ Yawɛ ahlua; a je lɛ kɛ je e ma mi bi ɔmɛ a kpɛti.

³¹ Akɛnɛ e bui Yawɛ munyu ɔ tue, nɛ e ya tɔ e mlaa a nɔ he je ɔ, a je lɛ we pɛsɛpɛsɛ; e musu nɛ tloo lɛ.”

Nyumu ɔ nɛ ble Hejɔɔmi ligbi ɔ

³² Benɛ Israel bi ɔmɛ ngɛ nga a nɔ ɔ, e ba mi kaa a ya na nyumu ko nɛ ngɛ lɛ́ lɛe Hejɔɔmi ligbi ɔ.

³³ Ni nɛmɛ nɛ ya na nyumu ɔ nɛ ngɛ lɛ́ ɔ lɛe ɔ ngɔ lɛ kɛ ba Mose, kɛ Aaron, kɛ ma a tsuo a hɛ mi.

³⁴ A tsi e nya ngɛ tsu mi, ejakaa a na we nɛ a tsɔɔ nɔ́ pɔtɛɛ nɛ sa kaa a pee lɛ.

³⁵ Kɛkɛ nɛ Yawɛ de Mose ke, “A gbe nyumu ɔ; ma a tsuo nɛ ya fia lɛ tɛ ngɛ ma sito he ɔ se!”

³⁶ Lɔ ɔ he ɔ, ma a tsuo gbla lɛ kɛ ho ma sito he ɔ se ya, nɛ a ya fia lɛ tɛ ngɛ lejɛ ɔ kɛ ya si e gbo kaa bɔ nɛ Yawɛ fa Mose ɔ.

Tadehi a he dekehi

³⁷ Yawɛ de Mose ke,

³⁸ “De Israel bi ɔmɛ ke a kpɛ deke ngɔ wo a tade ɔmɛ a nya ngɛ yi nɔhi tsuo; nɛ a ngɔ kpa bluu kɛ fi deke ɔmɛ kɛ wo tade ɔmɛ a nya.

³⁹ Deke nɛ ɔmɛ maa pee kaimi nɔ́ kɛ ha nyɛ. Ke nyɛ hyɛ mɛ pɛ nyɛ ma kai Yawɛ mlaa amɛ tsuo, nɛ nyɛ maa ye a nɔ, konɛ nyɛ ko je ye se kɛ ya nyɛɛ basabasa kɛ pee nyɛ suɔmi nya ní.

⁴⁰ Deke ɔmɛ ma ha nyɛ ma kai ye mlaa amɛ tsuo, nɛ nyɛ maa ye a nɔ, konɛ nyɛɛ pee nyɛ he klɔuklɔu kɛ ha nyɛ Mawu ɔ.

⁴¹ Imi ji Yawɛ, nyɛ Mawu ɔ nɛ; i je nyɛ kɛ je Egipt zugba a nɔ, konɛ ma ba pee nyɛ Mawu. Imi ji Yawɛ, nyɛ Mawu ɔ nɛ.”